1. Mehleng ya bogologolo, o be o swanetše go dira’ng ge o be o nyaka go bolela le kgoši ya Peresia?

NAGANA o be o phela kua Peresia mengwageng e 2 500 e fetilego. Go ba le taba e itšego yeo o nyakago go e botša kgoši. Ke moka o swanelwa ke go tšea leeto la go ya motseng wa Shushani moo kgoši e dulago gona. Eupša o swanetše go kgopela pele o ka bolela le kgoši. Ge e ba o ka leka go bolela le kgoši e se ya go dumelela, o be o ka bolawa.—Esitere 4:11.

2. Jehofa o nyaka gore re ikwe bjang ka go bolela le yena?

² Ruri go a thabiša go tseba gore Jehofa ga a swane le kgoši yeo ya Peresia! Jehofa o na le matla e bile o bohlokwa kudu go feta kgoši le ge e le efe, eupša o nyaka gore re bolele le yena ka nako le ge e le efe. O nyaka gore re se ke ra tšhaba go bolela le yena. Nagana feela, le ge Jehofa e le Mmopi yo Mogolo, Ramatlaohle le Mmuši yo Mogolo, o nyaka gore re no mmitša ‘Tate.’ (Mat. 6:9) Ruri go a re a thabiša go tseba gore Jehofa o nyaka gore re be le segwera se sebotse le yena!

3. Ke ka baka la’ng re swanetše go bitša Jehofa gore ke “Tate,” gona re tlo ithuta’ng sehlogong se?

³ Re swanetše go bitša Jehofa gore ke “Tate” ka gobane ke Mothopo wa bophelo, goba ke yena a re neago bophelo. (Ps. 36:9) Ka ge e le Tatago rena, re swanetše go mo kwa. Le gona ge e ba re dira seo a re kgopelago sona, o tla re šegofatša kudu. (Baheb. 12:9) Tše dingwe tša ditšhegofatšo tšeo ke go tlo phela ka mo go sa felego mo lefaseng goba legodimong. Le gona bjale go na le ditšhegofatšo tšeo re di hwetšago. Sehlogong se re tlo bona gore ke ka baka la eng re re Jehofa ke Tatago rena yo a re ratago, e bile re tlo ithuta gore ke ka baka la eng re ka tshepa gore a ka se tsoge a  re lahlile. Eupša a re thomeng pele ka go kwa gore ke ka baka la eng re ka kgodišega gore Tatago rena wa legodimong o re rata kudu, e bile o a re hlokomela.

4. Ke ka baka la’ng batho ba bangwe ba bona go le thata go tšea Modimo e le Tatago bona?

⁴ Na o bona go le thata go tšea Modimo e le Tatago? Batho ba bangwe ba ipona ba se bohlokwa ge ba ipapetša le Jehofa. Ga ba tshepe gore Modimo Ramatlaohle o na le taba le yo mongwe le yo mongwe wa bona. Eupša Tatago rena yo a re ratago ga a nyake re ikwa ka tsela yeo. Ke ka baka leo moapostola Paulo a ilego a botša batho ba kua Athene gore Jehofa o re file bophelo, e bile o nyaka re e ba bagwera ba gagwe. Ka morago ga gore a ba botše taba ye, o ile a ba botša le gore Jehofa “ga a kgole le yo mongwe le yo mongwe wa rena.” (Dit. 17:24-29) Modimo o nyaka gore yo mongwe le yo mongwe wa rena a bolele le yena go swana le ge ngwana a bolela le motswadi wa gagwe yo a mo ratago le yo a mo hlokomelago.

5. Re ithuta’ng mohlaleng wa kgaetšedi yo mongwe wa Mokriste?

⁵ Batho ba bangwe ba ka hwetša go le thata go tšea Jehofa e le Tatago bona ka gobane ge ba be ba sa gola botatago bona ba be ba sa ba rate. Ka mohlala, kgaetšedi yo mongwe o re: “Tate o be a re tlaiša kudu. Ge ke be ke thoma go ithuta Beibele, go be go le thata gore ke tšee Jehofa e le Tate wa ka. Eupša dilo di ile tša fetoga ka morago ga gore ke tsebe Jehofa gabotse.” Na le wena o ikwa go swana le kgaetšedi yo? Ge e ba le wena o ikwa ka tsela yeo, o se ke wa nyama. Ge nako e dutše e eya, o tlo bona gore Jehofa ke Tatago yo lerato.

