1. Omuntu okwa li e na okuninga shike tango, ngele okwa hala oku ka popya nomukwaniilwa gwaPersia?

NATU tye ando omimvo 2 500 lwaampono dha ka pita, owa li ho kala muPersia. Owa hala okupopya nomukwaniilwa gwoshilongo kombinga yoshinima shontumba, onkene owa yi koshilandopangelo Susa. Ihe manga inoo ka popya naye, owu na okupewa tango epitikilo kuye. Ngele owa kala inoo shi ninga, otashi vulika shi ka pule omwenyo gwoye. — Est. 4:11.

2. Jehova okwa hala tu kale tu uvite ngiini, uuna tatu popi naye?

² Inatu pandula tuu sho Jehova inaa fa omukwaniilwa ngoka gwaPersia! Jehova oku na oonkondo lela e vule omupangeli kehe gwopantu, nohatu vulu okupopya naye ethimbo kehe. Okwa hala tu kale twa manguluka okupopya naye. Pashiholelwa, nonando Jehova oku na omadhinasimaneko omakumithi, ngaashi Omushiti Omunenenene, Omunankondoawike nosho wo Omuwa Omunamapangeloagehe, okwa hala tu popye naye tatu longitha edhinasimaneko “Tate,” ndyoka li shiwike nawa. (Mat. 6:9) Ohashi tu nyanyudha okutseya kutya Jehova okwa hala tu kale tu uvite tu li popepi naye.

3. Omolwashike tatu vulu okwiithana Jehova “Tate,” noshike tatu ka kundathana moshitopolwa shika?

³ Oshi li mondjila sho hatu ithana Jehova, “Tate,” oshoka oye Oluthithiya lwomwenyo. (Eps. 36:9) Otu na okuvulika kuye, molwaashoka oye Tate yetu. Ngele otwa ningi shoka a hala tu ninge, otatu ka nyanyukilwa omayambeko omakumithi. (Heb. 12:9) Omayambeko ngoka oga kwatela mo omwenyo gwaaluhe kutya nduno omegulu nenge okombanda yevi. Opu na wo uuwanawa  mboka hatu nyanyukilwa ngashingeyi. Oshitopolwa shika, otashi ka kundathana nkene Jehova ha katuka e li Tate omunahole ngashingeyi, nonokutya omolwashike tatu vulu okukala nuushili kutya ke na esiku e ke tu ekelehi monakuyiwa. Ihe tango natu taleni kutya omolwashike tatu vulu okukala neinekelo kutya Tate yetu gwomegulu oku tu hole noonkondo noku na ko nasha natse.

4. Omolwashike yamwe haya mono oshidhigu okutala ko Jehova e li Tate gwawo?

⁴ Mbela oho mono oshidhigu okutala ko Kalunga e li Tate gwoye? Yamwe otashi vulika ya kale ye uvite kutya inaya simana kuJehova, oshoka omunenenene. Ohaya kala ya limbililwa, ngele Kalunga Omunankondoawike oku na ko ngaa nasha nayo pauhandimwe. Ihe uushili owo kutya Tate yetu omunahole ina hala tu kale tu uvite ngawo. Okwe tu pa omwenyo nokwa hala tu kale tu na ekwatathano naye. Konima yokupopya oshili ndjika, omuyapostoli Paulus okwa li a yelithile aapulakeni ye yomuAtena kutya Jehova “ke li kokule nomuntu nando ogumwe.” (Iil. 17:24-29) Kalunga okwa hala kehe gumwe gwomutse a popye naye, ngaashi naanaa okanona haka popi nomuvali gwako omunahole noku na ko nasha nako.

5. Oshike tatu ilongo moshimoniwa shomumwameme gumwe?

⁵ Yamwe otashi vulika haye shi mono oshidhigu okutala ko Jehova e li Tate gwawo, molwaashoka inaya ulukilwa naanaa nenge nokuli nandonando ohole nolukeno koohe. Natu taleni komatyokosha gomumwameme gumwe. Okwa ti: “Tate okwa li omuntu omudhigu noonkondo. Sho tango nda tameke okukonakona Ombiimbeli, osha li oshidhigu kungame okukala ndi uvite ndi li popepi naTate gwomegulu. Ihe sho nda tseya Jehova, omaiyuvo ngoka naampoka ngaa ga ningine.” Mbela nangoye osho ho kala wu uvite ngawo? Ngele osho, kala nuushili kutya nangoye oto vulu okutala ko Jehova e li Tate a dhenga mbanda.

