1. ¿Imatan pipas ruwanan karan Persia nacionmanta reywan parlananpaq?

KAYPI piensay, Persia nacionpin ñaupaq tiempopi tiyashanki, jinaspa reywan parlayta munashanki, jinan Susa llaqtaman viajanki, chaypin tarikun reypa palacion. Ichaqa qonqaylla reypa ñaupaqenpi mana wajashasuqtiyki rijuriwaq chayqa wañuchisqan kawaq (Est. 4:11).

2. ¿Imaynatan Jehová Dios munan payta ninanchista?

² Anchatan agradecekunchis Jehová Diosninchis mana chay reykuna jina kasqanrayku. Payqa llapa kamachikuqmantapas aswan atiyniyoqmi, chaywanpas munanmi imay ratopipas paywan parlananchista. Diostan nikun: “Kamaq, tukuy atiyniyoq, tukuyta kamachiq”, nispa. Chaywanpas Diosninchisqa munanmi “Papáy” otaq “Yayáy” nispa ninanchista (Mat. 6:9). Diosqa munanmi imayna juj tayta wawanwan kausan chhaynata paywan kausananchista.

3. ¿Imanaqtinmi Jehová Diosta “Papáy” nispa nisunman? ¿Imamantan kaypi yachasun?

³ Diosmi kausayta qowaranchis, chaymi “Papáy” niyqa allinpuni (Sal. 36:9). Papanchistaq chayqa paytan kasukunanchis. Kamachiwasqanchista kasukuspaqa askha bendicionkunatan chaskisun (Heb. 12:9). Jujninqa kay allpapi otaq janaq pachapi wiñaypaq kausaymi. Kunanpas yanapawanchismi. ¿Imaynatan Dios rikuchin munakuq Papanchis kasqanta? Diosqa manan jayk’aqpas saqewasunchu, ¿imaraykun chaymanta mana iskayananchischu? Chaykunamantan kaypi yachasun. Ñaupaqta yachasun imaraykus mana iskayananchischu Jehová Dios munakuwasqanchismanta cuidawasqanchismantapas.

4. ¿Imanaqtinmi wakin runakunapaq sasa kanman Jehová Diosta papankuta jina rikuy?

⁴ ¿Sasachu noqanchispaq Jehová Diosta papanchista jina rikuy? Wakin runakunan ninku: “Diosqa ancha jatunmi, chaymi runakunataqa mana qhawariwasunmanpaschu”, nispa. Munakuq Papanchismi ichaqa mana munanchu chhayna piensananchista. Paymi kausayta qowaranchis munantaqmi payman qayllaykunanchista. Chaymi apóstol Pablo Atenas llaqtapi runakunata niran: “Payqa manan sapankanchismantapas nishu karupichu kashan”, nispa (Hech. 17:24-29). Diosqa munanmi imayna juj wawa taytanwan riman chhaynata paywan rimananchista.

5. ¿Imatan yachanchis juj hermanata pasasqanmanta?

⁵ ¿Imaraykun wakin runakuna sasata rikullankumantaq Jehová Diosta papankuta jina? Kikin papanku paykunata mana munakusqankurayku. Juj hermanan niran: “Papayqa millaytan k’amiwaq, chaymi Bibliamanta yachayta qallarishaqtiy noqapaqqa sasa karan Diosta munakuq papayta jina rikuyqa. Ichaqa Jehová Diosta allinta reqsispan manaña chay jinatachu piensarani”, nispa. ¿Chay jinatachu qanpas piensaranki? Chhayna kaqtinqa ama llakikuychu, atillankin Jehová Diosta munakuq papanchista jina rikuyta.

6. Mateo 11:27 textopi nisqanman jina, ¿imaynatan Jehová Dios yanapawanchis munakuq Papanchista jina payta rikunanchispaq?

⁶ ¿Imaynatan Jehová Dios yanapawaranchis munakuq papanchista jina payta rikunanchispaq? Bibliapi Jesuspa ruwasqanta rimasqanta qelqachispa (leey Mateo 11:27). Jesusqa papan jinapunin imatapas ruwaran, chaymi niran: “Pipas noqata rikuwaqqa Yayatapas rikullantaqmi”, nispa (Juan 14:9). Jesusqa askha kutipin Jehová Diosta rikuchiran munakuq papanchista jina. Chaymi evangelio librokunapi yaqa 200 kutita “Papáy” nispa Diosta niran. ¿Imaraykun askha kutita Diosmanta rimaran? Payqa munaranmi llapa runakuna Jehová Diosta munakuq papanchista jina rikunankuta (Juan 17:25, 26).

7. ¿Imaynatan Jehová Dios wawanta rikuran? ¿Imatan chaymanta yachanchis?

