1. Persiab ǃnâ gao-aoba sī mûsa taena ge ǃkhōǂgā hâ i?

ǂÂI RE 2 500 kuriga ǃkharu hâse du Persiab ǃnâ ǁan hâ ǃkhaisa. ǃHūb di gao-aob ǀkha du ge xū-e ra ǃhoa ǂgao tsî du ge Shushansa ǃoa ra ǃnari. Gao-aoba du ge ǂanǂan tsî ǁîb mā-ams ose sī a mû ǁoa. Nēsa du ga dī o, o du ge sadu ûiba a ǂoaǃnâ ǁkhā.—Est. 4:11.

2. Mati da Jehovaba ǀgūs xa nî tsâ?

² Jehovab ge Persiab gao-aob khami ī tama hâ khoesi gao-aogu xab a ǀgapi xawe. ǁÎba da ge hoaǁae a ǀgū ǁkhā. ǁÎb ge ǁîb ǀkha da supuse nî ǃhoa ǃkhaisa ǂhâba hâ. Aiǁgauseb ge ǀgapi ǂgai ǀonde ūhâ Hoaxūn kuru-aob, Hoaǀgaixab tsî Hoaxūn ǂgaeǂgui-aob di hâde xaweb ge ti “Îtse” di da nî ǂgai bi ǃkhaisa ra ǂhâba. (Mat. 6:9) Nēs ge kaise ra tsâǀkhā da Jehovab nēti ī ǀgaub ǃnâ da nî ǂgaiǀî bi ǃkhaisa ǂhâba hâsa.

3. Tae-i ǃaroma da Jehovaba sida “Îtse” ti a ǂgai ǁkhā tsî tae-e da nē ǁkhāǁkhāǃâs ǃnâ nî ǃhoaǃgao?

³ Jehovaba da ge ti “Îtse” di a ǂgai ǁkhā—ǁîb ge sada ûiba a mā xui-ao. (Psa. 36:9) ǁÎb a sada ǁGû amaga da ge ǁîba nî ǁnâuǀnam. ǁÎb ta mî xūna da ga dī o, o da ge ǂgui ǀkhaega nî hōǃâ. (Heb. 12:9) Nē ǀkhaegu ge ǀamo ûiba ǃkhōǂgā hâ nēs ge ǀhommi ǃnâs gas tamas ka io ǃhūbaib aisa. Nēsis tsîna da ge ǀkhaega ra hōǃâ. Nē ǁkhāǁkhāǃâs ge matib Jehovaba nēsi ǀnamxa ǁgû i ase ī ǃkhais tsî hānîǁaeb ǃnâb xūǃnâ da tide ǀgaub tsîna nî ǃhoaǃgao. Xawe da ge aibe Jehovab a ǀnam da tsî ra kōǃgâ da ǀgaus xa nî ǃhoaǃgao.

4. Tae-i ǃaroman ǀnîna a ǃgombahe Jehovaba ǁîn ǁGûb ase mûsa?

⁴ Elob xa sadu ǁGûb ase ǂâisa kaise a ǃgomba du? ǀNî da âda ge Jehovab ǃoa-ai kaise ǂkharirose ra tsâ. ǁÎn ge Hoaǀgaixa Elob ǁîna ra kōǃgâ ǃkhaisa ǂgom tama hâ. Xaweb ge sada ǀnamxaǃnâ ǁGûba nēti da nî tsâ ǃkhaisa ǂgao tama hâ. ǁÎb ge ûiba ra mā da tsî ǁîb ǀkha da ǀhōsagusisa nî ūhâsa ra ǂhâba. Nēs xa ǃhoa toa tsîb ge Pauluba ǁîb ǃgâ-aona ǃoa ge mî, “mâ-i hoa-i âda xub kom ǃnūse hâ tamao.” (ǃNǃkh. 17:24-29) Elob ge ǂhâba hâ sada ǁîba ǃoa ǀgôa-i ǁî-i ǁgû-e ǃoa ǀnammi xa ǁgari-e hâse ra ī ǀgaub ǁkhāb ǃnâ nî īsa.