6. Shi ikolelela kuMateus 11:27, omomukalo gumwe guni Jehova e tu kwathela tu mu tale ko e li Tate yetu omunahole?

⁶ Omukalo gumwe moka Jehova e tu kwathela tu mu tale ko e li Tate omunahole, omokulesha oohapu dhaJesus niilonga ye, mOmbiimbeli. (Lesha Mateus 11:27.) Jesus okwa li a holele thiluthilu omaukwatya gaHe, nomolwaashono a vulu okutya: “Kehe ngoka a mono ndje, okwa mona wo Tate.” (Joh. 14:9) Olundji Jesus okwa li ha popi kombinga yonkandangala ndjoka Jehova ta dhana e li Tate. MOmavaangeli gane omo amuke, Jesus okwa longitha oshitya “Tate” iikando 165 lwaampono, a ukitha kuJehova. Omolwashike olundji Jesus a li a popi kombinga yaJehova? Etompelo limwe olyo kutya opo aantu ya vule okutompwa kutya Jehova oTate omunahole. — Joh. 17:25, 26.

7. Oshike tatu ilongo komukalo moka Jehova a li a ungaunga nOmwana?

⁷ Natu taleni shoka tatu ilongo komukalo moka Jehova a li a ungaunga nOmwana, Jesus. Jehova okwa kala aluhe ha pulakene komagalikano gaJesus. Ina kala owala he ga pulakene, ihe okwa kala wo he ga yamukula. (Joh. 11:41, 42) Kutya nduno Jesus okwa li i iyadha momashongo ga tya ngiini, okwa kala aluhe e uvite kutya oku holike kuHe note mu kwathele. — Luk. 22:42, 43.

8. Omomikalo dhini Jehova a li a kwathele Jesus?

⁸ Jesus okwa kala e shi kutya He oye Onzo yomwenyo noye e mu kaleka nomwenyo, nomolwaashono a ti: ‘Ngame ondi na omwenyo, omolwe.’ (Joh. 6:57) Jesus okwa kala i inekela thiluthilu muHe, na Jehova okwa li e mu kwathele naashoka a li a pumbwa, opo a kale nomwenyo. Shoka sha simanenena, Jehova okwa li a kwathele Jesus a kale omudhiginini kuYe. — Mat. 4:4.

9. Omomikalo dhini Jehova a li a ulukile Jesus kutya oku li He omunahole noku na ko nasha naye?

⁹ E li Tate omunahole, Jehova okwa li a  shilipaleke Jesus a mone kutya ota ambidhidhwa kuHe. (Mat. 26:53; Joh. 8:16) Nonando Jehova ka li a gamene Jesus kukehe shoka sha li tashi vulu oku mu etela uupyakadhi, okwe mu kwathele i idhidhimikile omashongo. Jesus okwa li e shi kutya uupyakadhi kehe tashi vulika a pite muwo, owopokathimbo. (Heb. 12:2) Jehova okwa li a ulike kutya oku na ko nasha naJesus, mokupulakena kuye, moku mu pa shoka a pumbwa, moku mu dheula nomoku mu ambidhidha. (Joh. 5:20; 8:28) Ngashingeyi natu ka taleni nkene Tate yetu gwomegulu, he tu kwathele momikalo dha faathana.

10. Shi ikolelela kEpisalomi 66:19, 20, Jehova oha ulike ngiini kutya oku tu hole?

¹⁰ Jehova oha pulakene komagalikano getu. (Lesha Episalomi 66:19, 20.) Jehova ina hala tu mu galikane owala poompito dhimwe, ihe okwa hala tu mu galikane aluhe. (1 Tes. 5:17) Otatu vulu oku mu galikana nesimaneko ethimbo kehe, kutya nduno otu li peni. Iha kala i ipyakidhila unene, opo ando kaa vule oku tu pulakena. Pehala lyaashono, oha kala aluhe i ilongekidha okupulakena komagalikano getu. Uuna tu shi kutya Jehova oha pulakene komagalikano getu, ohashi tu hedhitha popepi naye. Omupisalomi okwa ti: “Ondi hole Omuwa, oshoka ohu uvu eigidho . . . lyandje.” — Eps. 116:1.

