1. A ku djuleka yini akuva mhunu a kota ku humelela a mahlweni ka hosi ya le Pérsia?

A HI NGE u hanya a tikweni dzra Pérsia kolomu ka 2.500 wa malembe lama khalutiki. U djula ku khanela ni hosi ya tiko hi mhaka ya kukazri, kutani u teka liyendzro u kongoma a mutini wa wuhosi wa le Xuxani. Kambe a wu nge na ku singita u humelela mahlweni ka hosi na u nga zranganga hi ku kuma mpfumelelo wa yone. Phela, loko a wo humelela mahlweni ka hosi na yi nga zranganga hi ku ku pfumelela, a wu ta dlawa!​—Est 4:11.

2. Xana Yehovha a djula leswaku hi titwisa kuyini loko hi khanela naye?

² Hi khensa swinene leswi Yehovha a nga fanikiki ni hosi ya le Pérsia! Yehovha a tlakuke ngopfu swinene ku tlula hosi yini na yini ya nyama, kambe a hi tsrhika hi khanela na yene nkama wini na wini. A djula leswaku hi titwa na hi ntsrhunxekile ku mu tsrhindzrekelela. Hi xikombiso, Yehovha a nga vitaniwa hi swithopo leswi tlakukiki swa ku fana ni leswi liki Mutumbuluxi Lwenkulu, Lwe Wa Ntamu Hinkwawu na Hosi Leyi Tlakukiki. Kambe, loko hi khanela na yene, a djula hi tizrisa zritu dzra lizrandzru dzra ku “Tatana”. (Mt 6:9) Hakunene swi khumba mbilu ku tiva leswaku Yehovha a djula hi mu vona swanga lweyi hi nga ni wuxaka bya le kusuhi na yene.

3. Ha yini hi vitana Yehovha “Tatana” wezru, nakone i yini leswi hi taka bula ha swone ka nhloko-mhaka leyi?

³ Swi fanelile akuva hi vitana Yehovha “Tatana” hikusa hi yene Nhlovo ya wutomi byezru. (Ps 36:9) Leswi a nga Tatana wezru, hi fanela ku mu yingiseta. Loko hi yentxa leswi a hi kombelaka swone, hi ta va ni matovoko lamanyingi. (Hb 12:9) Matovoko lawo ma patsra wutomi lebyi nga helikiki, a tilweni kumbe a misaveni. Kambe  ni swoswi hi kuma mabindzru. Ka nhloko-mhaka leyi hi ta bula hi ndlela leyi Yehovha a hi khomaka ha yone swanga Tatana ni leswi swi hi yentxaka hi tiyiseka leswaku a nge txhuki a hi tsrhika a nkameni lowu taka. Kambe, ku sungula, a hi kambisiseni leswi hi yentxaka hi dumba leswaku Tatana wezru wa le tilweni a hi zrandzra ngopfu swinene nakone a zron’weka ha hine.

4. Ha yini van’we swi va bindzrela ku vona Yehovha swanga Tatana wavu?

⁴ Xana swa ku bindzrela ku vona Xikwembu Nkulukumba swanga Tatana waku? Van’we va nga ha pimisa leswaku Yehovha i nkulu ngopfu swinene lakakuva hine vhanu hi kumeka na hi nga li va ntxhumu ka yene. A va kholwi leswaku Xikwembu Nkulukumba Wa Ntamu Hinkwawu awa zron’weka hi vone ha mun’we-mun’we. Nambitanu, Tatana wezru a nga djuli hi titwisa xileswo. A hi nyike wutomi nakone a djula leswaku hi va ni wuxaka naye. A ntsrhaku ka ku hlaya mhaka leyi, mupostola Pawulo a tlhamuxele vayingiseti vakwe le Atena leswaku Yehovha ‘a nga kule ku hine hinkwezru’. (Min 17:24-29) Xikwembu Nkulukumba a djula leswaku mun’wana ni mun’wana wezru a khanela naye ku fana ni n’wana a yaka khanela ni tatana wakwe lwa nga ni lizrandzru ni lwa zron’wekaka.

