1. Ncinzi ncaakeelede kucita muntu kutegwa abandike amwami waku Persia?

AMWEEZEEZYE kuti mukkala ku Persia myaka minji yainda. Mpoonya muyanda kubandika amwami kujatikizya kaambo kamwi, aboobo mwaunka ku Susani nkwaakkala mwami. Pele kamutanabandika amwami, mweelede kuzumizyigwa anguwe. Ikuti mwabandika anguwe kamutanazumizyigwa, mulakonzya kujaigwa!—Es. 4:11.

2. Ino Jehova uyanda kuti katulimvwa buti ciindi notubandika anguwe?

² Eelo kaka tulalumba kapati kuti Jehova uliindene amwami waku Persia! Jehova ulisumpukide kapati kwiinda mweendelezi muntunsi uuli woonse, nokuba boobo uyanda kuti katubandika anguwe kufwumbwa ciindi. Uyanda kuti katwaanguluka kubandika anguwe. Mucikozyanyo, nokuba kuti Jehova ujisi mazina abulemu mbuli aakuti Mulengi Mupati, Mwami Singuzuzyoonse, uyanda kuti katubandika anguwe kwiinda mukubelesya bbala lyaluyando lyakuti “Taateesu.” (Mt. 6:9) Cilakkomanisya kapati kuti Jehova uyanda kuti katumubona munzila eeyi yaluyando!

3. Nkaambo nzi ncoceelela kwiita Jehova kuti “Taateesu,” alimwi ino ncinzi ncotutiibandike mucibalo eeci?

³ Cileelela kwiita Jehova kuti, “Taateesu” nkaambo ngokasensa kabuumi bwesu. (Int. 36:9) Akaambo kakuti ngu Taateesu, tuleelede kumumvwida. Ikuti twacita kweelana anzyayanda, tuyooba azilongezyo zinji. (Heb. 12:9) Zilongezyo eezyo zibikkilizya buumi butamani kujulu naa anyika. Noliba lino tulagwasyigwa kapati kwiinda mukucita boobo. Mucibalo eeci, tulabandika kujatikizya Jehova mbwatondezya kuti ngu Taateesu siluyando lino alimwi akaambo ncotukonzya kuba masimpe kuti kunyina nayootulekelezya kumbele. Pele cakusaanguna, atulange-lange kaambo ncotujisi lusyomo lwakuti  Taateesu wakujulu ulatuyanda kapati alimwi ulatubikkila maano.

4. Nkaambo nzi bamwi ncocibakatazya kubona Jehova kuti ngu Usyi?

⁴ Sena cilamukatazya kubona Leza kuti ngu Uso? Bamwi balakonzya kulimvwa kubula mpindu balyeezyanisya a Jehova. Baladooneka kuti Leza Singuzuzyoonse ulababikkila maano lwabo kubagama. Pele Taateesu siluyando tayandi kuti katulimvwa boobo. Wakatupa buumi alimwi uyanda kuti tube acilongwe anguwe. Naakamana kwaamba twaambo ootu twamasimpe, mwaapostolo Paulo wakabapandulwida baswiilizi bakwe ku Atene kuti, Jehova “tali kulamfwu kuli umwi aumwi wesu.” (Mil. 17:24-29) Leza uyanda kuti umwi aumwi wesu kabandika anguwe mbubwenya mbuli mwana mbwabandika amuzyali siluyando alimwi uubikkila maano.

5. Ncinzi ncotwiiya kumucizyi Munakristo umwi?

⁵ Bamwi cilakonzya kubakatazya kubona Jehova kuti ngu Usyi akaambo kakuti bakali kuyandwa buyo aasyoonto naa tiibakali kuyandwa naaceya abausyi bantunsi. Amubone ncaakaamba mucizyi Munakristo umwi. Wakaamba kuti, “Bataata bakali basilunya. Aboobo nondakatalika kwiiya Bbaibbele, cakandikatazya kumuyanda Taateesu wakujulu. Pele nondakamuzyiba Jehova, zintu zyakacinca.” Sena andinywe mbomulimvwa oobo? Ikuti naa mbocibede oobo, mutatyompwi pe. Mukuya kwaciindi andinywe muyootalika kubona kuti Jehova ngo Uso iwiinda kubota.

