1. ¿Ambe jatsispi para úni ima enga uékapiringa Persia anapu rei jingoni uandontskuarheni?

JU JE eranhaskani eska ióntkiiska ka eskachi jini Persia irekaxaka. Uékasïngachi rei jingoni uandontskuarheni ambe máeri, jimbochisï nirajka Susa jima enga rei irekaka. Peru nóchi nipiringa reini exeni engajtsïni ima no íntskupiringa sésikua para ísï úni, jimbokachi úpiringa uándikunhani (Est. 4:11).

2. ¿Néna uékasïni Jeoba eskachi pʼikuarheraaka jiáni engachi imani jingoni uandontskuarheaka?

² Kánikuachi sési pʼikuarherasïnga enga Jeoba no ísïka komueskaksï Persia anapu reicha. Nájkiruka iauani sánderu kʼéri ambeka eska kʼuiripuecha engaksï juramukua jatsika, úsïngachi na uéjki jatini uandontskuarheni imani jingoni. Uékasïndi eskachi no chéaka imani jingoni uandontskuarheni. Ísïsti eskachi úsïnga arhini Jeobani, Tata Kueraajpiri, Ima enga iámu ambe újka úni ka Kʼéri Juramuti. Peru ima uékasïndi eskachi arhiaka “Táti”, sánderu uékperakua jingoni (Mat. 6:9). ¿No ísïski eskajtsïni sési pʼikuastasïnga míteni eska Jeoba uékasïnga parachi ambakiti pájperakua ma jatsini imani jingoni?

3. ¿Andichisï uá arhini Jeobani “Táti”, ka ambechi exea ini jorhenguarhikua jimbo?

³ Uákachi arhini Jeobani “Táti” jimbokajtsïni ima kueraaska (Uku. 17:24, 25). Jimboka ima juchari Tátiska, jatsiskachi para kurhajchani. Engachi úska ambe engajtsïni ima juramuchijka, kʼérati kóntperatechanchi jatsiauaka (Ebr. 12:9). Ma kóntperata jindeuati tsípikua para méntkisï, auandarhu o Echerirhu. Peru ístujtsïni iásï kánikua marhuachisïndi kurhajchani. Ini jorhenguarhikua jimbochi exeaka nénajtsïni xarhatachisïni Jeoba eska Táti uékpiti máeska ka andichisï uá seguru jarhani eskajtsïni sánderu orhepani no méni jurajkuaka. Peru orheta ju je exeni andichisï uá mintsikani eska juchari Táti auandarhu anapujtsïni kánikua xénchasïnga ka eska pendienti jarhaska juchantsïni jimbo.

4. ¿Andiksïsï máru úkua jukanchajki ísï exeni Jeobani komueska Táti ma?

⁴ ¿Úkua jukanchasïnchi ísï exeni Jeobani komueska juchari Táti? Jamberiksï máru kʼuiripuecha ísï pʼikuarherajti enajkiksï no ma ambe jukaparhakue para Tata Diosï. Nóksï úsïndi jakajkuni eska Ima enga iámu ambe újka úni uandanhiasïnga juchantsïni jimbo. Peru juchari Táti uékpiti no uékasïndi eskachi ísï pʼikuarheraaka. Imajtsïni kueraasti ka uékasïndi eskachi imeri ambe míteaka ka niárani andarhierani. Enga apostuli Pablu indeni ambe aianguapka imani kʼuiripuechani engaksï jini Atenasi kurhajchani japka, uandaspti eskajtsïni Jeoba ‛no iauani jacheska’ (Uku. 17:24-29, Táta Diósïri Uandakua Tata Jesukristueri Aiatsperakua [TDU]). Tata Diosï uékasïndi eskachi iáminduecha no sáni chéparini andarhieraaka imani, ísï eska sapi ma na andarhierajka imeri táti uékpitini.

5. ¿Ambechi jorhenguarhisïni ima amberi enga nitamakuarhipka pirenchi ma?

⁵ Jarhasti máteru ambe enga jamberi újka eskaksï máru úkua jukanchaaka ísï exeni Jeobani komueska Táti ma. ¿Ambee inde ambe? Eska imecheri táti no káni o meru no sáni xénchaaska. Pirenchi ma uandaspti: “Juchiti tátirini no sési kámasïrendi. Engani uénapka Bibliaeri ambe jorhenguarhini, úkua jukanchasïrenga ísï exeni Tata Diosïni komu Táti ma. Peru engani niárapka Jeobani míteni, inde ambe mójtakurhispti”. ¿Ísïchi pʼikuarherasïni juchajtu? Enga ísïka, uákachi seguru jarhani eskachi juchajtu niáraaka exeni Jeobani komueska sánderu ambakiti Táti ma engachi uáka jatsini.

