1. Si un hende kier a papia ku rei di Persia, kiko e tabatin mester?

IMAGINÁ ku bo ta biba na Persia, un 2.500 aña pasá. Bo ke papia ku e rei tokante un asuntu. Pues, bo ta bai Susa, e stat unda e ta biba. Pero, lo bo no hinka den bo kabes pa presentá su dilanti sin ku e duna bo su outorisashon. Pasobra esei por kosta bo bida!—Èst. 4:11.

2. Kon Yehova ke pa nos sinti ora nos ta papia kuné?

² Nos ta kontentu ku Yehova no ta manera e reinan di Persia! Aunke e ta muchu mas poderoso i importante ku kualke gobernante humano, nos por papia kuné na kualke momento. E ke pa nos sinti nos liber pa hasi esei. Ta bèrdat ku e tin título elevá manera Magnífiko Kreador, Todopoderoso i Señor Soberano. Pero, e ke pa nos usa “Tata,” un palabra masha kariñoso. (Mat. 6:9) Ta emoshonante pa sa ku Yehova ke pa nos sinti nos asina serka di dje.

3. Dikon nos por yama Yehova “Tata,” i kiko nos lo wak den e artíkulo akí?

³ Nos por yama Yehova “Tata”—ya ku al final di kuenta ta e a duna nos bida. (Sal. 36:9) Komo e ta nos Tata, nos tin obligashon di obedes’é. Si nos hasi loke e ta pidi nos, nos lo haña bendishon maravioso. (Heb. 12:9) Un di nan ta bida eterno, sea den shelu òf riba tera. Pero for di awor nos ta benefisiá tambe. Den e artíkulo akí, nos lo wak kon Yehova ta demostrá nos ku e ta un Tata ku ta stima  nos i dikon nos por tin sigur ku nunka lo e bandoná nos. Pero promé, laga nos wak dikon nos por tin sigur ku nos Tata den shelu ta stima nos mashá.

4. Dikon algun hende ta haña ku ta difísil pa mira Yehova komo nan Tata?

⁴ Bo ta haña ku ta difísil pa mira Yehova komo bo Tata? Kisas algun hende ta pensa ku nan ta insignifikante na komparashon ku Yehova. Nan ta duda ku e Todopoderoso ta interesá den kada un di nan. Pero, nos Tata ku ta stima nos no ke pa nos pensa asina. El a duna nos bida i ke pa nos busk’é i hañ’é. Despues ku apòstel Pablo a splika esei na Aténas, el a bisa ku Yehova “no ta masha leu for di kada un di nos.” (Echo. 17:24-29) Dios ke pa kada un di nos papia kuné ku e mesun naturalidat ku un yu ta papia ku su tata ku ta stim’é.

5. Kiko nos ta siña for di e eksperensia di un ruman?

⁵ Kisas tin un otro motibu dikon algun hende ta haña ku ta difísil pa mira Yehova komo nan Tata. Kiko esei ta? Nan mes tata a demostrá nan tiki òf niun amor i kariño. Un ruman a bisa: “Mi tata tabata papia malu ku mi. Ora mi a kuminsá studia Beibel, tabata difísil pa mi sinti mi serka un Tata den shelu. Pero tur kos a kambia despues ku mi a konosé Yehova.” E sintimentunan ei ta konosí? Si esei ta e kaso, sea sigur ku bo tambe por bin mira Yehova komo e mihó Tata ku por tin.

6. Segun Mateo 11:27, kon Yehova a yuda nos mir’é komo un Tata ku ta stima nos?

⁶ Kon Yehova a yuda nos mir’é komo un Tata ku ta stima nos? Un manera ta di laga registrá den Beibel loke Hesus a bisa i hasi. (Lesa Mateo 11:27.) Hesus a reflehá e personalidat di su Tata asina perfekto ku e por a bisa: “Esun ku a mira mi, a mira e Tata tambe.” (Huan 14:9) Hopi biaha el a deskribí Yehova komo un Tata. Den e kuater Evangelionan, el a yam’é Tata mas o ménos 165 biaha. Dikon el a papia asina tantu di Yehova komo un Tata? Un motibu ta pa konvensé hende ku Yehova ta un Tata kariñoso.—Huan 17:25, 26.

7. Kiko nos ta siña tokante Yehova ora nos analisá e manera ku el a trata su Yu?

⁷ Laga nos wak kon Yehova a trata su Yu, Hesus, i loke esei ta siña nos di djE. Dios semper a skucha e orashonnan di su Yu, i el a kontestá nan tambe. (Huan 11:41, 42) Semper Hesus a sinti ku su Tata tabata stim’é i yud’é, sin importá ki prueba el a pasa aden.—Luk. 22:42, 43.

