1. Mundhu waidikana kuitenyi kuti abhuye na mambo wo Persiya?

RANGARIRANYI kuti makambogara ku persiya ku makore anokwana kuita 2.500 akakhirira. Kuti mubhuye na mambo ngo pamusoro po shwiro iri yese yamunayo, maizodikana kufamba kwenda ku Dhorobha ro Shushani. Asi kuti mubhuye naye, pakutanga maidikana kutendehwa ndiyena. Kudari mukaeja kubhuya naye mucizivi kutendehwa, maizouraiwa!—Ester 4:11.

2. Jehovha anoda kuti tijizwe kudini patinonga tecibhuya naye?

² Zvinodakajisa ngo zvokuti Jehovha wakasiyana maningi na mambo wo Persiya! Jehovha wakakhwirira maningi kupinda vatongi vo nyika ino. Pikija zvakadaro, tingabhuya naye pa nguva iri yese. Cimwenizve, iyena anoda kuti itusu tijizwe takasujunuka kuti tizviite. Inga muezaniso, pikija Jehovha ano mazina mazinji okureremeja, akadari inga Musiki wo Zvese, Wo Masimba- ese, Tenji Mukuru-kuru, iyena anotivhunja kuti timudane ngo zina ro kuti “Baba.” (Mateu 6:9) Jehovha anoda kuti timuvone inga Baba vanokhwederereka zve vano rudo! Azvidakajisi kuziva izvi here?

3. Ngenyi tinodikana kuvona Jehovha inga “Baba” zve tinozovonenyi pa musoro uno?

³ Itusu tinodikana kuvona Jehovha inga “Baba,” ngokuti ndiyena Cinyuke co upenyu. (Nduyo 36:10) Zvecivoneka kuti Jehovha ndi Baba wedu, tinodikana kumuzwira. Tikaita zvaanotikumbira, tinozoashira makomborero akawanda. (Vaheberi 12:9) Amwe awo, ngookuzoashira upenyu ucikaperi, azvinenyi kudenga kana pasi pano. Kuzwira Jehovha kunotibesera pikija wari uno. Pa musoro uwu, tinozovona kuti Jehovha nyamasi uno, anokhombijisa kudini kuva Baba vano rudo zve tingavisa kudini  no cokwadi co kuti iyena narini aazotisii. Asi pakutanga, ngativone kuti Baba wedu vo mugore vanokhombijisa kudini kuti vanotida maningi zve vanoda kutibesera.

4. Ngenyi vamweni vanovona zvecinesa kuvona Jehovha inga Baba wavo?

⁴ Zvinomunesa kuvona Jehovha inga Baba wenyu here? Vamweni vanorangarira kuti vakadodoka maningi zve avasisiri kuna Jehovha. Ngokudaro, vanozvivona zvecinesa kutenda kuti Mwari Wo Masimba-ese, anotaja umwe nga umwe wedu. Asi Baba wedu vano rudo avadi kuti tirangarire kudaro. Ivona vakatipa upenyu zve vanoda kuti tive no ushamwari navo. Pakupera kubhuya cokwadi ici, mupostori Pauro wakasanangurira vandhu vaimupurukira vo Atena, kuti Jehovha “aaripi ndhambo na ariwese wedu.” (Maitiro o Vapostori 17:24-29) Jehovha anoda kuti umwe nga umwe wedu abhuye naye inga mwana anobhuya na baba vano rudo.

5. Tinojijenyi ngo muezaniso wo imwe hambzaji yo Cikristu?

⁵ Thangwe rimweni rinoitisa kuti vamweni vavone zvecinesa kuvona Jehovha inga Baba wavo, ngo rokuti pa mbhuri pavo avazivi kumbokhombijihwa rudo. Hambzaji imweni yo Cikristu yakati: “Babangu vaindishupha maningi. Ngokudaro, pondakatanga kujija Bhaibheri, zvakandinesera maningi kujizwa ndiri phedo na Baba wedu vo mugore. Asi pondakanasa kuziva Jehovha zvese zvakacinja.” Munojizwavo kudaro here? Kudari munozwa kudaro, ivanyi no cokwadi cokuti imwimwivo mungavona Jehovha inga Baba vaushoni ku vandhu vese.

