1. Uzye umwi walinzile kucita uli ndi cakuti akulonda kulanda nu mwene wa ku Pesya?

ELENGANYINI ukuti mwikalanga mu Pesya imyaka 2,500 iyapita. Mukulonda ukulanda nu mwene pali vimwi, lyene imupita intamfu itali ukuya ukwi sano ilya ku Susa. Nomba lino mutatala mwalanda nu mwene, mulinzile kupoka ulusa. Nupya ukukanacita vivyo kungalenga mukomwe!—Esita 4:11.

2. Uzye Yeova akalonda twauvwa uli lino tukulanda nawe?

² Twatemwa sana pali vino Yeova wene ataya wa mwene wa ku Pesya! Yeova wakwatisya amaka nupya wacindamisya ukuluta ya kateeka yonsi antunze, nomba tungalanda nawe pa nsita ili yonsi. Akalonda ukuti twalanda nawe ukwaula intete. Nanti icakuti Yeova wakwata amazina ya mucinzi alulumbi wakwe Kaumba Mukulu, Wa Maka Yonsi, Kateeka wa Papelapela, akalonda ukuti twamwama ukuomvya izwi ilyamanyikwa sana ilyakuti “Tata.” (Mate. 6:9) Cikatuletela sana insansa ukumanya ukuti Yeova akalonda tupalame kuli aliwe!

3. U mulandu ci uno tungamila Yeova ukuti “Tata,” nupya i vyani vino tumalanzyanya umu cipande cii?

³ Icilinga ukwama Yeova ukuti “Tata” pano aliwe watuumba. (Masa. 36:9) Pa mulandu wakuti a Tata, tulinzile ukulamuvwila. Nga tukucita vino akalonda, tulapaalwa. (Ayeb. 12:9) Pa mapaalo yayo paya nu kukwata umi wa pe ukwi yulu nanti pano nsi. Kwaya ni visuma vino tukaipakizya pali ndakai. Icipande cii cimalanda pali vino Yeova akatulanga ukuti a Tata uwaya nu kutemwa pali ndakai nu mulandu uno tungasininkizizya  ukuti atalatala atutazyele uku nkoleelo. Nomba lekini tutale tulande pa mulandu uukalenga tusininkizye ukuti Tata witu uwa kwi yulu watutemwa sana nupya akatusakamala.

4. U mulandu ci uno yamwi cikayatalila ukulola Yeova ukuti a Isi?

⁴ Uzye cikamutalila kulola Yeova ukuti a Tata winu? Yamwi yakalola ukuti Yeova wakulisya nu kuti tutacindama kuli aliwe. Yakatwisika ndi cakuti Leza wa Maka Yonsi akayasakamala wenga na wenga. Nomba, Tata witu uwaya nu kutemwa asilonda twayuvwa vivyo. Watupeela umi nupya akalonda tuye ya cuza yakwe. Pa cisila ca kulanda pa cisinka cico, mutumwa Paulo walondolwelile aina Atena ukuti Yeova “asi kutali naswe.” (Mili. 17:24-29) Leza akalonda swensi wenga na wenga twalanda nawe, wakwe vivi kwene vino umwana akalanda ku muvyazi wakwe uwaya nu kutemwa nupya aakamusakamala.

5. I vyani vino tukusambilila kuli vino nkazi umwi walanzile?

⁵ Yauze nayo cikayatalila ukulola Yeova ukuti a Isi pa mulandu wakuti ya isi akuyavyala yatayalanganga icikuuku nu kutemwa nanti panono. Uvwini vino nkazi umwi walanzile. Watiile: “Ya tata yali sana nu unkalwe. Fwandi lino natandike sile kusambilila Baibo, cantalile sana kupalama kuli Tata uwa kwi yulu. Nomba lino nizile imanya Yeova, nasenwike.” Uzye namwe avino mukayuvwa? Ndi cakuti avino caya na kuli mwemwe, mutalinzile kutoovoka, insita ilafika lino mulalola ukuti Yeova a Tata winu musuma.

