1. Umuntu kwakumele enzeni nxa wayefuna ukukhuluma lenkosi yePhesiya?

AKE sithi uhlala ePhesiya ngezikhathi zakudaladala. Ufuna ukukhuluma lenkosi ngendaba ethile yikho uya edolobheni leSusa lapho okulesigodlo sayo khona. Kodwa uyakwazi ukuthi ngeke ukhulume layo ungazange uthole imvumo yayo ngoba ungenza njalo ungabulawa.​—Esta. 4:11.

2. Kuyini uJehova akufunayo nxa sikhuluma laye?

² Kuyasithokozisa ukwazi ukuthi uJehova kafanani lenkosi yePhesiya. Uphakeme kakhulu ukwedlula loba nguphi umbusi kodwa singakhuluma laye loba nini. Ufuna sikhululeke ukukhuluma laye. Ngokwesibonelo, lanxa ebizwa ngamabizo okuhlonipha aphakemeyo agoqela elithi Mdali, Somandla lelithi Nkosi Enkulu, uyafuna ukuthi simbize ngendlela ejayelekileyo sisithi “Baba.” (Mat. 6:9) Kuyasithokozisa ukuthi uJehova ufuna sibe seduze laye.

3. Kungani kuqondile ukubiza uJehova ngokuthi “Baba” futhi sizaxoxa ngani esihlokweni lesi?

³ Kuqondile ukubiza uJehova ngokuthi “Baba” ngoba unguMthombo wokuphila kwethu. (Hubo. 36:9) Njengoba enguBaba wethu, kufanele simlalele. Nxa singenza lokho asitshela khona sizathola izibusiso. (Heb. 12:9) Izibusiso lezo zigoqela ukuphila ezulwini kumbe emhlabeni kuze kube nini lanini. Lakhathesi zikhona izibusiso esizitholayo. Esihlokweni lesi sizaxoxa ngendlela uJehova atshengisa ngayo ukuthi unguBaba olothando lokuthi kungani kumele siqiniseke ukuthi esikhathini esizayo kasoze asitshiye loba sekutheni. Kodwa kasiqaleni ngokuxoxa ngokuthi kungani kumele siqiniseke ukuthi uBaba wethu osezulwini uyasithanda kakhulu futhi ulendaba lathi.

4. Kungani abanye kubathwalisa nzima ukubona uJehova enguBaba?

⁴ Kukuthwalisa nzima yini ukubona uNkulunkulu enguYihlo? Abanye bangacabanga ukuthi uJehova mkhulu kakhulu okokuthi bazibona bengaqakathekanga kuye. Bayathandabuza ukuthi uNkulunkulu uSomandla ulendaba labo njengomuntu ngamunye. Kodwa le kayisiyo indlela uBaba wethu osithandayo afuna sizizwe ngayo. Umphostoli uPhawuli watshela abantu base-Athene ukuthi uJehova wasinika ukuphila njalo ufuna sibe lobudlelwano laye. Esetsho njalo wabachasisela ukuthi uJehova ‘kakhatshana komunye lomunye wethu.’ (ImiSeb. 17:24-29) UNkulunkulu ufuna ngamunye wethu akhulume laye ngendlela umntwana akhuluma ngayo lomzali olothando futhi olendaba laye.

5. Sifundani kulokho okwenzakala komunye udadewethu?

⁵ Kwabanye kunzima ukubona uJehova enguBaba ngoba oyise ababazalayo kabazange babatshengise kangako uthando kanye lomusa kumbe vele kabazange babatshengise. Omunye udadewethu wathi: “Ubaba wayehlala ekhuluma izinto ezazingizwisa ubuhlungu. Ngathi ngiqalisa ukufunda iBhayibhili kwakunzima ukuthi ngibe seduze loBaba osezulwini. Kodwa lokhu kwantshintsha sengimazi uJehova.” Lawe ukubona kunzima yini ukuba seduze loJehova? Nxa kunjalo ungadani ngoba ngokuhamba kwesikhathi ungenelisa ukumbona enguBaba ongcono kulabo bonke.

