1. Kodi munthu akhafunika kucitanji toera kulonga na mambo wa ku Persya?

NYEREZERANI kuti imwe muli kukhala mu dziko ya Persya, mu pyaka 2.500 nduli. Imwe musafuna kulonga na mambo wa dziko ineyi, natenepa musaenda kunyumba kwace mu nzinda wa Suza. Mbwenye toera kulonga na mambo, cakutoma musafunika kutawiriswa. Mungakhonda kucita pyenepi, panango munaluza umaso wanu!​—Estere 4:11.

2. Kodi Yahova asafuna kuti tikhale na mabvero api pakulonga na iye?

² Ife tisapereka takhuta kakamwe thangwi Yahova asiyana na mambo unoyu wa ku Persya. Yahova ndi wamphambvu kakamwe kupiringana mautongi onsene a anthu, mbwenye ife tinakwanisa kulonga naye ndzidzi onsene. Pontho iye asafuna kuti tikhale akusudzuka toera kulonga naye. Mwacitsandzo, maseze Yahova ali na madzina akudzumatirisa ninga Nciti Wankulu, Wamphambvu Zonsene na Ntongi Wakudzulu na Dziko Yapantsi, iye asafuna kuti tilonge naye mukuphatisira fala yacitsalakano yakuti “Baba.” (Mat. 6:9) Ndi pyakutsandzayisa kakamwe kudziwa kuti Yahova asafuna kuti tikhale cifupi na iye.

3. Thangwi yanji tinakwanisa kucemera Yahova kuti “Baba,” pontho tinapfundzanji mu nsolo uno?

³ Ife tinakwanisa kucemera Yahova kuti “Baba” thangwi ndi Nciti wa umaso wathu. (Masal. 36:9) Nakuti ndi Babathu, ife tisafunika kumbvera. Ife tingacita pinafuna iye, tinatsandzaya na nkhombo zizinji kakamwe. (Aheb. 12:9) Nkhombo zenezi zisaphataniza umaso wakukhonda mala, pa dziko yapantsi peno kudzulu. Ngakhale cincino tinakwanisa kukhala na nkhombo thangwi yakubvera Mulungu. Mu nsolo uno tinapfundza kuti ndi  munjira ipi Yahova ndi Babathu waufuni, pontho thangwi yanji tisafunika kukhala na cinyindiro cakuti iye cipo anadzatisiya. Mbwenye cakutoma, tendeni tione kuti thangwi yanji tisafunika kukhala na cinyindiro cakuti Babathu wakudzulu asatifuna kakamwe, pontho asafuna kutiphedza.

4. Thangwi yanji ndi pyakunentsa kuna anango kuona Yahova ninga Babawo?

⁴ Kodi ndi pyakunentsa kwa imwe kuona Mulungu ninga Babanu? Anango asanyerezera kuti Yahova ndi wankulu kakamwe, pontho ife nee ndife akufunika kuna iye. Iwo asapenula kuti Mulungu Wamphambvu Zonsene nee asaatsalakana. Mbwenye Babathu waufuni nee asafuna kuti tikhale na manyerezero anewa. Iye atipasa umaso, pontho asafuna kuti tikhale axamwali ace. Mpostolo Paulu agomezera undimomwene unoyu kuna anthu a ku Atena kuti Yahova “nee ali kutali na m’bodzi na m’bodzi wa ife.” (Mabasa 17:24-29) Mulungu asafuna kuti tilonge na iye ninga pinalonga mwana na babace waufuni na wacitsalakano.

5. Tisapfundzanji na pidacitika na mulongo m’bodzi?

⁵ Ndi pyakunentsa kuna anango kuona Yahova ninga Babawo thangwi anyakubalawo nee apangiza ufuni na citsalakano kuna iwo. Mwacitsandzo, mulongo m’bodzi alonga: “Pai wanga akhanditsalakana mwakuipa kakamwe. Pidatoma ine kupfundza Bhibhlya, pikhali pyakunentsa kwa ine kukhala cifupi na Mulungu. Mbwenye pidadziwa ine Yahova, manyerezero anewa acinja.” Kodi muli na manyerezero mabodzi ene? Khala ndi tenepo, lekani kubwerera nduli. Mukupita kwa ndzidzi munadzaona kuti Yahova ndi Baba wadidi kakamwe.

