1. ¿Toni monekia kichiuas akin kinekia tajtos iuan akin tekiuajtia Persia?

XIKONNEMILI ke tionnemi ne uejkauj ompa Persia. Tikonneki tiontajtos iuan tekiuaj akin ompa taixyekana, yejua ika tikonitati kampa nemi ompa Susa. Sayoj ke, amo uelis iuan tiontajtos komo amo achto tiontajtani ox uelis tikonitas. Komo sayoj ijkon tionajsi, uelis mitsonmiktiskej (Ester 4:11).

2. ¿Keniuj kineki Jiova maj iuan titajtokan?

² Semi tiktasojkamatij maj Jiova amo kichiua kemej akin tekiuajtiaj Persia. Maski Jiova okachi ueyichiujkej ke okseki tekiuanij, uelis iuan titajtoskej keman tiknekiskej uan kineki maj iuan titajtokan. Kemej neskayot, maski Jiova kiixmatij kemej Ueyi Tachijchiujkej, Akin kipia nochi chikaualis uan Taixyekankej, kineki maj iuan titajtokan ijkon kemej titajtoskiaj iuan topopaj uan maj tikiluikan ‘toTajtsin’ (Mat. 6:9). Semi techyolpaktia tikmatiskej ke Jiova kineki maj ijkon tikiluikan keman iuan titajtouaj.

3. ¿Keyej uelis tikiluiskej Jiova ‘toTajtsin’, uan toni tikitatij itech nejin tamachtilis?

³ Jiova “techmakatok tonemilis”, yejua ika uelis tikiluiskej ‘toTajtsin’ (Hech. 17:24, 25). Kemej yejuatsin toTajtsin, moneki tiktakamatiskej. Komo tikchiuaj tein technauatia, yejuatsin techmakas miak tatiochiualismej (Heb. 12:9). Se tatiochiualis yejua tinemiskej nochipaya, ompa iluikak oso nikan taltikpak. Sayoj ke axkan no tikpiaj tatiochiualismej. Itech nejin tamachtilis tikitatij keniuj Jiova technextilia ke toTajtsin akin techtasojta uan keyej tikyekmatij ke amo keman techkauas. Sayoj ke, yekinika maj tikitakan keyej uelis titakuaujtamatiskej ke toTajtsin  semi techtasojta uan kineki techpaleuis.

4. ¿Keyej sekin kinouijmaka kiitaskej Jiova kemej ininTajtsin?

⁴ ¿Techouijmaka tikitaskej Jiova kemej toTajtsin oso toPopaj? Xa sekin kinemiliaj ke amo kinnamiki motokiskej iuan Dios. Amo kineltokaj ke toka motekipachoua porin kipia nochi chikaualis. Sayoj ke toTajtsin akin semi techtasojta amo kineki maj ijkon timomachilikan. Techmakak tonemilis uan kineki maj kuali iuan timouikakan. Satepan ke tatitanil Pablo kijtoj nejin ompa Atenas, kiniluij akin kikaktoyaj ke Jiova “amo uejka yetika de cada senme de tejuan” (Hech. 17:24-29). Dios kineki maj tinochin iuan timotokikan ijkon kemej kichiua se konetsin iuan ipopaj.

5. ¿Toni techmachtia tein kipanok se tokniuj siuat?

⁵ Oksekin no kinouijmaka kiitaskej Jiova kemej se tePopaj porin ininkalijtik ininpopaj amo kinnextilij ke kintasojtaya. Se tokniuj siuat kijtoj: “Nopopaj nechyolkokouaya ika itajtoluan. Keman peuak nimomachtia Biblia, nechouijmakaya nimotokis iuan toTajtsin akin moajsi iluikak. Sayoj ke satepan ke nikixmatik Jiova nejon mopatak”. ¿Ijkon techpanoua? Komo ijkon, maj amo timosenkauakan, tejuan no uelis tikitaskej Jiova kemej akin okachi kuali toPopaj.

6. Kemej kijtoua Mateo 11:27, ¿keniuj techpaleuiani Jiova maj tikitakan kemej toTajtsin akin techtasojta?

⁶ ¿Keniuj techpaleuiani Jiova maj tikitakan kemej toTajtsin akin techtasojta? Se taman yejua keman kichiuak maj moijkuilouani itech Biblia itajtoluan Jesús uan tein kichiuak (xikonixtajtolti Mateo 11:27). Jesús kichiuak tein iPopaj kichiua, yejua ika uelik kiluij semej itatojtokakauan: “Ijkon keme Nejuatsin tinechitstinemi, no ijkon Totajtsin Dios tikitstinemi” (Juan 14:9). Yejua miakpa ika tajtoj Jiova kemej se tePopaj. Sayoj itech naui Evangelios miakpa kinotsak Jiova toTajtsin. ¿Keyej miakpa ijkon kinotsak? Se taman yejua porin kinekia maj taltikpakneminij kineltokanij ke Jiova se tePopaj akin tetasojta (Juan 17:25, 26).