6. Ngokwalokho okutshiwo kuMathewu 11:27, yiphi enye indlela uJehova asincede ngayo ukuthi simbone enguBaba osithandayo?

⁶ Enye indlela uJehova asincedise ngayo ukuthi simbone enguBaba osithandayo yikubhala eBhayibhilini lokho uJesu akutshoyo lakwenzayo. (Bala uMathewu 11:27.) UJesu walingisela ubuntu bukaYise ngendlela epheleleyo okokuthi wathi: “Loba ngubani ongibonileyo usembonile loBaba.” (Joh. 14:9) Izikhathi ezinengi uJesu wayebiza uJehova ngokuthi nguBaba. Ngokwesibonelo, emaVangelini amane kuphela sithola ukuthi uJesu wasebenzisa ibala elithi “Baba” izikhathi ezingaba ngu-165 ekhuluma ngoJehova. Kungani uJesu wakhuluma kanengi kangaka ngoJehova? Esinye isizatho yikuthi wayefuna ukuqinisekisa abantu ukuthi uJehova unguBaba olothando.​—Joh. 17:25, 26.

7. Sifundani ngoJehova endleleni ayephatha ngayo iNdodana yakhe?

⁷ Ake sixoxe ngalokho esikufunda ngoJehova endleleni ayephatha ngayo iNdodana yakhe uJesu. UJehova wayehlala eyilalela imithandazo kaJesu futhi eyiphendula. (Joh. 11:41, 42) Kungelani lenhlupho uJesu ayehlangana lazo, wayehlala ebona ukuthi uYise uyamthanda futhi uyamsekela.​—Luk. 22:42, 43.

8. UJehova wamsekela njani uJesu?

⁸ UJesu wavuma ukuthi uJehova unguMthombo wakhe wokuphila lokuthi wayemnika izinto azidingayo ukuze aphile. Wathi: “Ngiphila ngenxa yakhe [uBaba].” (Joh. 6:57) UJesu wayemthemba sibili uYise futhi uJehova wayemnika lokho ayekudinga ukuze aqhubeke ephila. Kodwa okuqakatheke kakhulu yikuthi uJehova wancedisa uJesu ukuthi ahlale ethembekile kuye.​—Mat. 4:4.

9. UJehova watshengisa njani ukuthi unguBaba olothando futhi olendaba leNdodana yakhe?

⁹ UJehova unguBaba olothando yikho waqinisekisa uJesu ukuthi uyamsekela. (Mat. 26:53; Joh. 8:16) Lanxa engamvikelanga kukho konke okwakungamlimaza,  wamncedisa ukuthi aqinisele ebunzimeni. UJesu wayekwazi ukuthi loba yibuphi ubunzima obabungamehlela babungobesikhatshana. (Heb. 12:2) UJehova watshengisa ukuthi uyamthanda uJesu ngokumlalela nxa ekhuleka, ngokumnika lokho akudingayo, ngokumfundisa langokumsekela. (Joh. 5:20; 8:28) Khathesi kasixoxeni ngokuthi uBaba wethu osezulwini utshengisa njani ngendlela efananayo ukuthi ulendaba lathi.

10. Ngokwalokho okutshiwo kuHubo 66:19, 20, uJehova utshengisa njani ukuthi uyasithanda?

¹⁰ UJehova uyayilalela imithandazo yethu. (Bala iHubo 66:19, 20.) Kasifakeli imingcele yokuthi sithandaze kangaki, sithandazeleni kumbe ukuthi imithandazo yethu ibe mide kanganani kodwa uthi sithandaze kokuphela. (1 Thes. 5:17) Singakhuleka kuNkulunkulu wethu loba nini kungelani lokuthi singaphi. Uhlala eyilalela imithandazo yethu. Nxa singananzelela ukuthi uJehova uyayilalela imithandazo yethu sizamthanda kakhulu. Umhubi wathi: ‘Ngiyamthanda uJehova ngokuba uyalizwa ilizwi lami.’​—Hubo. 116:1.

