1. Nkinyi kibaadi akitungu kupeta kumpala kwa kutwela kwa nfumu a mu Perse?

BANDA kunangushena’shi we mwiumbo dya Perse kubapu kukila bipwa 2 500. We na lukalo lwa kwisamba na nfumu pabitale mwanda kampanda, bwende ku Suse, epata dya nfumu. Twe na mushindo wa kutwela kwi nfumu kushi’be kupeta matalwa nya. Su otwela kwashi mukupe matalwa, abakwipa!​—Esh. 4:11.

2. Yehowa akumiina’shi tupushe naminyi nsaa yatwisamba naye?

² Twi na lutumbu lukata kwi Yehowa mwanda aye te bu nfumu a mu Perse nya! Yehowa nyi Nfumu mukata mukile ba nfumu boso ba bana ba bantu, kadi atwisambaa naye nsaa yoso. Akumiina’shi twikale atwisamba naye nsaa yoso yatukumiina. Bu kileshesho, sunga mbyadi na myasu ikata ya bu Mupangi mukata, Sha-bukome boso, Mwanana na Nfumu, etutekye bwashi twisambe naye abikalaa bena kifuko, pa kumwitamina bu “Yaya.” (Mat. 6:9) Nyi mwanda wa muloo pa kumona’shi Yehowa akumiina’shi twifubwile peepi naye mu wawa mushindo!

3. Bwakinyi twi kwitamina Yehowa bu “Yaya,” na mmyanda kinyi yatukyebe kutaluula mu uno mwisambo?

³ Kwitamina Yehowa bu “Yaya” nkulombane mwanda aye ngi mwitupe muwa. (Mis. 36:10) Bu byadi Nshetu, twi na kitungo kya kumukokyela. Nsaa yatumukokyela, etwelela myabi ikile bungi. (Eb. 12:9) Mu yaya myabi, mwi mpa na muwa wa loso, bya bikala mwiyilu sunga pa nsenga. Atupete ingi myabi lelo uno. Mu uno mwisambo atukyebe kutaluula akitushinkamiisha lelo uno’shi Yehowa kwete kwitukitshina myanda bu Nshetu sha kifulo, na bwakinyi abitungu twikale bashinkamishe’shi  taketusumbushena mu mafuku aafiki. Kadi, kumpala kwa byoso, tubandeyi kutaluula akitushinkamiisha’shi Yaya eetu e mwiyilu mmwitufule ngofu na kwete kwitupasukila.

4. Bwakinyi bangi abanangushena’shi bi bukopo kumona Yehowa bu Nshabo?

⁴ Abikwelelaa bukopo bwa kumona Efile Mukulu bu Nshobe su? Bangi be kumona’shi mbakile bupeela na ta be na muulo pabepwandikisha na Yehowa. Abelesha mpanka’shi Efile Mukulu Sha-bukome boso, te bya kupasukila muntu pa bu penka nya. Anka, Yaya eetu sha kifulo, takumiina’shi tunangushene byabya nya. Mwitupe muwa na akumiina’shi twikale mu kipwano kibuwa naye. Kunyima kwa kushinkamisha bino bya binyibinyi, Mpoolo mutumiibwa baadi mupatulwile bantu abaadi abamuteemesha ku Atene’shi, Yehowa ‘te kula na oso aa kwatudi.’ (Bik. 17:24-29) Efile Mukulu akumiina’shi oso a kwatudi ekale esamba naye nka abikalaa mwana esamba na nshaye sha kifulo na amupasukilaa.

5. Nkinyi kyatulongyela ku mwanda wa ungi mukwetu mukashi mwina Kidishitu?

⁵ Bangi abamonaa bu bibukopo kumona Yehowa bu Nshabo, mwanda ba mashabo bebatande ta mbebaleshe kifulo nya. Tubandeyi kutala abyakula ungi mukwetu mukashi. Amba’shi: “Yaya baadi muntu e bubi, panabangile kulonga Bible, bibaadi bukopo bwandya kwifubwila peepi na Nshami e mwiyilu. Kadi, kunyima kw’ami kuuka Yehowa, naadi mushintulukye.” Wepushaa namu byabya su? Su mbyabya, uuka’shi, obe namu we mulombene kumona Yehowa bu Nshobe mukile buwa.

