1. Kumbi munthu wakhumbikanga kuchitanji kuti wakumani ndi fumu ya ku Perese?

YERUZGIYANI kuti mwajanga ku Perese vyaka pafufupi 2,500 vo vajumpha. Ndipu mukhumba kuluta ku Susani kuti mukakambiskani ndi fumu pa nkhani yinyaki. Kweni mungakumana nayu cha kwambula kuti yakuzomerezani. Asani mungachita viyo, mungataya umoyu winu!​—Este. 4:11.

2. Kumbi Yehova wakhumba kuti timuwonengi wuli asani tikambiskana nayu?

² Tiwonga ukongwa kuti Yehova we nge fumu ya ku Perese cha! Yehova ngwanthazi ukongwa kuphara fumu yeyosi kweni tingalongoro nayu nyengu yeyosi. Iyu wakhumba kuti tifwatukengi nayu. Mwakuyeruzgiyapu, chinanga kuti Yehova we ndi mazina ngapachanya nga udindu nge Mlengi, Wanthazizosi ndipuso Fumu Yikulu, kweni wakhumba kuti timudanengi kuti “Ada” asani tikambiskana nayu. (Mate. 6:9) Tikondwa ukongwa kuti Yehova wakhumba kuti timuwonengi kuti we nasi pafupi!

3. Ntchifukwa wuli tidana Yehova kuti “Ada,” nanga tikambiskanengenji mu nkhani iyi?

³ Mphakwenere kudana Yehova kuti “Ada” pakuti iyu Ntchisimi cha umoyu. (Sumu 36:9) Chifukwa chakuti Mbada ŵidu titenere kuŵavwiya. Asani tichita vo watitikambiya, titumbikikengi ukongwa. (Ahe. 12:9) Mwakuyeruzgiyapu, tingazisaniya umoyu wamuyaya panu pasi pamwenga kuchanya. Titumbikika so chinanga ndi sonu. Nkhani iyi, yikonkhoskengi mo Yehova walongore kuti iyu Mbada ŵidu kweniso chifukwa cho tisimikiziya kuti kunthazi wazakutijowopu cha. Kweni tiyeni tikambiskani dankha chifukwa cho tisimikiziya kuti Ada ŵidu akuchanya atitiyanja ukongwa ndipuso atitiphwere.

4. Ntchifukwa wuli anyaki awona kuti Yehova wangaja cha Wusewu?

⁴ Kumbi muwona kuti Chiuta wangaja cha Awusemwi? Ŵanthu anyaki awona kuti mbakusika ukongwa pakuyeruzgiya ndi Yehova. Akayikiya kuti Chiuta Wanthazizosi watiŵaphwere. Kweni Ada ŵidu achanju akhumba cha kuti tiŵanaŵanengi viyo. Yiwu akutipaska umoyu ndipu akhumba kuti tiŵapenji ndi kuŵasaniya. Wakutumika Paulo wati wakamba fundu iyi, wangukonkhoske ŵanthu a ku Atene kuti Yehova “we kutali cha ndi weyosi waku isi.” (Machi. 17:24-29) Chiuta wakhumba kuti weyosi waku isi wakambiskanengi nayu nge mo mwana wachitiya ndi mpapi waki wachanju yo watimuphwere.

5. Kumbi vo vinguchitikiya mzichi munyaki vititisambizanji?

⁵ Anyaki aŵanaŵana kuti Yehova wangaŵa Wisewu cha chifukwa chakuti awisewu wo akuŵabala aŵalongonga chanju cha. Wonani vo wangukamba mzichi munyaki. Iyu wanguti: “Ada andichitiyanga nkhaza ukongwa. Ndati ndayamba waka kusambira Bayibolu ndasuzgikanga kuwona kuti Ada akuchanya atindiyanja. Kweni ndingusintha ndati ndamuziŵa umampha Yehova.” Kumbi namwi muwona kuti Yehova watikuyanjani cha? Asani ndi viyo, mungagongowanga cha. Namwi mungayamba kuŵawona kuti Mbawusemwi amampha ukongwa.

6. Mwakukoliyana ndi Mateyu 11:27, kumbi ndi nthowa yimoza niyi yo Yehova watitiwovye kuti timuwonengi kuti Mbada achanju?

