1. Nila nanao inogne rehe naho te ho mbamy i mpanjaka i Persay mbeo?

ERETSERETO tie ndaty nitoboke ta Persa agne rehe, fa agn’arivo’e taogne lasa zay. Igne rehe fa mandeha amy ty tanàgne misy i mpanjaka i Persa a Sosana aoy, satria misy olagne lahibey tea’o horehafegne ama’e. Azo antoke tie tsy hahavany ho mbama’e mbeo rehe naho tsy nahazo alalagne boake ama’e. Ty anto’e, va’e ho vonoegne rehe naho tsy nahazo alalagne!—Estera 4:11.

2. Ino ty teà i Jehovah ho tsapantikagne naho fa mirehake ama’e tika?

² Tena fale tikagne satria tsy manahake i mpanjaka i Persay ty Jehovah! Ambone lavitse ty Jehovah naho oharegne amo o mpitondrao, faie afake mirehake ama’e avao tikagne ndra ombia ndra ombia. Tsy tea’e hisalasala hirehake ama’e tikagne. Maro ty agnaram-boninahitse itokavantikagne i Jehovah. Agnisa izay tihoe Mpamorogne Lahibey naho Tompo ty Hery vaho Tompo Fara Tampo’e. Faie tea’e naho mitoka aze tihoe ‘Baba’ tikagne. (Mat. 6:9) Mahafale ty mahafantatse tie tena teà i Jehovah hifandrambe marine ama’e tikagne!

3. Nagnino tikagne ro afake mitoka i Jehovah tihoe ‘Baba’? Ino ty hodinehentikagne amy ty lahatsoratse toy?

³ Fagneva ty ho tokavegne tihoe ‘Baba’ ty Jehovah satria ireke ty nagnomey aigne antika. (Sal. 36:9) Mila mankatò aze areke tika amy maha Raentikagne aze zay. (Heb. 12:9) Naho manao izay tikagne, le hahazo fitahiagne maro. Agnisa izay tihoe hiaigne nainai’e. Ndra zay an-dagnitse agne, ndra an-tane etoy. Maro ka ty fitahiagne fa azontikagne amy izao. Ho treantika amy ty lahatsoratse toy tie ino ty atao i Jehovah mba hagnaporofoagne fa Rae bey hatea reke, naho tihoe nagnino tika ro matoky fa tsy hahafoe antika reke. Faie andao hey tika handineke  ty porofo magnamaregne fa tena tea naho mikarakara antikagne i Raentikagney.

4. Nagnino ro sarotse amy ty ndaty ila’e ty mihevetse i Jehovah ho Baba’e?

⁴ Sarotse ama’o vao ty mihevetse i Jehovah ho Baba’o? Mieretseretse ty ndaty ila’e tie tsisy dika’e amy i Jehovah reke satria kidikidy naho oharegne ama’e, le tsy darea’e. Va’e hirehake aza iareo tie, ‘Ino ka tegna naho tretrézen’Andrianagnahare!’ Faie tsy teà i Jehovah hieretseretse hoe izay tikagne. Teà’e hifandrambe soa ama’e tikagne satria ireke ty nagnomey aigne antika. Nirehake ty miomba izay ty apostoly Paoly, sady nihazavae’e tamy ty ndaty nitsanogne aze ta Atena ao tie “tsy lavitse antikagne tsikiraikiraike” ty Jehovah. (Asan’ny Apostoly 17:24-29) O ajajao zao ohatse tsy misalasala mirehake amy ty baba’e. Hoe izay ka, fa teà i Jehovah tsy hisalasala hirehake ama’e tikagne satria tena tea naho mikarakara antika reke.

5. Ino ty azontikagne ianaragne boake amy ty raha niaigna ty rahavave raike?

⁵ Misy anto’e hafa ka mahavy ty ndaty ila’e tsy hihevetse i Jehovah ho Rae’e. Tsy le naneho hatea naho hasoa fagnahy tama’e ty rae’e niterake aze. Izao ty nirehafe ty rahavave raike: “Tena masiake ty babako. Nisarotse tamako areke ty nandrambe i Jehovah ho Raeko, tamy iraho vaho nanomboke nianatse Baiboly. Faie niova zay naho fa nahafantatse soa aze raho.” Naho izay ka ty tsapa’o, le ao rehe tsy ho kivy. Naho fa mandeha ty fotoagne, le ho tsapa’o fa Rae fanjaka ty Jehovah.

