1. Umuntfu bekufanele enteni nangabe afuna kukhuluma nenkhosi yasePheresiya?

ASEWUTICABANGE uphila ePheresiya eminyakeni lengaba ngu-2 500 leyendlulile. Ufuna kukhuluma nenkhosi yalelive ngendzaba letsite, ngako kufanele uye lapho kunesigodlo khona eShushani. Kodvwa ngaphambi kwekutsi ukhulume nalenkhosi, kufanele utfole imvume yayo kucala. Nawungetama kukhuluma nayo ingakakuvumeli, kungenteka ubulawe!—Esta 4:11.

2. Kufanele sitive njani ngekusondzela kuJehova?

² Sijabula kakhulu kutsi Jehova akafani nalenkhosi yasePheresiya! Jehova unemandla lamakhulu futsi ubaluleke kwendlula nobe ngumuphi umbusi longumuntfu, nobe kunjalo, singakhuluma naye nobe kunini. Jehova ufuna sitive sikhululekile kukhuluma naye. Nasi sibonelo, ngisho nobe Jehova aneticu letiphakeme njengalesitsi uMdali, Somandla nalesitsi iNkhosi Lephakeme, ufuna kutsi sikhulume naye sisebentisa ligama leletayelekile lelitsi “Babe.” (Mat. 6:9) Kuyasijabulisa kutsi Jehova ufuna sitive sisondzele kakhulu kuye!

3. Kungani kufanele sibite Jehova ngekutsi “Babe,” futsi yini lesitawucoca ngayo kulesihloko?

³ Kukahle kutsi sibite Jehova ngekutsi “Babe,” ngobe unguMtfombo wekuphila kwetfu. (Hla. 36:9) Ngesizatfu sekutsi unguBabe wetfu, kufanele simlalele. Nasenta loko lakucelako kitsi, sitawutfola tibusiso letinyenti. (Heb. 12:9) Letibusiso tifaka ekhatsi kuphila lokuphakadze, kungaba sezulwini nobe emhlabeni. Nanyalo tikhona tibusiso lesitijabulelako. Kulesihloko sitawucoca ngaloko Jehova lakwentako nyalo njengobe anguBabe lositsandzako nangekutsi singaciniseka njani kutsi angeke asishiye esikhatsini lesitako. Kwekucala,  asesicoce ngekutsi singaciniseka njani kutsi Babe wetfu losezulwini usitsandza kakhulu futsi uyasinakekela.

4. Kungani kumatima ngalabanye kutsi batsatse Jehova njengaBabe wabo?

⁴ Kuke kube matima yini kutsi ucabange Nkulunkulu njengaBabe wakho? Labanye bangase bacabange kutsi Jehova mkhulu kakhulu kangangekutsi asikabaluleki kuye. Bayangabata kutsi Nkulunkulu Somandla unendzaba nabo. Ngalokwehlukile, Babe wetfu lositsandzako akafuni sitive ngaleyondlela. Wasinika kuphila futsi ufuna sibe nebuhlobo lobuhle naye. Ngemuva kwekusho leliciniso, umphostoli Pawula watjela lebebamlalele e-Athene kutsi Jehova ‘akekho khashane kuloyo naloyo kitsi.’ (Imis. 17:24-29) Nkulunkulu ufuna kutsi ngamunye wetfu akhulume naye njengobe nemntfwana lomncane akhuluma nababe wakhe lomtsandzako futsi lomnakekelako.

5. Yini lesiyifundzako kulokwenteka kulomunye dzadze?

⁵ Kungaba matima ngalabanye kutsi batsatse Jehova njengaBabe wabo ngenca yekutsi bobabe babo lababantfu abazange babatsandze ngendlela lekahle. Cabanga nganaku lokwashiwo ngulomunye dzadze. Utsi: “Babe wami bekahlupha kakhulu. Nangicala kufundza liBhayibheli bekumatima kutsi ngitive ngisondzelene naBabe losezulwini. Kodvwa ngatsi nangicala kumati Jehova, konkhe loko kwashintja.” Utiva ngendlela lefanako yini? Nangabe kunjalo, ungapheli emandla, ngesikhatsi lesifanele utawugcine ubona kutsi Jehova unguBabe lokahle kakhulu.

