1. Leswaku munhu a kota ku vulavula ni hosi ya le Peresiya a ku laveka yini?

 HI MAHLO ya mianakanyo, tivone u tshama ePeresiya kwalomu ka malembe ya 2 500 lama hundzeke. U lava ku ya vulavula ni hosi hi mhaka yo karhi kutani u teka riendzo u ya eXuxani laha hosi yi tshamaka kona. Wa swi tiva leswaku a wu nge wu veki nenge emahlweni ka hosi handle ka mpfumelelo. Loko wo ringeta ku endla tano, swi herile hi wena!—Est. 4:11.

2. Yehovha u lava hi titwa njhani loko hi lava ku vulavula na yena?

² Swa tsakisa ku tiva leswaku Yehovha a nga fani ni hosi ya le Peresiya! Yehovha u tlakukile ku tlula vafumi hinkwavo kambe u lava leswaku hi vulavula na yena nkarhi wun’wana ni wun’wana lowu hi wu lavaka. U lava hi titwa hi ntshunxekile ku vulavula na yena. Hi xikombiso, hambileswi Yehovha a vitaniwaka hi mavito lama tlakukeke yo tanihi Mutumbuluxi Lonkulu, Lowa Matimba Hinkwawo ni leri nge Hosi Leyi Lawulaka kambe u lava leswaku hi n’wi vitana hi vito leri tolovelekeke leri nge ‘Tatana.’ (Mat. 6:9) Swa tsakisa hakunene ku tiva leswaku Yehovha u lava hi n’wi teka tanihi Tatana loyi a hi rhandzaka!

3. Hikwalaho ka yini hi fanele hi vitana Yehovha hi ku ‘Tatana’ naswona hi ta bula hi yini eka nhlokomhaka leyi?

³ Swa fanela ku vitana Yehovha hi ku ‘Tatana’ hikuva hi yena a hi nyikeke vutomi. (Ps. 36:9) Leswi a nga Tata wa hina, hi fanele hi n’wi yingisa. Loko hi endla swilo leswi a hi byelaka swona, hi ta kuma mikateko yo tala. (Hev. 12:9) Mikateko yoleyo yi katsa vutomi lebyi nga heriki laha misaveni kumbe etilweni. Ninamuntlha ku ni mikateko leyi hi yi kumaka. Eka nhlokomhaka leyi, hi ta bula hi ndlela leyi Yehovha a swi kombisaka ha yona sweswi leswaku i Tatana loyi a nga ni rirhandzu nileswaku hikwalaho ka yini hi tiyiseka leswaku a nge pfuki a hi tshikile ni siku ni rin’we. A hi sunguleni hi bula hi leswi endlaka hi tiyiseka leswaku Tata wa hina wa le tilweni wa hi rhandza naswona wa khathala hi hina.

4. Hikwalaho ka yini van’wana swi va tikela ku teka Yehovha tanihi Tata wa vona?

⁴ Xana swa ku tikela ku teka Yehovha tanihi Tata wa wena? Van’wana va tivona va nga pfuni nchumu loko va tipimanisa na Yehovha. Va tibyela leswaku Xikwembu xa Matimba Hinkwawo a xi na mhaka na vona. Kambe Tata wa hina wa rirhandzu a nga lavi hi titwa hi ndlela yoleyo. U hi nyike vutomi naswona u lava hi va ni vuxaka na yena. Loko muapostola Pawulo a heta ku vula marito lawa, u byele vayingiseri vakwe eAtena leswaku Yehovha a nga le “kule ngopfu ni un’wana ni un’wana wa hina.” (Mint. 17:24-29) Yehovha u lava hi vulavula na yena ku fana ni loko n’wana a vulavula ni mutswari wakwe loyi a n’wi rhandzaka.

5. Hi dyondza yini eka ntokoto wa makwerhu un’wana waxisati?

⁵ Van’wana swa va tikela ku teka Yehovha tanihi Tata wa vona hikwalaho ka leswi vatata wa vona va nga va kombisangiki rirhandzu. Xiya leswi makwerhu un’wana waxisati a swi vuleke. U ri: “Tatana a ndzi xanisa swinene. Loko ndzi sungula ku dyondza Bibele, a swi ndzi tikela ku titwa ndzi ri ni vuxaka ni Tata wa mina wa le tilweni. Kambe endzhaku ka loko ndzi dyondze hi Yehovha, sweswo hinkwaswo swi cincile.” Xana u titwa hi ndlela leyi fanaka? Loko swi ri tano, tiyiseka leswaku na wena u nga swi kota ku teka Yehovha tanihi Tatana loyi a nga ni rirhandzu.