6. Ino ty natao i Jehovah mba hagnampeagne antikagne hihevetse aze ho Rae bey hatea, arake ty Matio 11:27?

⁶ Nanao raha ty Jehovah mba hagnampeagne antika hihevetse aze ho Babantikagne. Nampanorate’e agnate Baiboly ao zao, ze raha nirehafe i Jesosy naho natao’e. (Vakio ty Matio 11:27.) Tena nanahake ty toetoen-dRae’e ty Jesosy. Izay ty nahavy aze nirehake tie: “Ze nahatrea ahy, le nahatrea an-dRaeko ka.” (Jaona 14:9) Mateteke ty Jesosy ro nirehake ty raha atao i Jehovah mba hahatsapantika tie tena Raentika reke. Trea amy i Filazantsara efatse rey ao ohatse, fa nampiasae i Jesosy mateteke tihoe “Rae” naho fa ireke nirehake ty miomba i Jehovah ndra nivavake tama’e. Nagnino ty Jesosy ro nanao izay? Amy izay rese lahatse o ndatio tie tena tea antikagne i Raentikagney, le i Jehovah.—Jaona 17:25, 26.

7. Ino ty ianarantika miomba i Jehovah naho henteagne ty raha natao’e tamy i Ana’ey?

⁷ Andao tika handineke ty fomba nifandrambesa i Jehovah tamy i Ana’ey satria misy lesogne soa ho rambesentika boake amy izay. Lava nijanjigne i Jehovah avao ohatse ty vavake natao i Jesosy sady nivalea’e ka. (Jaona 11:41, 42) Nahatsapa areke ty Jesosy fa tena tea aze ty Jehovah sady lava nanohagne aze avao tamy ty raha sarotse iaby natrehe’e.—Lioka 22:42, 43.

8. Inogne iaby ty raha nimey i Jehovah i Jesosy?

⁸ Fanta i Jesosy soa fa i Rae’e ty nagnomey aigne aze sady hagnomey aze ze raha ilae’e. Tena natoky izay reke. Hoe reke: “I Rae ty mahavy ahy ho velogne.” (Jaona 6:57) Le nimey i Jehovah aze vata’e ze raha nilae’e mba hahavelogne aze. Faie ambone izay, le nampea i Jehovah ka reke mba ho vita’e ty tsy hivalike ama’e.—Mat. 4:4.

9. Akore ty nampisehoa i Jehovah tie tena teà’e naho nikarakarà’e ty Jesosy?

⁹ Rae bey hatea ty Jehovah, le azo antoke fa fanta i Jesosy tie tena hanohagne aze Reke. (Mat. 26:53; Jaona 8:16) Maregne fa tsy lava narova i Jehovah avao reke naho fa niatreke tsapa hevetse ndra nisy raha nampijale aze. Faie nagnampe aze mba hiaretse o raha rehoe reke. Hay i Jesosy soa tie mihelagne avao ty raha iaby nampijale aze. (Heb. 12:2) Teà i Jehovah vata’e i ana’ey! Akore ty nampisehoa’ e izay? Nijanjigne aze, nagnomey ze raha nipaliae’e, nampianatse aze, vaho nanohagne aze reke. (Jaona 5:20; 8:28) Manahake ty fomba nikarakarà i Jehovah i Jesosy ka ty ikarakarà’e antikagne. Andao tikagne handineke izay.

10. Akore ty ampisehoa i Jehovah tie tena tea antika reke, arake ty Salamo 66:19, 20?

¹⁰ Mijanjigne ty vavake ataontikagne ty Jehovah. (Vakio ty Salamo 66:19, 20.) Tsy nandily antika reke tie isake hoe izao avao nareo ro toko’e hivavake amako, ndra tsy maintsy hoe izao ty halava ty vavake atao’areo, ndra miomba izao avao ty azo’areo rehafegne amako. Itika aza risihe’e mba hivavake ama’e mateteke. (1 Tes. 5:17) Vognogne hijanjigne antika avao reke ndra ombia ndra ombia. Naho fa tsapantika tie mijanjigne antikagne reke, le hitombo ty hateantikagne aze. Hoe ty mpanao salamo raike: “Teako ty Jehovah satria mijanjigne ty feoko.”—Sal. 116:1.