6. Mukuzwirana na Mateu 11:27, ngo yapi njira imweni yaanotibesera ndiyona Jehovha kuti timuvone inga Baba vano rudo?

⁶ Njira imweni yaanotibesera ndiyona Jehovha, kuti timuvone inga Baba wedu vano rudo, ngo yo kutendera kuti zvakananga Jesu no kuita, zvitahwe mu Bhaibheri. (Verenganyi Mateu 11:27.) Jesu wakanasa kuteveja mugariro wa Baba wake, zvomuita kuti anange kudari: “Ndiyani anondivona, anovonavo Baba.” (Johani 14:9) Jesu wakabhuya vhaza jakawanda pa zvinoita Jehovha inga Baba. Pa Mavhangeri marongomuna, Jesu wakashandisa gama rokuti “Baba,” pa vhaza jinokwana 165 ecinangira Jehovha. Ngenyi Jesu wakabhuya maningi ngo pamusoro pa Jehovha? Thangwe rimwe ngo rokuti Jesu waida kukhohwesa vandhu kuti Jehovha ndi Baba vano rudo.—Johani 17:25, 26.

7. Ngozvapi zvatinojija ngo pamusoro pa Jehovha ngo manera aakataja Jesu?

⁷ Vonanyi zvatinojija ngo pamusoro pa Jehovha ngo manera aakataja Mwanake, Jesu. Mukuvo wese Jehovha waizwa mukumbiro ja Jesu. Aacaizwa mukumbirojo basi asi iyena waijidavira. (Johani 11:41, 42) Pa zvineso zvese zvaakasongana nazvo, Jesu mukuvo wese waizwa kuti waidiwa no kubesehwa ndi Babake.—Luka 22:42, 43.

8. Munjira japi Jehovha wakabesera Jesu?

⁸ Jesu waizviziva kuti Jehovha wainga Cinyuke co upenyu hwake zve kuti iyena apone zvaifira kuna Babake, Jehovha. Iyena wakati: “Ndinorarama ndi Baba.” (Johani 6:57) Jesu waithemba Babake mukuperera zve Ivona vaimupa zvese zvaaida kuti apone. Cinosisira maningi ngo cokuti, Jehovha waibesera Jesu kuti aenderere mberi ecikura ku divi ro umwari.—Mateu 4:4.

9. Jehovha wakakhombijisa kudini kuti wainga Baba vaida maningi Jesu?

⁹ Inga Baba vano rudo, Jehovha wakaita kuti Mwanake azvizive kuti pa zvese zvaaiita waibesehwa ndi Baba wake. (Mateu 26:53; Johani 8:16) Pikija Jehovha aazivi kujivirira Jesu mu zvineso zvake zvese, iyena wakamubesera  kuhwisana nazvo. Jesu waizviziva kuti zvineso zvaaisongana nazvo azvicainga zvo kwenda no kwenda. (Vaheberi 12:2) Jehovha wakakhombija kuti waida Mwanake ngo kumupurutana, kumupa zvaiida, kumujijisa no kumubesera. (Johani 5:20; 8:28) Wari ngativone kuti Babedu vo mugore vanotibesera kudini mu njira yakafanana.

10. Mukuzwirana na Nduyo 66:19, 20, Jehovha anokhombijisa kudini kuti anotida?

¹⁰ Jehovha anozwa mukumbiro jedu. (Verenganyi Nduyo 66:19, 20.) Jehovha aadiri mugano pa mukumbiro jatinoita. Kusiapo zvondhozvo, anotivangisa kuti tiite mukumbiro ticikazorori. (1 VaTesalònika 5:17) Ngo nderemejo yese, tingakwedera kuna Mwari pa mukuvo uriwese, azvinenyi tiri kwapi. Jehovha asipi mundhu wakabatikana maningi kuti atame kuzwa mukumbiro jedu, iyena mukuvo wese anotizwa. Patinoziva kuti Jehovha anozwa mukumbiro jedu, tinojizwa tiri phedo naye. Mutari wo nduyo wakati: “Ndinoda Tenji Mwari, ngokuti anozwa izwi rangu.”—Nduyo 116:1.