6. Kweelana alugwalo lwa Matayo 11:27, ninzila nzi imwi Jehova mwatugwasya kutegwa katumubona kuti ngu Taateesu siluyando?

⁶ Nzila imwi Jehova mwatugwasya kutegwa katumubona kuti ngu Taateesu siluyando, nkwiinda mukupa kuti majwi aa Jesu alimwi anzyaakacita zilembwe mu Bbaibbele. (Amubale Matayo 11:27.) Jesu wakabwiiya bube bwa Bausyi cakuti wakaamba kuti, “Kufwumbwa ooyo wandibona wamubona awalo Taata.” (Joh. 14:9) Kanji-kanji Jesu wakali kwaamba kujatikizya mulimo ngwajisi Jehova mbwaanga ngu Taateesu. Mumabbuku one aa Makani Mabotu, Jesu wakaamba Jehova kuti “Taata” ziindi zitandila ku 200. Nkaambo nzi Jesu ncaakaamba Jehova kuti Taata ziindi zinji boobu? Kaambo kamwi nkakuti wakali kuyanda kuti bantu bazyibe kuti Jehova ngu Taata siluyando.—Joh. 17:25, 26.

7. Ncinzi ncotwiiya kuli Jehova kujatikizya mbwaakamulanganya Mwanaakwe?

⁷ Amubone ncotwiiya kuli Jehova kujatikizya mbwaakamulanganya Mwanaakwe, Jesu. Jehova lyoonse wakali kwiiswiilila mipailo ya Jesu. Tanaakaiswiilila buyo mipailo ya Jesu pele alimwi wakayiingula. (Joh. 11:41, 42) Mumasunko aali woonse ngaakajana Jesu, wakalubona luyando alimwi alugwasyo lwa Bausyi.—Lk. 22:42, 43.

8. Muunzila Jehova mwaakapa Jesu nzyaakali kuyandika?

⁸ Jesu wakalizyi kuti Bausyi mbobakali Kasensa kabuumi bwakwe alimwi mbobakali kupa kuti kapona. Aboobo wakaamba kuti: “Mebo ndili muumi akaambo ka Taata.” (Joh. 6:57) Jesu wakali kubasyoma Bausyi cakumaninina, aboobo bakamupa zintu zyakumubili nzyaakali kuyandika. Kwiinda zyoonse, Jehova wakamugwasya Jesu kutegwa azumanane kusyomeka kulinguwe.—Mt. 4:4.

9. Mbuti Jehova mbwaakatondezya Jesu kuti ngu Taateesu siluyando alimwi uulanganya?

⁹ Akaambo kakuti ngu Taateesu siluyando, Jehova wakapa kuti Jesu azyibe kuti wakali kumugwasya. (Mt. 26:53; Joh. 8:16) Nokuba kuti Jehova tanaakali kumukwabilila Jesu kucintu cili coonse icakali kukonzya  kumunyonganya, wakamugwasya kuliyumya mumasunko. Jesu wakalizyi kuti kufwumbwa sunko lyakali kukonzya kumusikila, lyakali buyo lyakaindi kasyoonto. (Heb. 12:2) Jehova wakatondezya kuti wakali kumulanganya Jesu kwiinda mukumuswiilila, kumupa nzyaakali kuyandika, kumuyiisya alimwi akumugwasya. (Joh. 5:20; 8:28) Lino atubone Taateesu wakujulu mbwatulanganya andiswe.

10. Kweelana alugwalo lwa Intembauzyo 66:19, 20, mbuti Jehova mbwatondezya kuti ulatulanganya?

¹⁰ Jehova ulaiswiilila mipailo yesu. (Amubale Intembauzyo 66:19, 20.) Tayandi kuti katubalila mipailo yesu; utukulwaizya kupaila lyoonse. (1Tes 5:17) Tulakonzya kupaila kulinguwe kufwumbwa ciindi, tacikwe makani ankotubede. Ulilibambilide lyoonse kuswiilila mipailo yesu. Ciindi notuzyiba kuti Jehova ulaiswiilila mipailo yesu, cilongwe cesu anguwe cilayuma. Sintembauzyo wakaamba kuti, “Ndilamuyanda Jehova, nkaambo ulamvwa jwi lyangu.”—Int. 116:1.