6. Hi ku ya hi Matewu 11:27, hi yihi ndlela yin’wana leyi Yehovha a hi pfuneke ha yona leswaku hi n’wi teka tanihi Tata wa hina wa rirhandzu?

⁶ Ndlela yin’wana leyi Yehovha a hi pfuneke ha yona leswaku hi n’wi teka tanihi Tata wa hina wa rirhandzu, hi leswi a endleke leswaku marito ni swiendlo swa Yesu swi tsariwa eBibeleni (Hlaya Matewu 11:27.) Yesu u kombise timfanelo ta Tata wakwe hi ku helela lerova u kale a ku: “Loyi a ndzi voneke u vone na Tatana.” (Yoh. 14:9) Mikarhi yo tala Yesu u hlamusele Yehovha tanihi Tatana. Eka Tievhangeli ta mune, Yesu u tirhise rito leri nge ‘Tatana’ mikarhi ya kwalomu ka 165 loko a vulavula hi Yehovha. Hikwalaho ka yini Yesu a tirhise rito leri ko tala loko a vulavula hi Yehovha? A lava vanhu va kholwa leswaku Yehovha i Tatana la nga ni rirhandzu.—Yoh. 17:25, 26.

7. Hi dyondza yini hi Yehovha eka ndlela leyi a khomeke N’wana wakwe ha yona?

⁷ Xiya leswi hi swi dyondzaka hi Yehovha eka ndlela leyi a khomeke Yesu N’wana wakwe ha yona. Mikarhi hinkwayo Yehovha a a yingisa ni ku hlamula swikhongelo swa Yesu. (Yoh. 11:41, 42) Loko Yesu a langutana ni miringo, a a swi xiya leswaku Tata wakwe wa n’wi rhandza naswona wa n’wi seketela.—Luka 22:42, 43.

8. Hi tihi tindlela leti Yehovha a pfuneke Yesu ha tona?

⁸ Yesu u tiyisekise leswaku Tata wakwe a ku ri Xihlovo ni Muhlayisi wa vutomi byakwe loko a ku: “Ndzi [hanya] hikwalaho ka Tatana.” (Yoh. 6:57) Yesu a a tshemba Tata wakwe hi ku helela naswona Yehovha u n’wi khathalerile. Xa nkoka swinene, Yehovha u pfune Yesu leswaku a tshama a tshembekile.—Mat. 4:4.

9. Yehovha u swi kombise njhani leswaku i Tatana loyi a rhandzaka ni ku khathala hi Yesu?

⁹ Leswi Yehovha a nga Tatana loyi a nga ni rirhandzu, u endle leswaku Yesu a swi vona leswaku wa n’wi seketela. (Mat. 26:53; Yoh. 8:16) Hambileswi Yehovha a nga sirhelelangiki Yesu eka makhombo hinkwawo kambe u n’wi pfunile leswaku a kota ku tiyisela maxangu. Yesu a a swi tiva leswaku ku xaniseka hinkwako loku a ta langutana na kona a ku ri ka nkarhinyana. (Hev. 12:2) Yehovha u kombise leswaku wa khathala hi Yesu hi ku n’wi yingisa, hi ku n’wi khathalela, hi ku n’wi letela ni hi ku n’wi seketela. (Yoh. 5:20; 8:28) Sweswi a hi voneni ndlela leyi Tata wa hina wa le tilweni a khathalaka ha yona hi hina hilaha ku fanaka.

10. Hi ku ya hi Pisalema 66:19, 20, Yehovha u swi kombisa njhani leswaku wa hi rhandza?

¹⁰ Yehovha u yingisa swikhongelo swa hina. (Hlaya Pisalema 66:19, 20.) A nga hi pimeli leswaku hi fanele hi khongela kangani, ku ri na sweswo u lava hi khongela mikarhi hinkwayo. (1 Tes. 5:17) Hi nga khongela eka Xikwembu nkarhi wun’wana ni wun’wana, swi nga ri na mhaka leswaku hi kwihi. U tshama a lunghekele ku yingisa swikhongelo swa hina. Ku tiva leswaku Yehovha wa swi yingisa swikhongelo swa hina swi endla hi n’wi rhandza. Mupisalema u te: ‘Ndza n’wi rhandza Yehovha, hikuva wa ri twa rito ra mina.’—Ps. 116:1.

