1. Antoy nepeg ya gawaen na sakey no labay toy mitongtong ed ari na Persia?

IMADYIN mon manaayam ka ed Persia manga 2,500 taon lay apalabas. Walay importante ya labay mon ibaga ed ari, kanian nambiahe ka paonlad palasyo to diad Susan. Balet antis kan makaasingger ed ari, kaukolan moy onkerew na permiso. Ta no andi, posiblin ipapatey to ka!​—Est. 4:11.

2. Antoy labay nen Jehova ya nalikna tayo no mitotongtong tayo ed sikato?

² Misalsalamat itayo ta si Jehova et aliwan singa ari na Persia! Agnaparaan na anggan siopan too ya manuley so pakapanyari nen Jehova, balet sikatoy sarag tayon asinggeran anggan anton oras. Labalabay to ya mitongtong tayo ed sikato. Singa bilang, anggano si Jehova so Makapadinayew ya Manamalsa, Makapanyarin-amin, tan Soberanon Katawan, say labay ton itawag tayo ed sikato et “Ama” no mitotongtong tayo ed sikato. (Mat. 6:9) Makapaligliwan naamtaan ya labay nen Jehova ya onapit so liknaan tayo ed sikato!

3. Akin et duga labat ya tawagen tayon “Ama” si Jehova, tan antoy aralen tayo ed sayan artikulo?

³ Duga labat ya tawagen tayon “Ama” si Jehova ta sikato so Subol na bilay tayo. (Sal. 36:9) Lapud sikato so Ama tayo, nepeg ya unoren tayo. No gawaen tayo ray ipapagawa to ed sikatayo, bendisyonan to itayo. (Heb. 12:9) Kaiba ed saratan ya bendisyon so andi-anggaan ya bilay, balanglan diad tawen odino diad dalin. Tan natan ni labat et bebendisyonan to tayo la. Aralen ed sayan artikulo no anto ray gagawaen nen Jehova natan bilang maaron Ama tayo tan no akin ya segurado ya agto  tayon balot paulyanan diad arapen. Balet, pantongtongan tayo nin unona no akin ya makapanmatalek tayo ya talagan inar-aro tan aasikasoen itayo nen Aman Jehova.

4. Akin et nanairapan so arum ya ipasen si Jehova bilang Ama ra?

⁴ Kasin nanairapan kan ipasen so Dios bilang Amam? Ompan iisipen na arum ya lapud atagtagey si Jehova et abebbebay pakanengneng tod sikara. Agda napanisiaan ya iyaansakit na Makapanyarin-amin ya Dios so kada too. Balet aliwan ontan so labay nen Aman Jehova ya nalikna tayo. Sikato so angiter na bilay tayo tan labay to ya magmaliw tayon maapit ed sikato. Satan ya katuaan et imbaga nen apostol Pablo ed saray taga Atenas tan impaliwawa tod sikara ya si Jehova et “ag-arawi ed balang sakey ed sikatayo.” (Gawa 17:24-29) Labay na Dios ya onasingger tayo ed sikato ya singa sakey ya ugaw a labalabay ton asinggeran so maaro tan maasikason ateng to.

5. Antoy naaralan tayo ed eksperiensya na sakey ya sister?

⁵ Nayarin nanairapan so arum ya ipasen si Jehova bilang Ama lapud agdan balot alikna so panangaro na mismon ama ra. Imanoen so imbaga na sakey ya sister: “Ansakit so panagsalita nen tatay ko,” so inkuan to. “Nen ginmapo ak ya nanaral na Biblia, pakaliknak et singa imposible ya onapit ak ed Aman Jehova. Balet nen talagan akabkabat ko la, anguman so panmoriak.” Kasin ontan met so naliliknam? No on, makaseguro ka ya nasabi panaon et naliknam lanlamang ya si Jehova so sankaabigan ya Ama.

6. Base ed Mateo 11:27, anto so sakey ya ginawa nen Jehova pian natalosan tayo ya sikatoy maaron Ama tayo?

⁶ Say sakey ya ginawa nen Jehova pian natalosan tayon sikatoy maaron Ama tayo et impaisulat to ed Biblia iray imbaga tan ginawa nen Jesus. (Basaen so Mateo 11:27.) Talagan inalig nen Jesus so personalidad nen Ama to kanian nibaga to: “Siopaman ya akanengneng ed siak et anengneng to met lay Ama.” (Juan 14:9) Mabetbet ya idedeskribe nen Jesus si Jehova bilang Ama. Diad apatiran Ebanghelyo labat, manga 165 beses ya inusar nen Jesus so salitan “Ama” pian tukoyen si Jehova. Akin et ontan karakel? Say sakey ya rason et pian nakombinse iray totoo ya si Jehova et maaron Ama.​—Juan 17:25, 26.

7. Antoy naaralan tayo ed panagtrato nen Jehova ed Anak to?

⁷ Imanoen no antoy naaralan tayo ed panagtrato nen Jehova ed Anak ton si Jesus. Lanang ya dedengelen nen Jehova iray pikakasi nen Jesus. Balet aglabat dinmengel noagta inebatan to met iratan. (Juan 11:41, 42) Diad amin a subok ya inarap nen Jesus, alikna toy panangaro tan suporta na Ama to.​—Luc. 22:42, 43.