8. Den ki manera Yehova a perkurá pa Hesus?

⁸ Hesus a rekonosé ku su Tata a dun’é bida i tur loke tabata nesesario pa keda na bida. El a bisa: “Mi ta biba pa motibu di e Tata.” (Huan 6:57) Hesus a konfia su Tata kompletamente, i Yehova a perkurá pa su nesesidatnan físiko. Pero mas importante, Yehova a perkurá pa Hesus den sentido spiritual.—Mat. 4:4.

9. Kon Yehova a demostrá ku e tabata un Tata ku tabata stima Hesus mashá?

⁹ Komo Yehova ta un Tata ku ta stima su yunan, el a hasi sigur ku Hesus tabata sa ku e por konta kuné. (Mat. 26:53; Huan 8:16) Aunke Yehova no a proteh’é di tur peliger, el a yud’é perseverá bou di prueba. Hesus tabata sa ku kualke daño ku lo el a sufri lo tabata temporal. (Heb. 12:2) Yehova a demostrá ku el a stima su Yu ora  el a skuch’é, perkurá p’e, eduk’é i yud’é. (Huan 5:20; 8:28) Awor, laga nos wak kon nos Tata den shelu ta hasi meskos pa nos.

10. Segun Salmo 66:19 i 20, kon Yehova ta demostrá nos su amor?

¹⁰ Yehova ta skucha nos orashonnan. (Lesa Salmo 66:19, 20.) E no ke pa nos pone límite pa loke ta trata nos orashonnan: nos por papia kuné di tur kos, kuantu biaha ku nos ke i kon largu ku ta nesesario. E mes ta manda nos pa hasi orashon konstantemente. (1 Tes. 5:17) Ademas, nos por resa na dje na kualke ora, sin importá unda nos ta. Nunka e ta muchu okupá pa skucha nos; semper e ta disponibel i atento. Ora nos komprondé ku Yehova ta skucha nos orashonnan, nos ta sinti nos atraí na dje. E salmista a bisa: “Mi ta stima SEÑOR, pasobra e ta tende mi bos.”—Sal. 116:1.

11. Kon Yehova ta kontestá nos orashonnan?

¹¹ Nos Tata no solamente ta skucha nos orashonnan, pero e ta kontestá nan tambe. Apòstel Huan ta sigurá nos: “Kiko ku nos pidié [Dios] ku ta di akuerdo ku su boluntat, e ta tende nos.” (1 Huan 5:14, 15) Ta klaru ku por sosodé ku Yehova no ta kontestá nos orashonnan na e manera ku nos ta spera. Tin biaha, su kontesta ta nò òf e ke pa nos warda ku pasenshi. Dikon? Pasobra e sa kiko ta mihó pa nos.—2 Kor. 12:7-9.

12-13. Den ki manera Yehova ta perkurá pa nos?

¹² Yehova ta perkurá pa nos. E ta hasi loke e ta eksigí for di tur tata di famia. (1 Tim. 5:8) E ta perkurá pa e nesesidat material di su yunan. E no ke pa nos ansha tokante kuminda, paña òf bibienda. (Mat. 6:32, 33; 7:11) Komo e ta stima nos, el a hasi sigur pa asta den futuro nos tin tur loke nos mester.

¹³ Pero mas importante, e ta perkurá pa nos nesesidat spiritual. Mediante Beibel, el a revelá na nos ken e ta, kiko ta su propósito, kiko ta e sentido di bida i kiko lo pasa den futuro. El a interesá den kada un di nos ora el a usa nos mayornan òf otro ruman pa yuda nos konos’é. I ku kariño e ta sigui yuda nos mediante ansiano di kongregashon i otro ruman spiritualmente maduro. Ademas, e ta instruí nos pa medio di nos reunionnan kaminda nos ta siña tokante dje huntu ku nos famia spiritual. Eseinan ta apénas algun manera ku Yehova ta demostrá ku e ta stima nos manera un Tata.—Sal. 32:8.