5. Hi dondzra yini ka leswi yentxekeliki makwezru mun’we wa xisati?

⁵ Van’wana swi nga ha va bindzrela ku vona Yehovha swanga Tatana wavu hi leswi va kalaka va nga kombiwanga lizrandzru kumbe va kombiwiki lizrandzru dzritsrongo hi va tatana vavu va nyama. Vona leswi makwezru mun’we wa xisati a swi hlayiki: “Tatana wanga a a lebya swinene.” A tlhela a ku: “Nkama lowu ni nga sungula ku dondzra Bibele, a swi ni kazratela ku titwa na ni ni wuxaka bya le kusuhi ni Tatana wezru wa le tilweni. Kambe nkama lowu ni mu tiviki Yehovha, ku ve ni ku txintxa.” Xana u ni ma titwela ya ku fana? Loko swi li tanu, u nga godole. Hi ku famba ka nkama na wene u nga swi kota ku vona Yehovha swanga Tatana lwe wa hombe ngopfu.

6. Hi ku ya hi Mattheo 11:27, hi yini yin’we ya tindlela leyi ha yone Yehovha a hi pfuniki ku mu vona swanga Tatana lwa nga ni lizrandzru?

⁶ Yin’we ya tindlela leti Yehovha a hi pfuniki ha yone ku mu vona swanga Tatana wezru lwa nga ni lizrandzru i kuva a yentxe leswaku mazritu ni swiyentxo swa Yesu swi tsraliwa a Bibeleni. (Dondzra Mattheo 11:27.) Yesu a kombise wumhunu bya Tatana wakwe hi ndlela leyi hetisekiki. Xiswoswo, a swi twala loko a ku: ‘Lweyi a ndzri voniki, a voni Tatana.’ (Yh 14:9) Yesu a a kotisa ku khanela hi ntizro lowu Yehovha a wu yentxaka swanga Tatana. Ntsena a mabukwini ya mune ya Evhangeli, Yesu a tizrise zritu “Tatana” kolomu ka 165 wa minkama loko a khanela hi Yehovha. Ha yini Yesu a khanele ngopfu hi Yehovha? Xin’we xa swivangelo a a li leswaku vhanu va kota ku kholwiseka leswaku Yehovha i Tatana lwa nga ni lizrandzru.​—Yh 17:25, 26.

7. Xana hi dondzra yini hi Yehovha ka ndlela leyi a nga khoma N’wanakwe ha yone?

⁷ Vona leswi hi swi dondzraka hi Yehovha ka ndlela leyi a nga khoma N’wanakwe, Yesu, ha yone. Yehovha minkama hinkwayu a a yingela swikhongoto swa Yesu. Mfuzri a a yingela swikhongoto swa Yesu a tlhela a swi hlamula. (Yh 11:41, 42) Nambi loko Yesu a kumana ni mindzringo ya ku tsrhamisisa kuyini, minkama hinkwayu a a titwa na a zrandzriwa a tlhela a seketeliwa hi Tatana wakwe.​—Lk 22:42, 43.

8. Xana Yehovha a nyike Yesu leswi a a swi vilela hi tindlela tini?

⁸ Yesu a pfumele leswaku Tatana wakwe hi yene Munyiki ni Mubekisi wa wutomi byakwe loko a te a ‘hanya ha Tatana’. (Yh 6:57) Yesu a a dumba Tatana wakwe hi ku helela, nakone Yehovha a a mu nyika leswi a a swi vilela hi le nyameni. Xa lisima ngopfu hi leswaku Yehovha a a mu nyika leswi a a swi vilela hi le moyeni.—Mt 4:4.

