СТАТЬЯ, КАЙ ТЭ СЫТЮВАС 6
Амаро Дад, о Иегова, фартэ амэн любий
«Мангэнпэ кадя: „Амаро Дад по нэбо“» (МАТФЕЯ 6:9).
ДИЛИ 135 Иегова анда вся ди ԥэнэн: «Ав мудро, мэрно шаво»
ПАЛА СО УӶАНАСА АНДА СТАТЬЯ? *
1. Со сас трэбуй, кай тэ подэс дума лэ персидсконэ царёса?
ПРЕДСТАВЬ, кай ту жувэс андэ Персия бут бэрша палпалэ. Тути трэбуй тэ подэс дума лэ царёса пала ек важно дила и ту жас андо персидско ӷлавно форо Сузы. Но май англал тути трэбуй тэ ԥэнэн, кай во тут аштярэл. Сар када на авелоп кадя, тут моӷли тэ умарэн! (Эсфирь 4:11).
2. Трэбуй варисо чи най, кай тэ подэс дума лэ Иеговаса?
2 Сар жэ драго по ди, кай о Иегова на шолпэ пэ кодэва персидско царё! Амаро Дэл со май баро анда всаворэ правителя. Но амэ лэса можэм тэ дас дума андэ любо время. Во камэл, кай амэ тэ дас дума лэса и тэ на лажас. Хоть пэр лэстэ ԥэнэн Создателё, Всемоӷущё и Владыка Ӷосподо, во камэл, кай амэ тэ ԥэнас пэр лэстэ «Дад» (Матфея 6:9). Амэн фартэ лэл лэ одестар, кай о Иегова камэл, кай амэ тэ полас лэс, сар дадэс!
3. Васо амэ можэм тэ ԥэнас по Иегова Дад и со амэ уӷанаса андэ кадэя статья?
3 О Иегова дя амэнди жызня, и амэ можэм тэ ԥэнас, кай во амаро Дад (Псалом 36:9). Тоди, амэ трэбуй лэс тэ кандас. И сар амэ терас кода, со во камэл, амэ можэм тэ аштярас лэстар бут лашимос (Евреям 12:9). Када вечно жызня по нэбо чи пэ ԥув. Ай дэсаво лашимос амэндэ исин ужэ акана. Андэ кадэя статья амэ уӷанаса, кай о Иегова, сар дад, диқэл пала амэндэ и васо амэ патяс, кай во никала амэн на ашавэла. Спэрва подаса дума, васо амэ патяс, кай амаро небесно Дад любий амэн и заботийпэ пала амэндэ.
О ИЕГОВА, КАДА ДАД, САВО ЛЮБИЙ И ЗАБОТИЙПЭ
О Иегова камэл, кай амэ тэ авас лэса фартэ лашэ друӷоря, сар о Дад, саво любий пэстирэ бэятонэн (Диқэн о абзацо 4.)
4. Васо дэкасти ԥарэс тэ полэн лэ Дэвлэс, сар дадэс?
4 Ԥарэс тути тэ полэс лэ Дэвлэс, сар дадэс, чи най? Дэко гиндон, кай о Иегова кацаво баро, кай амэ важ лэстэ нисо на ашас. Вонэ на патян, кай о Всемоӷущё Дэл, шола сама пэр лэндэ. Но амаро Дад, саво амэн любий, на камэл, кай амэ кадя тэ гиндосарас. Во дя амэнди жызня и во камэл, кай амэ лэс тэ родас и тэ виарақас. О апостоло Павло, кала ԥэндя кадэла алава, сыкадя кодэлэнди, ко жувэлас андэ Афины, кай о Иегова «найдур кажнонэстар амэндар» (Деяния 17:24—29). О Дэл камэл, кай амэ тэ полас лэс кадя, сар о бэято полэл пэстирэ дадэс, саво любий и заботийпэ.
5. Сости амэ сытювас кай амари ԥэй?
5 Аврэнди ԥарэс тэ полэн лэ Дэвлэс, сар дадэс, важ кода кай вонэ на диқлэ пэстирэ чаче дадэстар и любовь и о лашимос. Акэ со росԥэнэн амари ԥэй: «Мэрно дад ԥэнэнас найлашэ алава пэр мандэ. Сар кати мэ лэм тэ сытював па Библия, манди сас ԥарэс тэ полав лэ Иеговас, сар небеснонэ Дадэс. Вся паруделяпэ кати тоди, сар мэ лэс май драго уӷанглэм». Ай тумэнди ԥарэс тэ полэн лэ Иеговас, сар пэстирэ дадэс? Сар када кадя, нэ пэрэжывайте. Прожала и время и тумэ полэна, кай о Иегова само лашо дад па вся и люма.
6. Сар через кода, со пистромэ андэ Матфея 11:27, о Иегова поможый амэнди тэ полас, кай любий амэн, сар Дад?
