1. San wan sma ben musu du efu a ben wani taki nanga a kownu fu Persia?

KON meki wi taki dati yu e libi sowan 2500 yari pasa na ini a kondre Persia. Yu wani taki nanga a kownu fu a kondre fu wan tori èn dati meki yu e go na a foto Susan pe a kownu e tan. Ma yu musu kisi primisi fu go taki nanga a kownu. Efu wan sma ben go taki nanga a kownu sondro taki a kisi primisi, den ben o kiri en!​—Ester 4:11.

2. Wi musu frede fu taki nanga Yehovah? Fruklari dati.

² Wi breiti taki Yehovah no de leki a kownu fu Persia! Yehovah makti moro iniwan libisma tiriman, ma toku wi kan taki nanga en na iniwan ten. Yehovah no wani taki wi e frede fu taki nanga en. Bijbel e kari Yehovah na difrenti fasi. A e kari en a Mekiman, na Almaktiwan nanga a Moro Hei Tiriman. Toku a wani taki wi kari en Papa tu (Mat. 6:9). A sani disi e meki wi firi bun.

3. Fu san ede wi kan kari Yehovah „Papa”, èn san wi o luku na ini na artikel disi?

³ A fiti taki wi kari Yehovah „Papa”, fu di na en gi wi libi (Ps. 36:9). Fu di Yehovah na wi Papa, meki wi musu gi yesi na en. Te wi e du san a e leri wi, wi o kisi furu blesi (Hebr. 12:9). A o blesi son sma nanga têgo libi na hemel èn trawan o libi fu têgo na grontapu. Ma nownow kaba wi e kisi wini. Na artikel disi o sori wi taki Yehovah na wan Papa di lobi wi. Wi o si tu fu san ede wi kan de seiker taki noiti a o gowe libi wi. Ma wi o luku fosi fu san  ede wi no abi fu tweifri taki wi hemel Papa lobi wi èn taki a wani yepi wi.

4. Fu san ede a muilek gi son sma fu si Yehovah leki den Papa?

⁴ A muilek gi yu fu si Gado leki wan Papa? Son sma e prakseri taki wan makti Gado leki Yehovah no o luku den. Den no e bribi taki na Almakti Gado e broko en ede nanga den. Ma wi lobi-ati Papa no wani taki wi firi so. Na en gi wi libi èn a wani taki wi tron wan mati fu en. Baka di na apostel Paulus taki fu den srefi sani disi na ini Ateine, a taigi den sma di ben arki en taki Yehovah „no de fara fu nowan fu wi” (Tori 17:24-29). Gado no wani taki wi frede fu taki nanga en neleki fa wan pikin no e frede fu taki nanga en papa noso en mama di lobi en.

5. San wi e leri fu na ondrofenitori fu wan sisa?

⁵ Tra sma feni en muilek fu si Yehovah leki wan Papa fu di den eigi papa no sori lobi gi den. Wan sisa e taki: „Mi papa ben lobi kosi mi. Di mi bigin studeri Bijbel, a ben muilek gi mi fu si Gado leki mi hemel Papa. Ma baka di mi kon sabi Yehovah, mi bigin si sani tra fasi.” Yu e firi a srefi fasi leki a sisa disi? Efu dati de so, dan no lasi-ati. Baka wan pisi ten yu srefi o si Yehovah leki a moro bun Papa.

6. Soleki fa Mateyus 11:27 e sori, dan fa Yehovah e yepi wi fu kon si en leki wan lobi-ati Papa?

⁶ Yehovah wani yepi wi fu si en leki wan Papa di lobi wi. Fu dati ede a meki sma skrifi na ini Bijbel san Yesus taki èn san a du. (Leisi Mateyus 11:27.) Fu di Yesus abi den fasi fu en Papa, meki a ben taki: „A sma di si mi, si a Tata tu” (Yoh. 14:9). Te Yesus ben taki fu Yehovah, dan furu leisi a ben kari en Papa. Na ini den fo Evangelietori wawan, Yesus e gebroiki a wortu „Tata” sowan 165 leisi te a e taki fu Yehovah. Fu san ede Yesus ben kari Yehovah „Tata” someni leisi? Wan reide fu san ede a ben du dati, na fu di a ben wani yepi sma fu si Yehovah leki wan lobi-ati Papa.​—Yoh. 17:25, 26.

7. San wi e leri fu Yehovah te wi e luku san a ben e du gi en Manpikin?

⁷ San wi e leri fu Yehovah te wi e luku san a ben e du gi en Manpikin Yesus? Ala ten Yehovah ben arki den begi fu Yesus. A no ben arki wawan, ma a ben du tu san Yesus ben aksi en (Yoh. 11:41, 42). Awinsi sortu tesi Yesus ben kisi, a ben firi taki en Papa lobi en èn taki a ben yepi en.​—Luk. 22:42, 43.

