1. Ginani egi muthu a nga ba a yede gu gira na si ganeyi ni pfhumu ya Perisiya?

NGA dzi dundrugeya na wu gu vbanya Perisiya, tanga nya 2 500 myaga hwane. Wa gu vbweta guya ganeya ni pfhumu nya litigo khu mahungu nyo khaguri, khu kharato, u endra u hongola dhoropani ga Suza gu gu tsindza nya wufumu. Ganiolu gasi gu ganeya ni pfhumu u yede gu pheya khu gu lomba gu dzumeledwa khiyo. Wa gu mba gira isoso u di hadzi songwa. — Est. 4:11.

2. Jehovha o vbweta gu khuye hi dzipwa kharini tepo hi bhulago naye?

² Hi ngu bonga ngudzu kholu Jehovha a si fanigo ni pfhumu yoyo ya Perisiya. Jehovha na ni tshivba ngudzu guvbindra ni yevbini pfhumu nya mafu ambari ulolo uye a ngu hi hakha ni yevbini tepo. Uye o vbweta gu khuye hi dzipwa na hi tshulegide tepo hi bhulago naye. Khu giyeyedzo, ambari olu Jehovha a ranwago khu dzindziya nyo khugege nya nga Muvangi nya Khongolo, Nya Tshivba Yatshavbo, Pfhumu nya mafu ni ndzadzi uye a gu vbweta gu khuye hi mu rana “Baba mwendro Papayi” yi gu ndziya yi yeyedzago lihaladzo. (Mat. 6:9) Si ngu tsakisa ngudzu gu wona gu khethu Jehovha o vbweta gu khuye hi manega vbafuvbi ngudzu naye.

3. Khu ginani si pwisisegago gu rana Jehovha khethu Papayi nigu ginani hi na ganeyago khigyo avba nya ndrima yeyi?

³ Si ngu pwisisega ha gu rana Jehovha khethu “Baba mwendro Papayi” kholu khuye Gibuga nya womi wathu. (Ndzi. 36:9) Kha nga olu a gu Papayi wathu hi yede gu mu engisa. Ha gu gira esi a hi lombago hi na mana makategwa nyo samadzise ngudzu. (Hebh. 12:9) Makategwa yoyo ma gu pata womi nya gupindruge mafuni mwendro ndzadzini. Nigu hi ngu mana makategwa ambari olu. Ndrima yeyi yi na ganeya khedzi Jehovha a yeyedzago khidzo gu khuye Papayi nya lihaladzo olu nigu khu ginani hi nga tiyisegago gu khethu uye gima kha na nga hi diga mindru wa tshigu. Nyo pheye, hongoleni hi wona edzi hi nga tiyisegago khidzo gu khethu Papayi wathu wa ndzadzini a ngu hi haladza ngudzu nigu a ngu khathala khethu.

4. Khu ginani vambe si va garadzeyago gu wona Jehovha kha nga Papayi wavo?

⁴ Ina si ngu gu garadzeya gu wona Nungungulu kha nga Papayi wago? Vambe va nga pimisa gu khavo Jehovha khongolo ngudzu nya gu ethu hi mwalo lisima gwaye. Avo va gu kanakana gu khavo Nungungulu nya Tshivba Yatshavbo a ngu khathala khu moyo ni moyo wawe. Ambari ulolo, Papayi wathu nya lihaladzo kha vbweti gu khuye hi dzipwa kharato. Uye a hi ningide womi nigu a gu vbweta gu khuye hi manega ni wupari naye. Hwane nyo ganeye lisine leli mupostoli Pawulo tshamusede vaengiseyi vaye va Atena khuye Jehovha “mwalo hwindzo ga moyo ni moyo nya ethu.” (Mith. 17:24-29) Nungungulu a gu vbweta gu khuye moyo ni moyo wathu a ganeya naye nga edzi gyanana gi ganeyago khidzo ni muvelegi nya lihaladzo a khathalago.

5. Ginani hi gi hevbulago avba nya esi si dugeledego ndriyathu moyo nya nyamayi nya muKristo?

⁵ Vambe si nga va garadzeya gu wona Jehovha kha nga Papayi wavo kholu papayi wavo nya nyama kha va yeyedza lihaladzo nya likhongolo mwendro ne kha va yeyedza lihaladzo ni wuwadi. Nga wona esi si ganedwego khu ndriyathu moyo nya nyamayi nya muKristo, wari khuye: “Papayi wangu a di gu nyi tshanisa ngudzu khu malito. Na nyi nga gu pheya gu hevbula Bhibhiliya si di gu nyi garadzeya gu dzipwa na nyiri vbafuvbi ni Papayi wa Ndzadzini. Ganiolu tepo nyi nga muti gwadi Jehovha, satshavbo si di vbindrugedza.” U ngu dzipwa khu ndziya yamweyo? Abari kharato, tiyisega gu khuwe anuwe u na si kodza gu wona Jehovha kha nga Papayi nya wadi ga vatshavbo.

