1. Ngimba findu fiki fyalondiwagha ukuti muyobesanie nu mwalafyale uwa ku Peresia?

INONG’ONELA ukuti mwikalagha mfyinja fya mma 2,500 ifi fikindilepo ku Peresia. Mwalondagha ukuyobesania nu mwalafyale uwa nkisu isyakufwana ni nkhani yimo, polelo mwabukile nkaya ka Shushani kuno umwalafyale uyu ikalagha. Loli bo mukali ukuti muyobesanie nawe, mwalondiwagha ukuti abitikisye tasi. Linga mwabaghile ukuyoba nawe kisita kubitikisya mwayagha pakubika ubumi bwinu pangozi!—Estere 4:11.

2. Ngimba Yehova ikulonda ukuti twipilikeghe bulebule linga tukuyobesania nawe?

² Tukundaghisya fiyo panongwa yakuti Yehova akaya bo mwalafyale uwa ku Peresia! Yehova ali namaka kangi wakulondiwa fiyo ukukinda ubulaghili bulibosa ubwa bandu, loli tubaghile ukuyobesania nawe akabalilo kalikosa. Umwene ikulonda ukuti tuyeghe babuke ukuyobesania nawe. Mwakifwanikisyo, nalinga ukuti Yehova ali ningamu isya budindo bo Umpeli Unkulumba, Uwamakaghosa, kangi Undaghili wa kisu kyosa, loli umwene ikulonda ukuti tuyobesanieghe nawe mwakubombela amasyu aghakumanyikiwa fiyo aghakuti “Tata.” (Mat. 6:9) Syakuhobosya fiyo panongwa yakuti Yehova ikulonda ukuti tusegheleleghe fiyo kumyake!

3. Nongwa yafiki tubaghile ukunkolela Yehova ukuti “Tata,” kangi tukuya pakuyobesania isyafiki mu nkhani iyi?

³ Syakupilikiwa ukunkolela Yehova ukuti “Tata” panongwa yakuti yo Nyibuko ya bumi. (Sal. 36:9) Panongwa yakuti yo Tata witu, tuli nubudindo ubwakumpilikila. Linga tukubomba isi ikulonda, tukuya pakusayiwa fiyo. (Hib. 12:9) Ulusayo ulu lukongelelapo  ubumi bwa bwila na bwila, kumwanya pamo pa kisu kyapasi. Kangi tukusayiwa fiyo lino. Inkhani iyi yikuya pakulingania muno Yehova ikubombela pakuya yo Tata walughano lino kangi inongwa iyi tubaghile ukuyila nulusubilo losa ukuti atikuya pakutuleka nkyeni. Loli ikyakwanda, isagha tuyobesanie inongwa iyi tubaghile ukuyila nulusubilo ukuti Tata witu uwakumwanya atughanile fiyo kangi ikutupasikisya.

4. Nongwa yafiki bamo bikuketa ukuti kukafu ukunketa Yehova ukuya yo Tata wabo?

⁴ Ngimba mukuketa ukuti kukafu ukunketa Kyala ukuya yo Tata winu? Bamo babaghile ukwinong’ona ukuti Yehova wapamwanya fiyo nukuti tukaya bakulondiwa kumyake. Abene bikukayika linga Kyala Uwamakaghosa ikumpasikisya umundu aliwesa pamwene. Loli Tata witu walughano atikulonda ukuti twinong’oneghe bo ulu. Umwene atupele ubumi kangi ikulonda ukuti tuye nawe pabumanyani ubwamaka. Bo ayobile ifundo iyi, untumiwa Pauli ababulile abandu ba ku Ateni ukuti Yehova “akaya pabutali pali yumoyumo mmyitu.” (Imbo. 17:24-29) Kyala ikulonda ukuti umundu aliwesa ayobesanieghe nawe mwakufwana itolo namuno umwana ikubombela numpapi wake uwalughano.