6. Ngekusho kwaMatewu 11:27, nguyiphi indlela Jehova lasisite ngayo kuze simtsatse njengaBabe lositsandzako?

⁶ Lenye indlela Jehova lasisite ngayo kuze simtsatse njengaBabe lositsandzako kutsi usinikete liBhayibheli lelinemavi lashiwo nguJesu netintfo latenta. (Fundza Matewu 11:27.) Jesu walingisa buntfu baBabe wakhe, waze watsi: “Loyo longibonile mine umbonile naBabe.” (Joh. 14:9) Jesu bekavame kukhuluma ngaloko Jehova lakwentako njengaBabe. EmaVangelini lamane, Jesu wasebentisa ligama lelitsi “Babe” tikhatsi letingaba ngu-165 nakakhuluma ngaJehova. Kungani Jesu akhuluma kakhulu ngaJehova? Lesinye sizatfu kutsi bekafuna kwenta bantfu bakholwe kutsi Jehova unguBabe lonelutsandvo.—Joh. 17:25, 26.

7. Yini lesiyifundzako ngaJehova endleleni laphatsa ngayo iNdvodzana yakhe?

⁷ Cabanga ngaloko lesikufundzako ngaJehova endleleni lebekaphatsa ngayo iNdvodzana yakhe. Jehova bekahlale ayiva imithantazo yaJesu. Bekangagcini ngekuyiva kuphela kodvwa bekaphindze ayiphendvule. (Joh. 11:41, 42) Ngisho nangetulu kwebumatima Jesu labhekana nabo, bekahlale ati kutsi Jehova uyamtsandza futsi uyamsekela.—Luk. 22:42, 43.

8. Jehova wamniketa ngatiphi tindlela Jesu tintfo lebekatidzinga?

⁸ Jesu wakufakazela kutsi Babe wakhe bekanguMtfombo neMlondvoloti wekuphila kwakhe nakatsi: “Ngiphila ngenca [yaBabe].” (Joh. 6:57) Jesu bekametsemba ngalokuphelele Babe wakhe futsi Jehova wamniketa konkhe lebekakudzinga kuze aphile. Lokubaluleke kakhulu kutsi Jehova wasita Jesu kutsi ahlale etsembekile kuye.—Mat. 4:4.

9. Jehova wakhombisa njani kutsi unguBabe lobekamtsandza kakhulu Jesu?

⁹ Njengobe Jehova anguBabe lonelutsandvo, bekamcinisekisa Jesu kutsi utamsekela. (Mat. 26:53; Joh. 8:16) Ngisho nobe Jehova angazange amvikele Jesu kuto  tonkhe tintfo lebetingamlimata, wamsita kuze abeketelele bumatima. Jesu bekati kutsi nobe yini lebeyingamlimata beyitawuba yesikhashana. (Heb. 12:2) Jehova wakhombisa kutsi uyamtsandza Jesu ngekutsi amlalele, amnikete lakudzingako, amceceshe aphindze amsekele. (Joh. 5:20; 8:28) Nyalo, asesibone indlela Babe wetfu losezulwini lasisita ngayo ngendlela lefanako.

10. Ngekusho kweTihlabelelo 66:19, 20, Jehova ukhombisa njani kutsi uyasitsandza?

¹⁰ Jehova uyayilalela imithantazo yetfu. (Fundza Tihlabelelo 66:19, 20.) Akafuni sinciphise lizinga lesithantaza ngalo, kunaloko usikhutsata kutsi sithantaze ngaso sonkhe sikhatsi. (1 Thes. 5:17) Singathantaza nobe kunini kuNkulunkulu nobe sikuphi. Akasiko matasa kangangekutsi angeke asasilalele, uhlale akulungele kuyilalela imithantazo yetfu. Nasibona kutsi Jehova uyayilalela imithantazo yetfu, simtsandza kakhulu. Umhlabeleli watsi: “Ngiyamtsandza Simakadze, ngobe ulivile livi lami.”—Hla. 116:1.