6. Go ya ka Mateo 11:27, Jehofa o re thušitše bjang go bona gore ke Tatago rena yo lerato?

⁶ Jehofa o re thušitše go bona gore ke Tatago rena yo lerato ka go dira gore ka Beibeleng go ngwalwe dilo tšeo Jesu a ilego a di dira le go di bolela. (Bala Mateo 11:27.) Ge Jesu a be a le mo lefaseng, o be a ekiša Tatagwe ka selo se sengwe le se sengwe moo a ilego a bolela gore: “Yo a bonego nna o bone le Tate.” (Joh. 14:9) Gantši ge Jesu a be a bolela ka Jehofa o be a mmitša Tate. Ka mohlala, ka Diebangeding tše nne, Jesu o ile a bitša Jehofa “Tate” ka makga a ka bago a 165. Ke ka baka la’ng Jesu a ile a bolela kudu ka Jehofa? Ka gobane o be a nyaka gore batho ba kgodišege gore Jehofa ke Tate yo lerato.—Joh. 17:25, 26.

7. Re ithuta’ng tseleng yeo Jehofa a bego a swara Morwa wa gagwe ka yona?

⁷ Re ithuta’ng tseleng yeo Jehofa a bego a swara Morwa wa gagwe ka yona? Re ithuta gore ka mehla Jehofa o be a theetša dithapelo tša Jesu. Le gona o be a sa di theetše feela, eupša o be a di araba. (Joh. 11:41, 42) Mathateng ka moka ao Jesu a bego a eba le ona, o be a kgona go bona gore Jehofa o a mo rata le gore o na le yena.—Luka 22:42, 43.

8. Jehofa o ile a thuša Jesu ka ditsela dife?

⁸ Jesu o be a dumela gore Tatagwe ke yena a mo thekgago le go mo nea bophelo, ke ka baka leo a ilego a bolela gore: “Ke phela ka baka la Tate.” (Joh. 6:57) Jesu o be a tshepa Tatagwe kudu, gomme Jehofa o ile a mo thuša ka go mo nea selo se sengwe le se sengwe seo a bego a se hloka gore a phele. Sa bohlokwa le go feta, Jehofa o ile a thuša Jesu gore a dule a mmotegela.—Mat. 4:4.

9. Jehofa o bontšhitše bjang gore o be a rata Jesu le go mo hlokomela?

⁹ Ka ge Jehofa e le Tate yo lerato, o ile a thuša Jesu gore a bone gore o a mo hlokomela. (Mat. 26:53; Joh. 8:16) Le ge Jehofa a se a ka a šireletša Jesu dilong ka moka tšeo di ka mo gobatšago, o ile a mo thuša go kgotlelela. Jesu o be a tseba gore mathata ka moka ao a bego a mo wela e be e tlo ba a nakwana. (Baheb. 12:2) Jehofa o ile a bontšha gore o rata Jesu ka go  mo theetša, go mo hlokomela, go mo ruta le go mo thekga. (Joh. 5:20; 8:28) Ga bjale a re boneng kamoo Tatago rena wa legodimong a re bontšhago gore o re rata go swana le Jesu.

10. Go ya ka Psalme 66:19, 20, Jehofa o bontšha bjang gore o a re rata?

¹⁰ Jehofa o theetša dithapelo tša rena. (Bala Psalme 66:19, 20.) Jehofa ga a re botše gore re rapele gakae, re rapele ka eng goba re rapele nako e kaakang, go ena le moo o nyaka gore re rapele ka mehla. (1 Bathes. 5:17) Re ka rapela Modimo nako e nngwe le e nngwe, go sa šetšwe gore re mo rapela re le kae. Jehofa o dula a hlwaile tsebe ge re mo rapela. Ge re tseba gore Jehofa o theetša dithapelo tša rena, seo se dira gore re mo rate le go feta. Mopsalme o itše: ‘Ke rata Jehofa, ka ge a ekwa lentšu la ka.’—Ps. 116:1.

