1. ¿Tuku xtalakaskin xlakata chatum lataman tlan xtachuwinalh mapakgsina xalak Persia?

KALILAKPUWAW pi lamaw kxamakgan Persia. Chu tachuwinamputunaw mapakgsina, wa xlakata anaw kSusa. Pero nipara xlakpuwaw na’anaw kxlakatin mapakgsina komo xla ni xkinkamaxkin talakaskin, komo chuna xtlawaw max katuwa xwiliw kilatamatkan (Est. 4:11).

2. ¿La lakaskin Jehová namakgkatsiyaw akxni natalakatsuwiniyaw?

² Xlikana, lu paxtikatsiniyaw Jehová pi nichuna likatsi la mapakgsina xalak Persia. Maski xla tlakg lanka nixawa mapakgsinanin xalak kakilhtamaku, tlan natachuwinanaw akxni akinin lakaskinaw. Xlikana pi xla lilakgapaskan lanka Malakatsukina, Tiku kgalhi putum litliwakga chu Malana. Pero lakaskin pi nalimapakuwiyaw: “Tlat” (Mat. 6:9). ¿Nixlikana pi tlan limakgkatsiyaw xlakata Jehová lakaskin pi tlan natalalinaw?

3. ¿Tuku xlakata tlan limapakuwiyaw “Tlat” Jehová, chu tuku nalichuwinanaw k’uma artículo?

³ Tlan nalimapakuwiyaw Jehová “Tlat” xlakata xla kinkamaxkinitan latamat (Sal. 36:9). Xlakata xla kinTlatkan talakaskin nakgalhakgaxmataw. Komo natlawayaw tuku kinkawaniyan, nakgalhiyaw lhuwa tasikulunalin (Heb. 12:9). Pulaktum wa pi nalipaxuwayaw latamat nema ni kgalhi xlisputni, k’akgapun o kKatiyatni. Chu la uku nachuna tlan litamakgtayayaw akxni kgalhakgaxmataw. K’uma artículo, na’akxilhaw la kinkalimasiyaniyan Jehová pi xla chatum Tlat xapaxkina chu tuku xlakata liwana nakatsiyaw pi nikxni kintikamakgxtakgni.  Pero pulana kalichuwinaw tuku xlakata tlan nalipawanaw pi kinTlatkan xalak akgapun lu kinkapaxkiyan chu kinkakuentajtlawayan.

4. ¿Tuku xlakata makgapitsi latamanin tuwa makgkatsikgo naliʼakxilhkgo Jehová la xTlatkan?

⁴ ¿Tuwa makgkatsiyaw liʼakxilhaw Jehová la kinTlatkan? Max makgapitsi latamanin makgkatsikgo pi nitu litaxtukgo kxlakatin Jehová. Lakpuwankgo pi Dios tiku kgalhi xliputum litliwakga max ni kalilakgaputsa. Pero xapaxkina kinTlatkan ni lakaskin pi chuna namakgkatsiyaw. Kinkamaxkin latamat chu lakaskin pi tlan natalalinaw. Akxni apóstol Pablo lichuwinalh uma anta kʼAtenas, wa pi Jehová “ni makgat kinkawilanin chatunu akinin” (Hech. 17:24-29). Dios lakaskin pi akxni natachuwinanaw chuna natlawayaw la akxni aktsu kgawasa tachuwinan xtlat.

5. ¿Tuku katsiniyaw xlakata tuku titaxtulh chatum tala puskat?

⁵ Wi atanu tuku xlakata makgapitsin tuwa makgkatsikgo naliʼakxilhkgo Jehová la chatum Tlat. ¿Tuku uma? Pi xtlatkan ni kalimasiyanikgolh tapaxkit. Chatum tala puskat lichuwinalh: «Kintlat lu nitlan xkilikatsini. Akxni ktsukulh makglhtinan takgalhtawakga xalak Biblia, lu tuwa xakmakgkatsi naktalakatsuwini chatum Tlat xalak akgapun. Pero uma talakgpalilh akxni klakgapasli Jehová». ¿Nachuna makgkatsiyaw? Komo chuna, akinin na tlan naliʼakxilhaw Jehová la tlakg xatlan Tlat tiku niti xtachuna.