6. Mwakubverana na Mateu 11:27, Yahova asatiphedza tani toera kumuona ninga Babathu waufuni?

⁶ Njira ibodzi inapangiza Yahova kuti asatiphedza toera kumuona ninga Babathu waufuni, ndi kubulukira m’mafala a Yezu na pidacita iye pinagumanika m’Bhibhlya. (Lerini Mateu 11:27.) Yezu apangiza mwadidi makhaliro a Babace, na thangwi ineyi iye alonga: “Ule anandiona akuonambo Baba.” (Juwau 14:9) Yezu alonga kazinji kene mabasa anacita Yahova ninga Baba. M’mabukhu manai a Evanjelyu, Yezu aphatisira fala yakuti ‘Baba’ mukucemera Yahova m’maulendo 165. Thangwi yanji Yezu akhalonga kakamwe pya Yahova? Thangwi ibodzi ikhali kuphedza anthu toera akhale na cinyindiro cakuti Yahova ndi Baba waufuni.​—Juwau 17:25, 26.

7. Tisapfundzanji thangwi ya Yahova munjira idatsalakana iye Mwanace?

⁷ Tinakwanisa kupfundza pizinji thangwi ya Yahova kubulukira munjira idatsalakana iye Mwanace, Yezu. Ndzidzi onsene Yahova akhabvesera maphembero a Yezu. Iye nee akhabvesera basi ene maphembero a Yezu, mbwenye akhaatawira. (Juwau 11:41, 42) Mwakukhonda tsalakana nyatwa zikhathimbana na iye, ndzidzi onsene Yezu akhapibva kuti Babace akhanfuna na kum’phedza.​—Luka 22:42, 43.

8. Ndi munjira ipi Yahova akhatsalakana Yezu?

⁸ Yezu akhadziwa kuti Babace ndi Nciti wa umaso wace, pontho akhadziwa kuti toera akhale maso akhanyindira Babace. Na thangwi ineyi, iye alonga: “Ndiri na umaso thangwi ya Baba.” (Juwau 6:57) Yezu akhanyindira kakamwe Babace, pontho Yahova akhampasa pyonsene pikhafuna iye toera akhale maso. Kusiyapo pyenepi, Yahova aphedza Yezu toera akhale wakukhulupirika kuna iye.​—Mat. 4:4.

9. Yahova apangiza tani kuti akhali Baba waufuni na wacitsalakano kuna Yezu?

⁹ Nakuti ndi Baba waufuni, Yahova acitisa Yezu kudziwa kuti akhaphedzwa na Babace. (Mat. 26:53; Juwau 8:16) Maseze Yahova nee atsidzikiza Yezu mu nyatwa zace zonsene, Iye am’phedza toera kuzipirira. Yezu akhadziwa  kuti nyatwa zonsene zikhathimbana na iye zikhali za ndzidzi wakucepa. (Aheb. 12:2) Yahova apangiza kuti akhafuna Yezu mu kumbvesera, kumpasa pikhafuna iye, kumpfundzisa na kum’phedza. (Juwau 5:20; 8:28) Cincino tendeni tione kuti Babathu wakudzulu asatiphedza tani munjira ibodzi ene.

10. Mwakubverana na Masalmo 66:19, 20, Yahova asapangiza tani kuti asatifuna?

¹⁰ Yahova asabvesera maphembero athu. (Lerini Masalmo 66:19, 20.) Yahova nkhabe khazikisa ndzidzi toera kulonga na iye, mbwenye asatikulumiza toera kulonga naye ndzidzi onsene. (1 Ates. 5:17) Ife tinakwanisa kucita phembero kuna Mulungu wathu ndzidzi onsene, mwakukhonda tsalakana mbuto inagumanika ife. Iye cipo asakhala wakuphatika mbacimwana kubvesera maphembero athu, mbwenye ndzidzi onsene asakhala dzololo toera kutibvesera. Tingadziwa kuti Yahova asabvesera maphembero athu, ife tisanfuna kakamwe. Nyamasalmo alonga: “Ndisafuna Yahova, thangwi iye asabva mafala anga.”​—Masal. 116:1.