11. Mbuti Jehova mbwaingula mipailo yesu?

¹¹ Taateesu taiswiilili buyo mipailo yesu pele alimwi ulayiingula. Mwaapostolo Johane utusyomezya kuti: “Kufwumbwa cintu ncotumulomba ceendelana akuyanda kwakwe [Leza], ulatumvwa.” (1Joh. 5:14, 15) Nokuba boobo, ambweni Jehova takonzyi kwiingula mipailo yesu kweelana ambotuyanda. Ulizyi nzyotuyandika, aboobo zimwi ziindi bwiinguzi bwakwe mbwakuti peepe naa inga wayanda kuti tulindile.—2Kor. 12:7-9.

12-13. Muunzila nzi Taateesu wakujulu mwatupa zintu nzyotuyandika?

¹² Jehova ulatupa nzyotuyandika. Ulacita zintu nzyayanda kuti bamausyi bantunsi boonse kabacita. (1Tim. 5:8) Ulabapa zintu zyakumubili nzyobayandika bana bakwe. Tayandi kuti katulibilika kujatikizya zyakulya, zyakusama naa mwakukkala. (Mt. 6:32, 33; 7:11) Akaambo kakuti ngu Taata siluyando, Jehova mane wakapanga bubambe bwakuti katunoojisi zintu nzyotuyandika kumbele.

¹³ Kwiinda zyoonse, Jehova ulatupa zintu nzyotuyandika kumuuya. Kwiinda mu Jwi lyakwe, wayubununa kasimpe kajatikizya nguwe, makanze aakwe, mpindu yabuumi alimwi aziyoocitika kumbele. Wakatugwasya kwiinda mukubelesya bazyali besu naa bamwi buyo kutuyiisya kujatikizya nguwe. Alimwi wazumanana kutugwasya kuba balongwe bakwe kwiinda mubaalu basiluyando alimwi abakwesu abacizyi bamwi ibasimide kumuuya. Kuyungizya waawo, Jehova ulatuyiisya kwiinda mumiswaangano yesu yambungano, kwalo nkotuyiisyigwa antoomwe amukwasyi wesu wakumuuya. Kwiinda munzila eezyi alimwi azimwi, Jehova ulatondezya luyando kulindiswe toonse.—Int. 32:8.

14. Nkaambo nzi Jehova ncatuyiisya, alimwi ino ucita buti oobo?

¹⁴ Jehova ulatuyiisya. Mukwiimpana a Jesu, swebo tatulondokede. Aboobo kutegwa atuyiisye, Taateesu siluyando ulatulaya ciindi nokuyandika kucita boobo. Ijwi lyakwe lituyeezya kuti: “Aabo mbayanda Jehova ulabalaya.” (Heb. 12:6, 7) Jehova ulatulaya munzila zinji. Mucikozyanyo, nzyotubala mu Jwi lyakwe naa nzyotwiiya kumiswaangano yesu zilakonzya kutululamika. Naa ambweni lugwasyo ndotuyandika lulakonzya kuzwa kubaalu. Kufwumbwa nzila Jehova njakonzya kubelesya kutululamika, ulacita oobo akaambo kakuti ulatuyanda.—Jer. 30:11.

15. Muunzila nzi Jehova mwatukwabilila?

¹⁵ Jehova ulatugwasya kuliyumya mumasunko. Mbubwenya mbuli usyi muntunsi siluyando mbwagwasya bana bakwe muziindi zikatazya, Taateesu wakujulu ulatugwasya  kuliyumya mumasunko. Ubelesya muuya wakwe uusalala kutukwabilila kucintu cili coonse icikonzya kutunyonganya kumuuya. (Lk. 11:13) Alimwi Jehova ulatugwasya ciindi notutyompedwe. Mucikozyanyo, ulatupa bulangizi bukkomanisya. Bulangizi bwakumbele oobo bulatugwasya kuliyumya mumapenzi. Amubone kaambo aaka: Kufwumbwa cintu cibyaabi citucitikila, Taateesu siluyando uyoocigwisya. Kufwumbwa masunko ngotujisi, ngakaindi buyo kasyoonto, pele zilongezyo nzyapa Jehova ziyoozumanana mane kukabe kutamani.—2Kor. 4:16-18.