⁶ Yehova wakuchitiska kuti vo Yesu wakambanga ndi kuchita vilembeki mu Bayibolu nge nthowa yimoza yakutiwovye kuti timuwonengi nge Ada ŵidu achanju. (Ŵerengani Mateyu 11:27.) Yesu wangutole ndendende mijalidu ya Awisi mwakuti wangukamba kuti: “Munthu weyosi yo wawona ini, wawona so Ada.” (Yoha. 14:9) Kanandi Yesu wakambanga vo Yehova wachita pakuŵa Ada ŵidu. Mu mabuku nganayi pe nga Uthenga Wamampha, Yesu wangukamba mazu ngakuti “Ada” maulendu pafufupi 165 pakukamba Yehova. Ntchifukwa wuli Yesu wachitanga viyo? Chifukwa chimoza ntchakuti wakhumbanga kusimikiziya ŵanthu kuti Yehova Mbada achanju.​—Yoha. 17:25, 26.

7. Kumbi tisambiranji vakukwaskana ndi Yehova asani tiwona mo wachitiyanga vinthu ndi Mwana waki?

⁷ Ŵanaŵaniyani vo tisambira vakukwaskana ndi Yehova asani tiwona mo wachitiyanga ndi Mwana waki Yesu. Nyengu zosi Yehova wavwanga mapempheru ngaku Yesu. Iyu wavwanga waka cha kweni wamukanga so. (Yoha. 11:41, 42) Kwali Yesu wakumani ndi mayeseru wuli, kweni waziŵanga kuti Awisi atimuyanja kweniso kumuwovya.​—Luka 22:42, 43.

8. Kumbi Yehova wamuwovyanga wuli Yesu?

⁸ Yesu waziŵanga kuti Awisi ndiwu akumupaska umoyu kweniso kuti ndiwu amuwovyanga kuti walutirizgi kuja ndi umoyu. Wangulongo venivi po wangukamba kuti: “Ndija ndi umoyu chifukwa cha Ada.” (Yoha. 6:57) Yesu waŵathembanga ukongwa Awisi ndipu yiwu amupaskanga vakukhumbika pa umoyu. Kweni chakukhumbika ukongwa ntchakuti Yehova wamuphweriyanga mwauzimu.​—Mate. 4:4.

9. Kumbi Yehova wangulongo wuli kuti wamuyanjanga Yesu kweniso wamuphweriyanga?

⁹ Yesu waziŵanga kuti Awisi amuwovyengi chifukwa yiwu angumusimikiziya venivi pakuŵa Ada achanju. (Mate. 26:53; Yoha. 8:16) Chinanga kuti Yehova wamuvikiliyanga ku vinthu vosi cha Yesu vo vingamupweteka kweni wamuwovyanga kukunthiyapu mayeseru. Yesu waziŵanga kuti masuzgu ngo wakumanengi nangu nga kanyengu kamanavi. (Ahe. 12:2)  Yehova wangulongo kuti wamuphweriyanga Yesu chifukwa wamuvwisiyanga asani wapemphera, wamupaskanga vakukhumbika, wamusambizanga kweniso wamuwovyanga kuti wakunthiyepu. (Yoha. 5:20; 8:28) Sonu tiyeni tikambiskani vo Ada ŵidu akuchanya achita kuti atiphwere nge mo achitiyanga ndi Yesu.

10. Mwakukoliyana ndi Sumu 66:19, 20, kumbi Yehova walongo wuli kuti watitiyanja?

¹⁰ Yehova wavwisiya mapempheru ngidu. (Ŵerengani Sumu 66:19, 20.) Iyu wakuchita kutilangiya cha unandi wa mapempheru ngo tingaromba. Mumalu mwaki, watitipempha kuti tipempherengi nyengu zosi. (1 Ate. 5:17) Tingapemphera kwaku Chiuta widu nyengu yeyosi kweniso kwekosi ko tingaŵa. Iyu watondeka cha kuvwisiya mapempheru ngidu chifukwa cha kutangwanika ndipu wavuka nasi cha. Chiuta wavwisiya nyengu zosi. Asani taziŵa kuti Yehova wavwisiya mapempheru ngidu, titamba kumuyanja ukongwa. Munthu munyaki yo wangulembaku buku la Sumu wangukamba kuti: “Nditanja Yehova chifukwa watuvwa mazu ngangu.”​—Sumu 116:1.