6. Chuna la wan Mateo 11:27, ¿la kinkamakgtayanitan Jehová naliʼakxilhaw la chatum Tlat tiku kinkapaxkiyan?

⁶ ¿La kinkamakgtayanitan Jehová naliʼakxilhaw la chatum Tlat tiku kinkapaxkiyan? Pulaktum wa pi tsokgwilika kBiblia xtachuwin chu tuku tlawalh Jesús (kalikgalhtawakga Mateo 11:27). Jesús liwana limasiyalh tayat nema kgalhi xTlat wa xlakata lichuwinalh: «Wa nti nkiukxilhnita, ukxilhnita xaTlat» (Juan 14:9). Xla makglhuwa lichuwinalh pi Jehová wa xTlat. Anta kpulaktati Evangelios, 165 la xlimakglhuwa limapakuwilh Tlat. ¿Tuku xlakata makglhuwa lichuwinalh Jehová? Xlakata xlakaskin pi latamanin xkatsikgolh pi Jehová chatum Tlat xapaxkina (Juan 17:25, 26).

7. ¿Tuku katsiniyaw xlakata Jehová akxni akxilhaw la likatsinilh xKgawasa?

⁷ Kaʼakxilhwi la likatsinilh Jehová xKgawasa, Jesús, chu tuku kinkamasiyaniyan xpalakata Jehová. Dios ankgalhin kgaxmatnilh chu kgalhtilh xʼoración xKgawasa (Juan 11:41, 42). Maski Jesús lhuwa tuku titaxtulh, ankgalhin makgkatsilh xtapaxkit chu xtamakgtay xTlat (Luc. 22:42, 43).

8. ¿La kuentajtlawalh Jehová Jesús?

⁸ Jesús liwana xkatsi pi xTlat xmaxkinit xlatamat chu putum tuku xmaklakaskin. Lichuwinalh: «Klama kaj xpalakata xaTlat» (Juan 6:57). Jesús xlikana lu xlipawan, chu Jehová maxkilh putum tuku xmaklakaskin. Pero tuku tlakg xlakaskinka wa pi kuentajtlawalh xtakanajla (Mat. 4:4).

9. ¿La limasiyalh Jehová pi xpaxki Jesús?

⁹ Jehová limasiyalh pi xla chatum Tlat xapaxkina chu liwana masiyanilh Jesús pi ankgalhin xʼama makgtaya (Mat. 26:53; Juan 8:16). Xlikana pi ni lakgmaxtulh akxni katuwa xwi, pero makgtayalh. Jesús xkatsi pi tuku nitlan xtitaxtulh kaj xʼama titaxtu (Heb. 12:2). Jehová limasiyalh pi xkuentajtlawa xKgawasa, xmaxki tuku xmaklakaskin, kstakyawa chu xmakgtaya (Juan 5:20; 8:28). Chu la uku kaʼakxilhwi la chuntiya kinkakuentajtlawayan kinTlatkan xalak akgapun.

10. Chuna la wan Salmo 66:19, 20, ¿la kinkalimasiyaniyan xtapaxkit Jehová?

¹⁰ Jehová kgaxmata kioracioneskan (kalikgalhtawakga Salmo 66:19, 20). Xla ni kinkawaniyan la xlimakglhuwa natlawaniyaw oración, wata kinkawaniyan pi ankgalhin katlawaniw oración (1 Tes. 5:17). Nachuna, kaj xanikuta niku natawilayaw chu akxni nalakaskinaw tlan natlawayaw oración. Xla ankgalhin kinkakgaxmatniputunan chu ankgalhin kinkakuentajtlawayan. Akxni akgatekgsaw pi Jehová kgaxmata kioracioneskan, tlakg natalakatsuwiniputunaw. Chatum salmista lichuwinalh: «Akit kpaxki Kintikukan Dios, porque kgaxmatli [kintachuwin]» (Sal. 116:1).

11. ¿La kgalhti Jehová kioracioneskan?