5. Tae-e da ǀgui Xristeǁî ǃgâsas aiǁgausa xu ra ǁkhāǁkhāsen?

⁵ ǀNîn ge Jehovaba ǁîn ǁGûb ase mûs xa a ǃgombahe ǁîn ǁgûgu ge ǁîna ǀnamma ǁgau tama hâ i amaga. ǀGui Xristeǁî ǃgâsas aiǁgaus xa ǂâi re. “Ti ǁgûb ge kaise ǃgâi tama ǀgaub ǃnâ gere hâ-ū te” tis ge ra mî. “Elobmîsa ta ge ǁkhāǁkhāsen tsoatsoa o, o i ge kaise ge ǃgomba te i ti ǀhomsi ǁGûb ǀgūse tsâsa. Xawe ta ge Jehovab xa ǃnāsase a ǁkhāǁkhāsen tsoatsoa o, os ge nēsa ge dawa.” Sadu tsîna nēti ra tsâ? Nēs ga ama o, o tā ǂkhabu ǂâi re, ǁaeb da ī khami du ge Jehovaba sadu ǁGûb ase nî mû.

6. Mateub 11:27 ǃoagub mâba a ǀgui ǀgau hînab ge Jehovaba a hui daba mûǂansa ǁîb a ǀnamxaǃnâ ǁGûsa?

⁶ ǀGui ǀgaub Jehovab sada ǁîba ǀnamxa ǁGûb ase mûs ǀkha ra huib ge Jesub mîdi tsî dīb gere xūn tsîna Elobmîs ǃnâ xoamâi kais ǃnâ-ūsa. (Khomai re Mateub 11:27.) Jesub ge ǁîb ǁGûb ǀgauga kaise ǃgâise gere ǁgae tsî ge mî ǁkhā i: “Tita ra mû-i kom ǁGûba ra mû-eo.” (Jhn. 14:9) Jesub ge hoaǁae Jehovab ge ǀnamxaǃnâ ǁGûb ase gere dī xūn xa gere ǃhoa. Haka ǃGâiǂhôas ǂkhanidi ǃnâb ge ti “Îtse” di hâ mîsa 165 ǃnāde Jehovaba ǃoa ra ǁnaeǁgause ge sîsen-ū. Tae-i ǃaromab Jesuba Jehovab xa nētikōse gere ǃhoa? ǀGui ǃaromas ge în khoena mûǂan Jehovab a ǀnamxaǃnâ ǁGûsa.—Jhn. 17:25, 26.

7. Tae-e da Jehovab xa ra ǁkhāǁkhāsen ǁîb ǀgôab ǀkhab gere hâ ǀgauba xu?

⁷ Jehovab ge ǁîb ǀGôab Jesub ǀkha gere hâ ǀgauba xu da tae-e a ǁkhāǁkhāsen ǁkhā? Jehovab ge hoaǁae Jesub ǀgorede gere ǁnâu-am. ǁÎb ge Jesub ǀgorede ǁnâu-ams ǀguisa ge dī tama hâ i xawe gere ǃeream di. (Jhn. 11:41, 42) ǃGomsinab gere hōǃâ ǁaeb aib ge ǁîb ǁGûb ǂkhâǃnâsa gere hōǃâ.—Luk. 22:42, 43.

8. Jehovaba mâ ǀgaugu ǃnâ Jesuba ǂhâb hâ xūna gere mā?

⁸ Jesub ge ra mûǂan ǁîb ǁGûb ǁîb ûib di mā tsî kōǃgâ-ao ǃkhaisa mîb ge o: ‘ǁGûba xu ta ûisa ti.’ (Jhn. 6:57) Jesub ge ǁîb ǁGûb ǃnâ ǂgomǃgâsiba ge ūhâ i tsî Jehovab ge ǁîb sorosi ǂhâsiga gere kōǃgâ. ǂHâǂhâsase Jehovab ge Jesuba gagasise gere kōǃgâ.—Mat. 4:4.