16. Ino ncinzi cakacitika ciindi Adamu naakazangila Usyi siluyando?

¹⁶ Tulalubona luyando lwa Jehova kulindiswe ciindi notuyeeya ncaakacita ciindi Adamu naakamuzangila. Ciindi Adamu naakamuzangila Usyi wakujulu, wakaleka kuba cibeela camukwasyi wa Jehova kubikkilizya alunyungu lwakwe. (Rom. 5:12; 7:14) Pele Jehova wakacita cintu cimwi kutegwa agwasye lunyungu lwa Adamu.

17. Ino ncinzi Jehova ncaakacita ciindi Adamu naakamuzangila?

¹⁷ Jehova wakamusubula Adamu, pele wakasyomezya kuti uyoobagwasya balunyungu lwa Adamu. Mpoonya-mpoonya wakasyomezya kuti bantunsi bamumvwida bayoopilusyigwa kumukwasyi wakwe. (Matl. 3:15; Rom. 8:20, 21) Jehova wakapa kuti eeci cikonzyeke kwiinda mucinunuzyo cacipaizyo ca Mwanaakwe ngwayandisya, Jesu. Kwiinda mukutupa Mwanaakwe kuti atufwide, Jehova wakatondezya kuti ulatuyanda kapati.—Joh. 3:16.

18. Nkaambo nzi ncotuli aalusyomo lwakuti Jehova ulatuyanda, nokuba kuti twakaleya kulinguwe?

¹⁸ Nokuba kuti tatulondokede, Jehova ulatutamba mumukwasyi wakwe, alimwi kunyina naubona kuba mukuli uuminya kutugwasya.  Tulakonzya kumutyompya naa kuleya kulinguwe, pele Jehova lyoonse ulangila kuti tuyoopiluka kulinguwe. Jesu wakatondezya kujatikizya mboluli lupati luyando ndwajisi Jehova kulindiswe kwiinda mucikozyanyo camwana mutaka. (Lk. 15:11-32) Usyi wamucikozyanyo eeci kunyina naakaleka kulangila kuti mwanaakwe uyoopiluka. Ciindi mwanaakwe naakapiluka kuŋanda, bausyi bakamutambula amaanza obilo. Kuti naa twakaleya kuli Jehova mpoonya tweempwa, atube aalusyomo lwakuti Taateesu siluyando ulilibambilide kututambula amaanza obilo.

19. Ino Jehova uyoozibambulula buti zintu izyakanyonyooka akaambo kakubisya kwa Adamu?

¹⁹ Taateesu uyoozibambulula zintu zyoonse izyakanyonyooka akaambo kakubisya kwa Adamu. Adamu naakazanga, Jehova wakabikka bubambe bwakusala bantu bali 144,000 ibayooba bami alimwi abapaizi kujulu antoomwe a Mwanaakwe. Jesu alimwi abaabo mbayoolela limwi bayoogwasya bantu bamvwida kutegwa bakalondoke munyika mpya. Baakuzwidilila mumusunko wamamanino, Leza uyoobapa buumi butamani. Mpoonya Taateesu uyookkomana kubona nyika iizwide bantu balondokede. Eelo kaka eeco ciyooba ciindi cikkomanisya kapati!

20. Muunzila nzi Jehova mwatondezya kuti ulatuyanda kapati, alimwi ino ncinzi ncotuyoobandika mucibalo citobela?

²⁰ Jehova watondezya kuti ulatuyanda kapati. Ngu Taateesu iwiinda kubota. Ulaiswiilila mipailo yesu akutupa nzyotuyandika kumubili alimwi akumuuya. Ulatuyiisya alimwi akutugwasya. Kuyungizya waawo, uyootucitila zintu zibotu kumbele. Eelo kaka cilakkomanisya kapati kuzyiba kuti Taateesu ulatuyanda alimwi ulatubikkila maano! Mucibalo citobela tuyoobandika kujatikizya nzila swebo tobana bakwe Jehova, motukonzya kutondezya kuti tulalumba kapati akaambo kaluyando lwakwe.