1. I yini leswi munhu a afanele aswi yendla loko a lava kuvulavula ni hosi?

AHINGE u hanya aPeresiya ankameni wa khale. U lava kuvulavula ni hosi hi mhaka ya kukarhi. U gama u ya doropeni la Xuxani laha hosi yi tshamaka kona. Kambe awu fanelanga u vulavula ni hosi na yingaku pfumelelanga. Loko wo tshuka u ya ka hosi na yingaku pfumelelanga, u hakela hi wutomi la wena. — Est. 4:11.

2. Yehovha a lava hi titwisa kuyini loko hi vulavula na yena?

² Ha tlangela swinene leswi Yehovha a kalaka anga fani ni hosi ya Peresiya! Hambi leswi Yehovha anga tlakuka kutlula tihosi hinkwatu, wahi pfumelela kuva hi vulavula na yena nkama ni nkama. Angaswi lavi swaku hi chava kuvulavula na yena. Hi xikombiso, Yehovha i Muvumbi Lwenkulu, wa Matimba Hinkwawu ni Hosi leyi Fumaka kambe wahi rhamba akuva hi vulavula na yena na hi tirhisa rito lelinge “Papayi” kufana ni n’wana loko a vitana mupsali wa yena. (Mat. 6:9) Swi tsakisa hi ntamu kutiva swaku Yehovha, a lava hi titwa na hi li vanghanu va yena!

3. Hi mhaka muni swinga bihanga kuvitana Yehovha hi ku “Papayi”, naswona hita vona yini ka djondzo leyi?

³ Aswi bihanga kuvitana Yehovha hi ku “Papayi” hikusa hi yena angahi nyika wutomi. (Pis. 36:9) Leswi yena anga Papayi wa hina hi fanele himu yingisa. Naswona loko hi yendla leswi ahi kombelaka swona, atahi katekisa hintamu. (Hev. 12:9) Atahi nyika wutomi lelinga heliki amisaveni kumbe matilweni. Hambi swoswi hayi kuma minkateko. Ka djondzo leyi, hita  vona swaku hi mhaka muni Yehovha a li Papayi wa lirhandzu swoswi naswona i mpsini swihi yendlaka hi kholwa swaku angatahi tshika ankameni lowu taka. Kambe kusungula, ahi voneni swaku hi mhaka muni hi kholwa swaku Papayi wa hina lweyi anga matilweni wahi rhandza a tlhela ahi pfuna.

4. Hi mhaka muni vanhu van’wana swiva karhatela kuvona Yehovha na a li Papayi wa vona?

⁴ Swaku karhatela kuteka Yehovha a li Papayi wa wena? Van’wana va pimisa swaku Yehovha i mukulu hintamu lakakuva va tivona navanga li va nchumu. Naswona va kanakana swaku Xikwembu xa Matimba Hinkwawu xini mhaka na vona. Kambe Papayi wa hina wa lirhandzu anga lavi hi titwisa xileswo. Phela hi yena angahi nyika wutomi futshi a lava hiva ni wunghanu na yena. Loko Pawulo a byela vanhu va Atena swaku Xikwembu xi ni mhaka na vona a game a ku: “Axile kule ni mun’wana ni mun’wana wa hina”. (Mint. 17:24-29) Xikwembu xi lava swaku vanhu va vulavula na xona na va chunsekile kufana ni leswi n’wana a titwisaka xiswona loko a vulavula ni mupsali wa yena lweyi amu rhandzaka.

5. Hi djondza yini ka leswinga humelela makwerhu mun’we waxisati?

⁵ Van’wana swava karhatela kuvona Yehovha na a li Papayi wa vona hi mhaka leswi vapapayi va vona va kuva psala va kalaka vangava kombanga lirhandzu. Makwerhu mun’wana waxisati a te: “Papayi wa mina a akarhata. Loko ni sungule kudjondza Bibele aswini karhatela kuva ni wunghanu ni Papayi wa mina wa le matilweni. Kambe a nkama ningamu tiva kahle Yehovha minchumu yi sungule kucinca.” Na wena u titwisa xileswo? Loko u titwisa xileswo, unga heli ntamu. Hi kufamba ka nkama utamu tiva kahle Yehovha nakona utamu rhandza.

