1. Omuntu akaba aine kukora ki yaaba naayenda kureeba omugabe wa Buperesi?

TEERA akashushani ngu emyaka 2,500 ehingwire okaba nootuura omuri Buperesi. Oine eki orikwenda kugambira omugabe w’eihanga eryo, n’ahabw’ekyo ogyenda oza omu rurembo Shushani ahu omugabe arikutuura. Kwonka otakagambire n’omugabe, oine kubanza waashaba orusa. Waateeraho kugamba nawe otabandize kushaba orusa noobaasa kwitwa!​—Est. 4:11.

2. Yehova naayenda ngu twehurire tuta twaba nituza kugamba nawe?

² Ka twine okushemererwa kureeba ngu Yehova tari nk’omugabe wa Buperesi ogwo! Yehova naakirira kimwe omutegyeki weena ow’abantu, kwonka naayakiira abantu boona obwire bwona. Naayenda ngu tutatiina kugira eki twamugambira. Nk’eky’okureeberaho, n’obu Yehova araabe aine ebitiinisa, nk’Omuhangi Orikukirayo, ow’Obushoboorozi Bwona, n’Omutegyeki w’ebintu byona, naayenda ngu tumwete “Tataitwe,” ekitiinisa ekirikworeka ngu twine omukago murungi nawe. (Mat. 6:9) Ka nikitushemeza kureeba ngu Yehova naayenda tumwirire haihi nawe!

3. Ahabw’enki turikubaasa kugira ngu Yehova ni “Tataitwe,” kandi nituza kushwijuma ki omu kicweka eki?

³ Nituba tuhikire kweta Yehova “Tataitwe” ahakuba niwe Bukomooko bw’amagara gaitu. (Zab. 36:9) Ahabw’okugira ngu ni Tataitwe, twine obujunaanizibwa bw’okumworobera. Twakora ebi arikwenda ngu tukore, nitutunga emigisha mingi. (Heb. 12:9) Emigisha egyo neetwariramu amagara agatahwaho, yaaba omu iguru nari omu nsi. Na hati nitugasirwa munonga. Ekicweka eki nikituhamiza oku Yehova ari Tataitwe owa rukundo hati, n’oku turikuhamya ngu tarikwija kututsigaho omu biro by’omumaisho.  Kwonka ka tubanze tureebe ahabw’enki turikubaasa kuhamya ngu Tataitwe ow’omu iguru naatukunda munonga, kandi ngu naatufaho.

4. Ahabw’enki abamwe nibagumirwa kureeba Yehova nka Ishebo?

⁴ Nikikugumira kuteekateeka ngu Ruhanga ni Sho? Abamwe nibabaasa kwereeba nka bakye munonga baayegyeragyeranisa na Yehova. Nibabangaanisa yaaba Ruhanga ow’Obushoboorozi Bwona naabafaho. Kwonka, Tataitwe owa rukundo tarikwenda ngu twehurire tutyo. Akatuha amagara kandi naayenda ngu tugire omukago murungi nawe. Entumwa Paulo bwanyima y’okugamba amazima aga, akashoboororera abamuhurikiize omuri Aseene ngu Yehova tari “hare n’omuntu weena omuriitwe.” (Byak. 17:24-29) Ruhanga naayenda ngu buri omwe ahariitwe agaaniire nawe atarikutiina nk’oku omwana arikugaaniira na ishe orikumufaho.

5. Munyaanyazi-itwe omwe nitumwegyeraho ki?

⁵ Abamwe nikibaasa kubagumira kureeba Yehova nka Ishebo ahabw’okugira ngu baishebo ab’abantu bakaba batarikubakunda nari bakaba nibabakunda kakye. Teekateeka aha bigambo bya munyaanyazi-itwe omwe. “Tata akaba naantwaza kubi munonga,” nikwo arikugira. “Obu naatandika kwega Baibuli, kikaba nikiingumira kureeba Yehova nka Tataitwe ow’omu iguru. Kwonka ku naamumanyire, ebyo byona bikahinduka.” Naiwe oine enyehurira nk’ezo? Ku kiraabe nikwo kiri, gira obuhame ngu nikibaasika kureeba Yehova nka Sho orikukirirayo kimwe.

