1. Со ваљани сине те керел некој ако мангела сине те керел лафи е цареа тари Персија?

ЗАМИСЛИН туке кај живинеа ки Персија англедер околу 2.500 берш. Мангеа те кере лафи е цареа башо нешто важно, хем адалеске џаја ки царско диз Суза. Ама, англедер те кере лафи е цареа мора те овел тут лескири дозвола. Ако пробинеа те џа ки лесте бизи лескири дозвола, шај те ове мудардо! (Ест. 4:11).

2. Сар мангела о Јехова те дикха ко адава со шај те кера леа лафи?

² Кобор сием благодарна со о Јехова нане сар адава персиско цари! Иако о Јехова тано бут побаро таро секова манушикано владетели, шај те кера леа лафи ко секова време. Ов секогаш тано спремно те шунел амен. На пример, иако е Јехова иси ле баре титуле сар сој Баро Створители, Семоќно хем Најбаро Господари, ов мангела сарине амен те викина ле „мо Дад“ (Мат. 6:9). Кобор сием бахтале со ов мангела те осетина амен добором паше леа!

3. Соске шај те викина е Јехова „мо Дад“, хем со ка дикха ки акаја статија?

³ Иси амен право те викина е Јехова „мо Дад“ соске лестар авела амаро живото (Пс. 36:9). Адалеске сој тано амаро Дад, должна сием те шуна ле. Ако кераја адава со ов родела амендар, ка овен амен бут берекетија (Евр. 12:9). Ко адала берекетија тано вклучимо о вечно живото, бизи разлика дали ко небо или ки Пхув. Ама, о Девел авдиве да дела амен шуже берекетија. Ки акаја статија ка дикха сар о Јехова панда акана сикавела кај тано амаро Дад  со грижинела пе аменге, хем соске шај те ова сигурна кај нане те мукхел амен ни ки иднина. Ама, најангле те дикха соске амаро Дад сој ко небо бут мангела амен хем грижинела пе аменге.

4. Соске несавенге тано пхаро те дикхен е Јехова сар пумаро Дад?

⁴ Дали туке пхаро те дикхе ко Девел сар тло Дад? Несаве мислинена кај на врединена кеда ка спорединен пе е Јеховаја. Пхаро ленге те верујнен кај о Семоќно Девел интересинела пе ленге лично. Ама, амаро Дад со грижинела пе аменге, на мангела те размислина аѓаар. Ов денѓа амен живото хем мангела те ова леа паше. Откеда керѓа лафи башо акава, о апостол Павле објаснинѓа околенге со шунена ле сине ки Атина кај о Јехова „нане дур никастар амендар“ (Дела 17:24-29). О Девел мангела секова јекх амендар те осетинел пе слободно те керел леа лафи исто сар јекх чхаво со осетинела пе слободно те керел лафи пле родителеа кова со бут мангела ле.

5. Со сикљоваја таро искуство јекхе пхењакоро?

⁵ Јаверенге шај нане локхо те дикхен е Јехова сар пумаро Дад соске ленгоро лично дад на сикавѓа ленге скоро нисаво мангипе хем внимание. На пример, јекх амари пхен вакерѓа: „Мо дад сине бут насилно манцар. Кеда почминѓум те проучинав и Библија, сине манге пхаро е Девле те дикхав сар мло небесно Дад. Ама, откеда запознајнѓум е Јехова, са адава менинѓа пе“. Дали ту да осетинеа тут аѓаар? Ако оја, ов сигурно кај о Јехова туке да шај те овел о најшукар Дад со постојнела.

6. Спрема Матеј 11:27, ко саво начин о Јехова поможинѓа аменге те дикха ле сар амаро Дад сој пхердо мангипаја?

⁶ О Јехова поможинѓа аменге те дикха ле сар амаро Дад сој пхердо мангипаја адалеа со мукхља ки Библија те овен пишиме е Исусескере лафија хем постапке. (Читин Матеј 11:27.) О Исус добором совршено сикавела сине е Јеховаскере особине со шај сине те вакерел: „Кој дикхља ма ман, дикхља ме Даде да“ (Јован 14:9). Ов бут пути керела сине лафи башо Јехова кај постапинела сар Дад. Ко штар евангелија, о Исус користинѓа о лафи „Дад“ башо Јехова околу 165 пути. Соске керела сине адава? Те шај те поможинел е манушенге те хаљовен кај о Јехова чаче тано Дад кова со бут мангела амен (Јован 17:25, 26).

7. Со сикљоваја башо Јехова таро начин сар постапинела сине пле Чхавеа?

⁷ Размислин со сикљоваја башо Јехова таро начин сар постапинела сине пле Чхавеа. О Јехова секогаш шунела сине е Исусескере молитве. На само со шунела лен сине, него хем одговоринела сине ки ленде (Јован 11:41, 42). Бизи разлика саве пхарипа сине ле, о Исус секогаш осетинела сине о мангипе хем и поддршка пле Дадескири (Лука 22:42, 43).