11. Yehovha u swi hlamula njhani swikhongelo swa hina?

¹¹ Tata wa hina a ngo yingisa swikhongelo swa hina ntsena kambe u tlhela a swi hlamula. Muapostola Yohane u tiyisekisa mhaka leyi u ri: “Ku nga khathariseki leswaku i yini lexi hi xi kombelaka [eka Xikwembu] hi ku ya hi ku rhandza ka xona, xa hi twa.” (1 Yoh. 5:14, 15) Swi nga endleka Yehovha a nga swi hlamuli hi ndlela leyi a hi ehleketa ha yona swikhongelo swa hina. Wa swi tiva leswi nga swinene eka hina, hikwalaho mikarhi yin’wana hi nga kombela swo karhi kambe a nga hi nyiki kumbe a lava leswaku hi rindza.—2 Kor. 12:7-9.

12-13. Hi tihi tindlela leti Tata wa hina wa le tilweni a hi khathalelaka ha tona?

¹² Yehovha wa hi khathalela. U endla hinkwaswo leswi vatatana va faneleke va swi endla. (1 Tim. 5:8) Wa khathala hi swilaveko swa vana vakwe. A nga lavi leswaku hi vilela hi swakudya, swiambalo kumbe ndhawu yo tumbeta nhloko. (Mat. 6:32, 33; 7:11) Leswi a nga mutswari loyi a nga ni rirhandzu, Yehovha u endle lunghiselelo ra leswaku hi ta tiphina hi swilo leswi hi swi lavaka enkarhini lowu taka.

¹³ Xa nkoka swinene, Yehovha u hi nyika leswi hi swi lavaka leswaku hi va ni vuxaka na yena. Hi ku tirhisa Bibele, u hi hlamusela ndlela leyi a nga xiswona, xikongomelo xakwe, xikongomelo xa vutomi ni leswi nga ta endleka enkarhini lowu taka. U kombise leswaku wa hi rhandza hi ku endla leswaku vatswari va hina kumbe munhu un’wana a hi pfuna leswaku hi n’wi tiva. Nakambe hi ya emahlweni hi kuma mpfuno eka vakulu evandlheni ni le ka vamakwerhu van’wana. Ku engetela kwalaho, Yehovha wa hi letela hi ku tirhisa tinhlengeletano ta vandlha, laha hi dyondzaka swin’we ni vamakwerhu. Hi ndlela leyi, Yehovha Tata wa hina u kombisa leswaku wa khathala hi hina. (Ps. 32:8)

14. Hikwalaho ka yini Yehovha a hi letela naswona u hi letela njhani?

¹⁴ Yehovha wa hi letela. Ku hambana na Yesu, hina a hi hetisekanga. Hikwalaho loko Tata wa hina loyi a nga ni rirhandzu a hi letela, u pfa a hi tshinya loko swi fanerile. Rito rakwe ri hi byela leswi: “Loyi Yehovha a n’wi rhandzaka wa n’wi tshinya.” (Hev. 12:6, 7) Yehovha u hi tshinya hi tindlela to tala. Hi xikombiso, leswi hi swi hlayaka eRitweni rakwe kumbe leswi hi swi twaka etinhlengeletanweni ta vandlha, swi nga hi pfuna hi tshika mikhuva yo karhi. Mikarhi yin’wana hi nga kuma mpfuno lowu hi wu lavaka eka vakulu. Swi nga ri na mhaka leswaku mpfuno wu ta wu huma kwihi, mikarhi hinkwayo Yehovha u hi tshinya hi ndlela ya rirhandzu.—Yer. 30:11.

15. Hi tihi tindlela leti Yehovha a hi sirhelelaka ha tona?

¹⁵ Yehovha wa hi seketela loko hi ri emaxangwini. Ku fana ni ndlela leyi tatana a va seketelaka ha yona vana vakwe loko va ri emaxangwini, Tata wa hina wa le tilweni na yena wa hi seketela loko hi ri emaxangwini. U tirhisa moya wakwe lowo kwetsima leswaku a hi sirhelela eka swilo hinkwaswo leswi nga dlayaka vuxaka bya hina na yena. (Luka 11:13) Nakambe wa hi seketela loko hi hele matimba. Hi xikombiso, u hi nyika ntshembo lowu tiyisaka  nhlana. Ntshembo wolowo wu endla hi kota ku tiyisela maxangu. Ehleketa hi mhaka leyi: Swilo swo biha leswi hi langutanaka na swona, Tata wa hina wa rirhandzu u ta swi herisa hinkwaswo. Maxangu hinkwawo lawa hi langutana na wona mo va ya nkarhinyana kambe mikateko leyi humaka eka Yehovha i ya hilaha ku nga heriki.—2 Kor. 4:16-18.