11. Jehovha anodavirisa kudini mukumbiro jedu?

¹¹ Baba wedu avazwi basi mukumbiro jedu, asi vanojidavira. Mupostori Johani wakati: “Tikamukumbira ciro, ngo kuteveja kuda kwake, Yena anotipurukira.” (1 Johani 5:14, 15) Zvakajeka kuti, Jehovha aazodaviri mukumbiro jedu pa nguva yese yatinoda. Zvecivoneka kuti anonasa kuziva zvinotibesera, zvingaita kuti nguva jimweni iyena odavira kuti haiwa kana kutoita kuti tivetere padoko.—2 VaKorinto 12:7-9.

12-13. Baba wedu vo mugore vanotitajisa kudini?

¹² Jehovha anotipa zvatinoda. Jehovha anoita zvese zviya zvinodikana kuitwa ngo majibaba ku vana vavo. (1 Timoti 5:8) Iyena anopa zvinoda vana vake kuti vakwanise kupona. Jehovha aadi kuti itusu tithimwe-thimwe kuti tinozohenyi, tinozosimirenyi kana kuti tinozogarepi. (Mateu 6:32, 33; 7:11) Zvecivoneka kuti Jehovha ndi Baba vano rudo, anotigondesa kuti pikija kumbejiyo, anozoenderera mberi ecitipa zvese zvatinoda kuti tikwanise kupona.

¹³ Kusiyapo zvese izvo, Jehovha anozotipa zvatinoda kuti tirambe tino ushamwari wo phedo naye. Ecishandisa Soko rake, iyena anokwanisa kutivhunja kuti ndiyena ani, zvicinyi zvaanoda, ngocapi cinangwa co upenyu zve zvicinyi zvaanozoita kumbejiyo. Kuti akhombije kuti iyena anoneseka ngo umwe nga umwe wedu, Jehovha wakashandisa vabari vedu kana Makristu amweni kuti atibesere kumuziva. Mbhera wari, iyena ari kutibesera ngo kushandisa vakuru vano rudo pomwe no hama no hambzaji jimweni jakaivha kumujimu. Kusiyapo zvondhozvo, Jehovha anotijijisa patinoviya pamusongano, ngokuti pano, tinokwanisa kujija zvakawanda takabatana no hama no hambzaji jedu. Aya, ndi amwe manera anovonesa kuti Jehovha ndi Baba vanotida maningi.—Nduyo 32:8.

14. Ngenyi Jehovha anotijijisa zve anozviitisa kudini?

¹⁴ Jehovha anotijijisa. Itusu atizivi kukwana inga ndi Jesu. Ngo iyo ndava, inga divi ro kutijijisa, Baba wedu vano rudo, zvikadikana weya, vanotipangira. Bhaibheri rinoticeukija kudari: “Tenji anopangira vaanodisa.” (Vaheberi 12:6, 7) Jehovha angakwanisa kutipangira mu njira jakasiyana-siyana. Inga muezaniso, iyena angatipangira paya patinoverenga Bhaibheri kana zviya zvatinozwa patinoviya pa musongano. Kangaije angatozviita ecishandisa vakuru vo ungano. Azvinenyi hazvo njira ingashandiswa ndi Jehovha kuti atipangire, iyena anozviita ngokuti anotida.—Jeremia 30:11.

15. Jehovha anotijivirira mu njira yapi?

¹⁵ Jehovha anotibesera patinosongana no  zvineso. Kudari inga baba vanobesera mwana wavo paanosongana no zvineso, Baba wedu vo mugore vanotibeseravo kuti tihwisane no zvineso. Ivona vanoshandisa mujimu mucena wavo kuti vatijivirire pa zviri zvese zvinoda kutikhuvaza ku divi ro umwari. (Luka 11:13) Jehovha anotibeserazve patinonga takasuruvara. Inga muezaniso, iyena anotipa vetero inoshamaisa. Vetero iyi yo kumbeji, inotibesera kuti tihwisane no zvineso zvatinosongana nazvo. Vonanyi basi: Azvinenyi ndangani tino zvineso zvakadini, Jehovha anozozvipeja zvese kamare. Zvineso zvatiri kusongana nazvo, ngo zvo nguva shomani, asi makomborero atinozopuwa ndi Jehovha ngoo kwenda no kwenda.—2 VaKorinto 4:16-18.