8. Ко саве начинија о Јехова грижинѓа пе е Исусеске?

⁸ О Исус признајнѓа кај лескоро Дад створинѓа ле хем кај таро Јехова зависинела лескоро живото. Ки јекх прилика ов вакерѓа: „Ме живинава преку о Дад“ (Јован 6:57). Е Исусе сине ле целосно доверба ко пло Дад, хем о Јехова грижинела пе сине башо лескере телесна потребе. Ама сој најважно, о Девел грижинела пе сине башо лескере духовна потребе (Мат. 4:4).

9. Сар о Јехова сикавѓа е Исусеске кај тано Дад со грижинела пе леске хем бут мангела ле?

⁹ Адалеске сој тано Дад со грижинела пе, о Јехова мангља о Исус те овел целосно сигурно кај ов поддржинела ле (Мат. 26:53; Јован 8:16). Иако на заштитинѓа ле тари секоја дукх, о Девел поможинѓа леске те издржинел о неволје. О Исус сине сигурно кај секоја неволја со шај ка овел ле тани само привремено (Евр. 12:2). О Јехова сикавѓа леске кај мангела ле  адалеа со шунела ле сине, дела ле сине адава сој леске потребно, сикавела ле сине хем поможинела ле сине (Јован 5:20; 8:28). Акана те дикха сар амаро Дад сој ко небо грижинела пе аменге да ко слично начин.

10. Спрема Псалм 66:19, 20, сар о Јехова сикавела кај мангела амен?

¹⁰ О Јехова шунела амаре молитве. (Читин Псалм 66:19, 20.) Ов на мангела те чхива аменге границе ко молитве. Наместо адава, поттикнинела амен секогаш те молина амен леске (1. Сол. 5:17). Шај те молина амен леске ко секова време, бизи разлика коте сием. О Девел никогаш нане превише зафатимо те шај те шунел амен. Наместо адава, ов секогаш спремно шунела амаре молитве. Кеда хаљоваја кај о Јехова шунела амаре молитве, мангаја ле панда повише. О псалмисти вакерѓа: „Мангава е Јехова, соске ов шунела мло гласо“ (Пс. 116:1).

11. Сар о Јехова одговоринела ко амаре молитве?

¹¹ Амаро Дад на само со шунела амаре молитве него хем одговоринела ки ленде. О апостол Јован уверинела амен: „Било со те рода, ако тано спрема лескири волја, ов шунела амен“ (1. Јов. 5:14, 15). Џанѓола пе, о Јехова шај нане те одговоринел аменге аѓаар сар со аџикераја. Ов џанела со чаче ваљани аменге, адалеске понекогаш на дела амен адава со родаја, или палем, на дела ле аменге одма (2. Кор. 12:7-9).

12-13. Ко саве начинија амаро небесно Дад грижинела пе башо амаре потребе?

¹² О Јехова грижинела пе аменге. Ов да керела адава со родела таро са о дада те керен (1. Тим. 5:8). О Девел дела о буќа со ваљани лескере чхавенге те шај те живинен. Ов на мангела превише те секирина амен башо адава со ка ха, со ка урава хем дали ка овел амен тхан кај те живина (Мат. 6:32, 33; 7:11). Сар јекх родители пхердо мангипаја, о Јехова исто аѓаар грижинѓа пе те овен амен о буќа со ка ваљанен аменге ки иднина.

¹³ Сој најважно, о Јехова грижинела пе башо амаре духовна потребе. Преку пло Лафи, вакерѓа аменге о чачипе баши песте, баши пли намера, баши смисла е животоскири хем башо адава со ка случинел пе ки иднина. Панда таро почеток кеда шунѓем башо чачипе, ов сикавѓа аменге лично интерес аѓаар со поможинѓа амен те запознајна ле преку амаре родителија или преку некој јавер. Освен адава, о Јехова понадари да поможинела аменге преку амаре старешине кола со бут грижинена пе аменге хем преку јавера зрела пхраља хем пхења ко собрание. Исто аѓаар, сар дело тари лескири духовно фамилија, добинаја поуке преку о состанокија. Ко акала хем ко јавера начинија, ов сикавела кај тано Дад кова со грижинела пе секоле јекхеске амендар (Пс. 32:8).

14. Соске о Јехова сикавела амен, хем сар керела адава?