9. Xana Yehovha a swi kombisise kuyini leswaku i Tatana lweyi a a zrandzra ngopfu Yesu?

⁹ Swanga Tatana lwa nga ni lizrandzru, Yehovha a yentxe hinkwaswu akuva Yesu a swi tiva  leswaku Tatana wakwe a a mu seketela. (Mt 26:53; Yh 8:16) Nambi leswi Yehovha a kalaka a nga mu sizrelelanga ka makhombo hinkwawu, a mu pfune ku tiyisela loko a dzringiwa. Yesu a a tiyiseka leswaku khombo dzrin’wana ni dzrin’wana ledzri a nga txhukaka a kumiwa ha dzrone a dzri ta va dzra nkamanyana ntsena. (Hb 12:2) Yehovha a kombise leswaku a a zron’weka hi Yesu hi ku mu yingiseta, a mu nyika leswi a a swi vilela, a mu dondzrisa a tlhela a mu seketela. (Yh 5:20; 8:28) Swoswi a hi voneni leswaku Tatana wezru wa le tilweni a hi pfunisa kuyini hi tindlela leti fanaka.

10. Hi ku ya hi Amapsalma 66:19, 20, xana Yehovha a swi kombisisa kuyini leswaku awa hi zrandzra?

¹⁰ Yehovha a yingela swikhongoto swezru. (Dondzra Amapsalma 66:19, 20.) Yehovha a nga hi bekeli mpimu wa swikhongoto leswi hi nga swi yentxaka, kambe a hi kutxa kuva hi khongota kanyingi. (1Te 5:17) Hi nga tsrhindzrekela ka Xikwembu xezru hi xitxhavu nkama wini na wini, nambi loko hi li kwini na kwini. Yehovha a nge txhuki a hluleka ku hi yingiseta hi mhaka ya ku khomeka hi ntizro. A matsrhan’wini ya swoswo, minkama hinkwayu a tsrhama na a zreye ndleve. Loko hi twisisa leswaku Yehovha awa swi yingela swikhongoto swezru, swi hi yentxa hi mu zrandzra ngopfu. Mupsalma a te: ‘Ndzri zrandzra Yehovha, hikuva a yingela zritu dzranga.’​—Ps 116:1.

11. Xana Yehovha a hlamulisa kuyini swikhongoto swezru?

¹¹ Tatana wezru a nga gameli ka ku yingela swikhongoto swezru kambe a tlhela a swi hlamula. Mupostola Yohane a hi tiyisekisa leswi: ‘Loko hi kombela ntxhumu hi ku zrandzra kwakwe [Xikwembu Nkulukumba], a hi yingela.’ (1Yh 5:14, 15) Mahlayiwo lawo, swi nga yentxeka Yehovha a nga hlamuli swikhongoto swezru hi leswi hi swi djulisaka xiswone. Awa swi tiva leswi nga swa hombe ka hine. Xileswo, minkama yin’wana a nga hi nyiki leswi hi swi kombelaka, kumbe a nga ha djula hi yimanyana.​—2Ko 12:7-9.

12-13. Tatana wezru wa le tilweni a hi nyikisa ku yini leswi hi swi vilelaka?

¹² Yehovha a hi nyika leswi hi swi vilelaka. Yehovha a yentxa leswi a djulaka leswaku vatatana hinkwavu va swi yentxa. (1Tm 5:8) A nyika vana vakwe leswi va swi vilelaka hi le nyameni. A nga djuli leswaku hi hlatiyela hi leswaku hi ta da yini, kumbe hi ta yambala yini kumbe hi ta tsrhama kwini. (Mt 6:32, 33; 7:11) Swanga tatana lwa nga ni lizrandzru, Yehovha a yentxe leswaku hi kuma leswi hi swi vilelaka a nkameni lowu taka.