6. Eska na arhijka Mateu 11:27, ¿nénajtsïni jarhuataskia Jeoba parachi ísï exeni komueska Táti ma engajtsïni xénchajka?

⁶ ¿Nénajtsïni jarhuataskia Jeoba parachi ísï exeni komueska Táti ma engajtsïni xénchajka? Ma ambe enga úka, jindesti eska Bibliarhu karakata pakaraska ambe enga xáni Jesusi úka ka uandani (arhinta je Mateu 11:27). Jesusi sési xarhataspti na enga jásïika Táti jemba, jimbosï úpti uandani: “Ima engarini exeka jíndeni, exesti Diosï Tátini” (Juanu 14:9). Jesusi uánikua xanhari uandaspti na enga Jeoba xarhataka eska ísïska komu Táti ma. Tʼámu Ebanjeliuecharhu, Jesusi, ma 165 xanhari arhispti Jeobani, Táti. ¿Andisï xáni uandapi Jeobaeri ambe? Jimboka uékasïrenga eskaksï kʼuiripuecha sési mítetini japiringa eska Jeoba Táti uékpiti máeska (Juanu 17:25, 26).

7. ¿Ambechi jorhenguarhisïni Jeobaeri ambe engachi exejka na enga kámapka imeri Uájpani?

⁷ Ju je exeni néna kámaspi Jeoba imeri Uájpani Jesusini ka ambejtsïni jorhendasïni imeri ambe. Tata Diosï méntkisï kurhauasïrendi imeri Uájperi kómarhikuechani ka ístu mókukuantaasïrendi (Juanu 11:41, 42). Jesusi méntkisï exespti eska Táti jemba xénchasïrenga ka jarhuatani ambe uéjki jimbo enga ima nitamakuarhini japiringa (Luk. 22:42, 43).

8. ¿Jeoba néna pendienti jarhaspi Jesusini jimbo?

⁸ Jesusi uandaspti eska imeri Tati íntskuspka tsípikua ka iámindu ambe enga uétarhinchenga para úni irekani. Ima uandaspti: “Jatsi[ska] tsípikua Imani jimbo” (Juanu 6:57). Jesusi kʼamakʼamasï mintsikaspti Jeobani ka ima íntskuspti iámindu ambe enga uétarhinchenga para úni irekani. Peru ambe enga sánderu jukaparhakueka, jindesti eska Jeoba jarhuataspka Jesusini paraka no méni jurajkupiringa (Mat. 4:4).

9. ¿Néna xarhataspi Jeoba eska xénchasïrenga Jesusini?

⁹ Jeoba xarhataspti eska jindeska Táti uékpiti ma, jimboka úspka eska Jesusi mítepiringa eska ima jarhuataxapka (Mat. 26:53; Juanu 8:16). Ísïsti, Jeoba no kuájchakuspti iámindu amberi enga úpiringa no sési úkuni Jesusini, peru kʼóru jarhuataspti paraka úpiringa tekaantani ambe enga xáni nitamakuarhipka. Jesusi mítespti eska ima ambe enga no sési úkupiringa, no jindepiringa para méntkisï (Ebr. 12:2). Jeoba xarhataspti eska pendienti jarhaspka Uájpani jimbo  jimboka kurhaasïrenga imeri kómarhikuechani, íntskusïrendi ambe enga uétarhinchenga, jorhendasïrendi ka jarhuatani (Juanu 5:20; 8:28). Iásï, ju je exeni néna pendienti jarhasïni Jeoba juchantsïni jimbo ísï eska na úpka Jesusini jimbo.