11. Akore ty fomba hamalea i Jehovah ty vavake ataontikagne?

¹¹ Tsy mijanjigne avao ty Jehovah fa mamale ty vavake ataontikagne ka. Izao ty toky nimey i apostoly Jaona antika: “Ndra inogn’inogne angatahentikagne naho fa mifanandrife amy ty zoton’arofo’e, le mijanjigne antikagne reke.” (1 Jaona 5:14, 15) Faie va’e tsy ho arake ty ieretseretantikagne aze ty fomba hamalea’e ty vavake ataontikagne. Ireke ty tena mahafantatse ze raha mahasoa antika. Va’e hisy fotoagne areke ty Jehovah hamale tihoe: ‘Aha’a’, ndra: ‘Mandignisa hey.’—2 Kor. 12:7-9.

12-13. Inogne iaby ty raha mey i Jehovah mba hikarakaragne antika?

¹² Magnomey ze raha ilaentika ty Jehovah. Také i Jehovah amy ty loha ty keleiagne ty hagnomea’e ze raha ilae ty ana’e. (1 Tim. 5:8) Faie ireke ty tena modely amy izay. Mei’e antika ze raha tena ilaentika, agnisa izay ty hanegne, lamba naho tragno. Tsy teà’e areke naho minekoneko miomba ireo tika. (Mat. 6:32, 33; 7:11) Magnomagne hoavy fanjaka ho antikagne ka ty Jehovah manahake ty atao ty rae bey hatea.

¹³ Magnomey ze raha ilaentikagne ka ty Jehovah mba hahavy antika hifandrambe soa ama’e. Nimei’e antikagne ty Saontsi’e mba hahaiantika ty maregne miomba aze, ty raha nisafirie’e ho antikagne, ty anto’e namorogna’e antika, vaho ty raha hanoe’e amy ty hoavy. Va’e ty rae aman-drene’o ndra ndaty hafa ty nampianatse azo ty hamarenagne. Faie naho ty maregne, le fitaovagne nampiasae i Jehovah mba hagnampeagne azo avao iareo. Ampiasae i Jehovah ka o androanavi-pagnahy bey hateao naho ty rahalahy vaho rahavave matotse mba hagnampeagne antika hilongo soa ama’e. Mbe ampianare i Jehovah ka tikagne naho fa mivory miarake amo o mpiara-manompò. Trea amy ireo tie tena mikarakara antikagne i Raentikagney.—Sal. 32:8.

14. Ino ty anto’e mahavy i Jehovah magnitsy antikagne, sady akore ty fomba anoa’e izay?

¹⁴ Magnanatse naho magnitsy antika ty Jehovah. Voririke ty Jesosy fa itikagne tsy hoe izay. Misy fotoagne areke va’e hagnitsy antika i Raentikagney. Maniahy antika ty Saontsi’e tie: “Ze teà i Jehovah ro anare’e.” (Heb. 12:6, 7) Maro ty fomba anoa’e izay. Naho fa mamaky Baiboly ndra magnatreke fivoriagne ohatse tika, le va’e hahatsapa tie misy raha mila ahitsintikagne. Va’e hagnomey torohevetse antika ka o androanavi-pagnahio. Faie ndra akore ndra akore fomba agnitsia i Jehovah antikagne, le tsiarovo fa ty hatea’e antika ty mahavy aze manao izay.—Jer. 30:11.

15. Ino iaby ty atao i Jehovah mba hanohagnagne antikagne?

¹⁵ Manohagne antika ty Jehovah naho fa miatreke fitsapagne tikagne. Magnampe ty rae bey hatea naho fa miatreke raha sarotse ty ana’e.  Hoe izay ka ty atao i Raentikagne an-dagnitse agney amantikagne. Mampiasa ty fagnahi’e masigne reke mba hiarovagne antika amy ze raha va’e hanimba ty fifandrambesantikagne ama’e. (Lioka 11:13) Manohagne antika ka ty Jehovah naho fa kivy tikagne. Nimei’e fampitamagne fanjaka ohatse tikagne. Magnampe antika hiaretse raha sarotse rey. Ko haligno fa mihelagne avao ze kila raha mampijale antika satria hofoagna i Raentika bey hateay. Haharetse nainai’e areke ty fitahiagne ho azontika.—2 Kor. 4:16-18.