11. Kwezinye izikhathi uJehova uyiphendula njani imithandazo yethu?

¹¹ UBaba uyayilalela imithandazo yethu futhi ayiphendule. Umphostoli uJohane usiqinisekisa esithi: “Nxa sicela loba yini evumelana lentando [kaNkulunkulu], uyasizwa.” (1 Joh. 5:14, 15) Kodwa kwezinye izikhathi uJehova kaphenduli imithandazo yethu ngendlela esiyabe siyikhangelele. Uyakwazi okusincedayo yikho angabe efuna silinde. Kwesinye isikhathi impendulo yakhe ingaba nguhatshi.​—2 Khor. 12:7-9.

12-13. Yiziphi indlela uBaba wethu osezulwini asinika ngazo esikudingayo?

¹² UJehova usinika esikudingayo. Wenza lokho afuna obaba bakwenze. (1 Tim. 5:8) Unika abantwabakhe lokho abakudingayo ukuze baphile. Kafuni sikhathazeke ngokuthi sizakudlani, sizagqokani loba ukuthi sizahlala ngaphi. (Mat. 6:32, 33; 7:11) Njengoba enguBaba olothando, uJehova uphinde wahlela ukuthi asuthise zonke izidingo zethu esikhathini esizayo.

¹³ Okuqakatheke kakhulu yikuthi uJehova usinika esikudingayo okusinceda ukuthi sibe ngabangane bakhe. EBhayibhilini usitshelile ukuthi ungubani, ukuthi uhloseni, ukuthi siphilelani lokuthi kuzakwenzakalani esikhathini esizayo. Watshengisa ukuthi ulendaba lathi ngesikhathi esebenzisa abazali bethu kumbe omunye umuntu ukusifundisa ngaye. Kanti njalo uqhubeka esincedisa ukuthi sibe ngabangane bakhe esebenzisa abadala bebandla abasithandayo labafowethu labodadewethu abaqinileyo ekukhonzeni. Uphinda asifundise esebenzisa imihlangano yebandla lapho esifundiswa khona silabafowethu labodadewethu. Konke lokhu kanye lokunye kutshengisa ukuthi uJehova unguBaba osithandayo.​—Hubo. 32:8.

14. Kungani uJehova esilaya futhi ukwenza njani lokho?

¹⁴ UJehova uyasifundisa. Thina kasifanani loJesu ngoba silesono. Yikho enye indlela uBaba wethu osithandayo asifundisa ngayo yikusilaya nxa kufanele. ILizwi lakhe lisikhumbuza ukuthi “uJehova uyabalaya abathandayo.” (Heb. 12:6, 7) Usilaya ngendlela ezitshiyeneyo. Ngokwesibonelo singaqondiswa ngesikubale eBhayibhilini loba esikuzwe emhlanganweni webandla kumbe sincediswe ngabadala bebandla. Kungelani lokuthi  uJehova usebenzisa yiphi indlela ukuthi asilaye, uhlala esenza njalo ngoba esithanda.​—Jer. 30:11.

15. UJehova usisekela njani?

¹⁵ UJehova uyasisekela nxa sisebunzimeni. UBaba wethu osezulwini uyasisekela nxa sisebunzimeni njengoba nje ubaba olothando esenza njalo ebantwaneni bakhe nxa besebunzimeni. Usebenzisa umoya wakhe ongcwele ukuze asivikele kuloba yini engaphambanisa ubungane bethu laye. (Luk. 11:13) UJehova uphinda asincedise nxa sikhathazekile. Ngokwesibonelo, usinika ithemba ngekusasa futhi ithemba leli liyasinceda ukuthi siqinisele nxa sisebunzimeni. Ngakho kungelani lokuthi sehlelwa yibuphi ubunzima, uBaba wethu osithandayo uzakuqeda konke okusizwisa ubuhlungu. Inhlupho esihlangana lazo ngezesikhatshana kodwa izibusiso uJehova asinika zona zizahlala kuze kube nini lanini.​—2 Khor. 4:16-18.