5. Ngimba tukumanyilako isyafiki ukufuma ku isi umulumbu yumo alyaghene nasyo?

⁵ Bamo kubaghile ukuya kukafu ukunketa Yehova ukuya yo Tata wabo panongwa yakuti abatata babo bakabanangisyagha ulughano nikisa. Inong’onela isi umulumbu yumo ayobile. Umwene atile, “Tata wangu ali wankhaza fiyo. Bo nandile ukumanyila Ibaibolo, kwali kukafu fiyo ukuti nseghelele kwa Tata wakumwanya. Loli bo num’menye kanunu Yehova, nachenjile syosa isi.” Ngimba mo muno nanumwe mukwipilikila? Linga mo muno siyilile, mungawagha amaka linga akabalilo kakindilepo mubaghile ukwanda ukunketa Yehova ukuya yo Tata unnunu fiyo.

6. Ukufwana na Matai 11:27, ngimba njila yimo yiliku iyi Yehova atutulile ukuti tunketeghe ukuya yo Tata witu walughano?

⁶ Injila yimo iyi Yehova atutulile ukuti tunketeghe ukuya yo Tata witu walughano yo yakutupa amasyu agha Yesu afumusyagha kangi na ifi abombagha ifi fikwaghiwa mu Baibolo. (Belenga Matai 11:27.) Yesu akongagha utuyilo utwa Tata wake yonongwa yake ayobagha ukuti: “Uyu linga ambwene une bo ambwene na Tata.” (Yoh. 14:9) Utubalilo twingi Yesu ayobagha isyakufwana nubudindo ubu Yehova ikufwanisya pakuya yo Tata. Mu mabuku 4 agha masyu amanunu, Yesu abombile amasyu aghakuti “Tata” amalo aghakufwana 165 pakuyoba isya Yehova. Nongwa yafiki Yesu ayobagha fiyo isyakufwana na Yehova? Ikifukwa kimo kyali kyakuti abatule abandu ukumanya ukuti Yehova yo Tata walughano.—Yoh. 17:25, 26.

7. Ngimba tukumanyilako isyafiki isyakufwana na Yehova namuno abombelagha ifindu nu Mwanake?

⁷ Inong’onela isi tukumanyilako isyakufwana na Yehova namuno abombelagha ifindu nu Mwanake, Yesu. Akabalilo kosa Yehova apilikagha inyiputo sya Yesu. Umwene akapilikagha itolo inyiputo syake loli amwamulagha. (Yoh. 11:41, 42) Nalinga ukuti Yesu aghanagha nindamyo, loli akabalilo kosa inong’onelagha isya lughano ulwa Tata wake kangi namuno antulilagha.—Luka 22:42, 43.

8. Ngimba mo munjila siliku isi Yehova alintulile Yesu?

⁸ Yesu amenye ukuti Tata wake yo nyibuko ya bumi bwake yonongwa yake atile: “Ndi mumi mwa Tata.” (Yoh. 6:57) Yesu ali nulusubilo losa mwa Tata wake, kangi Yehova ampagha ifindu ifyakulondiwa pabumi bwake. Ikindu ikyakulondiwa fiyo, kyo kyakuti Yehova alintulile Yesu ukuti akindilile ukuya nsubiliwa kumyake.—Mat. 4:4.

9. Ngimba Yehova anangisye bulebule ukuti ali yo Tata walughano kwa Yesu?

⁹ Pakuya yo Tata walughano, Yehova alintulile Yesu ukumanya ukuti ayagha pakuntula pabumi  bwake bosa. (Mat. 26:53; Yoh. 8:16) Nalinga ukuti Yehova akamfighililagha Yesu ku kindu kilikyosa, loli umwene alintulile ukuti ifimbilisye kundamyo. Yesu asimenye ukuti indamyo yiliyosa iyi ayagha pakwaghana nayo yali ya kabalilo akapimba. (Hib. 12:2) Yehova anangisye ukuti alinganile Yesu mwakumpilikisya, ukumpa ifyakulondiwa pabumi bwake, ukummanyisya nukuntula. (Yoh. 5:20; 8:28) Isagha tukete muno Tata witu wakumwanya ikututulila munjila isyakufwana itolo.

10. Ukufwana na Masalimo 66:19, 20, ngimba Yehova ikunangisya bulebule ukuti atughanile?

¹⁰ Yehova ikupilika inyiputo syitu. (Belenga Masalimo 66:19, 20.) Umwene atikulonda ukuti tuyeghe numpaka pakwiputa m’malo mwake ikutukasya ukuti twiputeghe akabalilo kosa. (1 Tes. 5:17) Tubaghile ukwiputa kwa Kyala witu akabalilo kalikosa kisita kwinong’onela amalo agha tuliko. Umwene ikupilika nukwamula inyiputo syitu akabalilo kosa. Linga tukuketa ukuti Yehova ikwamula inyiputo syitu, tukuseghelela fiyo kumyake. Uwamasalimo atile, “Nunganile Yehova papo ikupilika ilisyu lyangu.”—Sal. 116:1.