16. Ino ty voka’e naho fa tsy nankatò i Andrianagnahare tea azey ty Adama?

¹⁶ Tena tea antikagne ka ty Jehovah naho henteagne ty raha natao’e tafara ty nanotà i Adama. Naho fa tsy nankatò reke, le nijale sady nanjare tsy agnisa ty keleia i Jehovah sasa reke naho ty tarira’e. (Rom. 5:12; 7:14) Faie nanao raha ty Jehovah mba hagnampeagne ty tarira’e.

17. Le avy le nanao ino ty Jehovah, tafara ty nanotà i Adama?

¹⁷ Fa tsy avotse sasa ty Adama. Faie nisaontsy ty Jehovah fa hagnavotse ty tarira’e. Le avy le nampitamà reke tafara kede ty nanotà i Adama tie ho agnisa ty keleia’e indraike ze ndaty mankatò. (Gen. 3:15; Rom. 8:20, 21) Nimei’e i Ana’e bakotokagney mba hatao sorogne hagnavotagne antikagne. Io ty porofo lahibey fa tena tea antikagne ty Jehovah.—Jaona 3:16.

18. Nagnino tikagne ro afake matoky fa teà i Jehovah ho agnisa ty ana’e tika ndra tie niala aze?

¹⁸ Teà i Jehovah ho agnisa ty keleia’e tikagne ndra tie tsy voririke. Vognogne hagnampe antikagne avao reke. Naho nandiso tamà i Jehovah ndra niala aze ohatse tika, le mitamà avao reke tie mbe hiheregne ama’e tika. Naseho i Jesosy tamy i fagnoharagne miomba i anake nisintake an-drae’ey fa tena tsy mahafoe antika i Babantikagney.  (Lioka 15:11-32) Lava nitamà avao i rangahe tamy i fagnoharagney tie mbe hiheregne i ana-dahi’ey. Ie naho fa niheregne reke, le tena nifale ty rae’e nandrambe aze. Naho niala i Jehovah areke rehe faie mibebake, le matokia fa tena fale i Raentika bey hateay sady vognogne handrambe azo.

19. Akore ty hagnaregna i Jehovah ty raha natao i Adama?

¹⁹ Hofoagna i Jehovah iaby ty voka-draty ty raha natao i Adama. Nanapa-kevetse ty Jehovah tafara ty nanotà i Adama fa hijobogne ndaty 144000, mba ho mpanjaka sady mpisorogne an-dagnitse agne miarake amy i Ana-dahi’ey. Hagneregne ze ndaty mankatò ho voririke indraike iareo amy i tontolo vaovaoy ao. Afara izay, le ho velogne nainai’e ze tsy mivalike amy i fitsapagne fara’ey. Tena ho fale i Raentikagney naho fa hahavazoho tie voririke iaby o ndatio. Hanjare ana’e ze kila o ndaty an-tane etoy tie amy izay. Tsy trea’o boake amy izay vao fa fanjaka ty raha tamaentikagne!

20. Inogne iaby ty raha natao i Jehovah mba hampisehoagne tie tena tea antika reke? Ino ty hodinehentika amy ty lahatsoratse magnarake?

²⁰ Tea antikagne vata’e ty Jehovah. Tsy misy rae fanjaka mandikoatse aze. Mijanjigne ty vavake ataontikagne reke sady magnomey ze raha paliaentikagne ara-nofo naho ara-pagnahy. Magnitsy naho manohagne antika reke. Magnomagne fitahiagne fanjaka ho antikagne ka reke. Mahafale antika ty mahafantatse tie tena tea antika sady mikarakara antikagne i Babantikagney! Faie akore ty hanoroantikagne fa teantikagne ka reke? Izay ty hianarantikagne amy ty lahatsoratse magnarake.