6. Muyiile Mateo 11:27, nkipaso kinyi kimune kitukwashe Yehowa bwatudya kumumona bu Yaya sha kifulo?

⁶ Kipaso kimune kitukwashe Yehowa bwa kumumona bu Nshetu sha kifulo, mpa kufundisha myanda ibakwile Yesu na ibakitshine mu Bible. (Badika Mateo 11:27.) Yesu baadi mwambule Nshaye kalolo mu kipaso kibaadi mpa na mwakule’shi: “Mummone mmumone Yaya.” (Yo. 14:9) Yesu baadi muleshe myanda ikwete kulombasha Yehowa ayilesha’shi nyi Yaya. Penda mu ma Evanjile, Yesu mutemune mwaku “Yaya” misusa 165 pabitale Yehowa. Bwakinyi Yesu bakwile misusa ibungi byabya pabitale Yehowa? Kabingilo kamune nka’shi bantu bashinguule’shi Yehowa nyi Yaya sha kifulo.​—Yo. 17:25, 26.

7. Nkinyi kyatulongo pabitale mushindo ubaadi Yehowa mukitshine Mwan’aaye myanda?

⁷ Banda kutala byatulongo pabitale bibaadi Yehowa mukitshine Mwan’aaye Yesu myanda. Yehowa badi ateemesha nteko ya Yesu. Tabadi penda ateemesha nteko ya Yesu nya, anka badi dingi aluula ku yanka. (Yo. 11:41, 42) Nsaa yoso ibaadi Yesu afumankana na nkalakashi, badi nka apete bukwashi bwa Nshaaye sha kifulo.​—Luk. 22:42, 43.

8. Mushindo kinyi ubadi Yehowa mupe Yesu byabya bibadi nabyo lukalo?

⁸ Yesu badi mushinkamishe’shi, Nshaaye nyi Nsulo na mulami a muwa waye pabakwile’shi: “Ne na muwa pa mwanda Yaya.” (Yo. 6:57) Yesu badi mutule lukulupilo lwaye loso mwi Nshaaye, na Yehowa namu bamupele kyoso kibadi nakyo lukalo bwa kushaala na muwa. Kintu ki na muulo ukata, Yehowa badi mukwashe Yesu bwadya kushaala na lulamato kwadi.​—Mat. 4:4.

9. Yehowa badi muleshe naminyi’shi nyi Yaya mmufule Yesu ngofu?

⁹ Bu byadi Nshe-bana sha kifulo, Yehowa bakitshine bya’shi Yesu ashinguule’shi kwete kupeta bukwashi bwa Nshaaye. (Mat. 26:53; Yo. 8:16) Sunga Yehowa tabadi mukalwile Yesu ku masaku ooso abadya kumufikila, Bamukwashile bwadya kwianyingiila.  Yesu badi muukye’shi myanda yoso ibubi yadya kufumankana nayo, ngya kapindji kapeela. (Eb. 12:2) Yehowa badi muleshe’shi mmufule Yesu pa kumuteemesha, kumulongyesha, kumupa bintu byadi nabyo lukalo, na kumukwasha. (Yo. 5:20; 8:28) Tubandeyi kutala byabakwete kwitupasukila kwi Nshetu e mwiyilu mu wawa mushindo umune.

10. Muyiile Misambo 66:19, 20, mushindo kinyi auleshaa Yehowa shi mwitufule?

¹⁰ Yehowa ateemeshaa nteko yetu. (Badika Misambo 66:19, 20.) Ta mwitutshibile bula bwa kwikala nteko yetu nya, anka etunyingisha bwa kumuteka nsaa yoso. (1 Tes. 5:17) Twi balombene kwifubwila kwi Efile Mukulu na kaneemo kooso, nsaa yoso yatukumiina sunga twekala mbalo kinyi. Takutwaa nsaa ya kwituteemesha; ateemeshaa nteko yetu nsaa yoso. P’atushinguula’shi Yehowa ateemesha nteko yetu, atumufulu ngofu. Mufundji a misambo bambile’shi: “Ne mufule Yehowa, mwanda ateemesha kwidila kwande.”​—Mis. 116:1.

