1. Iha tempu uluk, ema presiza halo saida atu bele koʼalia ho liurai Pérsia?

IMAJINA katak Ita moris iha rai-Pérsia tinan 2.500 liubá. Ita hakarak koʼalia ba liurai, entaun Ita bá sidade Susan, liurai nia hela-fatin. Maibé antes Ita bele koʼalia ho liurai, Ita tenke hetan uluk lisensa. Se lae, Ita bele mate.—Ester 4:11.

2. Jeová hakarak ita atu sente oinsá kona-ba koʼalia ba nia?

² Ita agradese tebes tanba Jeová la hanesan ho liurai Pérsia. Maski Jeová mak boot liu ukun-naʼin hotu, maibé ita bele koʼalia ba nia iha tempu naran deʼit. Nia lakohi ita taʼuk atu koʼalia ba nia. Porezemplu, maski Jeová iha títulu oioin hanesan Kriadór Boot, Maromak Kbiit Boot Liu Hotu, no Naʼi Ukun-Naʼin Boot Liu, maibé nia konvida ita atu koʼalia ba nia hodi uza liafuan “Aman”. (Mt 6:9) Ita kontente tanba Jeová hakarak ita atu sente besik ba nia.

3. Tanbasá ita bele bolu Jeová nuʼudar “Aman”? Iha lisaun neʼe, ita sei aprende kona-ba saida?

³ Ita bele bolu Jeová nuʼudar “Aman” tanba nia mak Hun ba ita-nia moris. (Sal 36:9) Tanba nia mak ita-nia Aman, ita presiza halo tuir nia. Kuandu ita halo tuir, ita sei hetan bensaun furak oioin. (Ebr 12:9) Bensaun sira-neʼe inklui moris ba nafatin iha rai ka iha lalehan. Ita mós bele hetan benefísiu agora. Iha lisaun neʼe, ita sei aprende kona-ba oinsá Jeová hatudu katak nia mak Aman neʼebé domin no tanbasá ita bele fiar katak nia sei nunka husik ita iha futuru. Maibé ulukliu, mai ita aprende tanbasá ita bele fiar katak ita-nia Aman iha lalehan hadomi tebes ita no tau matan ba ita.

4. Tanbasá ema balu sente susar atu haree Jeová nuʼudar sira-nia Aman?

⁴ Ita sente susar atu haree Jeová nuʼudar Ita-nia Aman ka lae? Ema balu sente katak sira kiʼik deʼit no la importante se kompara ho Jeová. Sira duvida se Maromak Kbiit Boot Liu Hotu hanoin duni sira ida-idak. Maibé, ita-nia Aman domin nian lakohi ita atu sente hanesan neʼe. Nia fó ita moris no nia hakarak ita atu iha relasaun diʼak ho nia. Depois fó sai tiha lia-loos sira-neʼe, apóstolu Paulo esplika ba ninia rona-naʼin sira iha Atenas katak Jeová “la dook husi ita ida-idak”. (Após 17:24-29) Maromak hakarak ita ida-idak atu koʼalia ba nia hanesan oan ida koʼalia ba ninia aman neʼebé hadomi nia no tau matan ba nia.

5. Ita bele aprende saida husi irmán ida nia esperiénsia?

⁵ Ema balu tan karik sente susar atu haree Jeová nuʼudar Aman tanba sira-nia aman rasik la hatudu domin ka laran-diʼak ba sira. Irmán ida hatete: “Haʼu-nia aman trata aat haʼu. Bainhira haʼu komesa estuda Bíblia, susar tebes ba haʼu atu sente besik ba Aman iha lalehan. Maibé depois haʼu koñese Jeová, haʼu-nia hanoin troka.” Ita mós sente hanesan neʼe ka lae? Se nuneʼe, keta laran-kraik, tanba Ita mós bele haree Jeová nuʼudar Aman neʼebé diʼak liu.

6. Tuir Mateus 11:27, oinsá Jeová ajuda ita atu haree nia nuʼudar Aman neʼebé domin?

⁶ Dalan ida oinsá Jeová ajuda ita atu haree nia nuʼudar Aman neʼebé domin mak liuhusi dirije ema hakerek Jesus nia liafuan no hahalok iha Bíblia laran. (Lee Mateus 11:27.) Jesus haleno ninia Aman nia hahalok ho perfeitu, tan neʼe nia bele dehan: “Ema neʼebé haree ona haʼu, haree ona mós Aman.” (João 14:9) Dala barak Jesus koʼalia kona-ba Jeová nuʼudar Aman. Iha Evanjellu haat, Jesus uza liafuan “Aman” maizumenus dala 165 hodi refere ba Jeová. Tanbasá Jesus koʼalia beibeik kona-ba Jeová nuʼudar Aman? Razaun ida mak atu ajuda ema iha konfiansa katak Jeová mak Aman neʼebé domin.—João 17:25, 26.