6 О Иегова камэл, кай амэнди тэ авэл вушэро тэ полас лэс, сар пэстирэ любящёнэ Дадэс. Важ када во стердя, кай андэ Библия тэ авэл запистромэ, со дэлас дума и терэлас лэско Шаво. (Адиносар Матфея 11:27 *.) О Иисусо кадя фартэ шоласпэ пэ пэско Дад, кай дажэ ԥэндя: «Ко диқля ман, диқля и мэрнэ Дадэс» (Иоанна 14:9). О Иисусо часто дэлас дума важ о Иегова, сар пала Дадэстэ. Кати андэ Евангелия варикай 200 разоря о Иисусо ԥэнэнас по Иегова Дад. Васо кадя бут? Важ кода кай и мануша тэ патян, кай о Иегова па чачимастэ Дад, саво любий (Иоанна 17:25, 26).
7. Со амэ уӷанас пала Иегова анда кода, сар во полэлас пэстирэ Шавэс?
7 Со амэ уӷанас пала о Иегова анда кода, сар во полэлас пэстирэ Шавэс, лэ Иисусос? О Иегова вся и время ашунэлас лэ Иисусостирэ молитвы. Во най кати ашунэлас, но и дэлас атвето пэр лэндэ (Иоанна 11:41, 42). Саво бы тэ на авэл ԥаримос кай о Иисусо, во вся и время полэлас, кай лэско Дад лэс любий и дэл зор (Луки 22:42, 43).
8. Сар о Иегова заботияспэ пала о Иисусо?
8 О Иисусо прижанэлас, кай лэско Дад дя лэсти жызня и жувэл блаӷодаря лэсти. Во ԥэндя: «Мэ жував блаӷодаря мэрнэ Дадэсти» (Иоанна 6:57). О Иисусо андэ вся патялас пэстирэ Дадэсти, и о Иегова дэлас лэсти вся, со трэбуй важ и жызня. Но со май ӷлавно, о Иегова поможыяс лэ Иисусости тэ на парашэл тэ кандэл лэс (Матфея 4:4).
9. Сар о Иегова сыкадя лэ Иисусости, кай во, сар Дад, любий и подритярэл лэс?
9 Сар любящё Дад, о Иегова ԥэндя лэ Иисусости, кай во вся и время лэла тэ подритярэл лэс (Матфея 26:53; Иоанна 8:16). О Иегова на фэрияс лэ Иисусос всаворэстар, состар лэсти авелоп найдраго. Но во дя лэсти зор, кай во тэ виритярэл вся о ԥаримос. О Иисусо ӷанэнас, кай о ԥаримос на авэла вся и время (Евреям 12:2). О Иегова драго сыкавэлас, кай любий лэ Иисусос. Во лэс виашунэлас и заботияспэ пала лэстэ, сытярэлас и подритярэлас лэс (Иоанна 5:20; 8:28). Уӷанам, сар амаро небесно Дад сыкавэл пэстири любовь каринг амэндэ.
САР О НЕБЕСНО ДАД СЫКАВЭЛ, КАЙ ЛЮБИЙ АМЭН?
Любящё дад 1) ашунэл пэстирэ бэятос, 2) заботийпэ пала кода, со лати трэбуй, 3) сытярэл и 4) фэрий лэс. Кадя и амаро небесно Дад сыкавэл амэнди, кай любий амэн (Диқэн и абзацоря 10—15.) *
10. Сар анда Псалом 66:19, 20 дицол, кай о Иегова сыкавэл, кай любий амэн?
10 О Иегова ашунэл амарэ молитвы. (Адиносар Псалом 66:19, 20 *.) Во на камэл, кай амэ тэ подадиносарас, скати тэ мангаспэ и пала со. Во камэл, кай амэ бут тэ мангаспэ лэсти (1 Фессалоникийцам 5:17). Амэ можэм тэ мангаспэ амарэ Дэвлэсти андэ любо время и кай бы амэ тэ на авас. Лэстэ нинай кацаво, кай лэсти найкала, во вся и время драго амэн виашунэл. Кала амэ полас када, амэ лас инке май фартэ лэс тэ любисарас. О псалмопевцо ԥэндя: «Мэ любисарав лэ Иеговас, важ кода кай во ашунэл мэрно ӷолосо» (Псалом 116:1).
11. Сар о Иегова дэл атвето пэ амарэ молитвы?
11 О небесно Дад най кати ашунэл амарэ молитвы, ай кадяжэ дэл атвето пэр лэндэ. О апостоло Иоанно ԥэндя: «Сар амэ мангас кода, со сжалпэ кодэлэса, со о Дэл камэл, во ашунэл амэн» (1 Иоанна 5:14, 15). Канешно, када на сыкавэл, кай о Иегова дэла атвето кадя, сар амэ када аштярас. Во ӷанэн, со важ амэндэ май фэдэр, важ када во дэкала ԥэнэн «най», ай дэкала во камэл, кай амэ тэ поаштярас (2 Коринфянам 12:7—9).
