1. Persia llactamanda reyhuan parlangapaj munashpaca ¿imatata rurana carca?

ASHTACA ashtaca huatacuna huashaman Persia llactapi causanajushcanchiman. Imamandapash reyhuan parlangapaj munaimandami Susa puebloman rina tucunchiman. Shinapash reyhuan parlangapaj munashpaca pai permisota cujpimi parlai usharinlla carca. Na permisota cujpi, yangata reypa ñaupajpi parlangapaj shayarigrijpica huañuchinmanmi carca (Est. 4:11).

2. ¿Jehová Diosca shuj reycunashnachu can?

² Persia llactamanda reycunashnaca Jehová Diosca na canllu. Paica tucui gobiernocunata yali poderta charishpapash paihuan parlachunmi munan. Jehová Diosca Tucuita Ruraj, Tucui Ushaita Charij, Mandaj Dios cashpapash paitaca “ñucanchi Taitalla” nichunmi munan (Mat. 6:9). Caita yachashpaca ¿nachu ninanda cushijupanchi?

3. a) Jehová Diostaca ¿imamandata “ñucanchi Taita” ni ushapanchi? b) Cai temapica ¿imatata yachajupashun?

³ Jehová Diostaca ñucanchiman causaiguta carashcamandami “ñucanchi Taita” ni ushapanchi (Hech. 17:24, 25). Ñucanchi Taita cashcamandami paita cazuna capanchi. Shinami tauca bendiciongunata chasqui ushapashun (Heb. 12:9). ¿Ima bendiciongunatallata chasquipashun? Para siempre cai Alpapi causanata o shujcunaca cielopi causanata. Jehová Diosta cazushpaca cunanbipashmi tauca bendiciongunata chasqui ushapanchi. Cai temapica Jehová Dios imashina shuj juyaj taitashna ñucanchita cuidajushcata, nimahora na jichuna cashcatapashmi yachajupashun. Shinapash pundapica Jehová Dios ñucanchita juyashcata  imamanda seguro cai ushashcatami yachajupashun.

4. Huaquin gentecunaca ¿imashinata Taita Diospa ñaupapica sintirin?

⁴ Jehová Diostaca shuj Taitatashnami ricuna capanchi. Shinapash huaquin gentecunaca Taita Diospa ñaupapica nimapa na sirvinshnami sintirin. Jehová Dios paicunata juyashcata, paicunata llaquishcatapash na crinllu. Shina pensarichunga Jehová Diosca na munanllu. Causaiguta carashcamandami paihuan ali amigocuna cachun munan. Caimanda parlashpallatami apóstol Pabloca Atenas llactapi cashpaca cashna nirca: Taita Diosca “ñucanchimandaca na carupi canllu” nishpa (Hech. 17:24-29). Imashinami shuj huahua paipa taitahuan imagutapash parlanlla. Shinallatami Jehová Diospash ñucanchicuna paiman imagutapash villachun munan.

5. Shuj panigumandaca ¿imatata yachajupanchi?

⁵ Huaquingunaca paicunapa propio taita na juyashcamandami Jehová Diosta shuj juyaj Taitatashnaca na ricun. Shuj paniguca: “Ñuca papitoca nali shimicunata nishpami maipash cachun tacurihuanlla carca. Chaimi Bibliamanda yachajui callarishpaca Taita Dios ñucata juyashcata intindinaca shinlli cahuarca. Shinapash Jehovamanda yachajushpaca ñana shina sintirircanichu” ninmi. Ñucanchicunapashmi shina sintiripashcashun. Shinapash cai panigushnami, Jehová Diostaca shuj juyaj Taitatashna ricuna capanchi.