11. Mushindo kinyi awalulaa Yehowa ku nteko yetu?

¹¹ Nsheetu t’ateemeshaa penda nteko yetu nya; alulaa ku yanka. Yowano mutumibwa etushinkamiisha’shi: “Su twamuteka kintu muyiile kukumiina kwaye [Efile Mukulu] aye eetuteemesha.” (1 Yo. 5:14, 15) Eyendo’shi, Yehowa ta mukumbene kwaluula nteko yetu mu mushindo watupwandikisha nya. Auku kyakya ki buwa bwetu, nyi bwakinyi ingi nsaa t’aluulaa sunga akumiina’shi tutengyele.​—2 Kod. 12:7-9.

12-13. Nshetu e mwiyilu kwete kulombasha nkalo yetu mu mishindo kinyi?

¹² Yehowa alombashaa nkalo yetu. Akitaa kyakya kitekibwe kwi nshe-bana ooso. (1 Tim. 5:8) Apeyaa bana baye bintu byabadi nabyo lukalo bwa kwikala na muwa. T’akumiinaa’shi twikalakashe bwa bidibwa, bilamba, sunga mbalo ya kulaala. (Mat. 6:32, 33; 7:11) Bu byadi muledi sha kifulo, Yehowa mwate mpa na mpàngo ya kulombasha nkalo yetu mu mafuku e kumpala.

¹³ Kintu ki na muulo ukata, Yehowa kwete kulombasha nkalo yetu ya mu kikudi. Ku bukwashi bw’Eyi dyaaye, mwitufumbwile bya binyibinyi byaaye, mpàngo yaaye, nshalelo ebuwa, myanda ayifiki mu mafuku e kumpala. Mmwitupasukile nsaa ibatudi atulongo bya binyibinyi bwa musango wa kumpala, afuba na baledi betu sunga bangi bantu bwa kwitulongyesha myanda yaaye. Kwete kwitukwasha dingi bwatudya kwikala ba kuuku baaye, pa kwitulesha kalolo kaaye kukidila kwi bakulu ba mu kakongye basha kifulo, na bangi bakwetu banyingye mu kikudi. Na dingi Yehowa kwete kwitulongyesha ku bukwashi bwa bisangilo bya kakongye, mwatulongo pamune na bakwetu ba mu kikudi. Mu ino mishindo mpa na ingi, Yehowa kwete kulesha byadi nshe-bana etupasukilaa atwe boso.​—Mis. 32:8.

14. Bwakinyi Yehowa etulongyeshaa, na ebikitaa naminyi?

¹⁴ Yehowa etulongyeshaa. Mu kwilekena na Yesu, atwe twi bakutwe kupwidika. Byabya bwa kwitulongyesha, Nshetu e mwiyilu etunyokaa pakudi mushindo. Eyi dyaaye aditutentekyesha’shi: “Yehowa . . . anyookaa mwana ooso adi nee kifulo.” (Eb. 12:6, 7) Yehowa etunyokaa mu mishindo ibungi. Kileshesho, twi kubadika mwanda kampanda Mwiyi dyaaye, sunga kupusha mwanda kampanda ku bisangilo ulombeene kwitukwasha, bwa kushintuula mweneno eetu. Pangi namu bukwashi bwatudi nabo lukalo abutuukila kwi bakulu. Sunga Yehowa etunyoka  mu mushindo wi naminyi, etunyoko mwanda mwitufule.​—Yel. 30:11.

15. Yehowa kwete kwitukalwila mu mishindo kinyi?

¹⁵ Yehowa etukwashaa bwa kunyingiila nkalakashi. Anka abikalaa nshe-bana sha kifulo akwasha bana baye pabadi mu nkalakashi, nshetu e mwiyilu etukwashaa nsaa yatudi mu nkalakashi. Etupa kikudi kyaaye, bwa kwitukalwila ku bintu bikumbene kulwisha kipwano kyetu naaye. (Luk. 11:13) Yehowa etukwashaa dingi patudi na twinyongoshi. Kileshesho, etupa lukulupilo lwibuwa. Lwalwa lukulupilo bwa myanda i kumpala alwitukwasha bwa kunyingiila nkalakashi. Banda kutala uno mwanda: Sunga twafumankana na mwanda wi naminyi, Nshetu sha kifulo akakatusha myanda yoso ibubi yabadi betukitshine. Nkalakashi yoso yatudya kupeta, i kwanka bwa kapindji kapeela, anka myabi ayitupa Yehowa nyi ngya loso.​—2 Kod. 4:16-18.