6. Kurugiirira ahari Matayo 11:27, ni muringo ki gumwe ogu Yehova atuhweraire kumureeba nka Tataitwe owa rukundo?

⁶ Omuringo gumwe ogu Yehova atuhweraire kumureeba nka Tataitwe owa rukundo, n’okuhandiikisa ebigambo bya Yesu n’ebikorwa bye omu Baibuli. (Shoma Matayo 11:27.) Yesu akooreka gye emitwarize nk’eya Ishe, kyamureetera kugira ngu “ondeebire, biri areebire Isheboona.” (Yoh. 14:9) Yesu akaba naakira kugira ngu Yehova ni Tataitwe. Omu bitabo by’Engiri byonka, Yesu akakoresa ekigambo “Tata” nari “Taata” emirundi 165 arikugamba ahari Yehova. Ahabw’enki Yesu yaabaire naakira kugamba bingi ahari Yehova? Enshonga emwe n’okugira ngu abantu batungye obuhame ngu Yehova ni Tataitwe oine rukundo.​—Yoh. 17:25, 26.

7. Omuringo ogu Yehova yaatwariizemu Omwana we, nitugwegyeraho ki?

⁷ Yetegyereze eki turikwegyera ahari Yehova ahabw’oku yaatwariize Omwana we Yesu. Obutoosha Yehova akaba naahurira okushaba kwa Yesu. Akaba atarikuhurira okushaba kwa Yesu kyonka, beitu akaba naakugarukamu. (Yoh. 11:41, 42) N’obu Yesu yaabaire agyezibwa ata, akaba amanya ngu Ishe naamukunda kandi naamushagika.​—Luk. 22:42, 43.

8. Ni mu miringo ki ei Yehova yaahaire Yesu ebirikwetengyesa?

⁸ Yesu akaba naamanya ngu Ishe niwe bukomooko bw’amagara ge kandi orikugabaisaho obu yaagira ati: “Ndi ohuriire ahabwa Tata.” (Yoh. 6:57) Yesu akaba naayesiga Ishe, Yehova, kandi Yehova nawe akaba naamuha ebirikwetengyesa kubaasa kubaho. Ekikuru munonga, Yehova akareeberera Yesu omu by’omwoyo.​—Mat. 4:4.

9. Yehova akooreka ata ngu ni Ishe wa Yesu oine rukundo kandi orikumufayo?

⁹ Ahabw’okugira ngu Yehova ni Tataitwe oine rukundo, Yesu akaba naamanya ngu aine obushagiki bwa Ishe. (Mat. 26:53; Yoh. 8:16) N’obu Yehova araabe yaikiriize Yesu kuhikwaho oburemeezi obumwe, kwonka akamurinda kusingura okugyezibwa. Yesu akaba naamanya ngu buri kabi akarikubaasa kumuhikaho,  tikarikwija kuba ak’obutwire. (Heb. 12:2) Yehova akooreka ngu naafayo ahari Yesu arikumuhurikiza, arikumuha ebirikwetengyesa, arikumutendeka, kandi arikumushagika. (Yoh. 5:20; 8:28) Ka tureebe oku Tataitwe ow’omu iguru arikutufaho omu miringo niyo emwe.

10. Kurugiirira ahari Zaaburi 66:19, 20, Yehova naayoreka ata ngu naatukunda?

¹⁰ Yehova naahurikiza okushaba kwaitu. (Shoma Zaaburi 66:19, 20.) Tarikwenda ngu tushabe emirundi mikye kandi kumara obwire bugufu, kureka naatuhiga kumushaba obutoosha. (1 Tes. 5:17) Nitubaasa kushaba Ruhanga obwire bwona, hoona ahu turikuba turi. Tarikubaasa kuburwa obwire bw’okutuhurikiza, butoosha naaba ariho kandi naata omutima aha kushaba kwaitu. Twamanya ngu Yehova naahurira okushaba kwaitu, nitumwirira haihi. “Ninkunda” Yehova, omuhandiiki wa Zaaburi nikwo yaagizire, ‘ahakuba naahurira eiraka ryangye.’​—Zab. 116:1.