16. Ku endleke yini loko Adamu a tshike ku yingisa Tata wakwe?

¹⁶ Hi kota ku swi vona kahle leswaku Yehovha wa hi rhandza eka ndlela leyi a anguleke ha yona loko Adamu a tshika ku n’wi yingisa. Loko Adamu a tshika ku yingisa Tata wakwe wa le tilweni, u lahlekeriwe hi lunghelo ra ku va xirho xa ndyangu wa Yehovha lowu tsakeke, yena swin’we ni vatukulu vakwe. (Rhom. 5:12; 7:14) Hambiswiritano, Yehovha u endle swo karhi leswaku a pfuna vatukulu va Adamu.

17. Endzhaku ka loko Adamu a xandzukile, hi ku hatlisa Yehovha u endle yini?

¹⁷ Yehovha u xupule Adamu kambe u nyike vatukulu vakwe ntshembo. Hi nkarhi wolowo u tshembise leswaku vanhu lava yingisaka, va ta tlhela va va swirho swa ndyangu wakwe. (Gen. 3:15; Rhom. 8:20, 21) Yehovha u endle sweswo swi koteka hi ku tirhisa gandzelo ra nkutsulo ra N’wana wakwe loyi a n’wi rhandzaka, Yesu. Hi ku nyikela hi N’wana wakwe hikwalaho ka hina, Yehovha u kombise leswaku wa hi rhandza swinene.—Yoh. 3:16.

18. Hi nga tiyiseka njhani leswaku Yehovha u lava hi va vana vakwe hambiloko hi hambukile?

¹⁸ Hambileswi hi nga hetisekangiki, Yehovha u lava hi va swirho swa ndyangu wakwe naswona a nga hi teki hi ri ndzhwalo. Hambiloko hi pfa hi hambuka, Yehovha a nga hi heleli mbilu. Yesu u tirhise xikombiso xa n’wana loyi a hambukile ku kombisa ndlela leyi Yehovha a hi rhandzaka ha yona tanihi vana vakwe. (Luka  15:11-32) Tatana wa le xifanisweni xexo, a nga tshikanga ku tibyela leswaku n’wana wakwe u ta vuya. Loko n’wana yoloye a vuya, tata wakwe u n’wi amukele hi mandla mambirhi. Loko hi hambuka eka Yehovha kutani hi hundzuka, ha tiyiseka leswaku Tata wa hina loyi a nga ni rirhandzu, u tiyimiserile ku hi amukela hi mandla mambirhi.

19. Yehovha u ta ku lulamisa njhani ku onhaka loku vangiweke hi Adamu?

¹⁹ Tata wa hina u ta lulamisa ku onhaka hinkwako loku vangiweke hi Adamu. Endzhaku ka loko Adamu a xandzukile, Yehovha u hlawule vanhu va 144 000, lava nga ta fuma tanihi vaprista etilweni ni N’wana wakwe. Yesu ni lava a nga ta fuma na vona, va ta pfuna vanhu lava yingisaka leswaku va va lava hetisekeke emisaveni leyintshwa. Endzhaku ka loko va hlule ndzingo wo hetelela, Xikwembu xi ta va nyika vutomi lebyi nga heriki. Tata wa hina u ta tsaka swinene loko a vona misava yi tele hi vana vakwe lava hetisekeke. Wolowo ku ta va nkarhi wo tsakisa hakunene!

20. Yehovha u swi kombise njhani leswaku wa hi rhandza swinene naswona eka nhlokomhaka leyi landzelaka hi ta bula hi yini?

²⁰ Yehovha u kombise leswaku wa hi rhandza swinene. I Tatana lonene. U yingisa swikhongelo swa hina naswona wa hi khathalela hi tindlela hinkwato. Wa hi letela naswona wa hi seketela. Nakambe u hi tshembisa mikateko yo tala. Swa tsakisa ku tiva leswaku Tata wa hina wa hi rhandza naswona wa khathala hi hina. Eka nhlokomhaka leyi landzelaka, hi ta bula hi ndlela leyi hina tanihi vana vakwe hi nga swi kombisaka ha yona leswaku ha n’wi rhandza.