16. Nkinyi kibakitshikile nsaa ibadi Adame mupele kukookyela Nshaaye sha kifulo?

¹⁶ Twi na kishinkamiisho kya mushindo witufule Yehowa, nsaa yatunangushena pabitale bibakitshine nsaa ibakutshile Adame na Eeva kumukookyela. Pabaadi Adame mupele kukookyela Nshaaye e mwiyilu, badi mushimishe mbalo yaaye mu kifuko kya Yehowa ki na muloo, bwaye’ye nabene mpa na bwa bana baaye. (Lom. 5:12; 7:14) Anka, Yehowa bakitshine kintu kampanda bwa kukwasha bana ba Adame.

17. Kunyima kwa bu ntomboshi bwa Adame, Yehowa baadi mukite kinyi mususa umune?

¹⁷ Yehowa baadi munyokye Adame, kadi tabaadi mulekye bekulu ba Adame kushi lukulupilo nya. Mususa umune, baadi mulee’shi bantu basha kukokyela abakalukila dingi mu kifuko kyaye. (Kib. 3:15; Lom. 8:20, 21) Yehowa baadi mwibilombashe ku bukwashi bwa  mulambu wa nkuulo wa Yesu, Mwana aaye aadi mufule. P’aye kwitutumina Mwanaye, Yehowa baadi muleshe’shi mmwitufule ngofu.​—Yo. 3:16.

18. Bwakinyi twi balombene kushinkamisha’shi Yehowa etukumiina bu bana baye, sunga byekala’shi tubadi bakatukye kwadi?

¹⁸ Sunga mbyatudi bakutwe kupwidika, Yehowa akumiina’shi twikale mu kifuko kyaye, na tamonaa kwitukwasha bu bushito nya. Twi kukita kilubilo sunga kukatuka kwadi munda mwa mafuku, kadi Yehowa takookaa bwa kwitukwasha nya. Ku bukwashi bwa lukindji lwa mwana mushimine, Yesu baadi muleshe Yehowa byadi mufule bana baye. (Luk. 15:11-32) Mu lwalwa lukindji, nshe-bana baadi nka na lukulupilo’shi mwan’aye alukiila. Pabalukiile mwana ku nshibo, nshaye baadi mumukukile na muloo oso. Su tubaadi bakatukye kwi Yehowa kadi tubelanga, twikale bashinkamishe’shi Nshetu sha kifulo akumiina kwitukuukila.

19. Yehowa akalumbuula bubi boso bwabadi bafwishe kwi Adame naminyi?

¹⁹ Nshetu akalumbuula bubi boso bwabadi bafwishe kwi Adame. Kunyima kwa Adame kutomboka, Yehowa batshile kitshibilo kya kusangula bantu 144 000 munkatshi mwa miilo, abakafubu bu ba nfumu na ba tshiite-mwakwidi mwiyilu na Mwan’aye. Mu nsenga ipya, Yesu na boso abakamunana naaye abakakwasha bantu basha kukookyela bwabadya kufika bantu bapwidikye. Kunyima kwa kutompibwa kwa nfudiilo, Efile Mukulu akebapa muwa wa loso. Nshetu akekala na muloo wa kumona nsenga ngiwule na bana baye bakashi na balume bapwidikye. Ayikekala nsaa ya muloo ukata!

20. Yehowa muleshe’shi mwitufule ngofu mu mishindo kinyi, na myanda kinyi yatukalongo mu mwisambo aulondo?

²⁰ Yehowa mmuleshe’shi mwitufule ngofu. Nyi Nshe-bana ebuwa. Apushaa nteko yetu na kwitupa bintu byatudi nabyo lukalo, bya ku mbidi na bya mu kikudi. Etulongyesha na kwitukwasha. Aketukitshina dingi myanda ikile buwa mu mafuku e kumpala. Twi na muloo wa kuuka’shi Nshetu sha kifulo etupasukilaa! Mu mwisambo aulondo atukataluula mishindo yatudya kulesha’shi twi bana baaye basha lutumbu bwa kifulo kyadi mwitufule.