11. Ngimba Yehova ikwamula bulebule inyiputo syitu?

¹¹ Tata witu atikupilika itolo inyiputo syitu loli ikwamula. Untumiwa Yohani ikutusimikisyila ukuti: “Aka linga tukusuma ukufwana nubwighane bwake ikutupilika.” (1 Yoh. 5:14, 15) Bwanaloli ukuti Yehova akabaghila ukwamula inyiputo syitu ukufwana namuno uswe tukulondela. Umwene asimenye isi tukulondiwa, yonongwa yake utubalilo tumo atikwamula mwanakalinga inyiputo syitu lumo ikulonda ukuti tughulileghe.—2 Kor. 12:7-9.

12-13. Ngimba mo munjila siliku isi Tata witu wakumwanya ikututulila?

¹² Yehova ikutupa ifyakulondiwa pabumi bwitu. Umwene ikubomba isi abapapi bosa bikulondiwa ukubomba. (1 Tim. 5:8) Ikubapa abanake ifindu ifyakulondiwa pabumi bwabo. Yehova atikulonda ukuti twiyayeghe isyakufwana nifyakulya, imyenda pamo namalo aghakughona. (Mat. 6:32, 33; 7:11) Pakuya yo Tata walughano, Yehova atutendekesyile ifindu ifinunu nkyeni.

¹³ Ikindu ikyakulondiwa fiyo, kyo kyakuti Yehova ikutupa ifyakulya ifyamwambepo. Ukwendela m’masyu ghake, umwene ikutubula isyakufwana numwene, ubwighane bwake, inongwa iyi atupelile kangi na isi sikwisa pakubombiwa nkyeni. Atunangisye ulughano bo tumanyile ubwanaloli, mwakubombela abapapi bitu pamo umundu yumo ukuti atutule ukummanya kanunu umwene. Kangi tukukindilila ukwambilila ubutuli ukufumu ku bakulumba ba kipanga kangi na ku bakamu na balumbu abakusi mwambepo. Mwakongelelapo, ikutupa ubulongosi ukwendela pangomano sya pakipanga, kuno tukumanyila amasyu ghake. Munjila isi nisingi, Yehova ikunangisya ukuti yo Tata walughano ku mundu aliwesa.—Sal. 32:8.

14. Nongwa yafiki Yehova ikutumanyisya, kangi ngimba ikubomba bulebule isi?

¹⁴ Yehova ikutumanyisya. Mwakukindana na Yesu, uswe tukaya bagholofu. Yonongwa yake ukuti atumanyisye, Tata witu uwalughano ikutufunda linga kwakulondiwa. Amasyu ghake ghikutukumbusya ukuti: “Bosa aba Yehova abaghanile ikubafunda.” (Hib. 12:6, 7) Yehova ikutufunda munjila nyingi. Mwakifwanikisyo, ifundo simo isi tubaghile ukubelenga mu Baibolo pamo ukupilika pangomano sibaghile ukututula ukuti tuchenje pabumi bwitu. Lumo ubutuli ubu tukulondiwa bukufuma ku bakulumba ba kipanga. Mulimosa muno Yehova ikutufundila, umwene ikubomba isi panongwa yakuti atughanile.—Yere. 30:11.

15. Ngimba mo munjila siliku isi Yehova ikutufighilila?

¹⁵ Yehova ikututula ukuti twifimbilisyeghe kundamyo. Ukufwana itolo namuno tata walughano ikubatulila abanake pakabalilo kandamyo,  Tata witu wakumwanya ikututula linga twaghene nindamyo. Umwene ikubombela mbepo wake mwikemo ukuti ghutufighilile ku findu ifi fibaghile ukonanga ubumanyani bwitu numwene. (Luka 11:13) Yehova ikututula kangi linga tuwile amaka. Mwakifwanikisyo, umwene ikutupa ulusubilo ulununu ulwa nkyeni. Ulusubilo ulu lukututula ukuti twifimbilisye kundamyo. Inong’onela isi: Nalinga ukuti tubaghile ukwaghana nindamyo, Tata witu walughano ikuya pakusosyapo indamyo yiliyosa iyi tubaghile ukwaghana nayo. Indamyo syosa isi tubaghile ukwaghana nasyo sya kabalilo akapimba, loli ulusayo ulu Yehova ikutupa lwa bwila na bwila.—2 Kor. 4:16-18.