6. Ukulingana ni lembelo lyakwe Mateo 11:27, iinzila ci yonga ino Yeova akatwazwilamo ukulola ukuti a Tata uwaya nu kutemwa?

⁶ Inzila yonga ino Yeova watwazwilamo kumulola ukuti a Tata uwaya nu kutemwa, u mu mazwi yano Yesu walandanga na vino wacitanga ivyalembwa muli Baibo. (Welengini Mateo 11:27.) Yesu wakolanyanga imiyele yakwe Isi, icalenzile alande nu kuti: “Wino wandola, walola na Tata kwene.” (Yoa 14:9) Yesu ilingi walondololanga Yeova ukuti a Isi. Mu mabuku 4 amalandwe sile, Yesu waomvizye izwi lyakuti “Tata” imiku 165 lino walandanga pali Yeova. U mulandu ci uno Yesu walandilanga sana pali Yeova? Umulandu onga u wakuti pakuti antu aingi yasininkizye ukuti Yeova a Tata uwaya nu kutemwa.—Yoa. 17:25, 26.

7. I vyani vino tungasambilila pali Yeova kuli vino wasakamalanga Umwanakwe?

⁷ Lekini tulande pali vino tungasambilila kuli Yeova pali vino wasakamalanga Umwanakwe, Yesu. Yeova lyonsi uvwanga amapepo yakwe Yesu. Nupya atuvwanga sile lelo wasukanga na mapepo yakwe. (Yoa. 11:41, 42) Asi mulandu ni ntazi zino Yesu wakwatanga, lyonsi uvwanga ukuti Isi wamutemilwe nupya wamwazwanga.—Luka 22:42, 43.

8. U mu nzila ci muno Yeova wapeelelanga Yesu vino walondekwanga?

⁸ Yesu walanzile pali isi ukuti ali ntulo nupya kapeela wa umi lino walanzile ukuti: “Indi nu umi pa mulandu wakwe.” (Yoa. 6:57) Yesu wataile sana Isi, nupya Yeova wamupeelanga vyonsi vino walondekwanga. Icacindime sana i cakuti Yeova wazwanga Yesu ukutwalilila ukuya uwa cisinka kuli aliwe.—Mate. 4:4.

9. I vyani vino Yeova wacitanga pa kulanga ukuti wali a Isi wa kutemwa kuli Yesu?

⁹ Pa mulandu wakuti a Isi uwaya nu kutemwa, Yeova wasininkizyanga ukuti Yesu wamanya ukuti wakweti Isi uwamwazwanga. (Mate. 26:53; Yoa. 8:16) Nanti icakuti Yeova atacingililanga Yesu ku viipe vyonsi, wamwazwanga ukuzizimizya intazi. Yesu wamanyile ukuti kucuula konsi kuno wacuulanga kwali ukwa pa kasita. (Ayeb. 12:2) Yeova walangilile  ukuti watemilwe Yesu lino uvwanga nga akulanda, kumupeela vino akulondekwa, kumusambilizya nu kumutungilila. (Yoa. 5:20; 8:28) Lekini tusambilile pa nzila zino Tata witu uwa kwi yulu akatusakamalilamo wakwe vino wacitanga kuli Yesu.

10. Kulingana ni lembelo lya Masamu 66:19, 20, uzye Yeova akalanga uli ukuti watutemwa?

¹⁰ Yeova akauvwa mapepo itu. (Welengini Masamu 66:19, 20.) Asilonda ukuti twacefyako mapepo yano tukapepa kuli aliwe, lelo akalonda twapepa insita izingi. (1 Tesa. 5:17) Tungapepa kuli Leza pa nsita ili yonsi asi mulandu na kuno tuli. Atapamviwa icakuti angafilwa ukuvwa ku mapepo itu, lelo wene akauvwa mapepo itu insita zyonsi. Nga twamanya ukuti Yeova akauvwa mapepo itu, tukamutemelwako. Kalemba wa masamu walanzile ati: “Natemwa [Yeova] pano akanguvwa.”—Masa. 116:1.