9. Jehovaba mati ge ǁgau ǁîb a ǀnamxaǃnâ ǁGûsa hîna Jesuba gere kōǃgâba?

⁹ ǀNamxaǃnâ ǁGûb aseb ge Jehovaba Jesuba gere mû kai ǁîb ǂkhâǃnâsab ūhâsa. (Mat. 26:53; Jhn. 8:16) Jehovab ge Jesuba tsûtsû bi ǁkhā a xūn hoana xu ǁkhauba tama hâ i xaweb ge ǃgomsigu ǃnâ mâǀgais ǀkha gere hui bi. Jesub ge ge ǂan i tsûgu hînab gere hōǃâgu hâhâ tide ǃkhaisa. (Heb. 12:2) Jehovab ge Jesuba ǃoa ǃgâs, tsâbabis, ǁkhāǁkhābis tsî ǂkhâǃnâbis ǃnâ-ū ge ǁgau ǁîbab ra kōǃgâ ǃkhaisa. (Jhn. 5:20; 8:28) Hā re i da kō matib  sada ǀnamxaǃnâ ǁGûba sada tsîna ǁkhā ǀgaugu ǃnâ ra kōǃgâsa.

10. Psalmdi 66:19, 20 ǃoagub Jehovaba mati sadab a ǀnam ǃkhaisa ra ǁgau?

¹⁰ Jehovab ge sada ǀgorede ra ǃgâ. (Khomai re Psalmdi 66:19, 20.) ǁÎb ge ǀgore ǀû da nîsa ǂgao tama hâ xawe ra ǂgan da î da ǃnāsase ǀgore. (1Tes. 5:17) ǃGamǃgamsenxa ǀgaub ǃnâ da ge Eloba ǃoa a ǀgū ǁkhā mâpa ǀgui da ga hâ xawe. ǁÎb ge sada ǀgorede ǃoa ǃgâs ǃaroma ǀhape tama hâ xawe hoaǁae nî ǃgâ. Jehovab sada ǀgorede ra ǃgâ ǃkhaisa da ga mûǂan o, o da ge ǁîba ǀnamma ra omkhâiba. ‘Tita ge Jehovaba a ǀnam,’ tib ge psalmdi xoa-aoba ge mî, ǁîb ti ‘ǀkhomabasende ra ǁnâu amaga.’—Psa. 116:1.

11. Jehovaba sada ǀgorede mati ra ǃeream?

¹¹ Sada ǁGûb ge sada ǀgoredi ǀguide ǁnâu tama hâ xawe ra ǃeream. Apostel Johaneb ge ge mî: “Xū-e da ga Elob di ǂâis ǃoa ǂgano, ob ge ra ǁnâu-am da” di. (1Jhn. 5:14, 15) Jehovab ge ǁaen ai sada ǀgorede sada ǂhāba hâ ǀgaub ai ǃeream tide. ǁÎb ge tae-i sada a ǃgâiba ǃkhaisa a ǂan tsî ǁaen ai sada ǀgorede ǃeream tide xawe ǁaeba nî ǃkharu kai.—2Kor. 12:7-9.

12-13. Jehovaba mâ ǀgaugu ǃnâ ra kōǃgâ da?

¹² Jehovab ge ra kōǃgâ da. ǁÎb ge hoa ǁGûgu ūhâ ǃereamsa ra tani. (1Tim. 5:8) ǁÎb ge ǁîb ǀgôan di sorosi ǂhâsiga ra kōǃgâ. ǁÎb ge sada ǂûn, saran tsî hâǃkhai-i xa nî ǂâiǂhansen ǃkhaisa ǂgao tama hâ. (Mat. 6:32, 33; 7:11) ǀNamxaǃnâ ǁGûb aseb ge Jehovaba sada di hānîǁaeb ǂhâsigu tsîna nî dīǀoaǀoa.

¹³ Xawe ǂhâǂhâsaseb ge Jehovaba sida gagasi ǂhâsiga ra kōǃgâ. ǁÎb mîs ǃnâ-ūb ge ǁîb xa hâ amab, hoa xūn mati ge kuru-e ǀgaus, tae-i ǃaromab ge kuru das tsî tae-i hānîǁaeb ǃnâ nî īs tsîna ra mîba da. ǁÎb ge sida ǁgûn tamas ka io ǀnî hâ ǁkhāǁkhā-ao-e ge sîsen-ū ǁîb xa ǁkhāǁkhā das ǃgao. Tsî da ge noxoba ǀhaohâb ǃûi-aogu tsî ǀnî hâ ǃgâsan ǀhaohâb din xa ǀnamxaǃnâ ǀgaub ǃna ra omkhâihe. Tsîb ge sida ǀhaodi ǃnâ-ūs tsîna ra daoǁgau da, nēpa da ge sida gagasi ǃgâsan ǀkha ǀguiba ra ǁkhāǁkhāsen. Nē ǀgaugu tsî ǀnî hâgu tsîn ǃnâb ge Jehovaba ra ǁgau sida ǃnâb ǃgâiǃgâibasensa ūhâ ǃkhaisa.—Psa. 32:8.