11. Kumbi Yehova wamuka wuli mapempheru ngidu?

¹¹ Ada ŵidu avwisiya waka cha mapempheru ngidu kweni atitimuka so. Wakutumika Yohane watitisimikiziya kuti: “Chechosi cho tingapempha mwakukoliyana ndi khumbu laki [Chiuta] watitivwa” (1 Yoha. 5:14, 15) Mbuneneska kuti nyengu zinyaki Yehova wangamuka mapempheru ngidu mo isi taŵanaŵaniyanga cha. Iyu waziŵa vo tikhumbika. Mwaviyo, nyengu zinyaki wangatipaska cha vo tamupempha pamwenga wangakhumba kuti tilindizgepu dankha.​—2 Akori. 12:7-9.

12-13. Kumbi Yehova wachita wuli kuti watipaski vo tikhumbika?

¹² Yehova watitipaska vakukhumbika pa umoyu. Iyu wachita vo wakhumba kuti anthulumi wosi wo ŵe ndi ŵana achitengi. (1 Timo. 5:8) Yehova wapereka vinthu vakukhumbika ku ŵana ŵaki. Wakhumba cha kuti tifipengi mtima kuti tiryengenji, tivwalengenji pamwenga tigonengi pani. (Mate. 6:32, 33; 7:11) Chifukwa chakuti Yehova Mbada achanju, wazamuwonesesa kuti kunthazi tizije ndi chechosi chakukhumbika pa umoyu.

¹³ Chakukhumbika ukongwa ntchakuti Yehova watitipaska chakurya chauzimu. Kuziya mu Mazu ngaki, watitivumbuliya uneneska wakukwaskana ndi iyu, vo wakhumba kutichitiya, chifukwa cho wakutilenge kweniso vo tilindizga kunthazi. Iyu wangutiwovya mwakugwiriskiya ntchitu apapi ŵidu pamwenga ŵanthu anyaki kuti tisambiri vakukwaskana ndi iyu. Ndipu walutirizga kutiwovya kuziya mwa ŵara achanju kweniso abali ndi azichi akukhwima mwauzimu. Kweniso Yehova wagwiriskiya ntchitu maunganu kuti watisambizi pamoza ndi abali. Kuziya mu vinthu venivi kweniso vinyaki, Yehova walongo kuti watitiyanja chifukwa Mbada ŵidu.​—Sumu 32:8.

14. Ntchifukwa wuli Yehova watitilanga, nanga wachita wuli venivi?

¹⁴ Yehova watitisambiza. Mwakupambana ndi Yesu, isi te akubuda. Mwaviyo, nyengu zinyaki asani mphakwenere, Ada ŵidu atitilanga chifukwa chakuti atitiyanja. Mazu ngawu ngakamba kuti: “Yehova walanga wo watiŵayanja.” (Ahe. 12:6, 7) Yehova watitilanga mu nthowa zakupambanapambana. Mwakuyeruzgiyapu, asani taŵerenga fundu yinyaki mu Mazu ngaki pamwenga asani tavwa fundu yinyaki ku maunganu, yingatiwovya kuti tisinthi mo tiŵanaŵaniya pamwenga mo tichitiya vinthu. Pamwenga panyaki ŵara ndiwu angatiwovya. Vilivi kanthu kuti wangagwiriskiya ntchitu nthowa wuli, kweni watitilanga chifukwa chakuti watitiyanja.​—Yere. 30:11.

15. Kumbi Yehova watitiwovya wuli?

 ¹⁵ Yehova watitiwovya pa mayeseru. Nge mo ada achanju awovye ŵana ŵawu asani akumana ndi masuzgu, Ada ŵidu akuchanya atitiwovya asani takumana ndi mayeseru. Yiwu agwiriskiya ntchitu mzimu wakupaturika kuti ativikiliyi ku vinthu vo vingananga ubwezi widu ndi yiwu. (Luka 11:13) Yehova watitiwovya so asani tifipa mtima ndi vinthu vinyaki. Mwakuyeruzgiyapu, watitikambiya vinthu vamampha vo tilindizga. Vinthu venivi vititiwovya kuti tikunthiyengepu masuzgu. Ŵanaŵaniyani ivi: Kwali tingakumana ndi suzgu yikulu wuli, Ada ŵidu achanju azamumalisa masuzgu ngosi ngo tikumana nangu. Mayeseru ngosi ngo tikumana nangu sonu ngakanyengu kamanavi waka. Kweni vitumbiku vo Yehova wazakutipaska vamuyaya.​—2 Akori. 4:16-18.