11. Yehova naagarukamu ata okushaba kwaitu?

¹¹ Tataitwe tarikuhurikiza okushaba kwaitu kyonka, beitu naakugarukamu. Entumwa Yohaana naatuhamiza ati: ‘Twashaba ekintu kyona nk’oku [Ruhanga] arikukunda, naatuhurira.’ (1 Yoh. 5:14, 15) Amazima gari ngu, Yehova naabaasa kugarukamu okushaba kwaitu omu muringo ogu tutarikuteekateeka. Naamanya ekirikubaasa kutugasira, n’ahabw’ekyo obumwe naagarukamu ngu ngaaha nari naaba naayenda ngu tutegyereze.​—2 Kor. 12:7-9.

12-13. Tataitwe ow’omu iguru naatuha ebirikwetengyesa mu miringo ki?

¹² Yehova naatuha ebirikwetengyesa. Eki arikwenda ngu abazaire abashaija boona bakore nawe naakikora. (1 Tim. 5:8) Abaana be naabaha byona ebirikwetengyesa kubaasa kugumaho bahuriire. Tarikwenda ngu twerarikirire aha by’okurya, eby’okujwara, nari oburaaro. (Mat. 6:32, 33; 7:11) Yehova Tataitwe owa rukundo, ataireho n’entebeekanisa y’okwigutsa ebyetengo byaitu byona omu biro by’omumaisho.

¹³ Ekikuru munonga, Yehova naatuha eby’omwoyo ebi turikwetenga. Kurabira omu Kigambo kye, naatumanyisa amazima agarikumukwataho, ekigyendererwa kye, amakuru g’okubaho kw’abantu, n’ebiraabeho omu biro by’omumaisho. Akooreka ngu naatufaho obu twabanza kwega amazima, arikukoresa abazaire baitu nari omuntu ondiijo kutuhwera kumumanya. Kandi naagumizamu kutuhwera kuba banywani be arikukoresa abareeberezi b’ekibiina n’ab’eishe-emwe na banyaanyazi-itwe abakuzire omu by’omwoyo. Kandi, Yehova naatuhabura kurabira omu nteerane z’ekibiina, twaba turi na bagyenzi baitu omu ka yaitu ey’eby’omwoyo. Omu miringo egi n’endiijo mingi, Yehova naayoreka ngu ni Tataitwe orikutufaho.​—Zab. 32:8.

14. Ahabw’enki Yehova naatutendeka, kandi naakikora ata?

¹⁴ Yehova naatutendeka. Itwe tituri nka Yesu, turi abatahikiriire. Tataitwe owa rukundo obumwe omu kututendeka naatuhana kyaba nikyetengyesa. Ekigambo kye nikitwijutsya ngu ‘abu [Yehova] arikukunda nibo arikuhana.’ (Heb. 12:6, 7) Yehova naatuhana omu miringo mingi. Nk’eky’okureeberaho, nitubaasa kushoma ekintu omu Kigambo kye nari tukihurire omu nteerane zaitu reero kituhabure. Nari obundi abareeberezi nibo barikutuha obuhwezi obu turikwetenga. Omuringo gwona ogu Yehova arikutuhanamu, butoosha naatuhana ahabw’okutukunda.​—Yer. 30:11.

15. Yehova naaturinda mu miringo ki?

¹⁵ Yehova naatuhwera kugumisiriza twaba nitugyezibwa. Nk’oku omuzaire arikuhwera abaana be omu bwire bugumire, na Tataitwe ow’omu iguru naatuhwera omu mbeera zigumire.  Naakoresa omwoyo gwe gurikwera kuturinda kutahikwaho akabi k’eby’omwoyo. (Luk. 11:13) Kandi Yehova naaturinda n’omu nyehurira. Nk’eky’okureeberaho, naatuha amatsiko g’omuhendo munonga. Amatsiko ago ag’ebiro by’omumaisho nigatuhwera kwemera embeera zigumire. Teekateeka ahari eki: N’obu twakuhikwaho bintu ki ebibi, Tataitwe owa rukundo naaza kutukiza akabi koona akaatuhikireho. Okugyezibwa kwona okurikutuhikaho ti kw’obutwire, kwonka emigisha ei Yehova araatuhe neeza kugumaho ebiro byona.​—2 Kor. 4:16-18.