11. Jehofa a ka araba dithapelo tša rena bjang?

¹¹ Tatago rena ga a no theetša dithapelo tša rena, eupša e bile o a di araba. Moapostola Johane o re: “Go sa šetšwe seo re se kgopelago go ya ka thato ya Modimo, Modimo o a re kwa.” (1 Joh. 5:14, 15) Ke nnete gore Jehofa a ka no se arabe dithapelo tša rena ka tsela yeo re naganago gore o tlo di araba ka yona. Ka dinako tše dingwe karabo ya gagwe e ka ba aowa goba a re araba ka moragonyana, ka gobane o tseba seo re se hlokago.—2 Bakor. 12:7-9.

12-13. Jehofa o bontšha bjang gore o a re hlokomela?

¹² Jehofa o a re hlokomela. Go no swana le ge a laela botate gore ba hlokomele malapa a bona, le yena o hlokomela yo mongwe le yo mongwe wa rena. (1 Tim. 5:8) Jehofa o re nea dilo tšeo re di hlokago e le gore re phele. Ga a nyake go re bona re tshwenyega ka dijo, diaparo le madulo. (Mat. 6:32, 33; 7:11) Ka ge Jehofa e le Tate yo lerato, o a tseba gore re tlo hloka eng nakong e tlago, e bile o tlo kgonthišetša gore re hwetša dilo tšeo.

¹³ Sa bohlokwa kudu, Jehofa o re nea dilo tšeo re di hlokago gore re be bagwera ba gagwe. Ka Beibeleng, Jehofa o re botša gore ke yena mang, gore ke ka baka la eng a bopile dilo ka moka le gore go tlo direga eng nakong e tlago. O ile a bontšha gore o rata yo mongwe le yo mongwe wa rena ka go diriša batswadi ba rena goba batho ba bangwe go re ruta ka yena. E bile o re thuša go ba bagwera ba gagwe a diriša bagolo bao ba nago lerato ka phuthegong le bana babo rena le dikgaetšedi bao ba godilego moyeng. Go tlaleletša go seo, Jehofa o re ruta a diriša diboka tša rena, moo re ithutago ka yena re na le bana babo rena le dikgaetšedi. Jehofa o diriša ditsela tše le tše dingwe go bontšha gore o a re hlokomela.—Ps. 32:8.

14. Ke ka baka la’ng Jehofa a re ruta goba a re laya, gona o dira seo bjang?

¹⁴ Jehofa o a re ruta. Rena ga re swane le Jesu ka gobane re belegwe re na le sebe gomme seo se dira gore re dire diphošo. Ka gona, ge Tatago rena a re ruta o fela a re laya ge go hlokagala. Beibele e re gopotša gore: “Jehofa o laya yo a mo ratago.” (Baheb. 12:6, 7) Jehofa o re laya ka ditsela tše dintši. Ka mohlala, ge re bala Beibele goba re le dibokeng, re ka lemoga gore re swanetše go fetoša tsela yeo re naganago ka yona le kamoo re dirago dilo ka gona. Goba mohlomongwe Jehofa a ka re laya a diriša bagolo. Go sa šetšwe gore Jehofa o diriša eng go re laya, ka mehla o dira seo ka gobane a re rata.—Jer. 30:11.

15. Jehofa o re thekga ka ditsela dife?

¹⁵ Jehofa o re thuša gore re kgone go kgotlelela mathata. Go no swana le ge tate yo lerato a thekga bana ba gagwe ge ba na le mathata, le Tatago rena wa legodimong o a re thekga ge re na le mathata. Jehofa o re nea moya o mokgethwa gore re dule re na le segwera se sebotse le yena. (Luka 11:13) E bile o a re homotša ge re nyamile. Ka mohlala, o re tshepiša go tlo re direla dilo tše dibotse lefaseng le lefsa. Go tseba  gore Modimo o tlo re direla dilo tše dibotse go re thuša go kgotlelela mathata. Nagana ka taba ye: Tatago rena yo lerato o tlo fediša mathata ka moka ao a re welago gona bjale, gomme a dira gore re se sa a gopola. Mathata ao a re welago gona bjale a ka se dule a le gona, eupša dilo tše dibotse tšeo Jehofa a tshepišago go re direla tšona di tlo dula di le gona.—2 Bakor. 4:16-18.