¹¹ KinTlatkan ni kajwatiya kgaxmata kioracioneskan, wata nachuna kinkakgalhtiyan. Apóstol Juan kinkawaniyan: «Na wa yuma ntalipawan ntu nkgalhiniyaw, mpi lapi wi mpala tu kskiniw, wa lantlata xtalakaskin, wa nakinkakgaxmatniyan» (1 Juan 5:14, 15). Xlikana, max Jehová ni chuna katikgalhtilh kioracioneskan chuna la xlakpuwanitaw. Xlakata xla katsi tuku tlakg tlan kimpalakatakan, lakgachunin kinkakgalhtiyan pi ni o lakaskin pi nakgalhkgalhiyaw tsinu kilhtamaku (2 Cor. 12:7-9).

12, 13. ¿La tlawa Jehová xlakata nakinkamaxkiyan tuku maklakaskinaw?

¹² Jehová kinkamaxkiyan tuku maklakaskinaw. Xla nachuna tlawa tuku kawani xanatlatni pi katlawakgolh (1 Tim. 5:8). Lilakgaputsa tuku maklakaskinkgo xkamanan. Ni lakaskin pi nalilakgaputsayaw liwat, lhakgat chu niku natawilayaw (Mat. 6:32, 33; 7:11). Xlakata kinkapaxkiyan, nachuna lilakgaputsama pi nakgalhiyaw putum tuku namaklakaskinaw kkilhtamaku nema aku mima.

¹³ Pero tuku tlakg xlakaskinka wa pi lilakgaputsa tuku xla kintakanajlakan. Anta kxTachuwin kinkawaniyan la likatsi, tuku xtalakaskin, tuku xlakata lamaw chu tuku nala kkilhtamaku nema aku mima. Kinkalilakgaputsan kinchatunukan akxni lakgapaswi xaxlikana chu kamaklakaskilh kinatlatnikan o amakgapitsi natalan xlakata nalakgapasaw. Chu chuntiya kinkalimakgtayayan lakgkgolotsin xalak congregación chu amakgapitsin natalan. Nachuna, kinkastakyawayan ktamakxtumit, niku makxtum katsiniyaw xpalakata. Putum uma, kinkalimasiyaniyan pi Jehová chatum Tlat tiku kinkalilakgaputsayan (Sal. 32:8).

14. ¿Tuku xlakata kinkastakyawayan Jehová, chu la tlawa?

¹⁴ Jehová kinkastakyawayan. Akinin ni xtachuna la Jesús, xlakata akinin makglakgalhinanin. Wa xlakata xapaxkina kinTlatkan kinkastakyawayan akxni maklakaskinaw. Anta kxTachuwin kinkamalakapastakayan pi xla «wa nti mpaxkiy, akgastakyaway» (Heb. 12:6, 7). Pulaklhuwa la tlawa. Akgtum liʼakxilhtit, max akxni wi tuku likgalhtawakgayaw kBiblia o kgaxmataw anta ktamakxtumit kinkamasiyaniyan pi talakaskin nalakgpaliyaw kilatamatkan. Nachuna max lakgkgolotsin nakinkamaxkikgoyan tamakgtay nema maklakaskinaw. Maski katuwa tuku namaklakaskin Jehová, kinkastakyawayan xlakata kinkapaxkiyan (Jer. 30:11).

15. ¿La kinkakuentajtlawayan Jehová?

¹⁵ Jehová kinkamakgtayayan natayaniyaw tuku tuwa. KinTlatkan xalak akgapun kinkakuentajtlawayan akxni titaxtuyaw tuku tuwa, chuna la tlawa chatum xatlat tiku kapaxki xkamanan. Limaklakaskin xʼespíritu santo  xlakata nitu naʼakgspula kintakanajlakan (Luc. 11:13). Nachuna kuentajtlawa tuku makgkatsiyaw. Akgtum liʼakxilhtit, kinkamaxkiyan akgtum tlan takgalhkgalhin kkilhtamaku nema aku mima, nema kinkamakgtayayan natayaniyaw taʼakglhuwit. Kalilakpuwaw uma: xapaxkina kinTlatkan nalakkaxtlawa putum tuku nitlan natitaxtuyaw. Tuku nitlan kaj titaxtu, pero xtasikulunalin Jehová putum kilhtamaku namakgapala (2 Cor. 4:16-18).

16. ¿Tuku lalh akxni Adán ni kgalhakgaxmatli xTlat?