7. ¿Toni techmachtia keman tikitaj keniuj Jiova kipaleuij iKonetsin?

⁷ Maj tikitakan toni techmachtia kemej Jiova kipaleuij iKonetsin, Jesús. Dios nochipa kikakik inetataujtiluan iKonetsin uan kinankilij (Juan 11:41, 42). Jesús nochipa kiitak ke iPopaj kitasojtaya uan kipaleuiaya keman kipanouaya ouijkayomej (Luc. 22:42, 43).

8. ¿Keniuj Jiova kipaleuij Jesús?

⁸ Jesús kimatia ke iPopaj kimakaka inemilis uan nochi tein ika moixpanoltiskia. Kijtoj: “Niyoltinemi porin Notajtsin Dios nechmakak nemilis” (Juan 6:57). Jesús senkis takuaujtamatik itech iTajtsin, uan Jiova kimakak tein ika moixpanoltiskia. Sayoj ke okachi kipaleuij maj amo keman kikaua (Mat. 4:4).

9. ¿Keniuj kinextij Jiova ke kitasojtaya Jesús?

⁹ Jiova kinextij ke se tePopaj akin tetasojta porin kichiuak maj Jesús kimatini ke kipaleuiaya (Mat. 26:53; Juan 8:16). Maski amo nochipa kimatampauij, kemaj kipaleuij maj taxiko keman kitajyouiltijkej. Jesús kimatia ke tein yeski tein kijyouiskia amo uejkauaskia (Heb. 12:2, TNM). Jiova kinextij ke kitasojtaya  iKonetsin keman kikakia, kimakaya tein kipolouaya, kimachtiaya uan keman kipaleuiaya (Juan 5:20; 8:28). Axkan maj tikitakan keniuj toTajtsin no ijkon techpaleuia.

10. Kemej kijtoua 1 Pedro 3:12, ¿keniuj kinextia Jiova ke techtasojta?

¹⁰ Jiova kikaki tonetataujtiluan (xikonixtajtolti 1 Pedro 3:12). Jiova amo kineki maj tikixtalikan kanachpa tiktataujtiskej, toni tikiluiskej uan kanachi tiuejkauaskej. Yejuatsin kineki maj nochipa tiktataujtikan (1 Tes. 5:17). Uan no, uelis tiktataujtiskej keman tiknekiskej uan kampa yeski. Uan amo keman kijtoua ke amo kemanti, ta nochipa techkaki. Keman tikitaj ke Jiova kikaki tonetataujtiluan, okachiok tiktasojtaj. Akin kijkuiloj se salmo kijtoj: “Niktasojta Jiova, porin yejuatsin kikaki notajtol” (Sal. 116:1).

11. ¿Keniuj Jiova kinankilia tonetataujtiluan?

¹¹ ToTajtsin amo sayoj kikaki tonetataujtiluan, ta no technankilia. Tatitanil Juan techmatiltia nejin: “Komo tiktajtaniliaj Dios tensa ijkon keme yejua in itanejnekilis [...], ijkuakon Totajtsin Dios techkakilia” (1 Juan 5:14, 15). Sayoj ke, Jiova xa amo technankilis kemej tikchiayaj. Yejuatsin kimati toni okachi techpaleuis uan kemansa amo techmaka tein tiktajtaniliaj oso kemansa moneki timochiaskej (2 Cor. 12:7-9).

12, 13. ¿Keniuj Jiova techmaka tein techpoloua?

¹² Jiova techmaka tein techpoloua. Yejuatsin kichiua tein kinnauatia tetatmej maj kichiuakan (1 Tim. 5:8). Jiova kiita maj ikoneuan kipiakan tein ika moixpanoltiskej. Amo kineki maj ika timotekipachokan toni tikuaskej, toni timotaliliskej oso kani tinemiskej (Mat. 6:32, 33; 7:11). Kemej techtasojta, no kichiuani tein techpaleuis maj satepan tikpiakan nochi tein monekis.

¹³ Sayoj ke Jiova okachi techmaka tein techpaleuis maj kuali timouikakan iuan. Itech iTajtol techmatiltiani akoni yejuatsin, itanejnekilis, keyej tinemij uan toni panos satepan. Kinextij ke techtasojta keman tikixmatkej tamachtilis tein melauak uan inintechkopa totatuan oso okseki tokniuan techpaleuij maj tikixmatikan. Uan kisentoka techpaleuia inintechkopa tayekananij uan okseki tokniuan akin yekyolmajsitokej. Uan no, techmachtia itech nechikolmej, kampa timosenmachtiaj iniuan tokniuan. Ika nochi nejin uan okseki taman, kinextia ke yejuatsin se tePopaj akin semi toka motekipachoua (Sal. 32:8).

14. ¿Keyej techmachtia Jiova, uan keniuj kichiua?