⁷ ¿Imaynatan Jehová Dios wawanta rikuran? ¿Imatan chaymanta yachasunman? Jehová Diosqa uyariranpunin wawanpa mañakusqanta, kutichimurantaq mañakusqanta (Juan 11:41, 42). Imapiña tarikuspapas Jesusqa rikuranmi Jehová Dios munakusqanta yanapasqantapas (Luc. 22:42, 43).

8. ¿Imaynatan Jehová Dios Jesusta cuidaran?

⁸ Jesusqa yacharanmi Papan kausayta qosqanta, kausananpaq imaymana qosqantapas. Chaymi niran: “Yayarayku kausani”, nispa (Juan 6:57). Tukuy sonqowantaq Papanpi confiaran, Diostaq tukuy necesitasqanta qoran kausananpaq astawanqa tukuy sonqowan payta servishanallanpaq (Mat. 4:4).

9. Jehová Diosqa anchatan Jesusta munakuran, ¿imaynatan chayta rikuchiran?

⁹ Diosqa yanaparanpunin wawanta, chaymi Jesusqa yacharan Papan paywan kashasqanta (Mat. 26:53; Juan 8:16). Manaña llapa sasachaymantachu pakaykuran chaypas yanaparanmi aguantananpaq. Jesusqa yacharanmi ima sasachakuypas mana wiñaypaqchu kasqanta (Heb. 12:2). Jehová Diosqa wawanta munakusqantan rikuchiran uyarispa, imachus necesitasqanta qospa, yachachispa, yanapaspa ima (Juan 5:20; 8:28).  Kunanqa yachasun imaynatas munakuq Papanchis noqanchistapas chhaynata cuidawasqanchista.

10. Salmos 66:19, 20 textopi nisqanman jina, ¿imaynatan Jehová Dios rikuchiwanchis munakuwasqanchista?

¹⁰ Jehová Diosqa uyariwanchismi mañakusqanchista (leey Salmos 66:19, 20). Diosqa munanmi paymanta mañakunanchista, chaymi niwanchis: “Mañakushallaychispuni”, nispa (1 Tes. 5:17). Diosmantaqa mañakusunmanmi tukuy tiempo maypi kashaspapas. Sichus reparasun mañakusqanchista uyariwasqanchista chayqa, astawanmi Diosman qayllaykusun. Salmota qelqaqmi niran: “Diosmi wajakuspa mañakusqayta uyariwaran, chaymi payta munakuni”, nispa (Sal. 116:1).

11. ¿Imaynatan Jehová Dios mañakusqanchista kutichimun?

¹¹ Papanchisqa kutichimunmi mañakusqanchista. Chaymi apóstol Juan niran: “Imataña Diospa munayninman jina mañakusunchis chaypas, Diosqa uyariwasunmi”, nispa (1 Juan 5:14, 15). Diosmi ichaqa allinta yachan imachus noqanchispaq aswan allin kasqanta, chaymi mayninpi mana mañakusqanchisman jinachu ruwanqa otaq juj tiempo suyananchistaraq munanqa (2 Cor. 12:7-9).

12, 13. ¿Imakunatan Jehová Dios ruwan imachus necesitasqanchista qowananchispaq?

¹² Diosqa imachus necesitasqanchistan qowanchis. Diosqa taytakunata kamachisqanman jinan ruwallantaq (1 Tim. 5:8). Chaymi wawankunaman imachus necesitasqanta qon. Manan munanchu p’achamanta, mijunamanta, maypi tiyananchismantapas llakikunanchista (Mat. 6:32, 33; 7:11). Munakuq tayta kasqanraykun imaymanataña ruwaran jamuq tiempopi imachus necesitasqanchista qowananchispaq.

¹³ Diosmi ichaqa astawan qowanchis paywan allinpi kananchispaq imakunatachus necesitasqanchista. Bibliapin paymanta willawanchis, munayninmanta, imapaq kamawasqanchismanta, imachus jamuq tiempopi pasananmantapas. Sapankanchismantan llakikun chaymi payta reqsinanchispaq tayta-mamanchiswan otaq juj hermanowan yanapawaranchis. Yanapawallanchistaqmi umalliqkunawan allin iñiyniyoq hermanokunawanpas. Chaymantapas juñunakuykunapin paymanta yachachiwanchis. Chaykunata ruwaspan rikuchin munakuwasqanchista (Sal. 32:8).

14. ¿Imaraykun Jehová Dios yachachiwanchis, imaynatan chayta ruwan?

¹⁴ Jehová Diosmi yachachiwanchis. Juchayoq runan kanchis, chaymi allin yachachisqa kanapaq corregiwanchis. Bibliapin nin: “Jehová Diosqa munakusqan runakunatan wanachin”, nispa (Heb. 12:6, 7). Yaqapaschá Bibliata leespa, otaq juñunakuypi uyarispa reparakunchis piensasqanchista imayna kasqanchistapas cambiananchis kasqanta. Otaq umalliqkunaq yanapayninta necesitanchis. Imaynaña kaqtinpas Diosninchisqa munakuwasqanchisraykun wanachiwanchis (Jer. 30:11).