¹⁴ О Јехова сикавела амен. Амен на сием сар о Исус, соске сием несовршена. Адалеске, те шај те сикавел амен, амаро Дад сој ко небо укоринела амен кеда ваљани. Лескоро Лафи сетинкерела амен: „Кас мангела о Јехова, ле укоринела“ (Евр. 12:6, 7). О Девел исправинела амен ко бут начинија. На пример, кеда ка читина нешто ки Библија или ка шуна нешто ко состанок, шај ка хаљова кај ваљани те кера несави промена ко амаро размислибе или постапке. А понекогаш ка добина и помош со ваљани аменге таро старешине. Бизи разлика ко саво начин о Јехова ка исправинел амен, те на бистра кај адава секогаш керела ле таро мангипе (Ерем. 30:11).

15. Ко саве начинија о Јехова заштитинела амен?

¹⁵ О Јехова поможинела амен те истрајна ко неволје. Исто сар јекх дад со бут грижинела пе пле чхавенге кеда ленге пхаро, амаро  Дад сој ко небо поможинела аменге кеда иси амен проблемија. Ов дела амен пло свети дух те шај те заштитинел амен ко духовно поглед (Лука 11:13). О Јехова поможинела амен хем кеда сием обесхрабриме. На пример, денѓа амен бут шужи надеж баши иднина која со поможинела аменге те истрајна ко неволје. Ма бистре: Бизи разлика саве лошна буќа ка случинен пе, амаро Дад со грижинела пе аменге ка поправинел секоја штета со доживинѓем ла. Секоја неволја со иси амен тани само привремено, ама о берекетија со дела о Јехова тане вечна (2. Кор. 4:16-18).

16. Со случинѓа пе кеда о Адам на шунѓа пле Даде?

¹⁶ Панда јекх доказ кај о Јехова мангела амен тано о начин сар постапинѓа кеда прво пути уле проблемија ки лескири фамилија ки Пхув. Адалеске со на сине послушно пле Дадеске сој ко небо, о Адам на сине више дело тари е Јеховаскири бахтали фамилија, а ни лескере потомција (Рим. 5:12; 7:14). Ама, о Јехова керѓа нешто те шај те поможинел е манушенге.

17. Со керѓа о Јехова одма откеда бунинѓа пе о Адам?

¹⁷ О Јехова казнинѓа е Адаме, ама на мукхља лескере потомцон бизи надеж. О Девел одма ветинѓа кај о послушна мануша јекх диве палем ка овен дело тари лескири фамилија (1. Мој. 3:15; Рим. 8:20, 21). Ов исполнинела адава ветување преку и откупно жртва пле мангле Чхавескири, е Исусескири. Адалеа со денѓа пле Чхаве аменге, о Јехова докажинѓа кобор бут мангела амен (Јован 3:16).

18. Соске шај те ова сигурна кај о Јехова мангела амен сар пле чхаве иако шај сием лестар дур?

¹⁸ Иако сием несовршена, о Јехова мангела те ова дело тари лескири фамилија, хем на дикхела амен сар пхарипа. Понекогаш шај ка разочарина ле или ка цида амен лестар, ама ов на откажинела пе амендар. О Исус сикавѓа кобор бут мангела амен о Јехова кеда вакерѓа  и споредба башо чхаво со гело песке кхералдан (Лука 15:11-32). О дад ки адаја споредба никогаш на нашавѓа надеж кај о чхаво ка иранел пе. Кеда дикхља ле сар иранела пе, сигате прастандило англи лесте хем пхравде вастенцар аџикерѓа ле. Ако цидинѓем амен таро Јехова, ама каинаја амен, шај те ова сигурна кај амаро Дад, сој пхердо мангипаја, ка аџикерел амен пхравде вастенцар.

19. Сар о Јехова ка поправинел и штета со керѓа ла о Адам?

¹⁹ Амаро Дад ка поправинел цело штета со керѓа о Адам. Откеда ов бунинѓа пе, о Јехова одлучинѓа те посвојнел 144.000 мануша тари Пхув те шај те служинен сар царија хем свештеникија заедно лескере Чхавеа. О Исус хем адала со ка владинен леа ка поможинен е послушна манушенге те овен совршена ко нево свето. Откеда ка накхавен о последно испит баши послушност, о Девел ка дел лен вечно живото. Тегани амаро Дад ка овел бахтало со цели Пхув ка овел пхерди лескере совршена чхавенцар хем чхаенцар. Адава чаче ка овел бут шужо време!

20. Ко саве начинија о Јехова сикавѓа кај бут мангела амен, хем со ка дикха ки јавер статија?

²⁰ О Јехова сикавѓа кај бут мангела амен. Ов тано о најшукар Дад со постојнела. Шунела амаре молитве хем дела амен адава со ваљани аменге, хем ко материјално хем ко духовно поглед. О Јехова сикавела амен хем поддржинела амен. Освен адава, ка дел амен бут шуже берекетија ки иднина. Бут сием бахтале со џанаја кај амаро Дад мангела амен хем грижинела пе аменге! Ки јавер статија ка дикха ко саве начинија, сар лескере чхаве, шај те сикава кај сием благодарна башо лескоро мангипе.