1. Ko e heigoa ka taute he tagata ka manako ke fina atu ke he patuiki i Peresia?

MANAMANATU LA kua moui a koe he 2,500 e tau kua mole i Peresia. Manako a koe ke vagahau ke he patuiki he motu hagaao ke he taha matakupu, ti fenoga atu a koe ke he taone he patuiki i Susana. To liga nakai manatu a koe ke fina atu ke he fale patuiki ato moua e fakaatāaga. Ka fina atu pulenoa a koe, to kelipopo a koe!​—Eseta 4:11.

2. Fēfē e logonaaga ha tautolu ka tutala mo Iehova?

² Loto fakaaue mooli a tautolu ki a Iehova ha kua nakai tuga e patuiki i Peresia! Mua atu e malolō mo e uho ha Iehova ke he ha pule he tagata, ka e fakaatā e ia a tautolu ke tutala mo ia he ha magaaho. Manako a ia ki a tautolu ke logona hifo e atāina ke tutala ki a ia. Ma e fakatai, pete he ha ha ia Iehova e tau matahigoa matalahi tuga e Tufuga Homo Ue Atu, Malolō Ue Atu, mo e Iki Pule Katoatoa, ka e uiina a tautolu ke tutala ki a ia he fakaaoga e kupu mafanatia ko e “Matua.” (Mata. 6:9) Aamotia mooli ha kua manako a Iehova ki a tautolu ke logona hifo e mafanatia mo e tata lahi ki a Ia!

3. Ko e ha kua fakahigoa e tautolu a Iehova ko e “Matua,” ti ko e heigoa ka fakatutala he vala tala nei?

³ Latatonu ke fakahigoa e tautolu a Iehova ko e “Matua,” ha ko ia ko e Punaaga he moui ha tautolu. (Sala. 36:9) Ha ko e Matua ha tautolu a ia, lata a tautolu ke omaoma ki a ia. Ka taute e tautolu e mena ne ole mai a ia, to moua e tautolu e tau monuina mua ue atu. (Hepe. 12:9) Ko e tau monuina ia ne putoia e moui tukulagi ke he lagi po ke lalolagi. To moua foki e tautolu e tau aoga mogonei. Ko e vala tala nei to fakatutala ke he tau gahua ha Iehova ko e Matua fakaalofa mogonei mo e kakano kua iloa tonu ai to nakai tiaki e ia a tautolu anoiha. Ka e fakamua, kia fakatutala  a tautolu ke he kakano kua mauokafua a tautolu kua lahi mahaki e fakaalofa he Matua ha tautolu he lagi ki a tautolu.

4. Ko e ha ne uka he falu ke onoono ki a Iehova ko e Matua ha lautolu?

⁴ Uka nakai ia koe ke manamanatu ke he Atua ko e Matua haau? Falu ne liga logona hifo e fakateaga he fakatatai ki a Iehova. Fakauaua a lautolu kua manamanatu e Atua Malolō Ue Atu hagaao ki a lautolu takitokotaha. Ka e nakai manako e Matua fakaalofa ha tautolu ke manamanatu pihia a tautolu. Foaki mai e ia e moui ki a tautolu ti manako ke moua e tautolu e fakafetuiaga mo ia. He talahau e mena mooli nei, fakamaama he aposetolo ko Paulo ke he tau tagata fanogonogo haana i Atenai ko Iehova kua “nakai ni mamao a ia mo tautolu takitokotaha.” (Gahua 17:24-29) Manako e Atua ki a tautolu takitokotaha ke o atu ki a ia tuga e tama ne fina atu ke he matua fakahelehele.

5. Ko e heigoa kua fakaako e tautolu mai he mena ne tupu ke he taha matakainaga fifine Kerisiano?

⁵ Falu ne liga uka ke onoono ki a Iehova ko e Matua ha lautolu, ha kua tote po ke nakai fakakite he matua taane ha lautolu e fakaalofa hofihofi ki a lautolu. Manamanatu ke he talahauaga he taha matakainaga fifine Kerisiano. “Vagahau vale tumau e matua taane haaku,” he ui e ia. “He kamata au ke fakaako e Tohi Tapu ti uka au ke tata ke he Matua he lagi. Ka e fai magaaho ti iloa e au a Iehova, ne hiki e tau mena oti ia.” Pihia nakai e tau logonaaga haau? Ka pihia, kia mafanatia kua maeke foki a koe ke kitia a Iehova ko e Matua mitaki lahi mahaki.