14. Dikon Yehova ta disipliná nos, i kon e ta hasi esei?

¹⁴ Yehova ta eduká nos. Kontrali na Hesus, nos ta imperfekto. Pues, komo parti di nos edukashon, nos Tata ku ta stima nos ta disipliná nos ora ta nesesario. Beibel ta kòrda nos: “Esun ku Yehova ta stima e ta disipliná.” (Heb. 12:6, 7) E ta hasi esei na vários manera. Por ehèmpel, kisas algu ku nos a lesa den Beibel òf skucha na reunion ta laga nos realisá ku nos tin ku kambia. Òf, e yudansa ku nos tin mester por bini di e ansianonan. Sea kual sea, Yehova semper ta disipliná nos pasobra e ta stima nos.—Yer. 30:11.

15. Den ki manera Yehova ta protehá nos?

¹⁵ Yehova ta yuda nos perseverá bou di prueba. Un tata ku ta stima su yunan ta yuda nan durante difikultat. Asina tambe, nos Tata den shelu ta yuda  nos durante prueba. E ta usa su spiritu santu pa protehá nos di kualke kos ku por daña nos amistat kuné. (Luk. 11:13) E ta protehá nos emoshonalmente tambe. Por ehèmpel, e ta duna nos un speransa maravioso pa futuro, kual ta yuda nos soportá difikultat. Pensa riba esaki: Yehova lo kita tur doló, sin importá kiko nos a pasa aden. E pruebanan ku nos ta pasa aden ta temporal, pero e bendishonnan di Yehova ta pa semper.—2 Kor. 4:16-18.

16. Kiko a pasa ora Adam a desobedesé su Tata ku tabata stim’é?

¹⁶ Un prueba di kuantu Yehova ta stima nos ta e manera ku el a reakshoná ora Adam a desobedes’é. Loke Adam a hasi a pone ku tantu e komo su desendientenan a stòp di forma parti di Yehova su famia felis. (Rom. 5:12; 7:14) Pero, Yehova a sali na nos yudansa.

17. Kiko Yehova a hasi mesora despues di e rebelion di Adam?

¹⁷ Yehova a kastigá Adam, pero e no a laga e desendientenan di Adam sin speransa. Mesora Yehova a primintí ku hende obediente lo bolbe forma parti di su famia. (Gén. 3:15; Rom. 8:20, 21) El a hasi esei posibel pa medio di e sakrifisio di su Yu stimá, Hesus. Ora Yehova a entregá su Yu pa nos, el a demostrá kuantu e ta stima nos.—Huan 3:16.

18. Aunke nos a alehá for di Yehova, dikon nos por tin sigur ku ainda e ke ta nos Tata?

¹⁸ Aunke nos ta imperfekto, Yehova ke nos den su famia, i nunka e ta mira nos komo un karga. Por pasa ku nos ta desepshon’é òf alehá pa un tempu for di dje, pero nunka e ta pèrdè speransa ku nos lo  bolbe serka dje. Ku e ilustrashon di e yu pèrdí, Hesus a mustra kuantu Yehova ta stima nos. (Luk. 15:11-32) Den e ilustrashon, e tata nunka a pèrdè speransa ku su yu lo bolbe. I ora e yu a bolbe, e tata a risibié ku brasa habrí. Si nos a alehá for di Yehova i nos ta arepentí, nos por tin sigur ku nos Tata lo ta kontentu pa risibí nos bèk.

19. Kon Yehova lo drecha tur daño ku Adam a kousa?

¹⁹ Nos Tata lo drecha tur daño ku Adam a kousa. Despues di e rebelion den Eden, Yehova a disidí di adoptá 144.000 hende for di entre humanidat pa sirbi komo rei i saserdote den shelu huntu ku su Yu. Hesus i e 144.000 lo yuda hende obedesidu yega na perfekshon den e mundu nobo. Unabes ku hende pasa e prueba di obedensia pa último biaha, Dios lo duna nan bida pa semper. E ora ei, nos Tata lo tin e goso di mira ku tera ta yen di su yunan perfekto. Esta un tempu maravioso esei lo ta!

20. Den ki manera Yehova a demostrá ku e ta stima nos mashá, i kiko nos lo analisá den e siguiente artíkulo?

²⁰ Yehova a demostrá ku e ta stima nos mashá. E ta e mihó Tata ku nos por tin. E ta skucha nos orashonnan i ta perkurá pa loke nos tin mester den sentido material i spiritual. E ta eduká i yuda nos. Ademas, e tin maravioso bendishon prepará pa nos. Nos ta kontentu pa sa ku nos Tata ta stima nos i ta demostrá esei! Den e siguiente artíkulo, nos lo wak kon nos, su yunan, por demostrá ku nos ta gradisidu pa e amor ku e tin pa nos.