11. Jehova ohi inyenge ngiini komagalikano getu?

¹¹ Tate yetu iha pulakene owala komagalikano getu, ihe ohe ga yamukula wo. Omuyapostoli Johannes okwe tu shilipaleke a ti: “Ngele tatu mu [Kalunga] indile shaa shoka she mu opalela, oye ote tu uvu ethimbo kehe ndyoka tatu mu indile.” (1 Joh. 5:14, 15) Odhoshili kutya Jehova otashi vulika kaa yamukule omagalikano getu momukalo moka twa tegelela. Oku shi shoka she tu opalela, onkene omathimbo gamwe eyamukulo lye oaawe nenge a kale a hala tu tegelele. — 2 Kor. 12:7-9.

12-13. Omomikalo dhini Tate yetu gwomegulu he tu pe shoka twa pumbwa?

¹² Jehova ohe tu pe shoka twa pumbwa. Oha ningi shoka a tegelela ootate ayehe ya ninge. (1 Tim. 5:8) Oha pe oyana shoka ya pumbwa. Ina hala tu kale tu na oshimpwiyu shiikulya, shiizalomwa nenge shehala lyokukala. (Mat. 6:32, 33; 7:11) E li Tate omunahole, okwa ninga nokuli elongekidho, opo a ka gwanithe po oompumbwe dhetu adhihe dhomonakuyiwa.

¹³ Shoka sha simanenena, Jehova oha gwanitha po oompumbwe dhetu dhopambepo. Okupitila mOohapu dhe, okwe tu hololela oshili kombinga ye mwene, yelalakano lye, yeityo lyonkalamwenyo noyonakuyiwa. Okwe tu kwathela, mokulongitha aavali yetu nenge yalwe, ye tu longe kombinga ye. Ote tu kwathele natango okupitila maakuluntugongalo aanahole nomaamwatate naamwameme mboka ya pyokoka. Shimwe ishewe, Jehova ohe tu longo okupitila pomakugongala, mpoka hatu longwa pamwe naamwatate naamwameme. Momikalo ndhika nadhilwe, Jehova ohe tu ulukile kutya oku na ohokwe mutse atuhe e li Tate. — Eps. 32:8.

14. Omolwashike Jehova he tu dheula, nohe shi ningi ngiini?

¹⁴ Jehova ohe tu dheula. Tse inatu gwanenena ngaashi Jesus. Onkee ano, Tate yetu omunahole ohe tu dheula, moku tu pa egeeloputudho mpoka sha pumbiwa. Oohapu dhe otadhi tu dhimbulukitha tadhi ti: “Omuwa oha geele kehe ngoka e holike kuye.” (Heb. 12:6, 7) Ohe shi ningi momikalo odhindji. Pashiholelwa, otashi vulika tu leshe sha mOohapu dhe nenge tu uve sha pokugongala, shoka tashi vulika shi tu kwathele tu ninge omalunduluko. Nenge tashi vulika tu mone ekwatho ndyoka twa pumbwa okuza kaakuluntugongalo. Kutya nduno Jehova ote tu kwathele momukalo guni, ohe shi ningi aluhe ti inyengithwa kohole. — Jer. 30:11.

15. Omomikalo dhini Jehova he tu gamene?

¹⁵ Jehova ohe tu kwathele, uuna tu li momaupyakadhi. Ngaashi owala tate omunahole ha  kwathele oyana pomathimbo omadhigu, Tate yetu gwomegulu naye ohe tu kwathele, uuna tu li momaupyakadhi. Oha longitha ombepo ye ondjapuki e tu gamene kwaashoka tashi vulu okuyona po ekwatathano lyetu naye. (Luk. 11:13) Jehova ohe tu kwathele wo, uuna twa gwililwa po pamaiyuvo. Pashiholelwa, okwe tu pa etegameno ekumithi. Etegameno ndyoka lyonakuyiwa ohali tu kwathele tu idhidhimikile omaupyakadhi. Ndhindhilika: Kutya nduno otu ningilwe uuwinayi wu thike peni, Tate yetu omunahole ote ke wu kutha po thiluthilu. Uupyakadhi awuhe tatu iyadha muwo owopokathimbo owala, ihe omayambeko ngoka hage tu zile kuJehova, ogaaluhe. — 2 Kor. 4:16-18.