6. Mateo 11:27​pi nishca shinaca ¿imashinata Jehová Diosca ñucanchita juyashcataca ricuchishca?

⁶ Jesuspa rurashcacunata, paipa yachachishcacunatapash Bibliapi escribichishpami Jehová Diosca ñucanchita juyashcataca ricuchishca (Mateo 11:27, liingui). Jehová Dios imashinapacha cashcatami Jesusca cai Alpapi cashpa ricuchirca. Chaimi cashna nirca: “Maijambash ñucata ricushpaca, ñuca Taitatami ricujun” nishpa (Juan 14:9). Jehová Dios shuj alipacha taita cashcataca tauca viajecunatami Jesusca parlarca. Mateo, Marcos, Lucas, Juan librocunapica cutin cutinmi “ñuca Taitalla” nijta ricuchin. Gentecuna Jehovata shuj juyaj Taitatashna ricuchun munaimandami Jesusca Jehovamanda cutin cutin parlan carca (Juan 17:25, 26).

7. Jehová Dios Jesusta ayudashcamandaca ¿imatata yachajupanchi?

⁷ ¿Imashinata Jehová Diosca Jesusta juyashcata ricuchirca? Jehová Diosca paipa Churi Jesuspa mañaicunata uyashpami paita juyashcata ricuchirca (Juan 11:41, 42). Llaquicunahuan cajpipash Jehová Dios paita juyaihuan ayudashcatami Jesusca siempre ricurca (Luc. 22:42, 43).

8. ¿Imashinata Jehová Diosca Jesusta ayudarca?

⁸ Jehová Dios paiman causaiguta cushcata, imata minishtishcatapash cushcataca Jesusca alimi yacharca. Chaimi Jesusca: “Ñuca Taitamandami causajuni” nirca (Juan 6:57). Jesusca tucui shunguhuanmi Jehová Diospi confiarca. Chaimi Jehová Diospash Jesús imata minishtishcata curca. Ashtahuanbachaca paita tucui shunguhuan sirvishpa catichunmi ayudarca (Mat. 4:4).

9. Jehová Diosca ¿imashinata Jesusta juyashcata ricuchirca?

⁹ Jesús paita ninanda juyashcata seguro cachunmi Jehová Diosca paitaca tucuipi ayudarca (Mat. 26:53; Juan 8:16). Jesús llaquicunata charijpipash chai llaquicunata na tucuchishpapash, chai llaquicunata aguantai ushachunmi Jehová Diosca ayudarca. Jesusca ima llaquita charishpapash, chai llaquicuna ashapalla cashcataca alimi yacharca (Heb. 12:2). Jesusta uyashpa, ima minishtirishcaguta cushpa, yachachishpa, ayudashpapashmi Jehová Diosca Jesusta juyashcata ricuchirca  (Juan 5:20; 8:28). Cunanga Jehová Dios ñucanchicunata Jesustashna cuidajushcata yachajupashunchi.

10. Salmo 66:19, 20​pi nishca shinaca ¿imashinata Jehová Diosca ñucanchita juyashcata ricuchin?

¹⁰ Jehová Diosca ñucanchi mañaicunata uyanmi (Salmo 66:19, 20, liingui). Jehová Diosca ñucanchicuna paita cutin cutin mañachunmi munan. Jehová Diostaca maipi cashpapash mañajunallami capanchi (1 Tes. 5:17). Jehová Diosca ñucanchita juyaimandami siempre ñucanchi mañaicunata uyajun. Ñucanchi mañaicunata Jehová Dios uyajta yachashpaca paitaca ashtahuanmi juyapashun. Salmo librota escribij runaguca nircami: “Mandaj Diostami juyajuni. Paimi, ninandapacha ñuca mañajujtaca uyahuashca” nishpa (Sal. 116:1).