¹³ Xa lisima ngopfu hi leswaku Yehovha a hi nyika leswi hi swi vilelaka hi le moyeni. Hi ku tizrisa Zritu dzrakwe, a hi paluxele ntiyiso wa leswi Yene hi ntshima a nga swone, nkongometo wakwe, leswi hi hanyelaka swone ni leswi taka yentxeka a nkameni lowu taka. A hi pfune hi ku tizrisa vapswele vezru kumbe van’wana akuva va hi dondzrisa mayelanu na Yene. Nakone a ya mahlweni a hi pfuna ku va vanghanu vakwe hi ku tizrisa vakulu va bandla lava nga ni lizrandzu ni vamakwezru vambeni lava wupfiki. Handle ka leswo, Yehovha a hi dondzrisa hi ku tizrisa mintlhanganu yezru ya bandla, lani hi dondzraka kun’we ni vamakwezru. Hi tindlela leto ni tin’wana, Yehovha a kombisa ku zron’weka kwakwe hi hinkwezru swanga tatana.​—Ps 32:8.

14. Ha yini Yehovha a hi dondzrisa, nakone a swi yentxisa kuyini swoswo?

¹⁴ Yehovha awa hi dondzrisa. Ku hambana na Yesu, hine a hi hetisekanga. Xileswo, loko swi djuleka, Tatana wezru wa lizrandzru awa hi laya akuva a hi dondzrisa. Bibele dzri hi dzrimuxa leswi: ‘Hikuva lweyi Hosi yi mu zrandzraka, ya mu khata.’ (Hb 12:6, 7) Yehovha a hi laya hi ku tizrisa tindlela tinyingi. Hi xikombiso, hi nga vona na swi djuleka kuva hi txintxa mapimisela kumbe mayentxela hi kola ka leswi hi swi dondzraka Bibeleni ni leswi hi swi yingelaka mintlhanganwini. N’waninkama xipfuno lexi hi xi vilelaka xi nga ta hi ka vakulu. Nambi loko Yehovha a ngo hi laya  hi ndlela muni, nkama hinkwawu a swi yentxa hi lizrandzru.​—Yr 30:11.

15. Yehovha a hi sizrelela hi tindlela tini?

¹⁵ Yehovha awa hi pfuna akuva hi tiyiselela mindzringo. Swanga hi leswi tatana wa lizrandzru a seketelaka n’wanakwe a minkameni ya swikazratu, Tatana wezru wa le tilweni a hi nyika ntamu wa ku tiyisela mindzringweni. A tizrisa moya wakwe lowa ku xwenga ku hi sizrelela ka ntxhumu wun’wana ni wun’wana lowu nga hi tiselaka khombo ka wumoya byezru. (Lk 11:13) Nakone Yehovha awa hi pfuna loko hi li ku hlatiyeleni. Hi xikombiso, a hi nyika ku lavisela loku hlamalisaka. Ku lavisela koloko ka nkama lowu taka ku hi pfuna ku byatsrha swikazratu. Yanakanya hi leswi: Nambi loko hi nga humeleliwa hi swa ku biha swa ku yini, Yehovha a ta helisa ku xaniseka kwini na kwini loku hi humelelaka. Swikazratu swezru i swa nkamanyana ntsena, kambe leswi Yehovha a hi yentxelaka swone swi ta tsrhama hi la ku nga helikiki.​—2Ko 4:16-18.

16. Ku yentxeke yini nkama lowu Adamu a doheliki Tatana wakwe wa lizrandzru?

¹⁶ Wumboni bya leswaku Yehovha awa hi zrandzra hi nga byi vona loko hi yanakanya mayelanu ni leswi a swi yentxiki nkama lowu Adamu a mu doheliki. Nkameni wolowo, Adamu ni vanakwe va tsrhike ku hamba xiyenge xa ndangu lowu tsrhaviki wa Yehovha. (Ro 5:12; 7:14) Nambitanu, Yehovha a yentxe swa kukazri ku pfuna lixaka dzra Adamu.

