LONGO DIA 6
Yehowa, Tata Wetu Wana Gutuzumba Muavula Diago
“Mudi naye gusamba ngegi: ‘Tata wetu.’”—MAT. 6:9.
LUNGIMBO 135 La tendre invitation de Jéhovah : « Sois sage, mon fils »
NDAGA JIDI MU LONGO EDI *
1. Itshi muthu gakhalele naye gutshita ha guya gudimona nu fumu ya gu Persia?
TANGIZA egi wajingile gu Persia ivo 2 500 yabalega gale. Udi nu ndaga imoshi ya guwambela fumu, watshita vuayaji uu nu gu dimbo dia ufumu gu Suse. Uvi gutuama egi udimone nu fumu ha guta n’enji maga, muene udi naye thomo guguhana njila. Gula walola guya gudimona nu fumu muene gugutamega ndo, wajiya gushiyiwa!—Est. 4:11.
2. Yehowa wana tshigina egi tudivue luholo lutshi tangua tudi muta nenji maga?
2 Idi ndaga ya gusuanguluga ha gujiya egi Yehowa gashigo gifua fumu ya gu Persia! Yehowa wakhala nu ngolo jiavula gubalega mafumu agasue a athu, uvi wakhala hehi ha guta maga nu muthu wagasue. Udi gututoga egi tuvuigo woma ha guta n’enji maga mu gisambu. Ha gufezegesa, Yehowa wakhala nu titre jiavula, gifua Mufugi Wakoma, Nzambi wa gudinyinyiga, nu Fumu wakoma, uvi muene wana gututoga ha gumutamega egi: “Tata.” (Mat. 6:9) Idi diago gutusuanguluisa ha gujiya egi Yehowa wana tshigina egi tusuene hehi n’enji!
3. Mukunda natshi tudi naye gutamega Yehowa egi “Tata,” nu itshi tuza muzuelela mu longo edi?
3 Tudi naye gutamega Yehowa egi: “Tata”, handaga muene udi ha gishina gia monyo wetu. (Ngi. 36:9) Tudi naye nji gumutumagela ha gumonegesa egi udi Tata wetu. Gula tudi gumutumagela, mbatuheta ishimbigo yavula diago. (Heb. 12:9) Mukatshi dia ishimbigo yene, tuajiya gutanga monyo wa mayilago mbatuheta mu dilu nga ha mavu. Tudi nji muheta gubonga guko mangino. Mu longo edi tuza mumona ndaga jidi gututshiginyisa egi Yehowa wana gutuzumba diago mangino, nu luholo tuajiya gutshigina egi muene mbagatubembigo nga hazonda mu masugu adi muza. Tutadile thomo, luholo tuajiya gutshigina egi Tata wetu wa mu dilu wana gutuzumba nu wana gudisagesa mukunda nu esue.
YEHOWA UDI SH’ETU WA GUZUMBA NU WANA GUTUBAMBA
Yehowa wana tshigina egi tukhale hehi n’enji, gifua luholo tata wa guzumba gana tshigina gukhala hehi nu an’enji (Tala paragrafe 4)
4. Mukunda natshi yana khala lamba gudi athu ako ha gumona Yehowa gifua Tata wawo?
4 Yakhala lamba gudi aye ha gumona Yehowa gifua Tata waye ba? Athu ako ajiya gutangiza egi ashigo nu ndando, handaga Yehowa wakhala wakoma muavula. Ana tshiginago egi Nzambi wa gudinyinyiga wajiya gudisagesa mukunda nu ene. Uvi Tata wetu wa guzumba ganago gutshigina egi tutangize ngenyi. Watuhanele monyo nu wana tshigina egi tukhale mafuta enji. Mupostolo Phaula wadijigile enya gu Atene ndag’eyi ya giamatshidia egi, Yehowa “gana khalago gualeha gudi muthu nu muthu ya mukatshi dietu.” (Makal. 17:24-29) Nzambi udi mutshigina egi, muthu wagasue mukatshi dietu ate n’enji maga gifua luholo mona ganata maga nu mvuaji ji’enji jia guzumba.
5. Longo ditshi tudi muzula mu eksperianse ya phangi’etu wa mukhetu?
5 Yajiya gukhala lamba gudi athu ako ha gumona Yehowa gifua Tata wa guzumba, handaga mvuaji jiawo jiana guamonesela ndo guzumba gua giamatshidia. Phangi mumoshi wa mukhetu wazuelele egi: “Tata wakhalele muenya khuta. Tangua ngasendesele gulonguga Biblia, yakhalele lamba gudi ame ha gudivua hehi nu Tata wa mu dilu. Uvi tangua ngajiyile Yehowa muabonga, ndaga jiagasue jiasombegesele.” Aye nji wadivile gale ngenyi ba? Gula idi ngenyi, jiya egi gungima dia matangua mbawumona diago egi, Yehowa udi Tata wabonga.