11. Jehova uyiphendvula njani imithantazo yetfu?

¹¹ Babe wetfu Jehova akayilaleli kuphela imithantazo yetfu kodvwa uyayiphendvula. Umphostoli Johane wasicinisekisa nakatsi: “Kunobe yini lesiyicela ngekwentsandvo yakhe [Nkulunkulu], uyasiva.” (1 Joh. 5:14, 15) Kuliciniso kutsi Jehova ngeke ayiphendvule ngendlela lesigadze ngayo imithantazo yetfu. Uyakwati loko lokusilungele, ngako ngalesinye sikhatsi imphendvulo yakhe ingaba ngu-cha! nobe afune silindze kancane.—2 Khor. 12:7-9.

12-13. Jehova usinakekela ngatiphi tindlela?

¹² Jehova usinika lesikudzingako. Wenta loko lafuna kutsi bonkhe bobabe bakwente. (1 Thim. 5:8) Unika bantfwana bakhe tonkhe tintfo labatidzingako kuze baphile. Akafuni sikhatseteke ngekudla, kwekugcoka nendzawo yekuhlala. (Mat. 6:32, 33; 7:11) Njengobe Jehova angumtali lonelutsandvo, uyaciniseka kutsi sitatitfola tintfo lesitatidzinga esikhatsini lesitako.

¹³ Lokubaluleke kakhulu kutsi Jehova usiniketa konkhe lesikudzingako kuze sibe nebuhlobo lobuhle naye. EVini lakhe usivetele liciniso ngaye, tinjongo takhe, injongo yekuphila nekutsi yini letawenteka esikhatsini lesitako. Usikhombisile kutsi uyasitsandza nasicala kufundza liciniso, usebentise batali betfu nobe labanye kuze basifundzise ngaye. Uyachubeka asisita kutsi sibe bangani bakhe asebentisa labadzala belibandla labasitsandzako, nalabanye bazalwane nabodzadze lesebanesikhatsi bakhonta Jehova. Ngetulu kwaloko, Jehova uyasifundzisa asebentisa imihlangano yelibandla, lapho sisuke sihlangene khona nebazalwane betfu nabodzadzewetfu. Asebentisa letindlela kanye naletinye, Jehova usuke akhombisa kutsi unguBabe losinakekelako.—Hla. 32:8.

14. Kungani Jehova asicecesha, futsi usicecesha njani?

¹⁴ Jehova uyasicecesha. Tsine asifani naJesu ngobe sinesono. Ngako kuze Babe wetfu lonelutsandvo asiceceshe, uyasiyala nakudzingekile. LiVi lakhe liyasikhumbuta kutsi: “Jehova uyamyala loyo lamtsandzako.” (Heb. 12:6, 7) Jehova usiyala ngetindlela letinyenti. Nasi sibonelo, lesikufundza eBhayibhelini nobe lesikuva emihlanganweni yebuKhristu, kungasisita sibone nakufanele sishintje indlela lesicabanga nobe lesenta ngayo tintfo. Ngalesinye sikhatsi, lusito lesiludzingako lungachamuka kulabadzala belibandla. Ngisho nobe Jehova angasiyala ngayiphi indlela, usuke akhombisa kutsi uyasitsandza.—Jer. 30:11.

15. Jehova usivikela ngatiphi tindlela?

¹⁵ Jehova uyasisita nasibhekene nebumatima. Njengobe babe lonelutsandvo  abasekela bantfwana bakhe ngetikhatsi letimatima, naBabe wetfu losezulwini uyasisekela nasibhekene nebumatima. Usebentisa umoya wakhe longcwele kuze asivikele kunobe yini lengalimata buhlobo betfu naye. (Luk. 11:13) Jehova uphindze asivikele nasicindzetelekile. Sibonelo saloko kutsi usinikete litsemba lelijabulisako. Lelitsemba lesinalo ngelikusasa lisisita kutsi sibeketelele bumatima. Cabanga nganaku: Ngisho nobe kungentekani lembi kitsi, Babe wetfu lositsandzako utasiphilisa kuko. Bumatima lesibhekana nabo besikhashana, kodvwa tibusiso Jehova lasiniketa tona titawuhlala phakadze.—2 Khor. 4:16-18.

