1. Niinzi nchakeelede kuchita muntu kuti kayanda kwaambuula amwaami wakuPersiya?

ATUTEEDI wakali kukkala kuPersiya muminyaka iili 2 500 yayinda. Mpawo wakeenda kuya kuSusani nkaambo wakali kuyanda kubuzya mwaami chimwi chintu. Nwaakasika wakeelede kukumbila saansi kuti waambuule amwaami nkaambo wakalizi kuti ulakonzya kujeegwa kuti waleka kuchita oobo.​—Es. 4:11.

2. Tweelede kulimvwa biyeni atala akwaambuula aJehova?

² Kulabotezya kaka kuziba kuti Jehova tali mbuuli Mwaami wakuPersiya! Nikuba kuti mupati kwiinda bantu boonse beendelezya pesi ututamba kuti twaambuule anguwe kufumbwa chiindi. Alubo uyanda kuti twaangunuke kwaambuulaawe. Muchikozyano, Jehova ulaamazina aakumulemeka aaswaanizya kuti Mulengi Mupati, Singuzuzyoonse, Mwaami Singuzuzyoonse, pesi uyanda kuti twaambuule anguwe katubelesya zina lizibinkene lyakuti “Taateesu.” (Mt. 6:9) Zilatuumbulizya kuziba kuti Jehova uyanda kuti tumubone mbuuli Ndeende.

3. Nkamboonzi nikweelela kwiita Jehova kuti “Taateesu,” alubo tulalanga-langaanzi muchiiyo eechi?

³ Kuleelela kuti twiite Jehova kuti “Taateesu” nkaambo Nkasensa kabuumi. (Int. 36:9) Mbukunga nguNdeende, tweelede kumuswiilila. Kuti twamuswiilila tuyoojana zilongezyo zipati. (Heb. 12:9) Zilongezyo eezyo ziswaanizya kupona kukabe kutamani kujulu naakuti aanyika. Alubo kumuswiilila kulatugwasya lino. Muchiiyo eechi tulabona Jehova mbatondeezya  kuti nguTaateesu siluyando akuti niinzi chipa kuti tube achoonzyo chakuti takatulekelezyi pe. Pesi atusaangune kulanga-langa kuti nkamboonzi nituli achoonzyo chakuti Taateesu uulikujulu ulatuyanda akuti ulaandaba andiswe.

4. Nkamboonzi bamwi nikubayumina kubona Jehova mbuuli Wisi?

⁴ Kulakuyumina na kubona Leza mbuuli Uso? Bamwi balibona kabali baniini loko alubo kabateeleli pe kuti balikozyanisya aJehova. Balazumbuuzya kuti Leza Singuzuzyoonse ulaandaba ambabo. Pesi Taateesu siluyando tayandi pe kuti tulimvwe oobo. Wakatupa buumi alubo uyanda kuti tumvwanane anguwe. Mwaapostolo Pawulu naakamaninsya kwaambuula kasimpe aaka wakapandulwida bantu bakuAtene kuti Jehova “tali kulamfwu kuli umwi aumwi wesu.” (Mil. 17:24-29) Leza uyanda kuti twaangunuke kwaambuulaawe mbuuli mwana mbachita kuli wisi ulaaluyando alubo ulaandaba anguwe.

5. Chikozyano chawumwi muchizi chituyiisyaanzi?

⁵ Bamwi kulakonzya kubayumina kubona Jehova mbuuli Wisi nkaambo mawisi teebakali kubatondeezya luyando. Umwi muchizi wakati: “Ndeendaangu wakali kukkala kandikalalila.” Alubo wakati: “Nindakasaanguna kwiiya Bbayibbele kwakali kundiyumina kumvwisisisya kuti Leza ulandiyanda. Pesi nindakamuziba kabotu Jehova ndakachincha maboneno aangu.” Mbulimvwa na anduwe? Kuti kakuli boobo, weelede kuba achoonzyo chakuti ulakonzya kuzoobona Jehova kali Ndeende mubotu.