6. Ha gutadila Matayo 11:27, itshi idi gututshiginyisa egi Yehowa watukuatesele ha gumumona gifua Tata wa guzumba?
6 Yehowa watukuatesele ha gumumona gifua Tata wa guzumba, mu njila ya mbimbi nu makalegelo a Yesu adi mu Biblia. (Tanga Matayo 11:27.) Yesu walanduile makalegelo a Sh’enji mu loholo luatagana diago, hene gazuelele egi: ‘Muthu wangumona ame, wamonyi nji Tata.’ (Yone 14:9) Yesu wamonesele nji midimo yana taganesa Yehowa gifua Tata. Mu ba Evanjile nguana, Yesu wakalegele mbimbi eyi “Tata” mahugo 165 ha guzuelela Yehowa. Mukunda natshi gatangele jina dia Yehowa mahugo avula? Wakhalele mutshigina egi athu ajiye egi Yehowa udi Tata wa guzumba.—Yone 17:25, 26.
7. Longo ditshi tuazula mukunda nu Yehowa mu luholo gakhalele mukalegela mun’enji ndaga?
7 Tutadile longo tuajiya guzula mu luholo Yehowa gana kalegela Mun’enji Yesu Klisto ndaga. Yehowa wakhalele mutegelela isambu ya Yesu. Gakhalelego phamba gumutegelela, uvi wakhalele nji gumuhana mvutu gu isambu yenji. (Yone 11:41, 42) Ikhale malamba a luholo lutshi gatagenele nawo, Yesu wakhalele mujiya egi Sh’enji wana gumuzumba nu wana gumukuatesa.—Luka 22:42, 43.
8. Mu maluholo tshi Yehowa gana kuatesa Yesu?
8 Yesu wakhalele mujiya egi Sh’enji wakhala ha gishina gia lujingu luenji, hene gazulele egi: ‘Ame ngudi nu monyo mukunda nu Tata.’ (Yone 6:57) Yesu washile diago mutshima gudi Sh’enji, hene Yehowa gakhalele gumuhana ima yagasue gakhalele nayo funu ha gujinga. Ndaga ya gubalega ndando idi egi, Yehowa wakuatesele Yesu ha gusala ya gujinginyina gudi muene.—Mat. 4:4.
9. Luholo lutshi Yehowa gamonesele egi wakhalele Tata wa guzumba mukunda nu Yesu?
9 Yehowa Tata wa guzumba watshitshile yagasue, hagula Yesu ajiye egi, Sh’enji wakhalele gumukuatesa. (Mat. 26:53; Yone 8:16) Ngatshima Yehowa gabambelego Yesu mu ndaga jiagasue jiakhalele naye gumubuila, uvi wamukuatesele ha gukolesela mu malamba ene. Yesu wakhalele mujiya egi malamba agasue gakhalele mutagana nawo akhalele a tangua diazonda. (Heb. 12:2) Yehowa wamonesele egi wana gudisagesa mukunda nu Yesu tangua gakhalele gumutegelela, gumuhana ima gakhalele naye funu, gumuhana formasio, nu gumukuatesa. (Yone 5:20; 8:28) Henyaha, tutalenu luholo Tata wetu wa mu dilu wana gudisagesa mukunda nu esue.
LUHOLO LUANA TUKUATESA TATA WETU WA GUZUMBA
Tata wa guzumba (1) udi mutegelela, (2) udi muhana ima ya gudia, (3) udi muhana formasio, nu (4) udi mubamba mun’enji. Tata wetu wa guzumba mu dilu, wana gutumonesela nji guzumba mu maluholo avula gifua awa (Tala paragrafe 10-15) *
10. Ha gutadila Ngimbo 66:19, 20, luholo lutshi Yehowa wana monesa egi watuzumba?
10 Yehowa wana guvua isambu yetu. (Tanga Ngimbo 66:19, 20.) Gana tshigina ndo egi tumusambe mahugo azonda; wana gututoga ha gumusamba tangua diagasue. (1 Tes. 5:17) Tuajiya gusamba tangua diagasue, nu fundo diagasue tudi. Gana khala ndo nu ima yavula ya gutshita yajiya gumukanga njila ha gututegelela; tangua diagasue wakhala hehi ha gututegelela. Gula tuajiya egi Yehowa wana guvua isambu yetu, mbatusuena hehi n’enji. Muyimbi wa ngimbo wayimbile egi: ‘Ngana zumba Yehowa handaga muene wana guvua dijui diami.’—Ngi. 116:1.