6. Hikuya hi Matewu 11:27, Yehovha ahi pfunisa kuyini kuvona swaku yena i Papayi wa lirhandzu?

⁶ Yehovha a yendle swaku marito ya Yesu ni leswi aaswi yendla swi tsaliwa ka Bibele. Leswi swi kombisa swaku yena i Papayi wa lirhandzu. (Lerha Matewu 11:27.) Phela Yesu amu tekelele hi kuhelela Yehovha lakakuva avula marito lawa: “Lweyi anivoneke, avonile Tatana”. (Yoh. 14:9) Yesu a atalisa kuvitana Yehovha a ku Papayi. Ka mabuku ya Matewu, Marka, Luka na Yohane ntsena, Yesu a vula swaku Yehovha i “Papayi” ka 165 wa makhambi. Hi mhaka muni Yesu a vulavule hintamu hi Yehovha? Hi mhaka a alava kukholwisa vanhu swaku Yehovha i Papayi wa lirhandzu. — Yoh. 17:25, 26.

7. Hi djondza yini ka leswi Yehovha angamu khomisa xiswona N’wana wa yena?

⁷ Ahi voneni leswi hingaswi djondzaka ka leswi Yehovha angamu khomisa xiswona N’wana wa yena Yesu. Minkama hinkwayu Yehovha a ayingisa swikhongelo swa Yesu a tlhela aswi hlamula. (Yoh. 11:41, 42) Hambiloko a kumana ni mindzingo ya kutshamisa kuyini, Yesu aaswi tiva swaku Papayi wa yena wamu rhandza futshi wamu seketela.  — Luk. 22:42, 43.

8. Yehovha amu pfunise kuyini Yesu?

⁸ Yesu aaswi tiva swaku lweyi aamu nyika wutomi a tlhela amu hlayisa aku li Papayi wa yena. Yena a te: ‘Ni hanya hikolaho ka Tatana’. (Yoh. 6:57) Yesu aamu tshemba hi kuhelela Papayi wa yena futshi Yehovha a anyika Yesu hinkwaswu leswi aaswi lava akuva atama a hanya. Kambe xa lisima hintamu hi leswaku Yehovha a apfuna Yesu akuva atshama na a tshembekile. — Mat. 4:4.

9. Yehovha aswi kombise kuyini swaku aamu rhandza Yesu?

⁹ Leswi Yehovha anga Papayi wa lirhandzu a  yendle leswaku Yesu aswi tiva swaku wamu seketela. (Mat. 26:53; Yoh. 8:16) Hambileswi Yehovha a kalaka anga vhikelanga Yesu ka swilo hinkwaswu leswi aswimu humelela, aamu pfuna loko a kumana ni mindzingu. Yesu aaswi tiva swaku hambiloko o o vavisiwa aswi tava swa nkama nyana. (Hev. 12:2) Yehovha a kombise swaku wamu rhandza Yesu hi kumu yingisa loko a khongela, amu nyika leswi aaswi lava, amu djondzisa ni kumu seketela. (Yoh. 5:20; 8:28) Swoswi ahi voneni leswi Papayi wa hina wa le matilweni ahi pfunisaka xiswona.

10. Hikuya hi Tipisalema 66:19, 20, Yehovha ahi kombisa kuyini swaku wahi rhandza?

¹⁰ Yehovha waswi yingisa swikhongelo swa hina. (Lerha Tipisalema 66:19, 20.) Yehovha angahi pimeli swaku hi khongela kangani, hi khongela hi yini kumbe swikhongelo swa hina swi lehile kufika kwini. A lava hi khongela minkama yotala. (1 Tes. 5:17) Hinga khongela ka Yehovha nkama hiswi lavaka hambi hova kwini. Minkama hinkwayu a yingisa swikhongelo swa hina. Naswona kutiva leswo swihi yendla hiva kusuhi na yena. Mupisalema a te: “Yehovha namu rhandza hikusa wani yingisela loko ni khongela ni kombela kupfuniwa.” — Pis. 116:1.