14. Jehovaba tae-i ǃaroma ra ǁkhāǁkhā da tsî nēsab mati ra dī?

¹⁴ Jehovab ge ra ǁkhāǁkhā da. Jesub khami da ge sida ǀoasa kurusa ūhâ tama hâ. Sida ǀnamxaǃnâ ǀhomsi ǁGûb ge ǁkhāǁkhā das ǃgao ǂhâbasa i ga ra o, o ra ǁnama da. ǁÎb mîs ge ra ǂâiǂâiǃnâ da: ‘ǃKhūb ǀnammi hâ-i, ǁî-e ra ǁkhara’ ǃkhaisa. (Heb. 12:6, 7) Jehovab ge ǂgui ǀgaugu ǃnâ ra ǁnama da. Aiǁgause da ge ǀnîsi xū-e ǁîb Mîs ǃnâ khomai tamas ka io ǀhaos tawa ǁnâu tsî a ǁgari-e ǁkhā ǀkharaǀkharana dīsa. Tamas ka io da ge ǂhâ da hâ huiba ǀhaohâb ǃûi-aoga xu a hō ǁkhā. Jehovab ga mâ ǀgaub ǃnâ ǀgui ga ra ǁnama da xawe i ge ǁîb ǁnamasa hoaǁae ǀnammi ai a ǃgaoǃgaosa.—Jer. 30:11.

15. Jehovaba mâ ǀgaugu ǃnâ ra ǁkhauba da?

¹⁵ Jehovab ge ǃgomsin ǃnâ mâǀgais ǀkha ra hui da. ǀNamxaǃnâ ǁgûb ǁîb ǀgôana ǃgomsin ǃnâ ra ǂkhâǃnâ khamib ge sida ǀhomsi ǁGûba ǃgom ǁaegu ǃnâ ra hui da. ǁÎb ǃanu gagab ǃnâ-ūb ge sida ǀhōsagusis ǁîb ǀkha da ūhâsa ra ǁkhauba. (Luk. 11:13) Jehovab ge ǂâiǂhansen da  ga ǁaeb ǃnâs tsîna ra hui da. Aiǁgauseb ge ǂoaǂamsa ǃâubasensa ge mā da. ǁNā hānîǁaeb ǃâubasens ge ra hui da ǃgomsin ǃnâ mâǀgaisa. Sao ra i xa ǂâi re: Mâ ǁgai xū-i hoa-i hîna sada ǀkha ra ī-eb ge sada ǀnamxaǃnâ ǁGûba nî ūbē. Sada ǃgomsin ge hâhâ tide xawe Jehovab ra mā da ǀkhaegu ge nî hâhâ.—2Kor. 4:16-18.

16. Tae-e ge ī Adammi ge ǁîb ǀnamxaǃnâ ǁGûba ǁnâuǀnam tama io?

¹⁶ Jehovab sida ūba hâ ǀnamma da ge Adammi ge ǁîba ǁnâuǀnam tama hâ io, ob ge dī xū-e xu ra mû. Adammi ge ǁîb ǀhomsi ǁGûba ǁnâuǀnam tama hâ io, ob ge ge Jehovab omaris ǃâ tama hâ i tsî ǁîb surib tsîn ge nēsa ge ǂoaǃnâ. (Rom. 5:12; 7:14) Xawe Jehovab ge xū-e ge dī Adammi suriba huis ǃgao.