6. Guya khu Matewu 11:27, khu yevbi mweyo nya dzindziya eyi Jehovha a yi thumisago gasi gu hi phasa gu mu wona nga Papayi nya lihaladzo?

⁶ Mweyo nya dzindziya eyi Jehovha a yi thumisago gasi a hi phasa gu mu wona kha nga Papayi nya lihaladzo, khesi si lovidwego omu nya Bhibhiliya maningano ni malito ni mithumo ya Jesu. (Leri Matewu 11:27.) Jesu pimedzede gwadi makhalelo ya Papayi waye nyo bwe a ganeya khuye: “Uye a nyi wonago, a ngu wona Babe.” (Joh. 14:9) Jesu dzitepo nya dzingi a di gu ganeya khu silo esi Jehovha a girago kha nga Papayi. Omu nya dziIvhangeli nya dzina basi, Jesu thumiside lito “Babe” tanga nya 165 dzitepo na gu thula Jehovha. Khu ginani Jesu a ganedego ngudzu kharato khu Jehovha? Gimwegyo nya sighelo khu gu a di gu vbweta gu khuye vathu va tiyisega gu khavo Jehovha Papayi nya lihaladzo. — Joh. 17:25, 26.

7. Ginani hi gi hevbulago avba nya edzi Jehovha a pharidego khidzo Gyanana gyaye?

⁷ Nga dundrugeya khesi hi si hevbulago khu Jehovha maningano ni edzi a pharidego khidzo Gyanana gyaye Jesu. Jehovha tepo yatshavbo a di gu engiseya milombelo ya Jesu. Uye kha nga ba a hegeya basi gu engiseya milombelo ya Jesu ganiolu a di gu yi hlamula gambe. (Joh. 11:41, 42) Gani a di gu emisana ni gigaradzo nya gu khale kharini, tepo yatshavbo Jesu a di gu wona lihaladzo ni giphaso gya Papayi waye. — Luka 22:42, 43.

8. Jehovha phaside Jesu khu dzindziya muni?

⁸ Jesu a di gu yeyedza gu khuye Papayi waye a diri uye Gibuga ni Musayisi nya womi waye tepo a nga khuye: “Nya gu vbanya khu kotani ya Papayi.” (Joh. 6:57, NM) Jesu a di gu tumba Papayi waye khu guvbeleya nigu Jehovha a mu ningide esi a nga ba a si vbweta khu nyamani. Nya lisima ga satshavbo khu gu Jehovha a di gu khathaleya Jesu khu liphuvboni. — Mat. 4:4.

9. Jehovha yeyedzide kharini gu khuye a diri Papayi nya lihaladzo ga Jesu?

⁹ Kha nga olu a gu Papayi nya lihaladzo, Jehovha a di gu gira satshavbo gasi gu Jesu a tiyisega gu khuye a na ni giphaso gya Papayi waye. (Mat. 26:53; Joh. 8:16) Ambari olu Jehovha a nga ba a si vhikeyi Jesu ga sigaradzo satshavbo  a nga ba a emisana naso, uye a di gu mu phasa gu si timiseya. Jesu a di gu dziti gu khuye ni gevbini gigaradzo a nga ba a emisana nagyo gi na vbindra khu gu gimbiya nya tepo. (Hebh. 12:2) Jehovha yeyedzide gu khuye a di gu khathala khu Jesu khu gu mu engiseya, a mu ninga esi si nga ba si vbwetega, a mu hevbudza ni gu mu phasedzeya. (Joh. 5:20; 8:28) Hongoleni hi wona edzi Papayi wathu wa ndzadzini a hi khathaleyago khidzo khu ndziya yamweyo.

10. Guya khu Ndzimo 66:19, 20, Jehovha a gu yeyedza kharini gu khuye a ngu hi haladza?

¹⁰ Jehovha a ngu engisa milombelo yathu. (Leri Ndzimo 66:19, 20.) Uye kha vbweti gu khuye hiya khu gu pimeledza milombelo yathu ganiolu o vbweta gu khuye hi gombeya tepo yatshavbo. (1 Tes. 5:17) Hi nga gombeya ga Nungungulu wathu khu githawo ni yevbini tepo ambari ni wevbini wulanga hi gomogo. Uye kha pharega nyo bwe a hamuga tepo nyo hi engiseye, tepo yatshavbo a dzi emisede gu hi engiseya. Tepo hi wonago gu khethu Jehovha a ngu engiseya milombelo yathu ha gu engedzeya gu mu haladza. Muembi nya dzindzimo a di khuye: “Nyi ngu mu haladza PFHUMU Nungungulu, kholu pwide lito nya nombelo wangu.” — Ndzi. 116:1.