16. Oshike sha ningwa po, sho Adam inaa vulika kuHe omunahole?

¹⁶ Ohole yaKalunga yoku tu hola, otu yi wetele momukalo moka a li i inyenge, sho Adam inaa vulika kuye. Sho Adam inaa vulika kuHe gwomegulu, ka li we e li oshitopolwa shuukwanegumbo waJehova, mwa kwatelwa noluvalo lwe. (Rom. 5:12; 7:14) Nonando ongawo, Jehova okwa yi mo olunyala, a kwathele oluvalo lwaAdam.

17. Konima yuunashipotha waAdam, Jehova okwa ningi po shike nziya?

¹⁷ Jehova okwa geele Adam, ihe ka li a etha oluvalo lwe ndoka inaalu valwa natango, lu kale kaalu na etegameno. Okwa li a uvaneke nziya kutya aantu mboka haya vulika otaya ka kala oshitopolwa shuukwanegumbo we. (Gen. 3:15; Rom. 8:20, 21) Shika Jehova okwe shi ningitha tashi wapa, okupitila mekuliloyambo lyOmwana omuholike, Jesus. Sho a gandja Omwana e tu sile, okwa ulike kutya oku tu hole noonkondo. — Joh. 3:16.

18. Omolwashike tatu vulu okukala nuushili kutya Jehova okwa hala tu kale oyana, nokuli nuuna twa tsu mo dhetu?

¹⁸ Nonando inatu gwanenena, Jehova okwa hala tu kale oshitopolwa shuukwanegumbo we, noine tu tala ko tu li omutenge. Otashi vulika tu mu yemateke nenge tu tse mo dhetu omathimbo  gamwe, ihe Jehova oha kala e na einekelo kutya otatu ka galukila kuye. Jesus okwa ulike kutya Jehova oku tu hole shi thike peni, sho a gandja eyele lyomumati ngoka a li a kana. (Luk. 15:11-32) Omusamane gwomeyele ndyoka, ka li nando a kanitha einekelo kutya omwanamati ita galukile we kegumbo. Sho omwanamati a galukile kegumbo, okwa li e mu taamba nomaako agehe. Ngele otwa thiga po Jehova e tatu iyele ombedhi, otatu vulu okukala nuushili kutya Tate yetu omunahole, okwi ilongekidha noku na ehalo lyoku tu taamba ko ishewe.

19. Jehova ota ka opalekulula ngiini shoka sha etithwa kuAdam?

¹⁹ Tate yetu ota ka opalekulula ashihe shoka sha etithwa kuAdam. Konima yuunashipotha waAdam, Jehova okwa tokola i ihogololele oohandimwe ye li 144 000 mboka taya ka pangela megulu pamwe nOmwana, Jesus, ye li aakwaniilwa naayambi. Jesus naamboka taya ka pangela pamwe naye, otaya ka kwathela aantu mboka haya vulika ya galukile megwaneneno, muuyuni uupe. Opo ihe konima ngele aantu mboka ya piti memakelo lyahugunina, Kalunga ote ke ya pa omwenyo gwaaluhe. Tate yetu ota ka kala a nyanyukwa okumona evi lyu udha oyanamati noyanakadhona ya gwanenena. Ethimbo ndyoka itali ka kala tuu linyanyudha!

20. Omomikalo dhini Jehova he tu ulukile kutya oku tu hole noonkondo, noshike tatu ka kundathana moshitopolwa tashi landula?

²⁰ Jehova okwe shi ulika kutya oku tu hole noonkondo. Oku li Tate a dhenga mbanda. Oha uvu omagalikano getu, nohe tu pe shoka twa pumbwa kutya nduno opalutu nenge pambepo. Ohe tu dheula nohe tu ambidhidha. Ote ke tu ningila wo iinima iiwanawa monakuyiwa. Ohashi tu nyanyudha okutseya kutya Tate yetu oku tu hole noku na ko nasha natse! Moshitopolwa tashi landula, otatu ka kundathana omikalo moka tatu vulu okuulika kutya otwa pandula ohole ye, tu li oyana.