1. Woo wia daut, wan eena met dän Kjennich von Persien räden wull?

STAL die mol väa, woo daut rom 2 500 Joa trigj en Persien wia. Wan eena don wull met dän Kjennich räden, must eena no de Staut Susa reisen. Un eena kunn uk nich jlikjtoo nom Kjennich gonen un met dän räden. Wan eena doa nich ieescht no Frieheit fruach, dan kunn eenem daut leicht daut Läwen kosten! (Est. 4:11).

2. Mott wie Angst haben, wan wie met Jehova räden wellen? Laj daut ut.

² Sent wie nich sea dankboa, daut Jehova nich soo es aus dis persischa Kjennich? Jehova es väl hecha aus irjenteen Harscha hia oppe Ieed, un doch kjenn wie aulentiet met am räden. Hee well, daut wie ons frie feelen, no am to komen. Fa Jehova woaren soone besondre Tietels jebrukt aus Schepfa, Aulmajchtja un hechsta Harscha, oba hee well, daut wie am aus onsen leeftoljen “Voda” aunräden (Mat. 6:9). Daut jeit ons sea to Hoaten, daut Jehova sikj wenscht, daut wie am soo no aun sent!

3. Wuarom kjenn wie Jehova onsen “Voda” nanen, un waut woa wie en disen Artikjel seenen?

³ Daut es rajcht, wan wie Jehova onsen “Voda” nanen, wiels ons Läwen von am kjemt (Psa. 36:10). Wäajen hee ons Voda es, sent wie daut schuldich, am to jehorchen. Un daut woat ons uk sea togood komen (Heb. 12:9). Wie woaren nu aul väl goodet beläwen un lota noch mol eewjet Läwen kjrieen, entwäda em Himmel ooda oppe Ieed. En disen Artikjel woa wie seenen, daut Jehova nu aul soo es aus een leeftolja  Voda un wuarom wie ons doaropp veloten kjennen, daut hee ons uk lota kjeenmol em Stäakj loten woat. Oba daut ieeschte well wie doavon räden, wuarom wie ons kjennen secha sennen, daut ons himlischa Voda ons väl räakjent un fa ons sorcht.

4. Wuarom kjennen eenje sikj daut meist nich väastalen, daut Jehova äa Voda es?

⁴ Felt die daut schwoa, die daut väatostalen, daut Jehova dien Voda es? Eenje feelen sikj sea kjlien, wan see doaraun denkjen, woo Jehova es. Dee beduaren, aus de aulmajchtja Gott waut om an romjeft. Oba ons leeftolja Voda well nich, daut wie soo denkjen. Hee haft ons daut Läwen jejäft un well, daut wie siene Frind sent. Krakjt daut muak de Apostel Paulus siene Toohiera en Ateen dietlich, un säd dan, daut Jehova “werkjlich von ons aula nich wiet auf” es (Apj. 17:24-29). Gott well, daut jieda eena von ons soo met am rät, aus een Kjint daut jeweenlich met eenen leeftoljen Voda deit.

5. Waut lia wie von daut, waut eene Sesta sajcht?

⁵ Aundre felt daut schwoa, sikj daut väatostalen, daut Jehova äa Voda es, wäajen see von äaren ieejnen Voda mau weinich ooda kjeene Leew jekjräajen haben. Eene Sesta sajcht: “Mien Voda wia sea hunjsch. Un doawäajen wia mie daut schwoa, mie onsen himlischen Voda no aun to feelen, aus ekj aunfunk de Bibel to studieren. Oba daut endad sikj, aus ekj Jehova bäta kjanen lieed.” Jeit die daut uk soo? Dan woa nich mootloos. Met de Tiet woascht du enwoaren, daut Jehova de basta Voda es, waut et jeft.

6. Waut haft Jehova no Matäus 11:27 no jedonen, daut wie ons daut väastalen kjennen, daut hee een leeftolja Voda es?

⁶ Waut haft Jehova jedonen, daut wie ons daut bäta väastalen kjennen, daut hee een leeftolja Voda es? Hee haft daut biejlikj en sien Wuat oppschriewen loten, waut Jesus säd un deed (läs Matäus 11:27). Jesus deed sienen Voda soo krakjt no, daut hee sajen kunn: “Wäa mie jeseenen haft, haft uk dän Voda jeseenen” (Joh. 14:9). Jesus räd foaken doavon, daut Jehova ons Voda es. Mau bloos en de vea Evangelien brukt Jesus daut Wuat “Voda” rom 165 Mol fa Jehova. Wuarom räd Jesus soo väl von Jehova? Eene Uasoak wia, daut hee de Menschen daut gaunz dietlich moaken wull, daut Jehova een leeftolja Voda wia (Joh. 17:25-26).