12, 13. Сар тиро небесно Дад заботийпэ пала кода, со тути трэбуй?
12 О Иегова заботийпэ пала кода, со амэнди трэбуй. Во екжэно терэл кадя, со трэбуй тэ терэн всаворэ дада (1 Тимофею 5:8). Во дэл пэстирэ бэятонэнди вся, со трэбуй важ и жызня. Во на камэл, кай амэ тэ пэрэжываем, со тэ хас, со тэ лас пэр пэстэ и кай тэ жувас (Матфея 6:32, 33; 7:11). О Иегова, сар о Дад, саво любий, стердя дажэ кадя, кай и англэ амэндэ тэ авэл вся, со трэбуй.
13 Ай само ӷлавно, во заботийпэ пала кода, кай амэ тэ дружысарас лэса. Андэ Библия о Иегова ԥэрнадя амэнди о чачимос пала пэстэ и пала кода, со камэл тэ стерэл. Во росԥэндя, васо о мануш трэбуй тэ жувэл и со амэн аштярэл англэ. Кала ту пэрво разо ашундян о чачимос, кадя во шутя сама пэр тутэ. Файма, ту ашундян о чачимос важ о Дэл лэ дадэстар и ла датар, чи варикастар аврэстар, ко поможысардя тути тэ уӷанэс важ лэстэ. О Иегова идоси диқэл пала тутэ через и старейшыноря, савэ любин тут и через авэр ԥрала и ԥэя, савэ фартэ патян лэсти. Инке о Иегова сытярэл тут пэ собрании, котэ ту сытёс еқэҭанэ лэ ԥралэнца и лэ ԥэянца. Када кати дэсо, со о Иегова сыкавэл, кай заботийпэ пала амэндэ (Псалом 32:8).
14. Васо о Иегова амэн сытярэл и сар во када терэл?
14 О Иегова сытярэл амэн. О Иисусо сас совершэно, но амэ най кацавэ. Важ када амаро любящё Дад сытярэл амэн. Андэ Библия пистромэ: «Кас о Иегова любий, кодэлэс и сытярэл» (Притчи 3:12). Тэ сытярэл о Иегова можэт по разному. Например, кала амэ адиносарас и Библия чи ашунас кода, со росԥэнэн пэ собрания, амэ полас, кай амэнди трэбуй тэ парувас пэстирэ гиндоря и кода, сар амэ пэс андярас. Кадяжэ амэнди моӷут тэ поможын и старейшыноря. Сар бы о Иегова тэ на сытярэл амэн, во вся и время терэл када, кай любий амэн (Иеремия 30:11).
15. Сар о Иегова амэн фэрий?
15 О Иегова поможый тэ пэрэандярас о ԥаримос. Сар о любящё дад подритярэл пэстирэ бэятонэн, кала лэнди ԥарэс, кадяжэ и амаро небесно Дад подритярэл амэн андо ԥаримос. О Иегова дэл амэнди свынто духо, саво фэрий амэн всаворэстар, со можэт тэ римой амари дружба лэса (Луки 11:13). Амаро любящё Дад подритярэл амэн, кала амэ пэрэжываем. Во дэл амэнди зор, кай тэ аштярас о лашимос, саво авэла англэ. Када дэл амэнди зор тэ пэрэандярас о ԥаримос. Погиндосар, саво бы ԥаримос тутэ тэ на авэл, о Иегова улэла вся, со тути прижыляпэ тэ пэрэандярэс. О ԥаримос, саво амэндэ исин, на авэла вся и время, ай о лашимос лэ Иеговастар авэла вечно! (2 Коринфянам 4:16—18).
АМАРО ДАД НИКАЛА АМЭН НА АШАВЭЛА
16. Со тердяпэ, кала о Адамо жыля против пэско любящё Дад?
16 О Иегова сыкадя, кай любий амэн кодэлэса, сар во пэс андярдя, кала лэстирэ бэяцэ пэ ԥув лэс на канглэ. О Адамо жыля против пэско небесно Дад. Важ када во и кодэла, ко жылэ лэстар, нэ моӷут тэ авэн андо бахтало лэ Иеговаско ери (Римлянам 5:12; 7:14). Но о Иегова на ашадя лэ манушэн андэ бида.
17. Со стердя о Иегова, кала о Адамо жыля против лэстэ?