8. Fa Yehovah ben yepi Yesus?

⁸ Yesus ben sabi taki na en Papa ben gi en libi èn taki a ben hori en na libi. A ben taki: „Mi e libi fu di a Tata gi mi libi” (Yoh. 6:57). Yesus ben frutrow en Papa èn Yehovah ben gi en san a ben abi fanowdu fu tan na libi. San moro prenspari, na taki Yehovah ben yepi Yesus fu tan gi yesi na en.​—Mat. 4:4.

9. Fa Yehovah sori taki a lobi Yesus?

⁹ Ala ten Yehovah ben horibaka gi Yesus. Dati meki Yesus ben sabi taki a ben man frutrow en Papa (Mat. 26:53; Yoh. 8:16). Yehovah no ben kibri Yesus gi ala ogri di ben kan miti en, ma a ben yepi en fu horidoro te a ben kisi tesi. Yesus ben sabi taki ala den ogri di ben miti en, ben de fu wan syatu ten nomo (Hebr. 12:2). Yehovah ben sori taki a ben lobi Yesus fu di a ben arki en, a ben sorgu gi en, a ben gi en leri èn a ben yepi en fu horidoro (Yoh. 5:20; 8:28). Wi o  luku now fa wi hemel Papa e yepi wi na a srefi fasi.

10. Soleki fa Psalm 66:19, 20 e sori, dan fa Yehovah e sori taki a lobi wi?

¹⁰ Yehovah e arki den begi fu wi. (Leisi Psalm 66:19, 20.) Yehovah no e weri fu arki den begi fu wi, na presi fu dati a e gi wi a deki-ati fu begi doronomo (1 Tes. 5:17). Wi kan begi Yehovah na iniwan ten èn awinsi pe wi de. Wi no abi fu frede taki a abi tumusi furu fu du èn taki a no o man arki wi. Te wi kon frustan taki Yehovah e arki den begi fu wi, wi o lobi en moro. A psalm skrifiman ben taki: „Fu tru mi lobi Yehovah, bika a e arki mi sten.”​—Ps. 116:1.

11. Fa Yehovah e piki den begi fu wi?

¹¹ Wi Papa Yehovah no e arki den begi fu wi wawan, ma a e piki den tu. Na apostel Yohanes ben taki: „Awansi san wi e aksi [Gado], a e yere wi, solanga a e kruderi nanga a wani fu en” (1 Yoh. 5:14, 15). Ma kande Yehovah no e piki den begi fu wi na a fasi di wi e fruwakti. Yehovah sabi san bun gi wi. Dati meki son leisi a piki fu en na „nôno”. Noso son leisi a wani taki wi musu wakti pikinso.​—2 Kor. 12:7-9.

12-13. Fa wi hemel Papa e sorgu gi wi?

¹² Yehovah e sorgu wi. Yehovah e du san a e fruwakti fu ala tra papa (1 Tim. 5:8). A e gi den pikin fu en den sani di den abi fanowdu fu tan na libi. A no wani taki wi broko wi ede nanga nyanyan, krosi noso wan tanpresi (Mat. 6:32, 33; 7:11). Fu di Yehovah lobi wi meki a seti sani, so taki wi kan kisi ala san wi abi fanowdu na ini a ten di e kon.

¹³ Ma san moro prenspari na taki Yehovah e yepi wi fu abi wan bun matifasi nanga en. Na ini en Wortu a e leri wi suma na en, san a abi na prakseri gi libisma, fu san ede wi de na grontapu èn san o pasa na ini a ten di e kon. A gebroiki wi papa nanga mama noso tra sma fu yepi wi fu kon sabi en. A e gebroiki den owruman nanga tra lepi brada nanga sisa na ini a gemeente tu, fu yepi wi fu tan wan mati fu en. Boiti dati, Yehovah e gi wi leri na den konmakandra pe wi de nanga wi brada nanga sisa. Na so Yehovah e sori taki a de wan papa gi wi alamala.​—Ps. 32:8.

14. Fu san ede Yehovah e gi wi piri-ai èn fa a e du dati?

¹⁴ Yehovah e gi wi leri. Tra fasi leki Yesus, wi na sondu libisma. Dati meki a de fanowdu son leisi taki wi Papa e gi wi piri-ai fu leri wi wan sani. Bijbel e taki: „Yehovah e piri-ai gi a sma di a lobi” (Odo 3:12). Yehovah e piri-ai gi wi na difrenti fasi. Fu eksempre, kande wi e leisi wan sani na ini Bijbel noso wi e yere wan sani na den konmakandra di e meki wi si taki wi musu kenki a fasi fa wi e denki noso fa wi e tyari wisrefi. Noso kande den owruman e gi wi rai. Awinsi fa Yehovah e piri-ai gi wi, ala ten a e du dati fu di a lobi wi.​—Yer. 30:11.