11. Jehová Diosca ¿imashinata ñucanchi mañaicunata contestan?

¹¹ Ñucanchita juyaj Jehová Diosca ñucanchi mañaicunata uyashpallaca na quedanllu. Ashtahuangarin imaguta mañashcatami cun. Chaimi apóstol Juanga cashna nirca: “Pai munashcashna ñucanchi imaguta mañajujtapash, Diosca uyanllami” nishpa (1 Juan 5:14, 15). Huaquimbica Jehová Diosca ñucanchi mañaicunataca ñucanchi munashcashnaca na contestanllu. Ñucanchipa ima ali cashcata yachaimandami huaquinbica ñucanchi mañashcataca na cun o huaquinbica tiempohuan contestan (2 Cor. 12:7-9).

12, 13. ¿Imacunatalla rurashpata Jehová Diosca ñucanchita ayudajushca?

¹² Jehová Diosmi imata minishtishcata cun. Jehová Diosca taitacunataca paipa huahuacunamanga imata minishtishcata cuchunmi mandan. Shinapash Jehová Diosrami chaita pactachishpa shuj ali ejemplota ricuchin (1 Tim. 5:8). Jehová Diosca ñucanchicuna micunamanda, churajunamanda, maipi causanamandapash yapata preocuparichunga na munanllu (Mat. 6:32, 33; 7:11). Ñucanchita juyaimandami, Jehová Diosca shamuj punllacunapipash imata minishtishcata cunga.

¹³ Ashtahuanbachaca Jehová Diosca paipa ali amigocuna cachunmi ayudan. Chaimi paimanda yachajuchunga Bibliata cushca. Bibliapimi paipa munai maijan cashcata, ñucanchicunata imapa rurashcata, jipa punllacunapipash ima pasana cashcata villajun. Bibliamanda yachajui callarijpica Jehová Diosca ñucanchi taitamamacunata, Bibliamanda yachachijcunatapashmi paimanda ñucanchita yachachichun utilizarca. Shinami cada unomanda preocuparishcata ricuchirca. Jehová Diosca congregacionmanda ancianocunata, shuj huauquipanicunatapash utilizashpami ñucanchitaca ayudashpa catijun. Shinallata tandanajuicunahuanbashmi ñucanchitaca yachachishpa catijushca. Caicunahuan o shuj cosascunahuanbashmi Jehová Diosca ñucanchimanda preocuparishcata ricuchin (Sal. 32:8).

14. ¿Imamandata Jehová Diosca ñucanchita disciplinan? ¿Imashinata disciplinan?

¹⁴ Ñucanchitaca Jehová Diosmi yachachin. Jesushuan ricushpaca ñucanchicunaca juchayucunami capanchi. Chaimi tucuipi ñucanchita juyaj Jehová Dios yachachichun minishtipanchi. Bibliapica Jehová Diosca “maijandapash juyashpami [disciplinan]” ninmi (Heb. 12:6, 7, NM ). Ñucanchita disciplinangapaca huaquin cosascunatami utilizan. Por ejemplo, talvez Bibliapi imatapash liishpa, tandanajuicunapi imatapash uyashpami imapi cambiana cashcata cuenta japipanchi. Shinallata huauqui ancianocunahuanbashmi imapi mejorana cashcata cuenta japichun ayudan. Jehová Diosca ñucanchita juyaimandami siempre imagupipash mejorashpa catichun ayudan (Jer. 30:11).

15. ¿Imashinata Jehová Diosca ñucanchita ayudan?

 ¹⁵ Jehová Diosmi llaquicunata aguantachun ayudan. Jehová Diosca shuj juyaj taitashnallatami ñucanchicuna ima llaquicunapi cajpipash aguantashpa catichun ayudan. Paipa espíritu santota cushpami paipa ali amigocuna cashpa catichunbash ayudan (Luc. 11:13). Tranquilo sintirichunbashmi ayudan. Por ejemplo, cunanbi charishca llaquicuna ñalla tucurinata crishpa aguantachunmi ayudan. Jehová Diosca ñucanchicuna cunanbi ima llaquicunata charishcatapash tucuchingami. Ñallami cushilla, para siempre causaiguta apamunga (2 Cor. 4:16-18).