16. Hakabaho ki Adamu ku yaagomiire Ishe owa rukundo?

¹⁶ Omuringo ogu Yehova yaakwatsiremu oburemeezi obwabaireho omu ka ye ey’omu nsi, nigworeka ngu naatukunda. Adamu ku yaagomiire Ishe ow’omu iguru, akafeerwa omwanya gwe omu ka ya Yehova eshemereirwe, kandi yaafeerereza na baijukuru be omugisha ogwo. (Rom. 5:12; 7:14) Kwonka Yehova akagira eki yaakora kuhwera baijukuru ba Adamu.

17. Bwanyima ya Adamu kugoma, ahonaaho Yehova akakora ki?

¹⁷ Yehova akafubira Adamu, kwonka tararekire baijukuru ba Adamu abatakazairwe kuguma bataine matsiko. Ahonaaho akaraganisa abantu abarikumworobera ngu naija kugaruka abareete omu ka ye. (Kut. 3:15; Rom. 8:20, 21) Yehova akakora entebeekanisa egi arikwihirira aha kitambo kya Yesu Omwana we omukundwa. Yehova ahabw’okuhayo Omwana we ahabwaitu, akooreka butunu ku arikutukunda munonga.​—Yoh. 3:16.

18. Ahabw’enki turikubaasa kuhamya ngu Yehova naaba naakitukunda nk’abaana be n’obu twakuba tuhabire?

¹⁸ N’obu turaabe turi abatahikiriire, Yehova naayenda ngu twije omu ka ye, kandi tarikutureeba nk’omugugu. Nitubaasa kureebya Yehova, nari kuhaba kakye, kwonka naaguma atwinemu amatsiko. Yesu akakoresa ekitebyo ky’omwana owaarazire kworeka oku Yehova  arikutufaho nk’oku omuzaire arikufayo aha baana be. (Luk. 15:11-32) Ishe w’omwana omu kitebyo ekyo tararekyeire aho kugira amatsiko ngu omutabani naija kugaruka. Omutabani ku yaagarukire, ishe akamwakiira aine ekihika ky’amaani. Twaba tuhabire tukaruga ahari Yehova kwonka tukeeteisa, nitubaasa kugira obuhame ngu Tataitwe ow’omu iguru ayeteekateekire kugaruka kutwakiira.

19. Yehova naija kutereeza ata obumogo obu Adamu yaareetsireho?

¹⁹ Tataitwe naija kutereeza byona ebi Adamu yaasiisire. Bwanyima ya Adamu kugoma, Yehova akacwamu kutoorana abantu 144,000 kuruga omu nsi ngu baze omu iguru kutegyeka n’Omwana we, nk’abagabe n’abanyamurwa. Yesu n’abu arikuza kutegyeka nabo nibaija kuhwera abantu abarikworobera Ruhanga kuba abahikiriire omu nsi ensya. Ku baraaheze kuraba aha kugyezibwa okw’aha muheru, Ruhanga naija kubaha amagara agatahwaho. Obwo, Ruhanga naija kutunga okumarwa ahabw’okureeba ensi eijwiremu abatabani n’abahara abahikiriire. Obwo ka nibwija kuba obwire burungi munonga!

20. Yehova ayorekire ata ngu naatukunda munonga, kandi nituza kwega ahari ki omu kicweka ekirikukurataho?

²⁰ Yehova ayorekire ngu naatukunda munonga. Niwe Tataitwe orikukirirayo kimwe. Naahurira okushaba kwaitu, kandi naatuha ebirikwetengyesa, eby’omubiri n’eby’omwoyo. Naatutendeka kandi naatushagika. Kandi omu biro by’omumaisho naija kutuha emigisha erikushemeza munonga. Nikitureetera okushemererwa kwingi kumanya ngu Tataitwe naatukunda kandi naatufaho! Omu kicweka ekirikukurataho, nituza kureeba oku itwe abaana ba Yehova turikubaasa kworeka ngu nitusiima rukundo ei atwiniire.