7. Woo jinkj Jehova met sienen Sän om?

⁷ Waut lia wie von Jehova, wan wie ons unjastonen, woo hee met sienen Sän Jesus omjinkj? Jehova horcht emma no dän siene Jebäda, un hee beauntwuad dee uk (Joh. 11:41-42). Jesus kunn emma seenen, daut sien Voda am väl räakjend un unjastetten deed, endoont waut hee derchmuak (Luk. 22:42-43).

8. Waut deed Jehova fa Jesus?

⁸ Jesus wist, daut sien Voda am daut Läwen jejäft haud un am aum Läwen hilt. Doawäajen säd hee: “Ekj [läw] wäajen am” (Joh. 6:57). Hee veleet sikj en aules opp sienen Voda, un dee jeef am daut, waut am em tieteljen fäld. Oba noch väl wichtja wia, daut Jehova uk em jeisteljen fa Jesus sorjd (Mat. 4:4).

9. Woo bewees Jehova, daut hee een leeftolja Voda wia, waut fa Jesus sorjd?

⁹ Wäajen Jehova een leeftolja Voda wia, kjeem hee doafäa opp, daut Jesus wist, daut hee am unjastetten deed (Mat. 26:53; Joh. 8:16). Jehova deed Jesus nich fa aules beschitzen, waut dän toosad, oba hee holp am, met siene Schwierichkjeiten foadich to woaren. Un Jesus wist, daut daut  schlemme, waut hee derchmuak, bloos fa een Stootje sennen wudd (Heb. 12:2, NW). Jehova bewees, daut hee Jesus leewd: Hee horcht Jesus too, sorjd fa am, lieed am un unjastett am (Joh. 5:20; 8:28). Well wie nu mol seenen, woo ons himlischa Voda biejlikj soo fa ons sorcht.

10. Aun waut es daut to seenen, daut Jehova ons leeft, soo aus Psalm 66:19-20 sajcht?

¹⁰ Jehova horcht no onse Jebäda (läs Psalm 66:19-20). Hee well nich, daut wie ons biem bäden trigjhoolen, oba daut wie foaken bäden (1. Tess. 5:17). Wie kjennen aulentiet to Gott bäden, endoont wua wie sent. Hee es kjeenmol too drock un horcht ons emma too. Wan wie daut enwoaren, daut Jehova no onse Jebäda horcht, dan leew wie am noch dolla. De Psalmenschriewa säd: “Ekj sie dän HARN goot, wiels hee hieed mie” (Psa. 116:1).

11. Woo beauntwuat Jehova onse Jebäda?

¹¹ Ons Voda hieet onse Jebäda un hee horcht uk no dee. De Apostel Johanes sajcht, daut Gott “ons hieren deit, wan wie am no waut froagen, daut no sienem Wellen es” (1. Joh. 5:14-15). Veleicht beauntwuat Jehova onse Jebäda nich soo, aus wie ons daut väastalen. Hee weet je, waut daut baste fa ons es, un doawäajen deit hee eenjemol nuscht ooda lat ons een bät wachten (2. Kor. 12:7-9).

12-13. Woo sorcht ons himlischa Voda fa ons?

¹² Jehova sorcht fa ons. Hee kjemt daut selfst no, waut hee von jieda Voda velangt (1. Tim. 5:8). Hee sorcht em tieteljen fa siene Kjinja un well nich, daut wie ons doaräwa sorjen, waut wie äten un auntrakjen sellen ooda aus wie een Dak äwarem Kopp haben (Mat. 6:32-33; 7:11). Un aus leeftolja Voda sitt Jehova mau rajcht doano, daut wie uk lota aules haben woaren, waut ons fält.

¹³ Oba noch väl wichtja es, daut Jehova em jeisteljen fa ons sorcht. Derch de Schreft lieet hee ons, woo hee es un waut hee sikj väajenomen haft un to waut wie läwen un waut noch mol komen woat. Hee kjemmad sikj uk doarom, daut onse Elren ooda sestwäa ons holp, mea von am to lieren, aus wie de Woarheit kjanen lieeden. Un hee halpt ons uk fa wieda derch leeftolje Eltestasch un aundre erfoarne Breeda un Sestren. Jehova lieet ons uk bie de Toopkomes, wua wie aula waut lieren. Hee deit aul dit un väl aundret toom ons wiesen, daut hee soo aus een Voda fa ons aulem sorcht (Psa. 32:8).

14. Wuarom belieet Jehova ons, un woo deit hee daut?

¹⁴ Jehova belieet ons. Wie sent nich volkomen, soo aus Jesus. Doawäajen deit ons leeftolja Voda ons nich bloos belieren, oba uk trajchtwiesen, wan daut fält. Sien Wuat sajcht je: “Wäm de Har goot es, däm trakjt hee trajcht” (Heb. 12:6-7). Jehova wiest ons derch veschiednet trajcht. Veleicht läs wie waut en sien Wuat ooda hieren waut bie de Toopkomes un woaren dan en, daut wie ons endren motten. Ooda de Eltestasch jäwen ons de Help, waut ons fält. Oba endoont, woo Jehova ons trajchtwiest, hee deit daut emma ut Leew (Jer. 30:11).