6. Hagaao ki a Mataio 11:27, ko e heigoa taha puhala kua lagomatai e Iehova a tautolu ke onoono ki a ia ko e Matua fakaalofa ha tautolu?

⁶ Taha puhala kua lagomatai e Iehova a tautolu ke onoono ki a ia ko e Matua fakaalofa ha tautolu he fakamau e tau kupu mo e tau gahua ha Iesu i loto he Tohi Tapu. (Totou Mataio 11:27.) Muitua fakatata e Iesu e mahani he Matua haana ati pehē a ia: “Ko ia kua kitia au, kua kitia foki e ia e Matua.” (Ioane 14:9) Fa mahani a Iesu ke tutala hagaao ke he matagahua ne taute e Iehova ko e Matua. He tau Evagelia hokoia ne fā, fakaaoga e Iesu e kupu “Matua” kavi ke he laga 165 he hagaao ki a Iehova. Ko e ha ne lahi e tutala ha Iesu hagaao ki a Iehova? Taha kakano ke omoomoi e tau tagata ke talitonu ko Iehova ko e Matua fakaalofa.​—Ioane 17:25, 26.

7. Ko e heigoa kua fakaako e tautolu hagaao ki a Iehova mai he puhala ne fehagai a Ia mo e Tama haana?

⁷ Manamanatu ke he mena kua fakaako e tautolu hagaao ki a Iehova mai he puhala ne fehagai a Ia ke he Tama haana ko Iesu. Logona tumau e Iehova e tau liogi ha Iesu. Nakai ni logona e Ia e tau liogi ha Iesu ka e tali foki e Ia. (Ioane 11:41, 42) Pete ni e tau kamatamata ne fehagai mo Iesu, logona hifo e ia e fakaalofa mo e lalagoaga he Matua haana.​—Luka 22:42, 43.

8. He tau puhala fe ne leveki e Iehova a Iesu?

⁸ Talahau e Iesu ko e Matua ko e Punaaga mo e Fakatumau he moui haana ati pehē a ia: “Ne moui foki au ke he Matua.” (Ioane 6:57) Falanaki katoatoa a Iesu ke he Matua haana, ti leveki e Iehova e tau manako fakatino ha Iesu. Mua atu ai, leveki e Iehova e moui fakaagaaga ha Iesu.​—Mata. 4:4.

9. Fakakite fēfē e Iehova ko e Matua fakaalofa lahi mahaki a ia ki a Iesu?

⁹ Ha ko e Matua fakaalofa, eketaha a Iehova ke iloa e Iesu kua moua e ia e lalagoaga he Matua haana. (Mata. 26:53; Ioane 8:16) Pete he nakai puipui e Iehova a Iesu mai he tau fakamamahi oti kana, lagomatai e Ia a Iesu ke fakauka ke he tau kamatamata. Iloa e Iesu ko e tau fakamamahi ne liga moua e ia to nakai tumau. (Hepe. 12:2) Fakakite e Iehova kua leveki e Ia a Iesu he fanogonogo ki a ia, foaki ke lata mo ia,  fakaako a ia, mo e lalago a ia. (Ioane 5:20; 8:28) Kitekite la mogonei ke he levekiaga he ha tautolu a Matua he lagi ki a tautolu he puhala pihia.

10. Hagaao ke he Salamo 66:19, 20, fakakite fēfē e Iehova kua fakaalofa a ia ki a tautolu?

¹⁰ Fanogonogo a Iehova ke he tau liogi ha tautolu. (Totou Salamo 66:19, 20.) Nakai manako a ia ki a tautolu ke fakakaupā e tau liogi ha tautolu; tomatoma e ia a tautolu ke liogi tumau. (1 Tesa. 5:17) Maeke a tautolu ke liogi fakalilifu ke he Atua ha tautolu he ha magaaho mo e he ha matakavi. Nakai lavelave foki a ia ke fanogonogo ki a tautolu; atā mo e mataala tumau a ia. Ka loto fakaaue a tautolu ha kua fanogonogo a Iehova ke he tau liogi ha tautolu, to futia a tautolu ki a ia. “Kua fakaalofa atu au, ha kua fanogonogo mai a Iehova ke he haku a leo,” he ui he salamo.​—Sala. 116:1.