6. Kweendelana a Matayo 11:27, niinzi chimwi chitugwasya kubona kuti Jehova nguTaateesu siluyando?

⁶ Majwi amichito yaJesu zilembedwe muBbayibbele nziimwi zitugwasya kubona Jehova kali Ndeende. (Bala Matayo 11:27.) Akaambo kakuti Jesu wakali kutobelezya buntu bwaWisi munzila iimaninide, wakati: “Kufwumbwa ooyo wandibona wamubona awalo Taata.” (Joh. 14:9) Jesu wakali kukkala kaambuula atala aJehova mbatondeezya kuti nguTaata. Mubbuku lyaMatayo, Makko, Lukka alyaJohane, Jesu wakaambuula atala aJehova kabelesya bbala lyakuti “Taata” kwaziindi zisika ku165. Nkamboonzi naakachita oobo? Nkaambo wakali kuyanda kuti tube aachoonzyo chakuti Jehova nguTaateesu siluyando.​—Joh. 17:25, 26.

7. Twiiyaanzi kunzila Jehova njaakamujata aayo Mwanaakwe?

⁷ Atulange-lange kuti Jehova wakali kumujata biyeni Mwanaakwe Jesu akuti twiiyaanzi? Chiindi choonse Jehova wakali kuziswiilila nkombyo zyakwe. Alubo taakali kugolela aawo pesi wakali kuzisandula. (Joh. 11:41, 42) Kufumbwa mapenzi ngaakali kuswaana, Jesu wakabona kuti Wisi ulamuyanda akuti ulamugwasya.​—Lk. 22:42, 43.

8. Jehova wakamugwasya biyeni Jesu?

⁸ Jesu wakalizi kuti Wisi nguwe wakamupa buumi akumugwasya kuti kaapona, nkinkaako wakaamba kuti: “Ndili muumi akaambo ka Taata.” (Joh. 6:57) Jesu wakali kusyoma Wisi chakumaninina. Alubo Jehova wakamugwasya kuti ajane ziyandikana mubuumi bwakwe. Kwiinda zyoonse, Jehova wakagwasya Jesu kuti akkale kasyomeka kulinguwe.​—Mt. 4:4.

9. Jehova wakatondeezya biyeni kuti ulaandaba aJesu akuti ulamuyanda?

⁹ Mbuuli Ndeende siluyando, Jehova wakapa kuti Jesu abe achoonzyo chakuti wakali kumugwasya. (Mt. 26:53; Joh. 8:16) Nikuba kuti Jehova taakakwabilila Jesu kuzintu zyoonse zyakali kukonzya kumuchisa pesi wakamugwasya kuti alisimye. Jesu wakalizi kuti  mapenzi ngaakali kuswaana aakali aachiindi chifwiifwi. (Heb. 12:2) Jehova wakatondeezya kuti ulaandaba aJesu kwiinda mukuswiilila nkombyo zyakwe, kumupa ziyandikana, kumuyiisya akumugwasya. (Joh. 5:20; 8:28) Lino atubone Taateesu uulikujulu mbatondeezya kuti ulaandaba andiswe mbuuli mbaakachita kuli Jesu.

10. Kweendelana a Intembauzyo 66:19, 20, Jehova utondeezya biyeni kuti ulatuyanda?

¹⁰ Jehova ulaziswiilila nkombyo zyesu. (Bala Intembauzyo 66:19, 20.) Tatubikkili mugaano munkani yakukomba pesi utusungwaazya kuti tukombe kulinguwe chiindi choonse. (1 Tes. 5:17) Tulakonzya kukomba kulinguwe chakulibombya kufumbwa mputubede. Tajisikini pe zyakuti nga ulakachilwa kuswiilila nkombyo zyesu. Kuti twaziba kuti ulazisandula nkombyo zyesu tulakonzya kuswena aafwiifwi anguwe. Sintembawuzyo wakati: “Ndilamuyanda Jehova nkaambo ulamvwa jwi lyangu.”​—Int. 116:1.