16. Kumbi ntchinthu wuli cho chinguchitika Adamu wati waleka kuvwiya Awisi achanju?

¹⁶ Tiwona ukaboni wakuti Yehova watitiyanja asani tiŵanaŵaniya vo wanguchita Adamu wati waleka kumuvwiya. Adamu wati waleka kuvwiya Awisi akuchanya, wangutaya mwaŵi wakuja mwana waku Yehova. Venivi vingukwaska so ŵana ŵaki. (Aro. 5:12; 7:14) Kweni Yehova wanguchitapu kanthu kuti wawovyi ŵana aku Adamu.

17. Kumbi Yehova wangulayizganji Adamu wati wagaruka waka?

¹⁷ Yehova wangumulanga Adamu kweni ŵana ŵaki wanguŵalayizga chinthu chinyaki. Pa nyengu yeniyi, iyu wangulayizga kuti ŵanthu akuvwiya azamuja so ŵana ŵaki. (Chiya. 3:15; Aro. 8:20, 21) Yehova wangunozga venivi kuziya mu sembi ya Mwana waki wakwanjiwa Yesu. Chifukwa chakuti wangupereka  Mwana waki kuti wazitifwiyi, Yehova wangulongo kuti watitiyanja ukongwa.​—Yoha. 3:16.

18. Ntchifukwa wuli tingasimikiza kuti Yehova wakhumba kuti tije ŵana ŵaki chinanga tingaguŵa, kuwere vuli pamwenga kusezgeka?

¹⁸ Chinanga kuti te akubuda, Yehova wakhumba kuti tije ŵana ŵaki ndipu wawona kuti te mphingu cha. Nyengu zinyaki tingamuguŵiska pamwenga tingaja kubwalu kwa gulu laki kwa kanyengu, kweni Yehova wavuka nasi cha. Yesu wangulongo mo Yehova watitiyanjiya muntharika ya mwana wakusoŵa. (Luka 15:11-32) Ada a muntharika iyi, agomezganga kuti zuŵa linyaki mwana wawu wazamuweku. Mwana uyu wati wawere kunyumba, awisi angumulondere ndi mtima wosi. Mwakuyanana waka, asani tamunangiya Yehova ndipu talapa, Ada ŵidu achanju mbakunozgeka kutilondere so.

19. Kumbi Yehova wazamuchita wuli kuti wanozgi vinthu vo Adamu wakunanga?

¹⁹ Ada ŵidu azamuweziyapu vosi vo Adamu wakunanga. Adamu wati wagaruka, Yehova wanguŵanaŵana kuti wasankhi ŵanthu 144,000 kuti aje ŵana ŵaki. Yiwu amuja mafumu ndi kuteŵete nge asembi pamoza ndi Mwana waki kuchanya. Mucharu chifya, Yesu ndi wo wamulamuliya nawu azamuwovya ŵanthu akuvwiya kuti azije akufikapu. Asani aziyeseka kakumaliya Yehova wazakuŵapaska umoyu wambula kumala. Pavuli paki, Ada ŵidu azamukondwa kuwona kuti charu chapasi chazaza ndi ŵana ŵawu akufikapu. Iyi yazamukuŵa nyengu yakukondwesa ukongwa!

20. Kumbi Yehova walongo wuli kuti watitiyanja ukongwa, nanga tazamukambiskananji mu nkhani ya sabata ya mawa?

²⁰ Yehova walongo kuti watitiyanja ukongwa munthowa zakupambanapambana. Yiwu Mbada amampha ukongwa. Yehova wavwisiya mapempheru ngidu ndipuso watitipaska vakukhumbika pa umoyu, mwakuliŵavu ndi mwauzimu viyo. Watitisambiza kweniso watitiwovya pa mayeseru. Iyu watisungiya vinthu vamampha ukongwa kunthazi. Tikondwa ukongwa kuziŵa kuti Ada ŵidu atitiyanja kweniso atitiphwere! Mu nkhani ya sabata yamawa, tazamukambiskana vo isi tingachita kuti tilongo kuti tiwonga chanju chaki.