11. Tali fēfē e Iehova e tau liogi ha tautolu?

¹¹ Nakai ni fanogonogo e Matua ha tautolu ke he tau liogi ha tautolu ka e tali foki e ia. Tala mai he aposetolo ko Ioane ki a tautolu: “Kaeke ke ole atu ai e tautolu ha mena ke lata mo e hana [Atua] finagalo, ti fanogonogo mai ai a ia kia tautolu.” (1 Ioa. 5:14, 15) Mooli, liga nakai tali e Iehova e tau liogi ha tautolu he puhala kua amanaki a tautolu ki ai. Iloa e ia e mena kua mua e aoga ki a tautolu, ti falu magaaho ko e nakai e tali haana po ke manako a ia ki a tautolu ke fakatali.​—2 Kori. 12:7-9.

12-13. He tau puhala fe kua foaki he Matua ha tautolu he lagi ke lata mo tautolu?

¹² Foaki e Iehova ke lata mo tautolu. Taute e ia e tau mena kua manako a ia ke he tau matua taane oti ke taute. (1 Timo. 5:8) Leveki e ia e tau manako fakatino he tau fanau haana. Nakai manako a ia ki a tautolu ke fakaatukehe ke he tau mena kai, tau mena tui, po ke tau mena ke nonofo ai. (Mata. 6:32, 33; 7:11) Tuga e matua fakahele, fakatoka foki e Iehova ke fakamakona e tau manako oti ha tautolu anoiha.

¹³ Mua atu e aoga, foaki e Iehova ke lata mo e tau manako fakaagaaga ha tautolu. Puhala he haana Kupu kua fakakite e ia e kupu mooli hagaao ki a ia ni, haana finagalo, kakano he moui, mo e vahā anoiha. Fakakite e ia ki a tautolu e levekiaga fakatagata he mogo fakamua ne fakaako e tautolu e kupu mooli ti fakaaoga e tau matua po ke taha faiaoga ke lagomatai a tautolu ke iloa a Ia. Matutaki mogoia a tautolu ke moua e lalagoaga totonu mai he tau motua fakaalofa mo e falu matakainaga motua fakaagaaga he fakapotopotoaga. Lafi ki ai, fakaako e Iehova a tautolu puhala he tau feleveiaaga ne fakaako auloa mo e magafaoa fakaagaaga ha tautolu. He tau puhala nei mo e falu foki, fakakite e Iehova e fiafia fakamatua haana ki a tautolu oti.​—Sala. 32:8.

14. Ko e ha kua fakaako e Iehova a tautolu, ti taute fēfē e ia?

¹⁴ Fakaako e Iehova a tautolu. Kehe mai ia Iesu, nakai mitaki katoatoa a tautolu. Ke maeke ke fakaako a tautolu, akonaki he Matua fakaalofa a tautolu kaeke kua lata. Fakamanatu he Kupu haana ki a tautolu: “Ha ko ia kua ofania he Iki [Iehova] kua akonaki atu a ia kia ia.” (Hepe. 12:6, 7) Akonaki e Iehova a tautolu ke he tau puhala loga. Tuga anei, fai mena ne totou e tautolu he Kupu haana po ke logona e tautolu he tau feleveiaaga kua liga fakatonu a tautolu. Po ke liga moua e tautolu e lagomatai kua lata mai he tau motua. He ha puhala ni, kua fakalagalaga tumau he fakaalofa e akonaki ha Iehova.​—Iere. 30:11.

15. He tau puhala fe ne puipui e Iehova a tautolu?

¹⁵ Lalago e Iehova a tautolu ke fakauka ke he tau kamatamata. Tuga ni e matua taane fakahele ne lalago e tau fanau haana he tau magaaho uka, fakatumau e Matua he lagi ke lalago a tautolu ke kautū ke he tau kamatamata. Fakaaoga e ia e agaaga tapu haana ke puipui a tautolu mai he hagahaga kelea fakaagaaga. (Luka 11:13)  Puipui foki e Iehova a tautolu ka loto lolelole. Ma e fakatai, foaki e ia ki a tautolu e amaamanakiaga mua ue atu. Ko e amaamanakiaga ia ma e vahā anoiha kua lagomatai a tautolu ke fakauka ke he tau mena vihi. Manamanatu ke he mena nei: Pete ni he tutupu e tau mena kelea ki a tautolu, to fakamaulu katoatoa he Matua fakaalofa ha tautolu e tau matematekelea ne lauia mo tautolu. Ko e tau kamatamata ne fehagai mo tautolu kua nakai tumau e tau mena nei, ka ko e tau monuina ne foaki mai e Iehova kua tukulagi ia.​—2 Kori. 4:16-18.