7. Ita aprende saida husi dalan neʼebé Jeová tau matan ba ninia Oan-Mane?

⁷ Ita bele aprende saida husi dalan neʼebé Jeová tau matan ba ninia Oan-Mane Jesus? Jeová sempre rona no hatán ba Jesus nia orasaun. (João 11:41, 42) Maski Jesus hasoru susar oioin, maibé nia bele sente ninia Aman nia domin no apoia.—Lc 22:42, 43.

8. Iha dalan saida deʼit mak Jeová tau matan ba Jesus nia presiza?

⁸ Jesus rekoñese katak ninia Aman mak Hun ba ninia moris no ajuda nia atu kontinua moris. Jesus dehan: “Haʼu moris tanba Aman.” (João 6:57) Jesus tau fiar tomak ba ninia Aman, no Jeová tau matan ba Jesus nia presiza isin nian. Importante liu mak Jeová tau matan ba Jesus nia presiza espirituál.—Mt 4:4.

9. Oinsá mak Jeová hatudu katak nia mak Aman neʼebé hadomi Jesus?

⁹ Tanba Jeová mak Aman neʼebé domin, nia ajuda Jesus atu iha konfiansa katak nia sei apoia Jesus. (Mt 26:53; João 8:16) Maski Jeová la proteje Jesus husi susar hotu, maibé nia ajuda Jesus tahan susar sira-neʼe. Jesus iha konfiansa katak terus neʼebé nia hasoru mak temporáriu deʼit. (Ebr 12:2) Jeová hatudu katak nia hadomi Jesus liuhusi rona,  treinu, apoia no tau matan ba Jesus nia presiza. (João 5:20; 8:28) Mai ita haree oinsá ita-nia Aman iha lalehan tau matan ba ita hanesan nia tau matan ba Jesus.

10. Tuir Salmo 66:19, 20, oinsá mak Jeová hatudu katak nia hadomi ita?

¹⁰ Jeová rona ba ita-nia orasaun. (Lee Salmo 66:19, 20.) Nia hakarak ita atu halo orasaun beibeik hodi fakar sai ita-nia laran ba nia kona-ba tópiku oioin no iha tempu naran deʼit. (1 Tes 5:17) Ita bele halo orasaun ba ita-nia Maromak iha tempu no fatin naran deʼit. Nia sempre prontu atu rona didiʼak ba ita. Bainhira ita hatene katak Jeová rona ba ita-nia orasaun, ita sei hadomi nia liután. Ema neʼebé hakerek salmo ida hatete: “Haʼu hadomi Jeová tanba nia rona haʼu-nia lian.”—Sal 116:1.

11. Oinsá Jeová hatán ba ita-nia orasaun?

¹¹ Ita-nia Aman rona no hatán ba ita-nia orasaun. Apóstolu João fó konfiansa mai ita: “Buat naran deʼit neʼebé ita husu hodi tuir [Maromak nia] hakarak, nia rona ita.” (1 João 5:14, 15) Dala ruma, Jeová hatán ita-nia orasaun iha dalan oioin. Nia hatene saida mak diʼak liu ba ita, tan neʼe dala ruma ninia resposta mak lae, ka nia hakarak ita atu hein.—2 Kor 12:7-9.

12-13. Iha dalan saida deʼit mak ita-nia Aman iha lalehan tau matan ba ita-nia presiza?

¹² Jeová tau matan ba ita-nia presiza. Nia halo buat neʼebé nia haruka aman hotu atu halo. (1 Tim 5:8) Nia tau matan ba ninia oan sira-nia presiza isin nian. Nia lakohi ita atu hanoin resin kona-ba ai-han, roupa, ka hela-fatin. (Mt 6:32, 33; 7:11) Tanba Jeová mak Aman neʼebé domin, nia mós halo ona arranju atu fó buat neʼebé ita presiza iha futuru.

¹³ Importante liu mak Jeová tau matan ba ita-nia presiza espirituál. Liuhusi ninia Liafuan, nia hatudu sai lia-loos kona-ba ninia an, ninia hakarak, kona-ba tanbasá nia kria ita, no kona-ba futuru. Bainhira ita foin aprende lia-loos, nia hatudu interese ba ita ida-idak liuhusi ita-nia inan-aman ka mestre Bíblia neʼebé ajuda ita atu koñese nia. No nia kontinua apoia ita liuhusi katuas kongregasaun no irmaun-irmán sira neʼebé maduru. Liután neʼe, Jeová hanorin ita no irmaun-irmán sira liuhusi reuniaun sira. Liuhusi dalan sira-neʼe no dalan seluk tan, Jeová hatudu ninia interese ba ita hotu nuʼudar Aman ida.—Sal 32:8.

14. Oinsá Jeová treinu ita no tanbasá?

¹⁴ Jeová treinu ita. La hanesan Jesus, ita la perfeitu. Tan neʼe atu bele treinu ita, ita-nia Aman neʼebé domin fó dixiplina ba ita bainhira presiza. Ninia Liafuan fó-hanoin ita: “Jeová fó dixiplina ba sira neʼebé nia hadomi.” (Ebr 12:6, 7) Jeová fó dixiplina ba ita iha dalan oioin. Porezemplu, dala ruma ita lee ninia Liafuan ka rona buat ruma iha reuniaun no rekoñese katak ita presiza halo mudansa. Ka karik katuas sira mak fó matadalan neʼebé ita presiza. Maski Jeová fó dixiplina iha dalan oioin, maibé nia sempre halo nuneʼe tanba hadomi ita.—Jer 30:11.