11. Uzye Yeova akaasuka uli mapepo itu?

¹¹ Tata witu uwa kwi yulu asiuvwa sile mapepo itu lelo akaasuka nu kwasuka. Umutumwa Yoane watunena ukuti: “Twasininkizya ukuti ndi twamulenga wene akatuvwa nu kutwasuka pali consi cino twalenga kulingana nu kulonda kwakwe.” (1 Yoa. 5:14, 15) Kuya kwene, Yeova atanga asuke mapepo itu kulingana na vino tukwenekela. Wamanya ivingatuzipila, fwandi insita zimwi atanga atupeele vino tukulonda nanti limwi angaleka tuloleele.—2 Kol. 12:7-9.

12-13. U mu nzila ci muno Yeova akatupeelela vino tukulondekwa?

¹² Yeova akatupeela vino tukulondekwa. Akacita vino akalonda avyazi yonsi aonsi yacita. (1 Tim. 5:8) Akapeela ana yakwe vyonsi vino yakulondekwa. Asilonda twasakamikwa pa vyakulya, vyakuzwala nanti umwa kwikala. (Mate. 6:32, 33; 7:11) Pa mulandu wakuti a Tata uwaya nu kutemwa, Yeova wasininkizya ukuti tulakwata vyonsi vino tukalondekwa.

¹³ Ni cicindame sana i cakuti Yeova akatupeela vyonsi vino tukulondekwa pakuti tuye ya cuza asuma na aliwe. Muli Baibo, watunena vino waya, vino akalonda vyonsi vino waumba ukuya, mulandu uno watuumbiile na vino alatucitila ku nkoleelo. Watwisileko amano lino sile twatandike kusambilila icumi ukuomvya avyazi itu nanti yauze kutusambilizya pali aliwe. Nupya watwalilile ukutwazwa kuti tuye ya cuza yakwe kuomvya ya eluda mu cilongano alino na ina na ya nkazi akula muli vyakwe Leza. Nupya akatusambilizya ukupitila mu kulongana kwa cila mulungu kuno tukasambilila pamwi na ina itu na ya nkazi. Muli vii na vyuze, Yeova akalangilila ukuti watwikako mano swensi.—Masa. 32:8.

14. U mulandu ci uno Yeova akatusambilizizya, nupya akacita uli vivyo?

¹⁴ Yeova akatusambilizya. Swemo twapusana na Yesu pano tutamalilika. Fwandi pakuti Tata witu uwaya nu kutemwa atusambilizye, akatusalapula ndi calondekwa. Baibo ikatunena ukuti: “Mwene [Yeova] akakalipila umuntu wensi wino watemwa.” (Ayeb. 12:6, 7) Yeova akatusalapwila umu nzila izipusanepusane. Tungawelenga vimwi muli Baibo nanti ukuvwa vimwi lino tukulongana nu kwiluka ukuti tulinzile ukusenula imyelenganyizizye itu ni micitile itu iya vintu. Nanti limwi ya eluda yangatwazwa ukusenuka mumwi muno tukulondekwa. Asi mulandu ni nzila ino Yeova akatusalapwilamo, akacita vivyo pa mulandu wakuti watutemwa.—Yele. 30:11.

15. Uzye Yeova akacita uli pa kutucingilila?

¹⁵ Yeova akatwazwa ukuzizimizya lino twaya ni ntazi. Wakwe vivi kwene vino isi uwaya nu  kutemwa akaazwa ana lino yaya ni ntazi, Tata witu uwa kwi yulu akatwazwa ukuzizimizya intazi. Akaomvya umupasi wa muzilo kutucingilila pakuti ucuza witu na aliwe utononeka. (Luka 11:13) Nupya Yeova akatwazwa ndi cakuti twatoovoka. Limwi angatupeela upalilo usuma. Upalilo uwo uwa ku nkoleelo ungatwazwa ukuzizimizya intazi. Elenganyini pali cii: Asi mulandu nu kuvula kwa vintu iviipe ivingatucitikila, Tata witu uwaya nu kutemwa alafumyapo ivintu vyonsi ivikalenga twacula. Intazi zitu i zya pa kasita sile, nomba vino Yeova akatupeela vilikalilila amanda pe.—2 Kol. 4:16-18.

