1. Mtu alihitaji kufanya nini ili kufika mbele ya mfalme wa Uajemi?

WAZIA kwamba unaishi miaka 2,500 hivi iliyopita katika nchi ya Uajemi. Unataka kuzungumza na mfalme wa nchi hiyo kuhusu jambo fulani, hivyo unasafiri kwenda katika jiji la kifalme la Shushani. Lakini kabla ya kufika mbele ya mfalme ili kuzungumza naye, ni lazima upate ruhusa yake. Usipofanya hivyo unaweza kupoteza uhai wako!—Esta 4:11.

2. Yehova anataka tuhisije tunapozungumza naye?

² Tunashukuru sana kwamba Yehova si kama mfalme huyo wa Uajemi! Yehova ni mkuu sana kuliko mtawala yeyote wa kibinadamu, hata hivyo anatualika tuzungumze naye wakati wowote. Anataka tujihisi huru kuzungumza naye. Kwa mfano, ingawa Yehova ana majina ya cheo yaliyotukuka kama vile Muumba Mkuu, Mweza-Yote, na Bwana Mwenye Enzi Kuu, tunaalikwa tumwite “Baba,” neno ambalo linagusa hisia. (Mt. 6:9) Ni jambo linalogusa moyo sana kwamba Yehova anataka tumwone kuwa Mungu mwenye wororo, anayetaka tuwe na uhusiano wa karibu pamoja naye!

3. Kwa nini tunaweza kumwita Yehova “Baba,” na tutazungumzia nini katika makala hii?

³ Inafaa kumwita Yehova “Baba,” kwa sababu yeye ndiye Chanzo cha uhai wetu. (Zab. 36:9) Kwa kuwa yeye ni Baba yetu, tuna wajibu wa kumtii. Tunapofanya yale anayotaka tufanye, tutapata baraka nzuri ajabu. (Ebr. 12:9) Baraka hizo zinatia ndani uzima wa milele, iwe ni mbinguni au duniani. Pia, tunanufaika hata sasa. Makala hii itazungumzia jinsi Yehova anavyotenda kama Baba mwenye upendo sasa na kwa nini tunaweza kuwa na  uhakika kwamba hatatuacha kamwe wakati ujao. Lakini kwanza, acheni tuzungumzie kwa nini tunaweza kuwa na uhakika kwamba Baba yetu wa mbinguni anatupenda sana na kutujali.

4. Kwa nini ni vigumu kwa baadhi ya watu kumwona Yehova kuwa Baba yao?

⁴ Je, ni vigumu kwako kumwona Mungu kuwa Baba yako? Baadhi ya watu wanajiona kuwa duni na wadogo sana wanapojilinganisha na Yehova. Wana shaka ikiwa Mungu Mweza-Yote anawajali kibinafsi. Hata hivyo, Baba yetu anayetupenda hataki tuhisi hivyo. Alitupatia uhai na anataka tuwe na uhusiano mzuri pamoja naye. Baada ya kutaja ukweli huo, mtume Paulo aliwaeleza wasikilizaji wake huko Athene kwamba Yehova “hayuko mbali na kila mmoja wetu.” (Mdo. 17:24-29) Mungu anataka kila mmoja wetu azungumze naye kama tu ambavyo kiasili mtoto huzungumza na mzazi wake anayempenda na kumjali.

5. Tunajifunza nini kutokana na kisa cha dada mmoja Mkristo?

⁵ Ni vigumu kwa baadhi ya watu kumwona Yehova kuwa Baba yao kwa sababu hawakuonyeshwa upendo na wororo na baba yao mzazi. Dada mmoja Mkristo alisema hivi: “Baba yangu alikuwa mkatili sana. Nilipoanza kujifunza Biblia, ilikuwa vigumu kwangu kuhisi nikiwa karibu na Baba aliye mbinguni. Lakini baada ya kumjua Yehova, hali ilibadilika.” Je, wewe pia huhisi kama alivyohisi dada huyo? Ikiwa ndivyo, uwe na hakika kwamba wewe pia unaweza kumwona Yehova kuwa Baba aliye bora zaidi kuliko wote.