11. Jehova uzisandula biyeni nkombyo zyesu?

¹¹ Taateesu taswiilili nkombyo zyesu luzutu pesi ulazisandula. Mwaapostolo Johane wakati: “Kufwumbwa cintu ncotumulomba ceendelana akuyanda kwakwe, [Leza] ulatumvwa.” (1 Joh. 5:14, 15) Nikuba boobo, Jehova ulakonzya kutasandula nkombyo zyesu mbuuli mbutuyanda. Ulizizi nzituyanda, nkinkaako ulakonzya kutatupa nzitwakumbila naakuti kutupa kakuli kwayinda chiindi.​—2 Kor. 12:7-9.

12-13. Aamba zimwi nzila Taateesu uulikujulu mbatugwasya kuti tujane ziyandikana.

¹² Jehova ulatupa ziyandikana. Mbuuli mataata mbaasanina bana, Jehova ulatusanina. (1 Tim. 5:8) Mbukunga tuli bana bakwe ulatugwasya kuti tujane zintu ziyandikana mubuumi. Tayandi kuti tukataazikane atala achakulya, zyakuzwaata aakwakukkala. (Mt. 6:32, 33; 7:11) Mbuuli muzyali ulaaluyando, Jehova wakabamba nzila yakutugwasya kuti tuzoojane ziyandikana kunembo.

¹³ Kwiinda zyoonse, Jehova utupa zintu zitugwasya kuti tukkale katuli abweenzinyina bulikabotu anguwe. Kabelesya Jwi lyakwe utuyiisya kasimpe atala anguwe, makanze aakwe, mbutukonzya kupona buumi bulaampindu anzitulangilila kunembo. Wakatondeezya kuti ulaandaba andiswe kwiinda mukutugwasya kuti tumuzibe nitwakali kuyiisigwa Bbayibbele awumwi muntu naakuti amuzyali wesu. Alubo tujana lwiiyo lutugwasya kubaalu akubakombima basimide mubukombi. Kuyungizya waawo, Jehova ulatuyiisya kabelesya miswaangano yambungano katuli aamwi abakombima. Eezi nziimwi nzila zitondeezya kuti Jehova ulaandaba andiswe.​—Int. 32:8.

14. Nkamboonzi Jehova natuyiisya alubo utuyiisya biyeni?

¹⁴ Jehova ulatuyiisya. Jesu wakali maninide pesi iswe tulaachibi. Nkinkaako Taateesu siluyando ulatuyiisya alubo kutuyiisya kuswaanizya kutulaya nikuyandikana. Jwi lyakwe lituyeezya kuti: “Abo mbayanda Jehova ulabalaya.” (Heb. 12:6, 7) Jehova utulaya munzila zisiyene-siyene. Muchikozyano, nzitubala muJwi lyakwe anzitumvwa kumiswaangano zilakonzya kupa kuti tubone mputweelede kubambulula. Chimwi chiindi tulakonzya kugwasigwa abaalu. Kufumbwa kuti watulaya biyeni, tweelede kuziba kuti makanze aakwe ngakuti ulatuyanda.​—Jer. 30:11.

15. Jehova utukwabilila biyeni?

¹⁵ Jehova ulatusimya chiindi nituli mumapenzi. Taateesu uulikujulu ulatusimya chiindi nituli muzyiimo ziyumu mbuuli mbachita wisi kubana bakwe. Ubelesya muuya uusalala kuti  atukwabilile muzintu zikonzya kupambanisya bweenzinyina bwesu anguwe. (Lk. 11:13) Alubo Jehova ulatukwabilila kuti tutakataazikani loko. Muchikozyano, utupa bulangilizi. Bulangilizi oobo bulatugwasya kuti tulisimye nituli mubuyumu-yumu. Yeeya atala azeezi: Kufumbwa zintu zibi zikonzya kutuchitikila Taateesu siluyando uyoozimaninsya. Kufumbwa mapenzi ngituswaana ngachiindi chifwiifwi pesi zilongezyo zyaJehova ziyookkala kukabe kutamani.​—2 Kor. 4:16-18.