16. Go ile gwa direga’ng ka morago ga gore Adama a se kwe Tatagwe wa legodimong?

¹⁶ Re kgona go bona gore Jehofa o a re rata ge re nagana ka seo a ilego a se dira ka morago ga gore Adama a se mo kwe. Ka morago ga gore Adama a se kwe Tatagwe wa legodimong, o ile a se sa ba karolo ya lapa la Jehofa. Seo se ile sa dira gore le bana bao a bego a tlo ba le bona e se be karolo ya lapa la Jehofa. (Baroma 5:12; 7:14) Eupša Jehofa o ile a dira se sengwe gore bana ba Adama e tle e be karolo ya lapa la gagwe.

17. Jehofa o ile a dira’ng gateetee ka morago ga gore Adama a dire sebe?

¹⁷ Ka morago ga gore Adama a dire sebe, Jehofa o ile a mo otla. Eupša o ile a tshepiša gore o tla thuša bana ba Adama. Gateetee o ile a tshepiša gore bana ba Adama bao ba kwago ba be ba tla boela ya ba karolo ya lapa la gagwe. (Gen. 3:15; Baroma 8:20, 21) Jehofa o ile a dira gore seo a se tshepišitšego se kgonege a diriša sehlabelo sa Morwa wa gagwe yo a mo ratago kudu, e lego Jesu. Ka gona o ile a bontšha gore o re rata kudu ka go romela Morwa wa gagwe gore a tlo hwela dibe tša rena.—Joh. 3:16.

18. Ke ka baka la’ng o ka kgodišega gore ge e ba o tlogetše Jehofa eupša o itshola, o tlo go amogela ge o boela go yena?

¹⁸ Le ge re belegwe re na le sebe, Jehofa o nyaka gore re be karolo ya lapa la gagwe, e bile ga a bone re le morwalo. Ka dinako tše dingwe re dira diphošo gomme re nyamiša Jehofa, eupša ga a re ngale. Jesu o ile a bontšha kamoo Jehofa a re ratago ka gona ka go diriša papišo ya morwa  wa lehlaswa. (Luka 15:11-32) Tate wa papišong yeo, o be a dula a holofetše gore ka letšatši le lengwe morwa wa gagwe o tla boa gae. Letšatšing leo morwa wa gagwe a boilego ka lona, tatagwe o ile a mo amogela ka lethabo le legolo kudu. Ge e ba o tlogetše Jehofa eupša o itshola, kgodišega gore ge o ka boela go yena o tlo go amogela ka lethabo.

19. Jehofa o tlo lokiša bjang mathata ao a bakilwego ke Adama?

¹⁹ Jehofa o tlo lokiša mathata ka moka ao a bakilwego ke Adama. Ka morago ga gore Adama a dire sebe, Jehofa o ile a phetha ka gore a tle a tšee batho ba 144 000 mo lefaseng gore ba tle ba buše le Morwa wa gagwe legodimong e le dikgoši le baperisita. Lefaseng le lefsa, Jesu le bao a tla bego a buša le bona ba tla thuša batho bao ba kwago gore ba phethagale. Ka morago ga mengwaga e sekete, batho bao ba tla lekwa la mafelelo go bontšha gore ba kwa Modimo. Ke moka bao ba tlago go botegela Jehofa ba tla hwetša bophelo bjo bo sa felego. Ka morago ga moo, Tatago rena o tla thaba ge a bona mo lefaseng go tletše bana ba gagwe bao ba phethagetšego. Ruri bophelo bo tla be bo thabiša kudu nakong yeo!

20. Jehofa o bontšhitše bjang gore o re rata kudu, gona re tlo ithuta’ng sehlogong se se latelago?

²⁰ Jehofa o bontšhitše gore o re rata kudu. Ga go na tate yo a swanago le yena. O theetša dithapelo tša rena e bile o re nea dilo tšeo re di hlokago gore re phele, le gore re dule re le bagwera ba gagwe. O a re ruta e bile o a re thekga. E bile o tlo re direla dilo tše dibotse lefaseng le lefsa. Ruri go a thabiša go tseba gore Tatago rena o a re rata e bile o a re hlokomela! Sehlogong se se latelago re tlo kwa gore re ka dira eng go bontšha gore le rena re rata Tatago rena.