¹⁶ Pulaktum tuku likatsiyaw pi Jehová kinkapaxkiyan wa la likatsinilh Adán akxni ni kgalhakgaxmatli. Xlakata tuku tlawalh, xla chu xkamanan nialh makgtapakgsikgolh kxfamilia Dios (Rom. 5:12; 7:14). Pero Jehová tlawalh tuku xtalakaskin xlakata xkamakgtayalh xkamanan Adán.

17. ¿Tuku lakapala tlawalh Jehová akxni Adán ni kgalhakgaxmatnalh?

¹⁷ Maski Jehová malakgaxokgelh Adán, kamaxkilh akgtum tlan takgalhkgalhin xkamanan. Tunkun malaknulh pi latamanin tiku xkgalhakgaxmatkgolh tlan xmakgtapakgsiparakgolh kxfamilia (Gén. 3:15; Rom. 8:20, 21). Tlan chuna tlawalh xlakata xtamakamastan xKgawasa, Jesús. Akxni makamastalh xKgawasa kimpalakatakan, limasiyalh pi lu kinkapaxkiyan (Juan 3:16).

18. Maski tamakgatlininitaw Jehová, ¿tuku xlakata liwana katsiyaw pi xla lakaskin pi xkamanan nalitaxtuyaw?

¹⁸ Maski makglakgalhinanin akinin, Jehová lakaskin pi namakgtapakgsiyaw kxfamilia chu ni akgtum takuka kinkaliʼakxilhan. Max namakgalipuwanaw o natamakgatliniyaw, pero xla chuntiya nakinkapaxkiyan. Kparábola xla kgawasa tiku xʼakgtsankgatapulinit, Jesús limasiyalh la kinkapaxkiyan Jehová (Luc. 15:11-32). Xatlat tiku lichuwinankan  kʼuma parábola nikxni lakpuwa pi xkgawasa nialh xʼama taspita. Chu akxni xla taspitli, xatlat xatapaxuwan makgamakglhtinalh. Komo tamakgatlininitaw Jehová chu makgxtakgnitaw tuku nitlan xtlawamaw, tlan liwana nakatsiyaw pi kinTlatkan lu kinkamakgamakglhtinamputunan.

19. ¿Tuku natlawa Jehová xlakata nalakkaxtlawa tuku nitlan tlawalh Adán?

¹⁹ KinTlatkan nalakkaxtlawa putum tuku nitlan tlawalh Adán. Akxni makglakgalhinalh, Jehová laksakli 144,000 latamanin tiku mapakgsinanin chu sacerdotes xlitaxtukgolh kʼakgapun xlakata xmakgtayakgolh xKgawasa. Jesús chu umakgolh mapakgsinanin nakamakgtayakgo latamanin tiku kgalhakgaxmatnankgo xlakata nialh nakgalhikgo talakgalhin kxasasti kakilhtamaku. Akxni titaxtukgonita nawan xaʼawatiya taputsastalanit, Dios nakamaxki latamat nema ni kgalhi xlisputni. KinTlatkan lu nalipaxuwa naʼakxilha pi putum Katiyatni litsama nawan xkamanan tiku ni kgalhikgo talakgalhin. ¿Nixlikana pi lu tlan nawan?

20. ¿La kinkalimasiyaninitan Jehová pi lu kinkapaxkiyan, chu tuku nalichuwinanaw kʼatanu artículo?

²⁰ Jehová limasiyanit pi lu kinkapaxkiyan. Wa tlakg xatlan Tlat nema kgalhiyaw. Kgaxmata kioracioneskan chu kinkamaxkiyan tuku maklakaskinaw kkilatamatkan chu kkintakanajlakan. Kinkastakyawayan chu kinkamakgtayayan. Nachuna, lakkaxwilinit lhuwa tasikulunalin nema nakinkamaxkiyan. ¿Nixlikana pi tlan kinkamamakgkatsiniyan pi kinTlatkan kinkapaxkiyan chu kinkakuentajtlawayan? Kʼatanu artículo nalichuwinanaw la tlan akinin, la komo xkamanan, napaxtikatsiniyaw tapaxkit nema kinkakgalhiniyan.