15. Woo halpt Jehova ons en schwoare Tieden?

¹⁵ Jehova unjastett ons en schwoare Tieden. Hee es soo aus een leeftolja Voda, dee siene Kjinja en schwoare Tieden biesteit. Hee jeft ons sienen heiljen Jeist, daut wie em Gloowen nich Schoden lieden (Luk. 11:13). Jehova halpt ons uk, wan wie  mootloos sent. Hee jeft ons biejlikj eene wundascheene Hopninj. Dise Hopninj jeft ons de Krauft, bie Schwierichkjeiten nich opptojäwen. Denkj doaraun, daut Jehova aules wada gootmoaken woat, wua wie nu unja lieden motten, endoont waut doa passieet. Onse Trubbels woaren ons bloos fa eene jewesse Tiet toosaten, oba daut goode, waut Jehova ons jeft, woat fa emma bliewen (2. Kor. 4:16-18).

16. Woo kjeem daut ut, daut Adam sienen leeftoljen Voda ojjehuarsom wia?

¹⁶ Jehova siene Leew fa ons es aun daut to seenen, waut hee deed, aus Adam am ojjehuarsom wia. Adam kunn nich lenja Poat von Jehova siene schaftje Famielje bliewen un siene Nokomen uk nich (Reem. 5:12; 7:14). Oba Jehova deed fuaz waut, om siene Nokomen to halpen.

17. Waut deed Jehova fuaz nodäm aus Adam ojjehuarsom wia?

¹⁷ Jehova bestroft Adam, oba hee vespruak, dän siene Nokomen to halpen. Hee säd fuaz, daut hee waut doonen wudd, daut jehuarsome Menschen wada Poat von siene Famielje woaren kunnen (1. Mo. 3:15; Reem. 8:20-21). Jehova muak daut doaderch mäajlich, daut sien leewa Sän Jesus sien Läwen fa ons jeef. Derch dit Leesjelt bewees Jehova, woo väl hee ons räakjend (Joh. 3:16).

18. Wuarom sent wie ons secha, daut wie Poat von Jehova siene Famielje sennen kjennen, wan wie uk mol von am aufjekomen sent?

¹⁸ Jehova well, daut wie Poat von siene Famielje sent, wan wie uk onvolkomen sent, un hee talt ons kjeenmol fa eene Laust. Veleicht schmäa wie Jehova mol aun ooda komen mol fa een Stoot von am auf, oba hee denkjt nich fuaz, daut doa kjeene Rot mea fa ons es. Jesus muak daut  dietlich, woo sea Jehova om siene Kjinja bekjemmat wia, aus hee daut Jlikjnis von dän veloarnen Sän vetald (Luk. 15:11-32). De Voda en daut Jlikjnis jeef kjeenmol de Hopninj opp, daut sien Sän trigjkomen wudd. Aus dee dan no Hus kjeem, neem de Voda am wada met Freiden opp. Wan wie mol von Jehova aufkomen un ons daut leet es, dan kjenn wie ons secha sennen, daut ons leeftolja himlischa Voda ons uk wada met Freiden oppnämen woat.

19. Woo woat Jehova dän Schoden wada gootmoaken, waut Adam aunjerecht haft?

¹⁹ Ons Voda woat aul dän Schoden wada gootmoaken, waut Adam aunjerecht haft. Nodäm aus Adam sikj jäajen Jehova stald, wort Jehova sikj eenich 144 000 Menschen uttowälen. Dee sullen met sienen Sän toop em Himmel Kjennichs un Priestasch sennen. En de niee Welt woaren Jesus un siene Metharscha de jehuarsome Menschen halpen, volkomen to woaren. Un no de latste Proow woat Gott dee dan daut eewje Läwen jäwen. Ons himlischa Voda woat dan sea schaftich sennen, wiels de gaunze Ieed voll sennen woat met siene volkomne Säns un Dajchta. Daut woat bloos wundascheen sennen!

20. Woo haft Jehova daut bewäsen, daut hee ons sea väl räakjent, un von waut woa wie en dän näakjsten Artikjel räden?

²⁰ Jehova haft daut bewäsen, daut hee ons sea väl räakjent. Hee es de basta Voda. Hee horcht no onse Jebäda un jeft ons aules, waut ons em tieteljen un em jeisteljen fält. Hee lieet ons un unjastett ons. Hee haft ons uk fa lota väl wundascheenet vesproaken. Daut jeft ons sea väl Freid, daut ons Voda Jehova ons leeft un fa ons sorcht! En dän näakjsten Artikjel woa wie doavon räden, woo wie aus siene Kjinja wiesen kjennen, daut wie fa siene Leew dankboa sent.