6. Kulingana na Mathayo 11:27, Yehova ametumia njia gani ili kutusaidia kumwona yeye kuwa Baba yetu anayetupenda?

⁶ Njia moja ambayo Yehova ametusaidia kumwona yeye kuwa Baba yetu anayetupenda ni kwa kuruhusu maneno na matendo ya Yesu yaandikwe katika Biblia. (Soma Mathayo 11:27.) Yesu aliiga utu wa Baba yake kikamilifu hivi kwamba angeweza kusema: “Yeyote ambaye ameniona mimi amemwona Baba pia.” (Yoh. 14:9) Yesu alizungumza mara kwa mara kuhusu jukumu ambalo Yehova hutimiza akiwa Baba. Katika vitabu vinne vya Injili, Yesu alitumia neno “Baba” mara 165 hivi kumrejelea Yehova. Kwa nini Yesu alizungumza sana kumhusu Yehova? Sababu moja ni ili watu wasadiki kwamba Yehova ni Baba anayetupenda.—Yoh. 17:25, 26.

7. Tunajifunza nini kumhusu Yehova kutokana na jinsi alivyomtendea Mwana wake?

⁷ Fikiria jambo tunalojifunza kumhusu Yehova kutokana na jinsi alivyomtendea Yesu, Mwana wake. Sikuzote Yehova alisikiliza sala za Yesu. Yehova hakusikiliza tu sala za Yesu bali pia alizijibu. (Yoh. 11:41, 42) Hata iwe alikabili majaribu gani, sikuzote Yesu alihisi kwamba Baba yake alimpenda na kumtegemeza.—Luka 22:42, 43.

8. Yehova alimwandalia Yesu mahitaji yake katika njia zipi?

⁸ Yesu alikiri kwamba Baba yake ndiye Chanzo na Mtegemezaji wa uhai wake aliposema kwamba: “Ninaishi kwa sababu ya Baba.” (Yoh. 6:57) Yesu alimtumaini Baba yake kikamili, na Yehova alimwandalia mahitaji yake ya kimwili. Jambo muhimu hata zaidi ni kwamba Yehova alimwandalia mahitaji yake ya kiroho pia.—Mt. 4:4.

9. Yehova alionyeshaje kwamba yeye ni Baba anayempenda na kumjali Yesu?

⁹ Akiwa Baba mwenye upendo, Yehova alihakikisha kwamba Yesu anajua kwamba anamtegemeza. (Mt. 26:53; Yoh. 8:16) Ingawa Yehova hakumkinga Yesu dhidi ya mambo yote ambayo yangeweza kumuumiza, alimsaidia avumilie majaribu. Yesu alikuwa na uhakika  kwamba hali yoyote ngumu ambayo angekabili ingekuwa ya muda mfupi. (Ebr. 12:2) Yehova alionyesha kwamba anamjali Yesu kwa kumsikiliza, kwa kumwandalia mahitaji yake, kwa kumzoeza, na kwa kumtegemeza. (Yoh. 5:20; 8:28) Sasa, acheni tuone jinsi Baba yetu wa mbinguni anavyotujali kwa njia hizo pia.

10. Kulingana na Zaburi 66:19, 20, Yehova anaonyeshaje kwamba anatupenda?

¹⁰ Yehova husikiliza sala zetu. (Soma Zaburi 66:19, 20.) Hataki tusali kwake mara chache tu, badala yake anatuhimiza tusali mara kwa mara. (1 The. 5:17) Kwa heshima, tunaweza kusali kwa Mungu wetu wakati wowote, haidhuru tuko wapi. Yehova hawezi kamwe kuwa na shughuli nyingi sana hivi kwamba akose kutusikiliza; sikuzote anapatikana na yuko tayari kutusikiliza. Tunapotambua kwamba Yehova husikiliza sala zetu, tunazidi kumpenda. Mtunga zaburi alisema hivi: “Ninampenda Yehova kwa sababu yeye huisikia sauti yangu.”—Zab. 116:1.