17 О Иегова спушля лэ Адамостар, важ кода со во стердя. Но во ԥэндя, кай поможыя кодэлэнди, ко жала лэ Адамостар. О Дэл сразу дя алав, кай и мануша, савэ лэс кандэна, упалэ авэна андэ лэско ери (Бытие 3:15; Римлянам 8:20, 21). Важ када о Иегова загиндосардя тэ отдэл пэстирэ любимонэ Шавэс, лэ Иисусос важ амэндэ. Кадэлэса о Иегова сыкадя, кай фартэ амэн любий (Иоанна 3:16).
Сар амэ отжылям лэ Дэвлэстар, но каисайлям, амаро любящё Дад фартэ лошавэл, кай амэ упалэ андэ лэско ери (Диқэн о абзацо 18.)
18. Катар амэ ӷанас, кай о Иегова камэл, кай амэ тэ авас лэстирэ бэяцэ, дажэ, кала отжас лэстар?
18 Хоть амэ найсовершэни, о Иегова камэл тэ диқэл амэн андэ пэско ери и на гиндой, кай амэ важ лэстэ аваса покута. Дэкала амэ терас варисо кацаво, со на чалёл лэ Иеговасти чи дурювас лэстар. Но во всаек на ашавэл амэн. О Иисусо сыкадя, сар дэ фартэ о Иегова любий пэстирэ бэятонэн, кала росԥэндя пала шаво, саво ужылятар пэстирэ дадэстар (Луки 15:11—32). Кодэва дад на парашэлас тэ патял, кай лэско шаво рияпэ. И кала во рисайля, лэско дад сас фартэ лошало кадэлэсти. Сар амэ отжылям лэ Дэвлэстар, но потом каисайлям, амэ трэбуй тэ ӷанас, кай амаро любящё Дад фартэ лошавэл, кай амэ упалэ андэ лэско ери.
19. Сар о Иегова рия вся, со хасардя о Адамо?
19 Амаро Дад рия вся, со хасардям через о Адамо. Кала о Адамо жыля против, о Иегова закамля, кай андэ лэско ери тэ авэн 144 000 мануша, савэ авэна царёря и рашая вмести лэстирэ Шавэса. Андо раё пэ ԥув о Иисусо и кодэла, ко лэса правия, поможына манушэнди, савэ кандэн, тэ ашэн совершэни. Сар послиднё разо о Дэл диқэла, кандэн вонэ лэс чи най, тоди во дэла лэнди вечно жызня. Сар дэ фартэ лошавэла амаро Дад, кала диқэла, кай пэ ԥув ек и совершэни лэстирэ шавэ и щея! Када авэла райкани время!
20. а) Сар о Иегова сыкавэл амэнди, кай любий амэн? б) Пала со амэ уӷанаса андэ авэр статья?
20 О Иегова фартэ амэн любий. Во со май лашо Дад. Во ашунэл амарэ молитвы и заботийпэ пала вся, со амэнди трэбуй важ и жызня и кай тэ авэл лащи дружба лэса. Во сытярэл и дэл зор амэнди. Ай инке лэстэ исин важ амэндэ бут лашимос. Сар жэ драго по ди, кала полас, кай о Иегова любий и заботийпэ пала амэндэ! Андэ авэр статья амэ уӷанаса, сар лошавэла о Иегова, кала амэ сыкаваса, кай любисарас лэс и блаӷодарни лэсти, сар лэстирэ бэяцэ.
ДИЛИ 105 О Дэл исин любовь
^ абз. 5 Амэ часто гиндосарас пала Иегова, кай во Создателё и кай во Хулай пэ вся и люма. Но амэндэ бут со исин, кай тэ полас, кай во амэн любий и диқэл пала амэндэ, сар небесно Дад. Васо амэ кадя гиндосарас? Пала када амэ уӷанаса анда кадэя статья. Амэ кадяжэ уӷанаса, васо амэ патяс, кай о Иегова амэн никала на ашавэла.
^ абз. 6 Матфея 11:27: «Мэрно Дад пэрэдя манди вся, и нико на ӷанэн вся кадя важ о Шаво, сар ек о Дад, и нико на ӷанэн вся пала Дад, сар кати о Шаво и кодэла, касти о Шаво камэл тэ росԥэнэн».
^ абз. 10 Псалом 66:19, 20: «Но о Дэл ашундя, во шутя сама пэ мэрни молитва. Наис лэ Дэвлэсти, саво виашундя ман, кала мангаваспэ и на одля мандар пэстири любовь, сави никала на прожал».
^ абз. 61 ПЭ КАРТИНКА. Пэ всаворэ штар картинки и дада пэстирэ бэятонэнца. Ек дад виашунэл лэ бэятос. Дуйто, о дад праварэл ла бэята. Трито, о дад сытярэл лэ бэятос. Штарто, о дад жалуий лэ бэятос. Палал пэ картинка дицол лэ Иеговаско вас. Када дэл тэ полас, кай о Иегова кадяжэ заботийпэ пала амэндэ.