16. Ngimba findu fiki fyabombiwe bo Adamu alekile ukumpilikila Tata wake walughano?

¹⁶ Tukuketa ubuketi ubwakuti Yehova atughanile linga tukwinong’onela muno abombile na Adamu bo alekile ukumpilikila. Bo Adamu alekile ukumpilikila Tata wake walughano, umwene naba mumbumba yake bataghile ulusako ulwakuya kulubafu lwa Yehova. (Rom. 5:12; 7:14) Loli Yehova abombilepo simo ukuti abatule abanake.

17. Ngimba Yehova abombile isyafiki mwanakalinga bo Adamu alekile ukumpilikila?

¹⁷ Yehova alimfundile Adamu, loli umwene afingile ukuti ikuya pakubatula abanake. Mwanakalinga afingile ukuti abandu aba bikumpilikila bikuya pakuya kulubafu lwake. (Bwa. 3:15; Rom. 8:20, 21) Yehova afwanisye ukubomba isi ukwendela mwikemo lya Mwanake unganiwa Yesu. Yehova anangisye ukuti atughanile fiyo mwakutupa umwanake.—Yoh. 3:16.

18. Nongwa yafiki tuli nulusubilo losa ukuti Yehova ikulonda ukuti tuye banake, nalinga tusokileko kumyake?

¹⁸ Nalinga ukuti tuli basitabugholofu, Yehova ikulonda ukuti tuye kulubafu lwake kangi umwene atikukatala ukututula. Tubaghile ukunkalalisya pamo ukuleka ukumpilikila nukusokako  kumyake kwa kabalilo akapimba loli umwene akabaghila ukutuleka. Yesu afwanikisye muno Yehova atughanile ni nkhani iya mwana unsobi. (Luka 15:11-32) Tata uwa nkifwanikisyo iki akindilile ukuya nulusubilo ukuti umwanake ayagha pakughomokako. Bo umwanake aghomokile ku kaya, tata alimwambilile mwalughano. Linga tusokileko kwa Yehova loli pabumalilo tulapile ukufumila pasi pandumbula, tubaghile ukuya nulusubilo losa ukuti Tata witu walughano ikuya pakutwambilila.

19. Ngimba Yehova ikwisa kutendekesya bulebule ifindu ifi Adamu alyonangile?

¹⁹ Tata witu ikuya pakutendekesya fyosa ifi Adamu alyonangile. Bo Adamu onangile, Yehova asalile abandu abakufwana 144,000 ukuti bakalaghileghe nu Mwanake Yesu kumwanya ukuya banyafyale kangi baputi. Yesu na aba isakulaghilagha nabo bisakubatula abandu ukuti baye bagholofu nkisu ikipya. Linga bagheliwe akabumalilo, Kyala ikwisakubapa ubumi bwa bwila na bwila. Tata witu ikwisakuhoboka fiyo bo ikuketa ikisu kiswile nabandu abagholofu. Aka kisakuya kabalilo kakuhobosya fiyo!

20. Ngimba mo munjila siliku isi Yehova ikunangisya ukuti atughanile fiyo, kangi inkhani iyakukongapo yikwisa pakulingania isyafiki?

²⁰ Yehova ikunangisya ukuti atughanile fiyo. Umwene yo Tata unnunu fiyo. Ikupilika inyiputo syitu kangi ikutupa ifindu fyosa ifyakulondiwa pabumi bwitu, ifyakumbili nifyamwambepo. Yehova ikutumanyisya nukututula. Kangi ikwisa pakutubombela ifindu ifinunu fiyo nkyeni. Tukuya balusekelo fiyo ukumanya ukuti Tata witu atughanile kangi ikutupasikisya! Inkhani iyakukongapo yikwisa pakulingania injila isi tubaghile ukunangisya ukuti tukundaghisya fiyo ulughano lwake.