11. Yehova hujibuje sala zetu?

¹¹ Baba yetu hasikilizi tu sala zetu, bali pia anazijibu. Mtume Yohana anatuhakikishia hivi: “Tukiomba chochote kulingana na mapenzi [ya Mungu], yeye hutusikia.” (1 Yoh. 5:14, 15) Lakini huenda Yehova akajibu sala zetu kwa njia tusiyotarajia. Hata hivyo, anajua kile kinachotufaa zaidi, kwa hiyo nyakati nyingine jibu lake ni hapana au anataka tusubiri.—2 Kor. 12:7-9.

12-13. Baba yetu wa mbinguni hutuandalia mahitaji yetu katika njia zipi?

¹² Yehova hutuandalia mahitaji yetu. Anatimiza mambo yote ambayo anataka akina baba wote wafanye. (1 Tim. 5:8) Anashughulikia mahitaji ya kimwili ya watoto wake. Hataki tuwe na mahangaiko kuhusu chakula, mavazi, au mahali pa kulala. (Mt. 6:32, 33; 7:11) Kwa kuwa Yehova ni Baba yetu anayetupenda, amefanya pia mipango ya kutosheleza mahitaji yetu yote ya wakati ujao.

¹³ Jambo muhimu hata zaidi ni kwamba Yehova hutuandalia mahitaji yetu ya kiroho. Kupitia Neno lake ametufunulia ukweli kujihusu, kuhusu kusudi lake, kusudi la maisha, na kuhusu wakati ujao. Alituelekezea uangalifu wa kibinafsi tulipoanza kujifunza kweli, alipowatumia wazazi wetu au walimu wengine ili watusaidie kujifunza kumhusu. Na bado tunaendelea kupata msaada kupitia wazee wa kutaniko wanaotupenda na pia ndugu na dada wengine wakomavu. Pia, Yehova anatufundisha kupitia mikutano ya kutaniko ambapo tunajifunza kumhusu tukiwa pamoja na familia yetu ya kiroho. Kupitia njia hizo na nyingine, Yehova anatukazia sisi sote uangalifu akiwa Baba yetu.—Zab. 32:8.

14. Kwa nini Yehova hutuzoeza, naye hufanyaje hivyo?

¹⁴ Yehova hutuzoeza. Tofauti na Yesu, sisi si wakamilifu. Hivyo, ili kutuzoeza, Baba yetu anayetupenda hututia nidhamu inapohitajika. Neno lake linatukumbusha hivi: “Yehova huwatia nidhamu wale anaowapenda.” (Ebr. 12:6, 7) Yehova hututia nidhamu kwa njia nyingi. Kwa mfano, huenda tukarekebishwa na jambo ambalo tumesoma katika Neno lake au tumesikia katika mikutano. Au huenda msaada tunaohitaji ukatoka kwa wazee. Haijalishi Yehova anatumia njia gani ili kututia nidhamu, sikuzote nidhamu yake huchochewa na upendo.—Yer. 30:11.

15. Yehova hutulindaje?

¹⁵ Yehova hututegemeza tunapokabili majaribu. Kama tu ambavyo Baba wa kibinadamu mwenye upendo huwategemeza watoto wake katika nyakati ngumu, ndivyo Baba  yetu wa mbinguni anavyotutegemeza wakati wa majaribu. Yehova hutumia roho yake takatifu ili kutulinda dhidi ya madhara ya kiroho. (Luka 11:13) Pia, anatulinda kihisia. Kwa mfano, anatupatia tumaini zuri ajabu. Tumaini hilo la wakati ujao hutusaidia kuvumilia matatizo. Fikiria hili: Hata tupatwe na mambo gani mabaya, Baba yetu anayetupenda atakuja kuondoa kabisa mambo yote yenye kuumiza tunayokabili. Matatizo yoyote tunayokabili ni ya muda mfupi tu, lakini baraka ambazo Yehova hutoa ni za milele.—2 Kor. 4:16-18.