11. Luholo lutshi Yehowa gana hana mvutu gu isambu yetu?
11 Sh’etu wa mu dilu gana vua ndo phamba isambu yetu, uvi wana gutuhana nji mvutu jia isambu yene. Mupostolo Yone udi gutudijiga egi: “Gula tudi mulomba nga gima tshi gifua mudi gutshigina [gua Nzambi], muene udi mutuvuila.” (1 Yone 5:14, 15) Yadiago, mbala jiko Yehowa gajiyilego gutuhana mvutu mu luholo tudi mutangiza. Wana jiya muabonga ndaga idi yabonga mukunda nu esue, hene matangua ako wana tuna gutuhana mvutu, nga ndo wana gututoga ha gunengena hazonda.—2 Kol. 12:7-9.
12-13. Mu maluholo tshi Tata wetu wa mu dilu wana gutukuatesa?
12 Yehowa wana tuhana ima tudi naye funu. Wana tshita ndaga gana toga muene atata agasue ha gutshita. (1 Tim. 5:8) Wana hana an’enji ima adi naye funu ha gujinga. Gana tshigina ndo egi tudisagese mukunda nu ima ya gudia, milele, nga mukunda nu inzo ya gubanda. (Mat. 6:32, 33; 7:11) Yehowa walondele gale ndaga ha gutagenesa nzala jietu mu masugu adi muza, gifua muana tshita tata wa guzumba gudi an’enji.
13 Ndaga ya gubalega ndando idi egi, Yehowa wana tagenesa nzala jietu jia mu nyuma. Mu njila ya Mbimbi yenji, Yehowa wana monesela athu giamatshidia giamutadila muene, nu felela dienji, nu gishina gatufugile, nu ndaga mbagatukalegela mu masugu adi muza. Tangua tuasendesele gulonguga Biblia, Yehowa watumonesele guzumba mu njila ya mvuaji jietu, nga mu njila ya mulongeshi muko ha gutukuatesa ha gumujiya. Gungima, tuana landula guheta ukuateshi nu guzumba guagasue gudi akulu a mu hungu nga gudi aphangi a mala nu akhetu. Luko, Yehowa wana tulongesa hamoshi nu aphangi etu a mu nyuma mu njila ya gudibungisa gua mu hungu. Wana gutumonesela guzumba mukut’etu agasue mu maluholo avula.—Ngi. 32:8.
14. Mukunda natshi Yehowa gana gutuhana formasio, nu wana guyihana gikuatshi?
14 Yehowa wana gutuhana formasio. Tuakhala ndo athu atagana gifua Yesu. Hene, ha gutuhana formasio, Yehowa wana gutuhana ndola gula idi mutoga ngenyi. Mbimbi yenji idi gutuwambela egi: ‘Yehowa wana hana ndola gudi athu ana zumba muene.’ (Heb. 12:6, 7) Yehowa wana gutuhana ndola mu maluholo avula. Matangua ako, ndaga tudi mutanga mu Mbimbi yenji, nga jinyi tudi muvua mu gudibungisa gua mu hungu, jiajiya gutukuatesa ha gusombegesa. Nga ndo, akulu a mu hungu ajiya gutukuatesa. Tangua diagasue, Yehowa wana hana disipline nu guzumba, ikhale didi dia luholo lutshi.—Yel. 30:11.
15. Mu maluholo tshi Yehowa gana gutubamba?
15 Yehowa wana gutukuatesa ha gukolesela mu malamba. Gifua luholo tata wa guzumba gana kuatesa an’enji mu tangua dia malamba, Sh’etu wa mu dilu nji wana gutukuatesa ha gukolesela mu tangua dia malamba. Wana kalegela nyuma yenji ha gutubamba mu malamba ajiya gubolesa ufuta wetu n’enji. (Luka 11:13) Yehowa wana tukuatesa nji tangua tudi yaguleba nga tudi nu gikenene. Wana tuhana felela diabonga mukunda nu masugu adi muza. Felela diene diana tukuatesa ha gukolesela mu malamba tudi mutagana nawo. Tudi naye gujiya egi, ikhale ndaga ya luholo tshi yatubuila, Sh’etu wa guzumba mbawukatula ndaga jiagasue jiana tubatela malamba. Malamba agasue tudi mutagana nawo, adi a tangua diazonda, uvi gubonga gudi gutubambela Yehowa gudi gua ivo nu ivo.—2 Kol. 4:16-18.
SH’ETU MBAGATUBEMBIGO NGA HAZONDA
16. Ndaga itshi yabuile tangua Adama galumbugile Sh’etu wa mu dilu?
16 Tuana mona guzumba gua Yehowa gula tuatangiza luholo gakalegele ndaga tangua Adama nu Eva amulumbugile. Tangua Adama galumbugile Sh’enji wa mu dilu, watotesele fundo dienji, nu dia an’enji mu fami ya gusuanguluga ya Yehowa. (Lomo 5:12; 7:14) Uvi, Yehowa wakalegele ndaga imoshi ha gukuatesa ajigulu a Adama.