15. Oinsá mak Jeová proteje ita?

¹⁵ Jeová ajuda ita tahan durante tempu susar. Aman neʼebé hadomi ninia oan ajuda ninia oan durante tempu susar, nuneʼe mós ho ita-nia Aman iha lalehan. Nia uza ninia espíritu santu atu proteje ita husi buat hotu neʼebé bele estraga ita-nia relasaun diʼak ho nia.  (Lc 11:13) Jeová mós proteje ita liuhusi ajuda ita bainhira ita laran-kraik. Porezemplu, nia fó ita esperansa furak. Esperansa neʼe ajuda ita atu tahan susar sira. Hanoin toʼok ida-neʼe: Maski buat aat akontese ba ita, ita-nia Aman domin nian bele hadiʼa ida-neʼe iha dalan neʼebé kompletu. Susar hotu neʼebé ita hasoru daudaun mak temporáriu deʼit, maibé bensaun husi Jeová mak ba nafatin.—2 Kor 4:16-18.

16. Saida mak akontese bainhira Adão la halo tuir ninia Aman neʼebé hadomi nia?

¹⁶ Ita haree Jeová nia domin ba ita bainhira ita hanoin kona-ba buat neʼebé nia halo kuandu Adão kontra nia. Bainhira Adão la halo tuir ninia Aman iha lalehan, nia la sai parte tan ba Jeová nia família neʼebé kontente, no ninia bei-oan hotu mós la sai parte tan ba família neʼe. (Rom 5:12; 7:14) Maibé Jeová halo buat ruma atu ajuda.

17. Jeová halo kedas saida bainhira Adão kontra?

¹⁷ Jeová fó-kastigu ba Adão, maibé nia fó esperansa ba Adão nia bei-oan sira. Nia promete kedas katak ema laran-metin sira bele sai fali parte ba ninia família. (Gén 3:15; Rom 8:20, 21) Jeová halo nuneʼe liuhusi ninia Oan-Mane Jesus nia sakrifísiu. Hodi fó ninia Oan-Mane atu salva ita, Jeová hatudu katak nia hadomi tebes ita.—João 3:16.

18. Tanbasá ita bele fiar katak Jeová hakarak ita sai ninia oan maski karik ita laʼo sees husi nia?

¹⁸ Maski ita la perfeitu, maibé Jeová hakarak ita sai parte ba ninia família, no nia nunka sai kole atu ajuda ita. Maski dala ruma, ita halo nia laran-kanek ka laʼo sees husi nia, maibé Jeová la lakon esperansa katak ita sei fila fali ba nia. Jesus hatudu oinsá Jeová hadomi  tebes ninia oan sira liuhusi istória kona-ba oan-mane neʼebé lakon. (Lc 15:11-32) Aman iha istória neʼe nunka lakon esperansa katak ninia oan-mane sei fila fali. Bainhira oan-mane neʼe fila fali ba uma, aman neʼe simu nia ho laran. Se ita laʼo sees husi Jeová maibé arrepende an, fiar bá katak ita-nia Aman domin nian prontu no hakarak simu fali ita.

19. Oinsá mak Jeová sei hadiʼa buat aat hotu neʼebé mosu tanba Adão nia sala?

¹⁹ Ita-nia Aman sei hadiʼa buat aat hotu neʼebé mosu tanba Adão nia sala. Depois Adão kontra, Jeová deside atu hili ema naʼin-144.000 nuʼudar oan-hakiak hodi sai liurai no amlulik iha lalehan hamutuk ho ninia Oan-Mane. Jesus no sira neʼebé ukun hamutuk ho nia sei ajuda ema laran-metin sira atu sai perfeitu fali iha mundu foun. Depois sira liu koko ba dala ikus, Maromak sei fó moris rohan-laek ba ema laran-metin sira-neʼe. No ita-nia Aman sei kontente bainhira haree mundu nakonu ho ninia oan-mane no oan-feto sira neʼebé perfeitu. Neʼe mak tempu neʼebé furak tebes.

20. Oinsá Jeová hatudu katak nia hadomi tebes ita? Iha lisaun tuirmai, ita sei aprende kona-ba saida?

²⁰ Jeová hatudu ona katak nia hadomi tebes ita. Nia mak Aman neʼebé diʼak liu. Nia rona ita-nia orasaun no tau matan ba ita-nia presiza isin nian no espirituál. Nia treinu no ajuda ita. Nia mós sei haraik bensaun furak oioin ba ita iha futuru. Ita sente kontente atu hatene katak ita-nia Aman hadomi ita no tau matan ba ita. Iha lisaun tuirmai, ita sei aprende kona-ba dalan oioin atu hatudu domin ba Jeová nuʼudar ninia oan sira.