8. Anto ray intarya nen Jehova parad si Jesus?

⁸ Binidbir nen Jesus ya say Ama to so Subol tan Manusustuni na bilay to nen imbaga to: “Manbibilay ak lapud Ama.” (Juan 6:57) Sigpot ya nanmatalek si Jesus ed Ama to, tan intarya nen Jehova so amin ya materyal a pankaukolan to. Manuna ed amin, intarya nen Jehova iray espiritual ya pankaukolan nen Jesus pian makapansiansian matoor.​—Mat. 4:4.

9. Panon ya impanengneng nen Jehova ed si Jesus ya Sikatoy maaro tan maasikason Ama?

⁹ Bilang maaron Ama, impaseguro nen Jehova ed si Jesus ya agto paulyanan. (Mat. 26:53; Juan 8:16) Anggaman agprinotektaan nen Jehova si Jesus ed amin ya subok, tinulongan To ya makapansungdo. Amta nen Jesus ya temporaryo labat iray irap ya dalanen to. (Heb. 12:2) Impanengneng nen Jehova ya inar-aro toy Jesus​—dinengel to, intarya to ray pankaukolan to, impasal to, tan sinuportaan to. (Juan 5:20; 8:28) Pantongtongan tayo natan  no panon itayo met ya aasikasoen na maaron Ama tayo ed tawen.

10. Base ed Salmo 66:19, 20, panon ya ipapanengneng nen Jehova ya inaro to tayo?

¹⁰ Dedengelen nen Jehova iray pikakasi tayo. (Basaen so Salmo 66:19, 20.) Agto labay ya isipen tayon limitado labat no anto ray sarag tayon ipikasi tan no panon karakel tan kabayag iratan; papasesegen to tayon naynay a manpikasi. (1 Tes. 5:17) Sarag tayoy manpikasi ed Dios ed anggan anton oras, tan anggan iner so kawalaan tayo. Agnakekesawan ya ondengel ed sikatayo tan iimanoen ton maong so amin ya ibabaga tayo. No kombinsido tayo ya dedengelen nen Jehova iray pikakasi tayo, mas onapit tayo ed sikato. “Inad-arok si Jehova,” so imbaga na salmista, “ta dedengelen to so boses ko.”​—Sal. 116:1.

11. Panon ya eebatan nen Jehova iray pikakasi tayo?

¹¹ Aglabat dedengelen na Ama tayo iray pikakasi tayo noagta eebatan to met iratan. Oniay impaseguro nen apostol Juan: “Antokaman so kekerewen tayo unong ed linawa [na Dios], dedengelen to itayo.” (1 Juan 5:14, 15) Siempre, ompan wala ray pikakasi tayo ya ag-ebatan nen Jehova diad paraan ya labay tayo. Amta to no antoy sankaabigan parad sikatayo kanian no maminsan, say ebat to et andi odino manalagar tayo ni.​—2 Cor. 12:7-9.

12-13. Diad anto ran paraan ya itatarya nen Aman Jehova iray pankaukolan tayo?

¹² Itatarya nen Jehova iray pankaukolan tayo. Gagawaen ton mismo imay ingganggan to ed amin ya ulo na pamilya. (1 Tim. 5:8) Itatarya to so materyal a pankaukolan na saray ananak to. Agto labay ya pampagaan tayoy naakan, isulong, odino panayaman tayo. (Mat. 6:32, 33; 7:11) Bilang maaron ateng, sinegurado ni ingen nen Jehova ya niwalad sikatayo so amin ya pankaukolan tayo ed arapen.

¹³ Manuna ed amin, itatarya nen Jehova iray espiritual ya pankaukolan tayo. Panamegley na Salita to et impaamta tod sikatayo so katuaan nipaakar ed sikato, say gagala to, say kabaliksan na bilay, tan no anto ray nagawa ed arapen. Sikaton mismo so nanggaway paraan pian naamtaan tayoy katuaan. Inusar to ray atateng tayo odino arum ni ya angibangat ed sikatayo nipaakar ed sikato. Tan tuloytuloy to tayon tutulongan panamegley na saray maaron elder ed kongregasyon tan arum nin maespiritual ya agagi. Niarum ni, panamegley na saray aral ed kongregasyon et ibabangat to tayo kaiba so espiritual ya pamilya tayo. Diad saratan ya paraan et ipapalikna nen Aman Jehova so panangiyansakit to ed sikatayon amin.​—Sal. 32:8.

14. Akin ya ipapasal itayo nen Jehova, tan panon ton gagawaen itan?

¹⁴ Ipapasal itayo nen Jehova. Aliwa tayon singa si Jesus ta agtayo perpekto. Kanian pian nipasal itayo nen Aman Jehova, didisiplinaen to tayo no nakaukolan. Ibabaga na Salita to: “Saramay aaroen nen Jehova et didisiplinaen to.” (Heb. 12:6, 7) Didisiplinaen itayo nen Jehova diad dakel a paraan. Singa bilang, nayarin walay nabasa tayo ed Biblia odino walay narengel tayo diad saray aral ya mangipetek ed sikatayo. Odino nayarin manlapud saray elder so panangipetek ya kaukolan tayo. Anggan anton paraan so usaren nen Jehova, tandaan tayo ya didisiplinaen to tayo lapud inar-aro to tayo.​—Jer. 30:11.