¹⁴ Jiova techmachtia. Jesús amo katka tajtakolej, sayoj ke tejuan kemaj. Yejua ika, toTajtsin Dios akin techtasojta techmelaua keman moneki porin kineki techmachtis. ITajtol techelnamiktia ke “kinmejmelautinemi nochi nekes ten Yejuatsin kintasojtatinemi” (Heb. 12:6, 7). Kichiua ika miak taman, kemej neskayot, xa teisa tein tikixtajtoltiaj itech Biblia oso tikakij itech nechikolmej techpaleuia maj tikitakan ke moneki tikpataskej tein tikchiuaj uan tein tiknemiliaj. No uelis techmelauas inintechkopa tayekananij. Kemej yeski kemej Jiova techmelauas, nochipa kichiua porin techtasojta (Jer. 30:11).

15. ¿Keniuj techpaleuia Jiova?

¹⁵ Jiova techpaleuia maj titaxikokan. ToTajtsin techpaleuia keman tikpanouaj  ouijkayomej, ijkon kemej kichiua se tepopaj akin kintasojta ikoneuan. Techmaka iespíritu tein techpaleuia maj amo teyi kichiua maj amo kuali timouikakanok iuan (Luc. 11:13). Uan no, techpaleuia maj kuali timomachilikan. Kemej neskayot, techiluia ke uelis tikchiaskej tein kuali uan nejon techpaleuia maj titaxikokan keman tikpiaj ouijkayomej. Maj titanemilikan itech nejin: toTajtsin akin techtasojta kiyektalis tein yeski tein axkan techtajyouiltia. Ouijkayomej tein axkan tikpiaj tamiskej, sayoj ke tatiochiualismej tein techmaka Jiova tikpiaskej nochipaya (2 Cor. 4:16-18).

16. ¿Toni panok keman Adán amo kitakamatik iTajtsin?

¹⁶ Se taman kemej Jiova kinextia ke techtasojta yejua tein kichiuak keman Adán amo kitakamatik. Ika tein kichiuak Adán, yejua uan ikoneuan amo katkajok ikalyetouanij Dios (Rom. 5:12; 7:14). Sayoj ke Jiova kichiuak tein tapaleuiskia.

17. ¿Toni niman kichiuak Jiova keman Adán amo tatakamatik?

¹⁷ Maski Jiova kitatsakuiltij Adán, yejuatsin kijtoj ke kinpaleuiskia ikoneuan. Niman kijtoj ke akin tatakamatiskiaj oksepa yeskiaj ikalyetouanij (Gén. 3:15; Rom. 8:20, 21). Uelik kichiuak nejon keman iKonetsin, Jesús, kitemakak inemilis. Keman Jiova kitemakak Jesús maj toka momikili, kinextij ke semi techtasojta (Juan 3:16).

18. Maski xa tikaujkej Jiova, ¿keyej senkis tikmatij ke techtasojta kemej tiikoneuan?

¹⁸ Maski titajtakolejkej, Jiova kineki maj timoajsikan itech ikalyetouanij uan amo kiita ke tikuejmolouaj. Xa se tonal amo tikchiuaskej tein kineki oso xa tikauaskej seki tonalmej, sayoj ke kichia  maj timokepakan. Ika neskayot kampa ika tajtoj telpoch akin kiauilchiuak itomin, Jesús kinextij ke Jiova semi techtasojta (Luc. 15:11-32). Tepopaj akin Jesús ika tajtoj kichiaya maj ikonetsin mokepani. Uan keman mokepak, kiselij ika miak pakilis. Komo tikaujkej Jiova uan timoyolnonotskejya, uelis senkis tikmatiskej ke toTajtsin kineki techselis.

19. ¿Keniuj kitamis Jiova nochi tein amo kuali tein kichiuak Adán?

¹⁹ ToTajtsin Dios kiyektalis nochi tein amo kuali tein kiualkuik itajtakol Adán. Keman amo tatakamatik, Jiova kiixtalij kinixpejpenas 144,000 taltikpakneminij akin yeskij tekiuanij uan tiopixkamej ompa iluikak iuan iKonetsin. Itech yankuik taltikpak, Jesús uan nejin tekiuanij kinpaleuiskej taltikpakneminij akin tatakamatij maj amo tajtakolejkejok. Satepan ke moitas ox yekmelauj tatakamatij, Dios kichiuas maj nemikan nochipaya. Ijkuak toTajtsin semi yolpakis keman kiitas ke nochin ikoneuan amo tajtakolejkejok. ¡Semi kualtsin yeski!

20. ¿Keniuj kinextiani Jiova ke semi techtasojta, uan toni tikitaskej itech okse tamachtilis?

²⁰ Jiova kinextiani ke semi techtasojta. Yejuatsin okachi kuali toPopaj tein uelis tikpiaskej. Kikaki tonetataujtiluan uan techmaka tein ika timoixpanoltiskej uan tein techpaleuia maj kuali timouikakan iuan. Techmachtia uan techpaleuia. Uan no, techmakas miak taman tein kuali satepan. ¡Semi techyolpaktia tikmatiskej ke toTajtsin Dios techtasojta uan kineki techpaleuis! Itech okse tamachtilis tikitaskej keniuj tejuan kemej tiikoneuan, uelis tiktasojkamatiliskej netasojtalis tein techpialia.