15. Fa Yehovah e yepi wi fu horidoro?

¹⁵ Yehovah e yepi wi fu horidoro te wi e kisi tesi. Neleki fa wan papa di lobi en pikin e yepi den te den abi problema, na so wi hemel Papa e yepi wi te wi e kisi tesi. Yehovah e gi wi en santa yeye. A yeye disi e kibri wi gi iniwan sani di kan pori wi matifasi nanga en (Luk. 11:13). Yehovah e yepi wi tu te wi lasi-ati.  Fu eksempre, a gi wi wan moi howpu. A howpu disi e yepi wi fu horidoro te wi abi problema. No frigiti taki awinsi sortu ogri e miti wi, Yehovah, wi Papa di lobi wi, kan meki ala sani kon bun baka. Den tesi di wi e kisi na fu wan syatu ten nomo, ma den blesi fu Yehovah na fu ala ten.​—2 Kor. 4:16-18.

16. San pasa di Adam trangayesi en Papa?

¹⁶ Te wi e prakseri san Yehovah du di Adam trangayesi en, dan wi e si taki a lobi wi. Di Adam trangayesi en hemel Papa, dan a no ben mag tan na ini na osofamiri fu Yehovah moro. Disi meki taki den bakapikin fu en srefi no ben o de na ini na osofamiri fu Yehovah (Rom. 5:12; 7:14). Ma Yehovah du wan sani fu yepi den bakapikin fu Adam.

17. San Yehovah du wantewante baka di Adam trangayesi en?

¹⁷ Yehovah strafu Adam, ma a pramisi fu yepi den bakapikin fu Adam. Wantewante baka di Adam sondu, Yehovah pramisi taki libisma di ben gi yesi na en, ben o man kon baka na ini na osofamiri fu en (Gen. 3:15; Rom. 8:20, 21). Fu man du a sani disi Yehovah seni en lobi Manpikin Yesus fu kon dede gi libisma. A sani disi e sori taki Yehovah lobi wi trutru.​—Yoh. 3:16.

18. Fu san ede wi kan de seiker taki Yehovah wani wi leki en pikin, srefi efu wi ben gowe libi en fu wan pisi ten?

¹⁸ Aladi wi na sondusma, Yehovah wani wi na ini en osofamiri. A no e si wi leki wan hebi, ma a de klariklari fu yepi wi. Kande wi e du sani di e meki taki Yehovah sari noso kande wi e gowe libi en. Ma a e tan howpu taki wi o drai kon baka  na en. Yesus ben fruteri a tori fu a lasi manpikin fu sori o furu Yehovah lobi den pikin fu en (Luk. 15:11-32). A papa na ini na agersitori dati ben tan howpu taki en boi ben o drai kon baka na oso. Di a boi fu en kon na oso baka, a papa ben breiti so te taki a lon go brasa en. Efu wi gowe libi Yehovah, ma wi abi berow, dan wi kan de seiker taki wi lobi-ati Papa de klariklari fu teki wi baka na ini en osofamiri.

19. Fa Yehovah o seti ala sani baka di Adam pori?

¹⁹ Wi Papa Yehovah o seti ala sani baka di Adam pori. Baka di Adam sondu, Yehovah bosroiti fu teki 144.000 libisma fu dini leki kownu nanga priester na ini hemel makandra nanga en Manpikin. Na ini a nyun grontapu Yesus nanga den 144.000 salfuwan, o yepi libisma di e gi yesi na Gado fu kon fri fu sondu. Baka te den sma disi pasa wan lasti tesi, Yehovah o gi den têgo libi. Wi Papa o prisiri na a ten dati te a grontapu o furu nanga den manpikin nanga den umapikin fu en di no o abi sondu moro. A ten dati o switi trutru!

20. Fa Yehovah sori taki a lobi wi èn san wi o luku na ini a tra artikel?

²⁰ Yehovah sori wi o furu a lobi wi. En na a moro bun Papa. A e arki den begi fu wi, a e gi wi san wi abi fanowdu fu tan na libi èn a e yepi wi fu abi wan bun matifasi nanga en. A e gi wi leri èn a e yepi wi fu horidoro tu. Boiti dati, a o du moi sani gi wi na ini a ten di e kon. Wi e firi bun fu di wi sabi taki wi Papa lobi wi èn a e sorgu wi! Na ini a tra artikel wi o si fa wi leki pikin fu Yehovah kan sori taki wi de nanga tangi gi a lobi fu en.