11. Kodi Yahova asatawira tani maphembero athu?

¹¹ Babathu nee asabvesera basi ene maphembero athu, mbwenye asaatawira. Mpostolo Juwau alemba: “Tingaphemba cinthu mwakubverana na pinafuna [Mulungu], iye asatibvesera.” (1 Juwau 5:14, 15) Mbwenye nee ndi dzidzi onsene wakuti Yahova asatawira maphembero athu mwakubverana na njira inadikhira ife. Iye asadziwa pinthu pyakufunika kwa ife, ndi thangwi yace, midzidzi inango nee asatawira, peno iye asafuna kuti tidikhire.​—2 Akor. 12:7-9.

12-13. Ndi munjira ipi Babathu wakudzulu asatipasa pinafuna ife?

¹² Yahova asatipasa pinafuna ife. Iye asacita pinthu ninga pire pinadikhirwa kuna baba onsene. (1 Tim. 5:8) Iye asapasa anace pinthu pinafuna iwo. Yahova nee asafuna kuti tidzudzumike na pyakudya, pyakubvala na nyumba. (Mat. 6:32, 33; 7:11) Ninga baba waufuni, Yahova acita masasanyiro toera kutipasa pinafuna ife ntsogolo.

¹³ Kusiyapo pyenepi, Yahova asatipasa pinthu pyauzimu toera tikhale na uxamwali wadidi na iye. Kubulukira m’Bhibhlya, asatipanga undimomwene unalonga pya iye, cifuniro cace, cifuniro ca umaso na pinthu pinafuna kucitika ntsogolo. Yahova apangiza kuti asatitsalakana mu ndzidzi udatoma ife kupfundza undimomwene mukuphatisira anyakubalathu peno munthu unango toera kutipfundzisa pya iye. Pontho asapitiriza kutiphedza toera tikhale axamwali ace mukuphatisira akulu a mpingo na abale na alongo akukola mwauzimu. Munjira inango, Yahova asatipfundzisa kubulukira m’misonkhano ya mpingo, pabodzi na abale na alongo athu. Natenepa, Yahova asapangiza kuti ndi baba wacitsalakano kuna ife tonsene.​—Masal. 32:8.

14. Thangwi yanji Yahova asatipfundzisa, pontho asacita tani pyenepi?

¹⁴ Yahova asatipfundzisa. Mwakusiyana na Yezu, ife ndife akusowa ungwiro. Natenepa, khala ndi pyakufunika, Babathu waufuni asatilanga toera kutipfundzisa. Ndi thangwi yace Bhibhlya isalonga: “Yahova asalanga ale akuti iye asaafuna.” (Aheb. 12:6, 7) Yahova asatilanga munjira zizinji. Mwacitsandzo, panango iye anatisandika kubulukira mu pinthu pinaleri ife m’Bhibhlya, pinabva ife pa misonkhano peno mukuphatisira akulu a mpingo. Mwakukhonda tsalakana njira inaphatisira Yahova toera kutisandika, iye asacita pyenepi mwaufuni.​—Yer. 30:11.

15. Kodi Yahova asatitsidzikiza tani?

¹⁵ Yahova asatiphedza toera kupirira nyatwa. Ninga pinacita baba waufuni wakuti asatsalakana anace m’midzidzi ya nyatwa, Babathu wakudzulu asatitsalakana m’midzidzi ya nyatwa. Yahova asaphatisira nzimu wace wakucena  toera kutitsidzikiza ku cinthu consene cakuti cinafudza uxamwali wathu na iye. (Luka 11:13) Yahova asatiphedzambo mu ndzidzi unakhala ife akutsukwala. Mwacitsandzo, iye asatipasa cidikhiro cakutsandzayisa. Cidikhiro ceneci ca ntsogolo cisatiphedza toera kupirira nyatwa. Nyerezerani basi: Mwakukhonda tsalakana pinthu pyakuipa pinacitika kuna ife, Yahova anadzamalisa pinthu pyenepi. Pontho ndi pya ndzidzi wakucepa, mbwenye nkhombo zinatipasa Yahova ndi zakwenda na kwenda.​—2 Akor. 4:16-18.