11. Jehovha a gu hlamula kharini milombelo yathu?

¹¹ Papayi wathu kha hegeyi basi gu engiseya milombelo yathu ganiolu a ngu yi hlamula. Mupostoli Johane a hi tiyisegiside gu khuye: “Ha gu lomba gilo maningano ni gudzina gwaye [Nungungulu], hi na ni lisine nya gukhethu a ngu hipwa.” (1 Joh. 5:14, 15) Khu lisine si nga gira Jehovha a si hlamuli milombelo yathu guya khedzi hi nga ba hi si virede khidzo. Khuye a sitigo esi si gu sadi gwathu khu kharato dzimbe dzitepo hlamulo waye ahihi, dzimbe dzitepo o vbweta gu khuye u vireya. — 2 Kor. 12:7-9.

12-13. Papayi wathu wa ndzadzini a gu hi sayisa khu dzindziya muni?

¹² Jehovha a ngu hi sayisa. Uye a ngu gira esi a vbwetago gu khuye vatshavbo va papayi va gira. (1 Thim. 5:8) Uye a ngu khathala khesi si vbwetegago ga sanana saye gasi si dzi vbanyisa. Uye kha vbweti gu khuye hi garadzega khu guhodza, sombo nyo ambale mwendro wulanga nyo khale. (Mat. 6:32, 33; 7:11) Kha nga olu a gu Papayi nya lihaladzo, Jehovha giride malulamiselo nya gu hi mana esi hi si vbwetago mindru wa tshigu.

¹³ Nya lisima ga satshavbo khu gu uye a ngu hi sayisa khu liphuvboni. Khu gu thumisa Lito laye a ngu hi embeya lisine maningano ni uye, makungo yaye, tshamuselo nya womi ni esi hi na si manago mindru wa tshigu. Uye a hi phaside khu gu thumisa vavelegi vathu mwendro vambe vathu gasi va hi hevbudza maningano ni uye. Nigu uye a ngu simama gu hi phasa gu khala dzipari dzaye khu gu thumisa madhota nya lihaladzo ya libandlani ni vambe vandriyathu va vidzidwego khu liphuvboni. Gimbe gambe khu gu Jehovha a ngu hi hevbudza khu gu thumisa mitshangano nya libandla, omu hi hevbulago gumogo ni vandriyathu va liphuvboni. Khu gu thumisa dzindziya dzedzi ni dzimbe Jehovha a gu hi yeyedza lihaladzo laye kha nga Papayi. — Ndzi. 32:8.

14. Khu ginani Jehovha a hi hevbudzago, nigu a gu si gira kharini isoso?

¹⁴ Jehovha a ngu hi hevbudza. Guhambana ni Jesu, ethu kha ha vbeleya. Khu kharato kha nga Papayi nya lihaladzo, tepo a hi hevbudzago, dzimbe dzitepo a ngu hi kawuka sa gu vbwetega. Lito laye li ngu hi dundrugisa esi: “Pfhumu a gu kawuka uye a mu haladzago.” (Hebh. 12:6, 7) Jehovha a gu hi kawuka khu dzindziya nyo hambanehambane. Khu giyeyedzo, si nga gira a hi kawuka khu gilo nyo khaguri hi lerigo omu nya Lito laye mwendro hi gipwago mitshanganoni yathu. Adzina madhota ma nga hi ninga giphaso hi gi vbwetago. Ambari Jehovha a gu hi kawuka  khu ndziya muni, tepo yatshavbo a gu gira isoso kholu a ngu hi haladza. — Jer. 30:11.

15. Jehovha a gu hi vhikeya khu dzindziya muni?

¹⁵ Jehovha a ngu hi phasa gu timiseya silingo. Kha nga papayi nya lihaladzo a phasago sanana saye tepo si emisanago ni sigaradzo, Papayi wathu wa ndzadzini nuye a ngu hi phasa tepo hi emisanago ni silingo. Uye a gu thumisa liphuvbo laye nya guage gasi li hi vhikeya ga silo si nga hadzi ghoha wupari wathu naye. (Luka 11:13) Jehovha a ngu hi vhikeya gambe ha gu ba hi garadzega. Khu giyeyedzo uye a ngu hi ninga gutumba nyo tsakise. Gutumba gogo ga mindru wa tshigu gu ngu hi phasa gu timiseya sigaradzo. Nga dundrugeya khesi: Ambari ha gu dugeledwa khu sigaradzo nyo khale kharini, Papayi wathu nya lihaladzo a na dusa khu guvbeleya satshavbo si hi pwisago wuvi. Ni gevbini gigaradzo hi emisanago nagyo gi na vbindra ganiolu makategwa hi ningwago khu Jehovha gima kha ma na nga vbeya. — 2 Kor. 4:16-18.