16. Adán, Jehovata na cazujpica ¿imata pasarca?

¹⁶ Adán, Jehovata na cazujpipash chai ratoca Adandaca na tucuchircachu. Chaimi nita ushapanchi Jehová Diosca juyaj Dios cashcata. Shina na cazuimandaca Adanbash, paipa miraicunapash Jehovapa familia caitaca ñana usharcachu (Rom. 5:12; 7:14). Shinapash ¿Adanba miraicunataca Jehová Diosca cungashpachu saquirca?

17. Adán, Jehovata na cazujpica ¿imatata Jehová Diosca rurarca?

¹⁷ Jehová Dios Adanda castigashpapash paipa miraicunataca na cungashca saquircachu. Adanda castigashpapash paipa miraicuna cutin Jehovapa familia tucui ushashcatami Jehová Diosca nirca (Gén. 3:15; Rom. 8:20, 21). Chai nishcataca Jehová Diosca paipa juyashca churi Jesusta ñucanchimanda huañuchun cachamushpami pactachirca. Shinami ñucanchita ninanda juyashcata ricuchirca (Juan 3:16).

18. Jehovamanda caruyashca cashpapash ¿imamandata Jehová ñucanchita paipa huahuacunatashna juyashcataca seguro capanchi?

¹⁸ Ñucanchicuna juchayucuna cajpipash nimapa na sirvijtashnaca Jehová Diosca na ricunllu. Ashtahuangarin paipa familia tucuchunmi  munan. Huaquinbica Jehovata sirvinata saquishpa paimanda caruyajpipash Jehová Diosca paiman tigrachunmi munan. Tucuita yanga tucuchishca jovenmanda parlashpami Jesusca Jehová Dios ñucanchita ninanda juyashcata yachachirca (Luc. 15:11-32). Tucuita yanga tucuchishca jovenba taitaca paipa churi tigramunataca seguromi carca. Shuj punlla paipa churi tigramujpica cushijushpami chasquirca. Shina cuendami shuj huauqui o shuj pani arrepintirishpa tigramujpica Jehová Dios perdonashcataca seguro caita ushapanchi.

19. Adanba culpamanda ashtaca llaquicuna tiashcataca ¿imashinata Jehová Diosca tucuchinga?

¹⁹ Adanba culpamanda ashtaca llaquicuna tiashcata tucuchitapacha tucuchingapami Jehová Diosca 144 mil gentecunata paipa churi Jesushuan cielopi mandachun agllangapaj decidirca. Paicunaca reycuna, sacerdotecunami cielopica canga. Cai Alpa shuj paraíso tucujpica Jehovata cazuj gentecuna jucha illaj cachunmi Jesuspash, 144 mil ungidocunapash ayudanga. Cai alpapi gentecuna último pruebapi Jehovata tucui shunguhuan cazujpimi, Jehová Diosca para siempre na huañushpa causana oportunidadta paicunamanga cunga. Cai alpapi jucha illaj gentecuna causanajujta ricushpami Jehová Diosca ninanda cushijunga. Chaica shuj jatun cushijuimi canga.

20. a) Jehová Diosca ¿imashinata ñucanchita juyashcataca ricuchishca? b) Cati temapica ¿imatata yachajupashun?

²⁰ Ñucanchicunaca juyaj taita Jehová Diostami charipanchi. Paica ñucanchi mañashcacunata uyan, ima minishtishcatapashmi caran. Shinallata paipa ali amigocuna cachunbashmi ayudan. Jehová Diosca ñucanchita yachachin, ayudaitapashmi ayudan. Shinallata ashtaca bendiciongunatapashmi ñucanchipaca ña alichishcalla charin. Jehová Dios ñucanchita juyajta, cuidajta yachashpaca ninandami cushijupanchi. Cati temapica ñucanchicuna Jehovata juyashcata imashina ricuchi ushashcatami yachajupashun.