11. Yehovha aswi hlamulisa kuyini swikhongelo swa hina?

¹¹ Papayi wa hina a yingisa swikhongelo swa hina a tlhela aswi hlamula. Mupostola Yohane a te: “Loko hikombela xokarhi mayelanu ni kurhandza ka yena [Yehovha], yena wahiyingisa.” (1 Yoh. 5:14, 15) Swinga yendleka Yehovha anga hlamuli swikhongelo swa hina hilaha hi lavaka ha kona. Waswi tiva leswinga swinene ka hina futshi minkama yin’wana anga pfumeli leswi hi kombelaka swona naswona angaha lava hi nyima nyana. — 2 Kor. 12:7-9.

12-13. Yehovha ahi wundlisa kuyini?

¹² Yehovha wahi wundla. A yendla leswi a lavaka swaku vapapayi hinkwavu vaswi yendla. (1 Tim. 5:8) A nyika vana va yena swilo hinkwaswu leswi vaswi lavaka swaku va hanya. Angaswi lavi swaku hi karhateka hi swakudla, mpahla kumbe ka kutshama kona. (Mat. 6:32, 33; 7:11) Leswi anga Papayi wa lirhandzu, Yehovha a tlhela ahi tiyisekisa swaku atahi nyika hinkwaswu hiswi lavaka nkameni lowu taka.

¹³ Xa lisima kutlula hinkwaswu, Yehovha ahi pfuna kuva ni wuxaka lelinene na yena. Hi kutirhisa Bibele, ahi byela leswi anga swona ni leswi aswi lavaka ka swivumbiwa swa yena. Naswona ahi byela swaku ahi tumbuluxele yini ni leswi swingata yendleka ka nkama lowu taka. Ahi djondzise ntiyiso hi kutirhisa vapsali va hina kumbe vamakwerhu abandleni. Ni swoswi wa ha hi djondzisa hi kutirhisa madoda ya bandla kumbe vamakwerhu lavanga ni wuxaka lelinene na yena. Yehovha a tlhela ahi djondzisa hi kutirhisa mintlhanganu ya bandla leyi hiyi kumaka xikan’we ni vamakwerhu. Hinkwaswu leswi, swi komba swaku Yehovha i Papayi wa hina lweyi anga ni lirhandzu. — Pis. 32:8.

14. Hi mhaka muni Yehovha ahi djondzisa naswona ahi djondzisisa kuyini?

¹⁴ Yehovha wahi djondzisa. Kuhambana na Yesu, hina ahi hetisekanga. Hi mhaka leyo Papayi wa hina wa lirhandzu apfa ahi laya loko ahi djondzisa. Bibele li li: ‘Hosi [Yehovha] alaya lweyi amurhandzaka.’ (Hev. 12:6, 7) Yehovha ahi laya hi tindlela ta ku hambanahambana. Hi xikombiso, hingaha lerha ka Bibele kumbe kuswi twa mitlhanganwini ivi hiswi twisisa swaku hi fanele hi cinca mavonelo ya hina ni leswi hiswi yendlaka. Minkama yin’wana hingaha pfuniwa hi madoda.  Aswina mhaka swaku Yehovha ahi layisa kuyini kambe leswi hiswi tivaka hileswaku ahi laya hileswi ahi rhandzaka. — Yer. 30:11.

15. Yehovha ahi vhikelisa kuyini?

¹⁵ Yehovha wahi pfuna kutiyisela swikarhatu. Kufana ni leswi vapapayi va pfunaka vana va vona loko va ni swikarhatu, na hina Papayi wa hina wa le matilweni wahi pfuna loko hi kumana ni mindzingo. A tirhisa moya wa yena wokwetsima akuva ahi vhikela ka swilo leswinga wonhaka wuxaka la hina na yena. (Luk. 11:13) Yehovha wahi pfuna loko hi hela ntamu. Hi xikombiso, ahi nyika ntshembo wa kuhlamalisa lowu vulavulaka hi nkama lowu taka naswona wuhi pfuna kutiyisela loko hi kumana ni swikarhatu. Pimisa hi leswi: Hambiloko hi humeleliwa hi swilo swa kubiha, Papayi wa hina wa lirhandzu ataswi helisa. Swikarhatu hinkwaswu leswi hi kumanaka na swona i swa nkama nyana kambe minkateko leyi Yehovha ahi nyikaka yona yita tshama hilaha kunga heliki. — 2 Kor. 4:16-18.