16. Ni nini kilichotukia Adamu alipokosa kumtii Baba yake mwenye upendo?

¹⁶ Tunajionea uthibitisho wa upendo wa Yehova kupitia jinsi alivyotenda matatizo yalipozuka kwa mara ya kwanza katika familia yake duniani. Adamu alipokosa kumtii Baba yake wa mbinguni, alipoteza nafasi yake katika familia ya Yehova yenye furaha, na pia ya uzao wake. (Rom. 5:12; 7:14) Hata hivyo, Yehova aliingilia kati ili kuusaidia uzao wa Adamu.

17. Baada ya Adamu kuasi, Yehova alichukua hatua gani mara moja?

¹⁷ Yehova alimwadhibu Adamu, lakini hakuwaacha bila tumaini wazao wa Adamu ambao walikuwa hawajazaliwa. Papo hapo aliahidi kwamba wanadamu watiifu wangerudishwa katika familia yake. (Mwa. 3:15; Rom. 8:20, 21) Yehova aliandaa mpango huo kwa msingi wa dhabihu ya fidia ya Mwana wake mpendwa, Yesu. Kwa kumtoa Mwana wake kwa ajili yetu, Yehova alithibitisha jinsi anavyotupenda sana.—Yoh. 3:16.

18. Kwa nini tunaweza kuwa na hakika kwamba Yehova anataka tuwe watoto wake hata ikiwa tulikengeuka kutoka kwake?

¹⁸ Ingawa sisi si wakamilifu, Yehova anataka tuwe sehemu ya familia yake, na kamwe hatuoni kuwa mzigo. Huenda tukamhuzunisha au tukakengeuka kwa muda fulani kutoka kwenye  njia yake, lakini sikuzote Yehova anatumaini kwamba tutarudi kwake. Yesu alitoa mfano unaoonyesha kina cha upendo wa Yehova Baba yetu, kwa kusimulia kisa cha mwana mpotevu. (Luka 15:11-32) Katika mfano huo, baba hakuacha kamwe kutumaini kwamba mwanawe angerudi. Mwana huyo aliporudi nyumbani, baba yake alimkaribisha kwa uchangamfu. Ikiwa tulikengeuka kutoka kwa Yehova lakini tumetubu, tunaweza kuwa na hakika kwamba Baba yetu anayetupenda yuko tayari na ana nia ya kutukaribisha tena.

19. Yehova ataondoaje madhara ambayo Adamu alisababisha?

¹⁹ Baba yetu ataondoa madhara yote yaliyosababishwa na Adamu. Baada ya Adamu kuasi, Yehova aliamua kuwafanya kuwa wana watu 144,000 kutoka miongoni mwa wanadamu, nao watatumikia wakiwa wafalme na makuhani mbinguni pamoja na Mwana wake. Katika ulimwengu mpya, Yesu pamoja na watawala wenzake watawasaidia wanadamu watiifu kufikia ukamilifu. Baada ya kushinda jaribu la mwisho la utii, Mungu atawapa wanadamu uzima wa milele. Kisha Baba yetu atafurahi sana kuona dunia ikiwa imejaa wana na binti zake wakamilifu. Utakuwa wakati mzuri ajabu!

20. Yehova ameonyeshaje kwamba anatupenda sana, na tutazungumzia nini katika makala inayofuata?

²⁰ Yehova ameonyesha kwamba anatupenda sana. Yeye ndiye Baba bora zaidi. Anasikiliza sala zetu na kutupatia mahitaji yetu, ya kiroho na ya kimwili. Anatuzoeza na kututegemeza. Pia, anatuahidi baraka nzuri za wakati ujao. Tunaguswa moyo sana kujua kwamba Baba yetu anatupenda na kutujali! Makala inayofuata itazungumzia njia ambazo sisi, tukiwa watoto wake, tunaweza kuonyesha kwamba tunathamini upendo wake.