17. Adammi di ǁnâuǀnamoǃnâsib khaoǃgâb ge Jehovaba tae-e dī?

¹⁷ Jehovab ge Adamma ge ǁkhara xawe ǁîb suriba huisa ge mîmâi. ǁÎb ge ǁnā ǁaeb ai ge mîmâi ǁnâuǀnamxa khoen ge nî ǁîb omaris ǁanin di ǃâ kai di. (Gen. 3:15; Rom. 8:20, 21) Jehovab ge nēsa ǁîb ǀnamǀnamsa ǀGôab Jesub di xoremarib ǃnâ-ū ge īǁkhā kai. ǁÎb ǀGôaba xoremarib ase mās ǃnâ-ūb ge Jehovaba matikōseb a ǀnam da ǃkhaisa ge ǁgau.—Jhn. 3:16.

18. Tae-i ǃaroma da ǂgomǃgâsiba nî ūhâ Jehovab ǁîb ǀgôan ase ra ǂhâba da ǃkhaisa, ǁîba xu da ga hâbē xawe?

¹⁸ ǀOasa kurusa da ūhâ tama hâ xaweb ge Jehovaba ra ǂhâba i da ǁîb omaris ǃâ-i tsî sida huis ǂgui sîsen-e ǂhâ hâ khami tsâ tama hâ. ǀNîsi da ge ǁîba ra ǂkhîoǃnâ kai xū-e dī tsî ǁîba xu a hâbē ǁkhā xaweb ge Jehovaba sida ai ǀûsen tama hâ. Jesub ge Jehovab ǁîb ǀgôana ūba hâ ǀnamma kā hâ  ǀgôab ǂkhōs ǃnâ-ū ge ǁgau. (Luk. 15:11-32) ǁNā ǂkhōs ǃnâ hâ ǁgûb ge ǁîb ǀgôab nî oaǀkhī ǃkhaisa gere ǀgoreba. ǀGôab ge oasī o, ob ge ǁîb ǀgôaba ǃgâiaǂgaob ǀkha ge ǁkhoreǁhare. Jehovaba xu da ga hâbē xawe ǃhausen o, o da ge ǂgomǃgâsiba nî ūhâ Jehovab māsenxase nî ǁkhoreǁhare da ǃkhaisa.

19. Jehovaba mati Adammi xa ǃaroma-e hâ tsûga nî ūbē?

¹⁹ Sida ǁGûb ge Adammi ge ǃaroma tsûgu hoaga nî ūbē. Adammi ǁnâuǀnamoǃnâsib khaoǃgâb ge Jehovaba ge mîǁgui 144 000 ǂkhauhesana ǁhûisa hîna ǁîb ǀGôab Jesub ǀkha ǀhommi ǃnâ sī nî ǂgaeǂguina. ǀAsa ǃhūbaib ǃnâ i ge Jesub tsî ǁîb ǀkha ra ǂgaeǂguin tsîna ǁnâuǀnamxa khoesiba ǀoasa kurusa hōs ǀkha nî hui. ǀUniga ǃnāsab ǁîn ǁnâuǀnamxasiba ǃâitsâ-e hâs khaoǃgâb ge Eloba ǀamo ûiba nî mā nî. Sida ǁGûb ge kaise nî ǃgâiaǂgao mûb ga ra o ǃhūbaib ǀoasa kurusa ūhâ khoen xa ǀoa hâ di. Nē ǁaeb ge kaise nî ǂoaǂamsa i.

20. Jehovaba mâ ǀgaugu ǃnâ kaiseb a ǀnamda ǃkhaisa ge ǁgau tsî sao ra ǁkhāǁkhāǃâsa tae-e nî ǃhoaǃgao?

²⁰ Jehovab ge kaiseb a ǀnam da ǃkhaisa ge ǁgau. ǁÎb ge a ǂoaǂamsa ǁGû. ǁÎb ge sida ǀgorede ra ǃgâ tsî ǂhâ da hâ xūna ra mā da, sorosises tsî gagasises tsîna. ǁÎb ge ǁkhāǁkhā da tsî ra ǂkhâǃnâ da. Tsîb ge hānîǁaeb ǃnâs tsîna ǂoaǂamsa xūna nî dība da. Kaise da ge ra ǃgâiaǂgao ǂansa sida ǁGûb ge a ǀnamda tsî ra tsâba da di. Sao ra ǁkhāǁkhāǃâs ǃnâ da ge nî mû mati da ǁîb ǀGôan ase ǁîb ǀnamma da ra ǃgôaǃgâ ǃkhaisa nî ǁgausa.