16. Kuyendleke yini loko Adamu a djohele Yehovha?

¹⁶ Hinga vona swaku Yehovha wa hi rhandza loko hi pimisa hi leswi angaswi yendla a nkama Adamu anga djoha. Adamu a lahlekeliwe hi wuxaka na Yehovha naswona yena ni vana va yena avangaha lumbi ndjangu wa Yehovha. (Rhom. 5:12; 7:14) Hambileswo, Yehovha a yendle swa kukarhi akuva a pfuna vana va Adamu.

17. I yini leswi Yehovha anga tekela kuswi yendla a nkama Adamu anga djoha?

¹⁷ Yehovha a khatise Adamu kambe a tshembise kupfuna vana va yena. A tekele kutshembisa swaku hinkwavu lava yingisaka vata tlhela va lumba ndjangu wa yena. (Gen. 3:15; Rhom. 8:20, 21) Yehovha a yendle swaku leswo swi koteka hi kutirhisa gandzelo la  nkutsulo hi N’wana wa yena Yesu. A kombise swaku ahi rhandza ngopfu hi kunyikela N’wana wa yena hi mhaka ya hina. — Yoh. 3:16.

18. Hi mhaka muni hi tiyiseka swaku Yehovha wahi lava tani hi vana yena hambiloko hi tshuka hi hambuka?

¹⁸ Hambileswi hi kalaka hinga hetisekanga, Yehovha a lava leswaku hi lumba ndjangu wa yena naswona angahi voni nahi li ndzhwalu ka yena. Minkama yin’wana hingahamu kwatisa kumbe hi hambuka swa nkama nyana kambe yena minkama hinkwayu wa tshemba swaku hita tlhelela ka yena. Yesu a kombise swaku Yehovha ava rhandza ngopfu vana va yena hi kuvula xifananiso xa n’wana lweyi a lahlekeke. (Luk. 15:11-32) Papayi wa kona a atshemba swaku siku lin’wana n’wana wa yena aata vuya. A nkama anga vuya, amu yamukelile hi lirhandzu. Loko kuli swaku hi hambukile ka Yehovha kambe ha tisola, hinga tiyiseka swaku Yehovha atahi yamukela hi lirhandzu.

19. Yehovha ataswi lunghisisa kuyini leswinga wonhiwa hi Adamu?

¹⁹ Papayi wa hina ata lunghisa hinkwaswu leswinga wonhiwa hi Adamu. Loko Adamu a djohile, Yehovha a yendle xiboho xa kulanga 144.000 wa vanhu lavangata va tihosi ni kutlhela va va vaprista ni N’wana wa yena amatilweni. Amisaveni leyimpsha, Yesu ni lava angata fuma na vona vata yendla swaku vanhu hinkwavu lava yingisaka va va lava hetisekeke. Loko se kuhundza a xikambelo xa wugamu, Xikwembu xitava nyika wutomi lelinga heliki. Yehovha a ta tsaka loko a vona misava na yi tale hi vana va yena va kuhetiseka. Kuta va nkama wa kutsakisa hintamu!

20. Yehovha aswi kombisa kuyini swaku wahi rhandza hintamu naswona hita vona yini ka djondzo leyi landzelaka?

²⁰ Yehovha ahi kombe swaku wahi rhandza hintamu. Yena i Papayi wa kahle kutlula hinkwavu. A yingisa swikhongelo swa hina, ahi nyika hinkwaswu leswi hiswi lavaka leswaku hi tama hi hanya hi tlhela hiva ni wuxaka lelinene na yena. Wahi djondzisa athlela ahi pfuna. Naswona atahi katekisa hintamu ka nkama lowu taka. Swa tsakisa hintamu kutiva swaku Papayi wa hina wahi rhandza futshi wahi hlayisa! Ka djondzo leyi landzelaka hita vona swaku hinga yendla yini akuva hi kombisa swaku hali khensa lirhandzu la yena.