16. Zvicinyi zvakaitika Adhamu na Evha pavakatama kuzwira Baba wavo vano rudo?

¹⁶ Cimweni cinovonesa kuti Jehovha anotida, cinovoneka pa manera aakaita pakabuda zvineso pa mbhuri yokutanga. Adhamu aazivi kuzwira Jehovha, ngo iyo ndava, iyena no mubarihwana wake wese aazivizve kuita divi ro mbhuri yakadakara ya Mwari. (VaRoma 5:12; 7:14) Asi, Jehovha wakaita ciri cese kuti abesere mubarihwana wa Adhamu.

17. Jehovha wakaitenyi, Adhamu paakapera kushaisha?

¹⁷ Jehovha wakapanica Adhamu, asi aazivi kusiya mubarihwana wake ucina vetero. Ngo kukasika, Jehovha wakagondesa kuti mubarihwana wese wa Adhamu waizovazve divi ro mbhuri yake. (Genesi 3:15; VaRoma 8:20, 21) Kuti zvese izvi zvikwanirisike, Jehovha wakatuma mwana wake waaida maningi, Jesu, kuti aviye kootifira. Muripo wakanasa kukhombija kuti Jehovha anotida maningi.—Johani 3:16.

18. Ngenyi tingava no cokwadi cokuti Jehovha anotida inga vana pikija tikamusiya?

¹⁸ Pikija atizivi kukwana, Jehovha anoda kuti tive divi ro mbhuri yake zve iyena aavoni kuva  muthwaro kutibesera. Ngo zvokadi kuti tingamunyangajisa kana kumusiya, asi iyena aazotisii. Jesu wakakhombija kuti Jehovha anoda maningi vana vake ngo kuverenga shitoria co mwana mupanduki. (Luka 15:11-32) Pa muezaniso uu, baba wo mupanduki avazivi kusiya kuvetera kuti mwanavo waizoviya. Mwana paakahwirira kanyi, babake vakamuashira ngo nyara mbiri. Mukuezanavo, kudari tikasiya kushandira Jehovha, asi toguma pa kuzvidemba, tingava no cokwadi cokuti Baba wedu vano rudo, vanozotiashira ngo nyara mbiri.

19. Jehovha anozonasiririsa kudini zvese zvakamoswa ndi Adhamu?

¹⁹ Babedu vanozonasirira zvese zvakamoswa ndi Adhamu. Adhamu naapera kupandukira, Jehovha wakada kuva no 144.000 zvo vandhu kuti vave vapiri no majimambo no Mwana wake. Jesu no 144.000 vanozobesera vandhu vanozwira kuti vave vakakwana mu nyika imbza. Kudari vandhu ava, vakambhera ngo kupona pa kuejwa ko kupejisira, vanowana upenyu ucikaperi. Jehovha anozodakara maningi ngo kuvona nyika yakazara ngo vandhu vakakwana. Ngo zvokadi kuti inozova ngari inodakajisa.

20. Jehovha anokhombijisa kudini kuti anotida zve tinozovonenyi pa musoro unozaro?

²⁰ Jehovha anokhombija kuti anotida maningi. Iyena ndi Baba vakanakisisa. Iyena anozwa mukumbiro jedu, anotipa zvatinoda kuti tipone no zvatinoda ku divi ro umwari. Iyena anotijijisa no kutibesera. Cimwenizve, anozotiitira zviro zvinoshamaisa kumbejiyo. Zvinodakajisa kuziva kuti Baba wedu Jehovha, vanotida no kutibesa. Zvecivoneka kuti tiri vana vake tinodikana kumuda inga iyena anotida. Asi tingazviitisa kudini? Tinozozvivona pa musoro unozaro.