15. ¿Imaynatan Jehová Dios yanapawanchis?

¹⁵ Jehová Diosqa yanapawanchismi aguantananchispaq. Imaynan juj tayta wawankunata yanapan sasachakuypi tarikuqtinku chhaynatan Diospas yanapawanchis. Santo espirituntan qowanchis paymanta ama karunchakunanchispaq (Luc. 11:13).  Chaymantapas willawanchismi jamuq tiempopi kusisqa kausananchista, chayta yuyariymi yanapawanchis sasachakuykunata aguantananchispaq. Ima llakikuypiña tarikusunman chaypas munakuq Diosninchismi chayta allichapunqa. Sasachakuyninchisqa manan wiñaypaqchu, Diospa qowasqanchismi ichaqa wiñaypaq kanqa (2 Cor. 4:16-18).

16. ¿Iman pasaran Adanpa juchallikusqanrayku?

¹⁶ Adán juchallikuqtinpas Jehová Diosqa rikuchiranmi munakuwasqanchista. Adanpa juchanraykun llapa wawankunapas manaña Diospa familianmantañachu kapuranku (Rom. 5:12; 7:14). Ichaqa, ¿imatan Dios ruwaran Adanpa wawankunata yanapananpaq?

17. ¿Imatan Jehová Dios ruwaran Adanpa juchallikusqan qhepallaman?

¹⁷ Jehová Diosqa castigaranmi Adanta, ichaqa niranmi wawankunata yanapananpaq. Adanpa juchallikusqan qhepallamanmi Diosqa prometeran kasukuq runakuna paypa familianman kutimpunankuta (Gén. 3:15; Rom. 8:20, 21). Chayta junt’ananpaqmi Jesusqa noqanchisrayku wañuran. Chaywanmi rikuchiran anchata munakuwasqanchista (Juan 3:16).

18. Jehová Diosmanta karunchakuranchisña chaypas, ¿imaraykun mana iskayananchischu wawankunata jina munakuwasqanchismanta?

¹⁸ Juchayoq runaña kanchis chaypas Jehová Diosqa munanmi familian ukhupi kananchista, manataqmi sayk’unchu yanapawaspanchis. Sonqontaña k’irisunman otaq juj tiempoña paymanta karunchakusunman chaypas, payqa suyashallanmi kutimunanchista. Jesusmi willaran chinkapuq churimanta, chaywanmi rikuchisharan Jehová Dios may tukuyta munakuwasqanchista (Luc. 15:11-32). Chay willakuypi taytaqa  suyashallaranmi wawan kutimpunanta, kutimpuqtintaq taytanqa sumaqta chaskiran. Diosmantaña karunchakuranchis chaypas, Diosqa chaskiwasunmi juchanchismanta pesapakuqtinchisqa.

19. ¿Imatan Jehová Dios ruwanqa Adán juchallikusqan jawa mana allinkunata chinkachipunanpaq?

¹⁹ Papanchisqa Adanpa juchan jawa imaymana mana allinkuna kasqantan tukuchipunqa. Adán juchallikuqtinmi Diosqa decidiran 144.000 runakuna Jesuswan kuska reykuna sacerdotekuna kanankupaq. Mosoq pachapiqa Jesusmi paykunawan kuska kasukuq runakunata yanapanqaku mana juchayoq kapunankupaq. Último pruebata pasasqanku qhepamantaq Diosqa paykunaman wiñay kausayta qonqa. Jinan Papanchisqa kusikunqa kay allpapi wawankuna ch’uya kapusqankumanta. ¡Chay tiempoqa kusikunapaqmi kanqa!

20. ¿Imaynatan Jehová Dios rikuchiran anchata munakuwasqanchista? ¿Imamantan qatimuq yachachikuypi yachasun?

²⁰ Jehová Diosqa sut’itan rikuchin anchata munakuwasqanchista. Manan pipas pay jina taytaqa kanmanchu. Uyarinmi mañakusqanchista, imachus necesitasqanchistan qowanchis kausananchispaq paywan allinpi kananchispaqwan. Yachachiwanchismi, yanapawanchistaq sasachakuypi tarikuqtinchis. Jamuq tiempopi sumaqta kausananchispaqtaq imaymanata ruwashan. Maytan kusikunchis chhaynata munakuwasqanchismanta cuidawasqanchismantapas. ¿Imaynatan agradecekusqanchista rikuchisunman? Qatimuq yachachikuypin chaymanta yachasun.