16. Ninji pidacitika pidakhonda Adhamu kubvera Babace waufuni?

¹⁶ Ife tisaona ufuni wa Yahova tinganyerezera pinthu pidacita iye mu ndzidzi udadawa Adhamu. Pidakhonda Adhamu kubvera Babace wakudzulu, iye pabodzi na dzindza yace aluza mwai wakucita khundu m’banja yakutsandzaya ya Yahova. (Aroma 5:12; 7:14) Mbwenye Yahova acita masasanyiro toera kuphedza dzindza ya Adhamu.

17. Yahova acitanji pidamala kwene Adhamu kudawa?

¹⁷ Yahova atcunyusa Adhamu, mbwenye iye apikira kuphedza dzindza ya Adhamu. Mwakukhonda dembuka, Yahova apikira kuti anthu akubvera mbadabwerera pontho m’banjace. (Gen. 3:15; Aroma 8:20, 21) Yahova acita pyenepi mukuphatisira ntsembe yaciomboli ya Mwanace wakufunika, Yezu. Mukupereka Mwanace toera kutiombola, Yahova apangiza kuti asatifuna kakamwe.​—Juwau 3:16.

18. Maseze tadawira Yahova, thangwi yanji tinakwanisa kukhala na cinyindiro cakuti iye asatifuna?

¹⁸ Maseze ndife akusowa ungwiro, Yahova asafuna kuti tikhale m’banja yace, pontho iye nee asaona kuti ndi pyakunentsa kakamwe toera kutiphedza. Panango tinantsukwalisa peno kukhala kutali na iye, mbwenye ndzidzi onsene Yahova asadikhira kuti tinabwerera kuna iye. Yezu apangiza kuti Yahova asafuna kakamwe  anace mukuphatisira nsangani wa mwana wakutayika. (Luka 15:11-32) Mu nsangani unoyu, baba akhadikhira kuti ndzidzi onsene mwanace mbadabwerera. Pidabwerera mwana kunyumba, babace antambira na manja mawiri. Khala tadawira Yahova mbititcunyuka, tinakwanisa kukhala na cinyindiro cakuti Babathu waufuni ali dzololo toera kutitambira na manja mawiri.

19. Yahova anadzamalisa tani nyatwa zonsene zidatomeswa na Adhamu?

¹⁹ Babathu anadzamalisa nyatwa zonsene zidatomeswa na Adhamu. Pidadawa Adhamu, Yahova asankhula anthu akukwana 144.000 toera adzatonge ninga amambo na anyantsembe kudzulu pabodzi na Mwanace. Yezu pabodzi na atongi andzace anadzaphedza anthu akubvera toera akhale aungwiro mu dziko ipswa. Iwo angapangiza kukhulupirika pa mayesero akumalisa, Mulungu anadzaapasa umaso wakukhonda mala. Buluka penepo, Babathu anadzatsandzaya kakamwe angaona dziko yapantsi yadzala na anthu aungwiro. Mwakukhonda penula, unoyu unadzakhala ndzidzi wakutsandzayisa kakamwe!

20. Yahova asapangiza tani kuti asatifuna kakamwe, pontho tinapfundzanji mu nsolo unatowera?

²⁰ Yahova asapangiza kuti asatifuna kakamwe. Iye ndi Baba wadidi kakamwe. Yahova asabvesera maphembero athu na asatipasa pinafuna ife, munjira yauzimu na yakumanungo. Iye asatipfundzisa na kutiphedza. Pontho anadzatipasa nkhombo zadidi kakamwe ntsogolo. Pisatitsandzayisa kakamwe kudziwa kuti Babathu asatifuna na kutitsalakana. Nsolo unatowera, unadzafokotoza kuti tinapangiza tani kupereka takhuta thangwi ya ufuni unapangiza iye kuna ife.