17. Ntsrhaku ka ku doha ka Adamu, Yehovha a tekele ku yentxa yini?

¹⁷ Adamu a khatisiwile hi Yehovha. Kambe Yehovha a nga tsrhikanga vatukulu va Adamu lava a va ha ta pswaliwa na va nge na ku lavisela. Yehovha a tekele ku dumbisa leswaku vhanu lava va yingisetaka a va ta tlhela va va xiyenge xa ndangu wakwe. (Gn 3:15; Ro 8:20, 21) Akuva leswo swi ta koteka, Yehovha a zrumele Yesu, N’wanakwe lwa zrandzrekaka, akuva a ta ta hi fela. Xitizrulo i xikombiso  xa lizrandzru ledzrikulu ledzri Yehovha a nga nadzru hi hine vhanu.​—Yh 3:16.

18. I yini xi hi tiyisaka leswaku Yehovha a ha swi djula ku va Tatana wezru nambi loko hi nga va na hi lahlekile?

¹⁸ Nambi loko hi nga hetisekanga, Yehovha a djula leswaku hi va swizro swa ndangu wakwe, nakone a ngaka a nga hi voni swanga ntsrhwalu. Ina, hi txhuka hi mu khunguvanyisa Yehovha kumbe hi lahleka. Nambitanu, Yehovha minkama hinkwayu a lavisela leswaku hi ta tlhelela. Akuva a hi khanyisela ku yenta ka lizrandzru dzra Yehovha hi vanakwe, Yesu a the xihitana xa n’wana wa ku lahleka. (Lk 15:11-32) Ka xifaniso lexi, tatana muni a nga heleliwanga hi dumbo dzra leswaku n’wanakwe a a ta tlhelela kaya. Nkama lowu n’wana a tlheleliki kaya, tatana wakwe a mu yamukele hi ku tsrhava lokukulu. Loko hi txhuka hi lahleka kambe hi tisola, hi nga tiyiseka leswaku Tatana wezru wa lizrandzru a ta hi yamukela hi mavoko mabidzri.

19. Xana Yehovha a ta swi lulamisa hi ndlela yini leswi honeteliwiki hi Adamu?

¹⁹ Tatana wezru a ta swi lulamisa hinkwaswu leswi honiwiki hi Adamu. Ntsrhaku ka loko Adamu a dohile, Yehovha a tiyimisele ku teka 144.000 wa vhanu va va vana vakwe akuva va ta tizra swanga tihosi ni vaprista a tilweni kun’we ni N’wanakwe. Yesu ni lava a taka fuma navu va ta pfuna vhanu lava yingisetaka akuva va kuma ku hetiseka a misaveni leyimpswha. Loko vhanu volavo va khaluta ka xikambelo xa ku yingiseta xa wugamu, Yehovha a ta va nyika wutomi lebyi nga helikiki. Tatana wezru hi wugamu a ta nyonxa swinene loko a vona misava na yi tale hi vana vakwe lava hetisekiki. Handle ka ku ganaganeka, wolowo wu ta va nkama wa ku hlamalisa ngopfu swinene!

20. Hi tini tindlela leti Yehovha a kombisiki ha tone leswaku awa hi zrandzra, nakone hi ta dondzra yini ka nhloko-mhaka leyi landzrelaka?

²⁰ Yehovha hakunene a hi nyika swikombiso swinyingi swa leswaku a hi zrandzra ngopfu swinene. A nga kone Tatana wa ku fana na yene. A yingela swikhongoto swezru, a hi nyika leswi hi swi vilelaka hi nyameni ne moyeni. Awa hi dondzrisa a va a hi seketela. Nakone a ni matovoko manyingi lawa a taka hi nyika wone nkameni lowu taka. Swi khumba mbilu ku tiva leswaku Tatana wezru awa hi zrandzra nakone awa hi seketela! Ka nhloko-mhaka ya xidondzro lexi landzrelaka hi ta dondzra leswaku hine swanga vanakwe hi nga swi kombisisa kuyini leswaku ha dzri tlangela lizrandzru dzrakwe.