16. I vyani vyacitiike lino Adamu wapondokiile Isi uwaya nu kutemwa?

¹⁶ Tukalola vino Yeova watutemwa nga twelenganya pali vino wacisile lino Adamu wamupondokiile. Lino Adamu wapondokiile Isi uwa kwi yulu, wafumile mu lupwa lwakwe Yeova kumwi na ana yakwe yonsi. (Loma 5:12; 7:14) Nomba Yeova wacisilepo vimwi pakuti aazwe ana yakwe Adamu.

17. I vyani vino Yeova wacisile lino Adamu wapondwike sile?

¹⁷ Yeova wafulwile Adamu, lelo wacisilepo cimwi pakuti aazwe ana yakwe Adamu. Lilyo kwene walavile ukuti antu ali nu kuya ni cuvwila yalaya mu lupwa lwakwe nupya. (Utan. 3:15; Loma 8:20, 21) Yeova walenzile ukuti cii cicitike ukupitila mu mpolelwa ya Mwanakwe, Yesu. Yeova walangilile ukuti watutemwa sana pa kupeela umwanakwe pa mulandu witu.—Yoa. 3:16.

18. I cani calenga tusininkizye ukuti Yeova akalonda ukuti tuye ana yakwe nanti icakuti twapumbuka?

¹⁸ Nanti icakuti tutamalilika, Yeova akalonda tuye mu lupwa lwakwe nupya asilola ukuti i cisendo ndi cakuti akutwazwa. Insita zimwi tungamusosya nanti ukupumbuka  pa nsita inono, nomba lyonsi akatwalilila ukutaila ukuti tulaswilila kuli aliwe. Yesu walangilile vino Yeova watemwa ana yakwe lino wasimike ilyasi lya mwana umuponge. (Luka 15:11-32) Isi umu cilangililo cici atatiile ukupalila ukuti umwana wakwe alawela. Lino umwana wawezile apa ng’anda, isi wamupokeliile ningo sana. Ndi cakuti twapumbuka ukufuma kuli Yeova nupya twalapila, tungasininkizya ukuti Tata witu uwaya nu kutemwa waipekanya nupya akalondesya ukutupokeelela.

19. Uzye Yeova alacita uli pa kuzifya ivintu vyonsi vino Adamu ononyile?

¹⁹ Tata witu alazifya ivintu vyonsi vino Adamu ononyile. Pa cisila lino Adamu wapondoka, Yeova wapingwilepo ukukala antu 144,000 ukufuma umu antu, aalaya ya kateeka nupya ya simapepo ukwi yulu pamwi nu Mwanakwe. Yesu na ya kateeka yauze yalazwilizya antu ukuya amalilike umu nsi ipya. Pa cisila ca kwezya ucisinka wao ukwakusyalikizya, Leza alayapeela umi uwa manda pe. Lyene Tata witu uwa kwi yulu alatemwa sana ukulola insi yonsi yazulamo ana yakwe aonsi na anaci amalilike. Ala icintu cico cilazipa wakwe cimwi!

20. I vyani vino Yeova akacita pa kulanga ukuti watutemwa sana, nupya i vyani vino icipande icilondelilepo cilalanda?

²⁰ Yeova watulanga ukuti watutemwa sana. A Isi umusuma sana. Akauvwa mapepo itu nu kutupeela vyonsi vino tukulondekwa mu umi ni vya kutwazwa muli ukapepa. Akatusambilizya nu kututungilila. Nupya alatucitila ivintu ivisuma sana uku nkoleelo. Tukaya sana ni nsansa ukumanya ukuti Tata witu watutemwa sana nupya akatusakamala! Cipande icilondelilepo cilalanda pali vino tungacita pakuti tulange ukuti tukataizya pali vino watutemwa.