17. Gungima dia gulumbuga gua Adama, ndaga tshi Yehowa gatshitshile mbala imoshi?
17 Yehowa wahanele Adama ndola, uvi walayele egi mbawukuatesa ajigulu a Adama. Walayele mbala imoshi egi athu adi gumutumagela mbaavutuga mu fami yenji. (Gis. 3:15; Lomo 8:20, 21) Mbawavutula mu fami yenji mu njila ya mulambu wa Mun’enji wa guzumba Yesu. Tangua Yehowa gahanele Mun’enji mukunda nu esue, wamonesele diago egi wana gutuzumba muavula.—Yone 3:16.
Gula tualumbugila Yehowa nu tuabalumuna mutshima, Tata wetu wa guzumba udi hehi ha gutuyamba nu gusuanguluga guagasue gula tuavutuga gudi muene (Tala paragrafe 18)
18. Mukunda natshi tuajiya gutshigina egi Yehowa wana tuzula gifua an’enji, ngatshima tuamulumbugila?
18 Tushigo athu atagana, uvi Yehowa wana gututshigina mu fami yenji, nu gana tumona ndo gifua tudi ginemo gudi muene. Matangua ako tuajiya gumutshitshila ndaga yabola, nga gumutuna, uvi muene gana gutubemba ndo. Yesu watele gishima gimoshi gia mona watotele, ha gumonesa guzumba guakola Yehowa gana monesela an’enji. (Luka 15:11-32) Tata udi muzuelewa mu gishima gia Yesu, gatoteselego felela dienji egi mun’enji mbawumuvutuga. Tangua mona muene gavutugile gumbo diawo, sh’enji wamuyambele nu gusuanguluga guagasue. Gula tualumbugila Yehowa nu tuabalumuna mutshima, tudi naye gukhala nu felela egi Tata wetu wa guzumba udi hehi ha gutuyamba nu gusuanguluga guagasue gula tuavutuga gudi muene.
19. Luholo tshi Yehowa mbagalondega ndaga jiabolesele Adama?
19 Tata wetu mbawulondega ndaga jiagasue jiabolesele Adama. Gungima dia gulumbuga gua Adama, Yehowa wazudile desizio dia gutomba athu 144 000 ha mavu agasue, ha gukhala mafumu nu nganga-nzambi mu dilu nu Mun’enji. Yesu nu Aklisto anyi ambiwe maji mu nyuma, mbaakuatesa athu ana tumaga ha gubua athu atagana mu mavu ahe-ahe. Gungima dia gulolewa gua gisugishilo, Nzambi mbawuhana athu atumaga monyo wa mayilago. Tata wetu mbawusuanguluga muavula ha gumona mavu a guzala pha nu an’enji a mala nu a akhetu atagana. Mbayikhala diago tangua dia gusuanguluga!
20. Mu maluholo tshi Yehowa wana monesa egi watuzumba muavula, nu itshi mbatumona mu longo dialandula?
20 Yehowa wamonesele haphelo egi wana gutuzumba muavula. Udi diago Tata watagana. Wana guvua isambu yetu nu wana gutuhana ndaga tudi najio funu ha gujingila, nu jia mu nyuma. Wana tuhana formasio nu wana tukuatesa. Mbawudi gutukalegela ndaga jiawaha mu masugu adi muza. Idi ndaga ya gusuanguluga ha gujiya egi Tata wetu wana gutuzumba nu wana gutukuatesa! Longo dialandula mbadizuelela maluholo esue an’enji, tuajiya guhana mersi mukunda nu guzumba guenji.
LUNGIMBO 108 L’amour fidèle de Dieu
^ par. 5 Tuana jiya egi Yehowa udi Mufugi wetu nu udi Fumu wakoma. Uvi tudi nu ndaga jidi gututuma ha gumumona egi udi Tata wa guzumba. Tuza mumona ndaga jiene mu longo edi. Tuza mujiya luko mukunda natshi tudi mutshigina egi Yehowa mbagashigo gutubemba nga hazonda.
^ par. 59 UKOTELESHI WA IFUANESA: Ifuanesa yagasue nguana idi mumonesa tata nu mun’enji: tata mungoshi udi mutegelela mun’enji wa yala muabonga, muko udi muhana mun’enji wa mukhetu ima ya gudia, muko udi muhana mun’enji formasio, uvi muko udi muhana mun’enji udi nu gikenene gikhesa. Gifuanesa gia koko dia Yehowa gidi gungima dia ifuanesa eyi, gidi gutumonesa egi Yehowa wana gutumonesela guzumba mu maluholo avula gifua awa.