16. Yini leyenteka ngesikhatsi Adamu angamlaleli Babe wakhe lonelutsandvo?

¹⁶ Siyabubona bufakazi bendlela Jehova lasitsandza ngayo nasicabanga ngaloko Jehova lakwenta ngesikhatsi Adamu angamlaleli. Ngesikhatsi Adamu angamlaleli Babe wakhe losezulwini, wabese akasabi yincenye yemndeni waJehova lojabulako akanye netitukulwane takhe. (Rom. 5:12; 7:14) Nobe kunjalo, Jehova wenta lokutsite kuze asite titukulwane ta-Adamu.

17. Ngemuva kwekuvukela kwa-Adamu, yini Jehova layenta ngekushesha?

¹⁷ Jehova wamjezisa Adamu, kodvwa wetsembisa kusita situkulwane sakhe. Ngekushesha, Jehova wetsembisa kutsi bebatawuphindze babe khona bantfu labalalelako emndenini wakhe. (Gen. 3:15; Rom. 8:20, 21) Jehova wasebentisa inhlawulo yeNdvodzana yakhe layitsandzako kuze akwente loku. Ngekutfumela indvodzana yakhe kutsi itosifela, Jehova bekakhombisa kutsi usitsandza kakhulu.—Joh. 3:16.

18. Kungani singaciniseka kutsi Jehova ufuna kutsi sibe bantfwana bakhe, ngisho nobe besesimshiyile?

¹⁸ Ngisho nobe sinesono, Jehova ufuna  sibe yincenye yemndeni wakhe futsi akakutfoli kuyinkinga lenkhulu kusisita. Singamdvumata ngaletinye tikhatsi, kodvwa Jehova uhlale etsemba kutsi sitawubuyela kuye. Jesu wayikhombisa indlela Jehova labatsandza ngayo bantfwana bakhe nakakhuluma ngendzaba yendvodzana lebeyilahlekile. (Luk. 15:11-32) Babe walendvodzana lokukhulunywa ngayo kulomfanekiso waJesu akazange alahle litsemba lekutsi indvodzana yakhe itawubuya. Ngesikhatsi lendvodzana ibuya ekhaya, babe wayo wayemukela ngekujabula lokukhulu. Nangabe simshiyile Jehova kodvwa sesiphendvukile, singaciniseka kutsi babe wetfu lositsandzako ukulungele futsi utimisele kusemukela.

19. Jehova utawulungisa njani umonakalo lowabangelwa ngu-Adamu?

¹⁹ Babe wetfu Jehova utawulungisa wonkhe umonakalo lowabangelwa ngu-Adamu. Ngemuva kwekuvukela kwa-Adamu, Jehova wakhetsa kufaka esiswini bantfu labangu-144 000 lebebatawutsatfwa emhlabeni, kuze babe ngemakhosi nebaphristi ezulwini kanye neNdvodzana yakhe. Jesu kanye nalabo latawube abusa nabo batawusita ekususeni sono kubantfu labalalelako emhlabeni lomusha. Ngemuva kwekuncoba eluvivinyweni lwekugcina, Nkulunkulu utawubese ubanika kuphila lokuphakadze. Babe wetfu utawujabula nakabona umhlaba ugcwele bantfu labete sono. Leso kutawuba sikhatsi lesijabulisa kakhulu!

20. Jehova ukhombise ngatiphi tindlela kutsi usitsandza mbamba, futsi yini lesitawucoca ngayo esihlokweni lesilandzelako?

²⁰ Jehova usikhombisile kutsi usitsandza mbamba nekutsi unguBabe lokahle kakhulu. Uyayiva imithantazo yetfu futsi usinika loko lesikudzingako kuze siphile futsi sibe nebuhlobo lobuhle naye. Uyasicecesha aphindze asisekele. Jehova usetawusentela tintfo letinhle esikhatsini lesitako. Kuyasijabulisa kwati kutsi Babe wetfu uyasitsandza futsi uyasinakekela! Esihlokweni lesilandzelako, sitawucoca ngetindlela lesingakhombisa ngato kutsi siyambonga ngekusitsandza kwakhe njengobe sibantfwana bakhe.