15. Diad anto ran paraan ya proprotektaan itayo nen Jehova?

¹⁵ Susuportaan itayo nen Jehova diad saray subok. Singa sakey ya maaron ama ya agto papaulyanan iray ananak to no walay problema da, ag-itayo paulyanan nen Jehova no nasusubok itayo. Uusaren toy masanton espiritu to pian protektaan itayo ed antokaman ya maneral ed relasyon tayo ed sikato. (Luc. 11:13) Tutulongan itayo met nen Jehova no onkakapuy  so emosyon tayo. Singa bilang, inikdan to tayo na balibalin ilalo. Satan ya ilalo so ontutulong pian nasungdoan tayo ray kairapan. Tandaan: Anggan panon kauges so naeksperiensya tayo, sigpot ya ekalen nen Aman Jehova so epekto na satan. Amin ya subok ya aarapen tayo et temporaryo labat, balet saray bendisyon ya iter nen Jehova et agmangangga.​—2 Cor. 4:16-18.

16. Antoy resulta nen ag-inunor nen Adan so maaron Ama to?

¹⁶ Nanengneng tayo ya talagan inar-aro itayo nen Jehova diad samay ginawa to nen nankasalanan si Adan. Manlapu la nen ag-inunor nen Adan so Ama to ed tawen, sikato tan saray magmaliw ya ilalak to et agla kabiangan na maliket a pamilya nen Jehova. (Roma 5:12; 7:14) Balet walay ginawa nen Jehova pian natulongan iray ilalak nen Adan.

17. Kayari na impanrebelde nen Adan, antoy tampol ya ginawa nen Jehova?

¹⁷ Dinusa nen Jehova si Adan, balet ta inikdan to na ilalo iray agni niyanak ya ilalak nen Adan. Insipan ton tampol ya saray matulok ya totoo et magmaliw lamet ya kabiangan na pamilya to. (Gen. 3:15; Roma 8:20, 21) Ginawa itan nen Jehova diad panamegley na dondon bagat na inar-aro ton Anak ya si Jesus. Nen inter nen Jehova so Anak to parad sikatayo, pinaneknekan to ya inar-aro to tayo.​—Juan 3:16.

18. Akin ya makaseguro itayon labay nen Jehova ya magmaliw itayon ananak to anggano akaarawi tayo ed sikato?

¹⁸ Anggano agtayo perpekto, labay nen Jehova ya magmaliw tayon kabiangan na pamilya to, tan agton balot ipapasen ya pabelat itayo ed sikato. Anggano apaermen tayoy Jehova odino akaarawi tayo ed sikato, lanang ya maniilalon ompawil tayo lanlamang. Diad samay ilustrasyon nen Jesus nipaakar ed managdarak  ya anak, impanengneng to so kaaralem na panangaro na Ama to ed saray ananak To. (Luc. 15:11-32) Diad saman ya ilustrasyon, lanang ya tatalaranan na ama so ipawil na anak to. Nen abantag to ya nitan la may anak to, malikeliket ton inabet. No akaarawi tayo ed si Aman Jehova balet ta magbabawi itayo, makaseguro tayo ya mabulos tan maaro to itayon awaten.

19. Panon ya apigeren nen Jehova so deral ya resulta na ginawa nen Adan?

¹⁹ Apigeren na Ama tayo so amin ya deral ya resulta na ginawa nen Adan. Kayari na impanrebelde nen Adan, nandesisyon si Jehova ya tagibien to so 144,000 ya totoo pian manlingkor diad tawen bilang arari tan saserdote kaiba na Anak to. Uleyan nen Jesus tan sarayan kakaiba to iray matulok ya totoo tan tulongan da ran magmaliw ya perpekto diad balon mundo. Kayari na unor ya subok tan apaneknekan da la ya matulok ira, ikdan ira na Dios na andi-anggaan ya bilay. Diad satan et seguradon malikeliket so Ama tayo lapud nanengneng to ya perpekto la so amin ya ananak to diad dalin. Seguradon malikeliket itan ya panaon!

20. Diad anto ran paraan ya ipapanengneng nen Jehova ya inar-aro to tayo, tan antoy aralen tayo ed ontumbok ya artikulo?

²⁰ Malinlinew ya inar-aro itayo nen Jehova. Sikato so sankaabigan ya Ama. Dedengelen to ray pikakasi tayo tan itatarya to ray materyal tan espiritual ya pankaukolan tayo. Ipapasal tan susuportaan to tayo. Inikdan to itayo met na balibalin ilalo ed arapen. Agaylay liket tayo lapud maar-aro tan maasikaso so Ama tayo! Diad ontumbok ya artikulo, aralen tayo no panon tayon nabales so panangaro nen Aman Jehova.