16. Niinzi chakachitika chiindi Adamu naakasala kutaswiilila Wisi ulaaluyando?

¹⁶ Nzyaakachita Jehova chiindi Adamu naakabisya zitugwasya kubona kuti ulatuyanda. Chiindi Adamu naakabisya, we abana bakwe bakasweekelwa chilongezyo chakuba chipanzi champuli yaJehova iibotelwa. (Rom. 5:12; 7:14) Pesi Jehova wakabweza ntaamu kuti atugwasye.

17. Jehova wakachitaanzi chiindi Adamu naakasala kutamuswiilila?

¹⁷ Nikuba kuti Jehova wakamupanicha Adamu pesi wakapa bana baAdamu bulangilizi. Wakasyomezya kuti bantu bamuswiilila balakonzya kuba chipanzi champuli yakwe lubo. (Matl. 3:15; Rom. 8:20, 21) Jehova wakajula mweenya ooyu kabelesya chinunuzyo chaMwanaakwe ngwayandisya, Jesu. Wakatondeezya kuti ulatuyanda kapati kwiinda mukutupa Mwanaakwe.​—Joh. 3:16.

18. Niinzi chitondeezya kuti Jehova utubona mbuuli bana bakwe nikuba kuti nga twaleya kunzila zyakwe?

¹⁸ Nikuba kuti tulaachibi, Jehova uyanda kuti tube chipanzi champuli yakwe alubo taboni kutugwasya kawuli mulimu muyumu. Tulakonzya kubisya naakuti kuleya munzila zyakwe pesi Jehova tatulekelezyi pe. Jesu wakatugwasya kumvwisisisya mbatuyanda Jehova kabelesya chikozyano chamwana mulombe wakasweekede. (Lk. 15:11-32) Wisi uli muchikozyano eechi wakali abulangilizi bwakuti  mwanaakwe uzooboola. Mwanaakwe naakaboola wakamutambula amaanza aabili. Kuti twaleya munzila zyaJehova, tweelede kuba choonzyo chakuti Taateesu siluyando ulaachiyandisyo chakuti tuboole akuti uyootutambula amaanza aabili.

19. Jehova uyoowabambulula biyeni mapenzi akeetwa aAdamu?

¹⁹ Taateesu uyoowabambulula mapenzi woonse akeetwa aAdamu. Adamu naakabisya, Jehova wakasala kuti kube bantu bali 144 000 batazoozwe aanyika kuti bakabe baami abapayizi kujulu kabalaamwi aMwanaakwe. Munyika mpya, Jesu abeendelezinyina bazoopa kuti bantu baswiilila bazoomaninine. Alubo kuti bazunda kusunkwa kwamamanino, Leza uyoobapa buumi butamani. Taateesu uyoobotelwa kubona nyika yoonse kayizwide bantu batakwe chibi. Chiyooba chiindi chibotu loko!

20. Jehova utondeezya biyeni kuti ulatuyanda kapati alubo tuyooyiyaanzi muchiiyo chitobela?

²⁰ Nisimpe Jehova ututondeezya kuti ulatuyanda kapati. NguNdeende mubotu kwiinda boonse. Ulaziswiilila nkombyo zyesu alubo ulatupa zintu zitugwasya mubuumi amubukombi. Ulatuyiisya alubo ulatugwasya. Kuyungizya waawo, utubambilide zilongezyo zipati kunembo. Kulatuumbulizya kuziba kuti Taateesu ulatuyanda akuti ulaandaba andiswe. Muchiiyo chitobela tuyoobona mbutukonzya kutondeezya kuti tulamulumba akaambo kaluyando ndwatutondeezya.