16. Kwenzakalani ngesikhathi u-Adamu ehlamukela uYise olothando?

¹⁶ Nxa sicabanga ngalokho uJehova akwenzayo ngesikhathi u-Adamu ehlamuka siyabona sibili ukuthi uyasithanda. U-Adamu kazange alalele uYise osezulwini futhi lokhu kwabangela ukuthi yena lezizukulwane zakhe bangabi ngamalunga emuli kaJehova. (Rom. 5:12; 7:14) Kodwa uJehova wenza okuthile ukuze ancede izizukulwane zika-Adamu.

17. UJehova wenzani ngemva kokona kuka-Adamu?

¹⁷ UJehova wamjezisa u-Adamu kodwa wathembisa ukunceda izizukulwane zakhe. Ngemva kokona kuka-Adamu, uJehova wahle wathembisa ukuthi abantu abalalelayo bazaphinda babe ngamalunga emuli yakhe. (Gen. 3:15; Rom. 8:20, 21) Wasebenzisa umhlatshelo weNdodana yakhe ayithandayo  uJesu ukuthi enze abantu baphinde babe ngamalunga emuli yakhe. UJehova watshengisa ukuthi uyasithanda kakhulu ngokunikela ngeNdodana yakhe ngenxa yethu.​—Joh. 3:16.

18. Kungani kumele siqiniseke ukuthi uJehova uyafuna sibe ngabantwabakhe lanxa singaphambuka?

¹⁸ Lanxa silesono uJehova uyafuna ukuthi sibe ngamalunga emuli yakhe futhi kakuboni kungumthwalo ukusincedisa. Uhlala elethemba lokuthi sizabuyela kuye lanxa singamdanisa kumbe siphambuke okwesikhatshana. UJesu watshengisa ukuthi uJehova ubathanda kangakanani abantwabakhe ngesikhathi elandisa umzekeliso wendodana yolahleko. (Luk. 15:11-32) Ubaba osemzekelisweni lo kazange alahle ithemba lokuthi indodana yakhe izaphenduka. Yathi ibuyela ekhaya uyise wayamukela ngazo zombili. Nxa sesitshiye uJehova kodwa siphenduka, kumele siqiniseke ukuthi uBaba wethu osithandayo uzimisele ukusamukela.

19. UJehova uzawulungisa njani umonakalo owabangelwa ngu-Adamu?

¹⁹ UBaba wethu uzalungisa wonke umonakalo owabangelwa ngu-Adamu. Ngemva kokuhlamuka kuka-Adamu, uJehova wahlela ukuthi kube labantu abangu-144 000 abazakuba leNdodana yakhe ezulwini bengamakhosi kanye labaphristi. Emhlabeni omutsha uJesu lalabo azabusa labo bazakhipha isono ebantwini. Nxa abantu labo bangaqhubeka bethembekile ngemva kokulingwa kokucina, bazaphiwa ukuphila okungapheliyo nguNkulunkulu. UBaba wethu uzathokoza ngokubona umhlaba usugcwele amadodana lamadodakazi akhe angelasono. Leso kuzakuba yisikhathi sentokozo sibili!

20. UJehova utshengisa njani ukuthi uyasithanda kakhulu futhi sizaxoxa ngani esihlokweni esilandelayo?

²⁰ UJehova utshengisa ukuthi uyasithanda kakhulu. UnguBaba ongcono kulabo bonke. Uyayilalela imithandazo yethu futhi usinika esikudingayo okusinceda ukuthi siqhubeke siphila njalo simkhonza. Uyasifundisa njalo asisekele. Kanti njalo uzasenzela izinto ezinhle kakhulu esikhathini esizayo. Kuyasithokozisa ukwazi ukuthi uBaba wethu uyasithanda futhi ulendaba lathi. Esihlokweni esilandelayo sizaxoxa ngezindlela esingatshengisa ngazo ukuthi lathi siyamthanda.