16. Ginani gi nga girega tepo Adhamu a nga diga gu engisa Papayi waye nya lihaladzo?

¹⁶ Hi ngu wona lihaladzo la Jehovha tepo hi dundrugeyago khesi a giridego tepo Adhamu a nga diga gu mu engisa. Tepo Adhamu a nga diga gu engisa Papayi waye wa ndzadzini uye gumogo ni sanana saye va di diga gu gira gipandre nya ndranga ya Jehovha. (Rom. 5:12; 7:14) Ganiolu Jehovha giride gilogyo gasi gu phasa sanana sa Adhamu.

17. Ginani egi Jehovha a nga dzegeya gu gira tepo Adhamu a nga ghoha?

¹⁷ Jehovha a di tsayisa Adhamu ganiolu a tumbisa gu phasa sanana sa Adhamu. Uye a di dzegeya gu tumbisa gu khuye vathu nya gu engise va na bweleya va ya gira gipandre nya ndranga yaye. (Gen. 3:15; Rom. 8:20, 21) Jehovha giride soso khu gu thumisa Gyanana gyaye nya gigodwa Jesu gasi gi ta hi dzegisa. Khu gu hi ninga Gyanana gyaye gasi hi kodza gu vbanyiswa, Jehovha  a di yeyedza lihaladzo nya likhongolo a gu nalo khethu. — Joh. 3:16.

18. Ginani gi yeyedzago gu khigyo Jehovha a ngu hi vbweta kha nga sanana saye ambari ha gu ba hi ndreyide ndziyani gwaye?

¹⁸ Ambari olu hi nga mba vbeleya, Jehovha a ngu dzina gu khuye hi gira gipandre nya ndranga yaye nigu gima kha hi woni na hiri gigaradzo gwaye. Dzimbe dzitepo hi ngu mu khunguvanyisa mwendro gu ndreyanyana khu gitepwana ganiolu Jehovha kha hi tsukuli. Jesu fananiside wukhongolo nya lihaladzo la Jehovha khu sanana saye tepo a nga tshamuseya matimo nya gyanana gi nga ba gi dzimede. (Luka 15:11-32) Papayi wa avba nya gipimaniso gegi gima kha nga vbeledwa khu gutumba nyo khuye gyanana gyaye gi na wuya. Tepo gyanana gyaye gi nga bweleya gaya uye a di gi hakha khu mandza mavili. Ha gu ba hi ndreyide ndziyani ga Jehovha ganiolu hi vbedza hi dzi laya hi nga tiyisega gu khethu Papayi wathu nya lihaladzo a dzi emisede gu hi hakha.

19. Jehovha a na lulamisa kharini guvivba gwatshavbo gu residwego khu Adhamu?

¹⁹ Papayi wathu a na lulamisa guvivba gwatshavbo gu residwego khu Adhamu. Hwane nya gu ba Adhamu a ghohide, Jehovha a di hunga gu hatha 144 000 vathu gasi va ya thuma kha nga dzipfhumu ni vaphasi nya mhamba ndzadzini gumogo ni Gyanana gyaye. Jesu gumogo ni vale va na fumago naye va na phasa vathu vale nya gu engise gu khala vathu nyo vbeleye mafuni nya maphya. Hwane nya gu lingwe nya gu hegise gasi gu yeyedza gu khavo va ngu engisa kamo, Nungungulu a na va ninga womi nya gupindruge. Khavbovbo, Papayi wathu a na ganeya na tsakide khuye mafu ma tade khu sanana saye nya gu vbeleye. Gu na ba guri tepo nyo tsakise ngudzu.

20. Jehovha a gu hi yeyedza lihaladzo khu dzindziya muni nigu ginani hi na ganeyago khigyo avba nya ndrima yi landreyago?

²⁰ Jehovha a ngu yeyedza gu khuye a ngu hi haladza ngudzu. Uye khuye Papayi nya wadi ga vatshavbo. A ngu engiseya milombelo yathu nigu a ngu hi ninga esi hi si vbwetago khu nyamani ni liphuvboni. A ngu hi hevbudza ni gu hi phasedzeya. Nigu a hi dongisede silo nya sadi mindru wa tshigu. Si ngu tangadzisa myonyo yathu guti gu khethu Papayi wathu a ngu hi haladza nigu a ngu khathala khethu. Ndrima yi landreyago yi na ganeya khu dzindziya edzi ethu hi nga yeyedzago khidzo lihaladzo kha nga sanana saye.