16. Ko e heigoa e mena ne tupu he nakai omaoma a Atamu ke he Matua fakaalofa haana?

¹⁶ Kitia e tautolu e fakamooliaga he fakaalofa ha Iehova ma tautolu he puhala ne tali a ia ke he tau lekua ne tupu fakamua he magafaoa haana he lalolagi. He nakai omaoma a Atamu ke he Matua haana he lagi, ne nakai liu a ia fai vala he magafaoa fiafia ha Iehova ke lata mo ia mo e tau hologa haana. (Roma 5:12; 7:14) Ka e fai mena ne taute e Iehova ke lagomatai.

17. He mole e totoko ha Atamu, ko e heigoa ne taute agataha e Iehova?

¹⁷ Fakahala e Iehova a Atamu ka e mavehe a ia ke lagomatai e tau hologa ha Atamu ke fai amaamanakiaga. Mavehe agataha a Iehova to liuaki mai e ia e tau tagata omaoma ke he magafaoa haana. (Kene. 3:15; Roma 8:20, 21) Fakatoka e Iehova e mena nei he fakavē ke he poa lukutoto he Tama fakahele haana ko Iesu. He foaki e Iehova e Tama haana ke lata mo tautolu, fakakite e Ia e lahi mahaki he fakaalofa haana ki a tautolu.​—Ioane 3:16.

18. Ko e ha kua iloa e tautolu kua manako a Iehova ke eke a tautolu mo tau fanau haana, pete ka hehē a tautolu ki a Ia?

¹⁸ Pete kua nakai mitaki katoatoa a tautolu, manako a Iehova ki a tautolu ke fakalataha he magafaoa haana, ti nakai manamanatu a ia kua fakamamafa a tautolu ki a ia. Liga fakaita e tautolu a ia po ke fai magaaho ne hehē, ka e nakai  tiaki e Iehova a tautolu. Fakatātā e Iesu e hokulo he levekiaga fakamatua ha Iehova he tala ke he tama mahani uka. (Luka 15:11-32) Ko e matua taane he fakatai ne nakai oti e amanaki ke he tama haana ke liu mai. He liu mai e tama ki kaina, ne liu e matua taane feleveia fakamakai a ia. Ka taute e tautolu e hehē ki a Iehova ti fakatokihala, to mauokafua a tautolu kua mautali mo e makai e Matua fakaalofa ke liu fakafeleveia mai a tautolu.

19. To utakehe fēfē e Iehova e tau lekua ne fakatupu e Atamu?

¹⁹ To utakehe he Matua ha tautolu e tau lekua oti kana ne fakatupu e Atamu. Mole e totoko ha Atamu, finagalo a Iehova ke hiki mai e 144,000 he tau tagata ka fekafekau ko e tau patuiki mo e tau ekepoa he lagi fakalataha mo e haana Tama. Ko Iesu mo lautolu ia kua pule fakalataha ka lagomatai e tau tagata omaoma ke hokotia ke he mitaki katoatoa he lalolagi foou. Ka mole e kautū ha lautolu ke he kamatamata fakahiku he mahani omaoma, to foaki he Atua ki a lautolu e moui tukulagi. To fiafia mogoia e Matua ha tautolu he kitia e lalolagi kua puke ke he tau fanau mitaki katoatoa haana. Ko e magaaho homo ue atu mooli a ia!

20. He tau puhala fe kua fakakite e Iehova kua lahi mahaki e fakaalofa haana ki a tautolu, ti ko e heigoa ka fakatutala ki ai he vala tala ka mui mai?

²⁰ Fakakite e Iehova kua lahi mahaki e fakaalofa haana ki a tautolu. Ko e Matua mitaki lahi mahaki a ia. Logona e ia e tau liogi ha tautolu ti foaki e mena kua lata mo tautolu he puhala fakatino mo e fakaagaaga. Fakaako mo e lalago e ia a tautolu. Ha ha foki ia Iehova e tau monuina homo ue atu ne fakatoka mai i mua ma tautolu. Mafanatia e tau loto ha tautolu ke iloa kua lahi mahaki e fakaalofa he Matua ha tautolu ki a tautolu! Ko e vala tala ka mui mai to fakatutala ke he tau puhala ka fakakite e tautolu ko e tau fanau haana, kua loto fakaaue a tautolu ke he haana fakaalofa.