10. Eska na uandajka 1 Pedru 3:12, ¿nénajtsïni xarhatachesïni Jeoba eskajtsïni xénchasïnga?

¹⁰ Jeoba kurhauasïndi juchari kómarhikuechani (arhinta je 1 Pedru 3:12). Imajtsïni no arhisïndi eskachi iauani méni kómarhiaka, sánderu sési, pʼímarhisïndijtsïni parachi someni kómarhini (1 Tes. 5:17). Na uéjki jatini ka nani uéjkichi jarhani, uákachi janhanharhikua jingoni kómarhini juchari Tata Diosïni. Imajtsïni méntkisï jingontku kurhajchasïndi engachi kómarhijka. Ka engachi exejka eska ima meru kurhauasïnga juchari kómarhikuechani, niárasïngachi sánderu xénchani. Salmueri karari ma uandaspti: “Xénchasïnga Jeobani, jimboka ima kurhauasïnga juchiti uandakuechani” (Sal. 116:1).

11. ¿Néna mókuantasïni Jeoba juchari kómarhikuechani?

¹¹ Juchari Táti no solu kurhauasïndi juchari kómarhikuechani, ístu mókuantaasïndi. Apostuli Juanu uandasïndi “eska engachi kurhajkuarhiaka ma ambe eska ima na uékajka, imajtsïni kurhajchaaka” (1 Juanu 5:14, 15). Ísïsti, jamberijtsïni Jeoba no ísï mókuchentaati eskachi na erokuarhini japka. Jimboka ima míteska ambe enga sánderu sésika para jucha, ménisïjtsïni no íntskusïndi ambe engachi kurhakujka o ménisï uékasïndi eskachi erokuarhiaka ma tiempu (2 Kor. 12:7-9).

12, 13. ¿Nénajtsïni íntskusïni Jeoba ambe engachi uétarhinchajka?

¹² Jeobajtsïni íntskusïndi ambe engachi uétarhinchajka. Ima májkueni úsïndi eska na juramukuajka tátichani eskaksï uáka (1 Tim. 5:8). Ima íntsaasïndi imeri uájpechani ambe engaksï uétarhinchajka para úni irekani. No uékasïndi eskachi uandanhiauaka tʼirekua jimbo, xukuparhakua o nani engachi irekaaka (Mat. 6:32, 33; 7:11). Jimbokajtsïni ima xénchasïnga, ístu exestia ambe enga uáka sánderu orhepani parachi no ma ambe uétarhinchani.

¹³ Peru ambe enga sánderu jukaparhakueka, jindesti eskajtsïni jarhuatasïnga parachi ambakiti pájperakua ma jatsini imani jingoni. Imeri Karakata jimbojtsïni aiangusti ambe enga ísïka imeri ambe, ambe enga uéjka úni, andichisï irekani jaki ka ambe enga úkuarhiaka sánderu orhepani. Xarhataspti eskajtsïni uékasïrenga jarhuatani jiáni engachi uénapka míteni jurhimbikuani ka úraaspti juchari tátichani o máteru nemani parajtsïni imeri ambe jorhendani. Ka útasïjtsïni uékperakua jingoni jarhuataxati úrapariani kúnguarhikuarhu anapu orhejtsïkutichani ka máteru ambakiti erachichani. Ístu, jorhendasïndijtsïni tánguarhikuecha jimbo, nani engachi újka májku kʼéri jorhenguarhini juchari erachicha jingoni. Ini ambe jingoni ka ístu máteru ambe úparini, xarhatasïndi eska Táti máeska enga pendienti jarhajka iáminduechani jimbo (Sal. 32:8).

14. ¿Andijtsïnisï arhistachejki Jeoba ka néna úsïni?

¹⁴ Jeobajtsïni arhistachesïndi. Juchachi no májkueniska eska Jesusi jimbokachi pekadoriska. Ísï jimbo, parajtsïni arhistacheni, juchari Táti uékpitijtsïni jurhimberantasïndi jiáni enga uétarhijka. Imeri Karakatarhu uandasïndi eska ima “imanisï jurhimberajka néni enga xénchajka” (Ebr. 12:6, 7, TDU). Ka para ísï úni, mámaru ambe úrasïndi. Por ejemplu, ambe engachi Bibliarhu arhintaaka o ambe engachi tánguarhikuarhu kurhauaka, jarhuataatijtsïni exeni eskachi jatsiska para mójtakuni na engachi jámajka o eratseni. Ístu, Jeoba uáti orhejtsïkutichani úraani parajtsïni jarhuatani. Ambe uéjki úrani parajtsïni jurhimberantani, Jeoba méntkisï ísï úsïndi jimbokajtsïni xénchasïnga (Jer. 30:11).

15. ¿Nénajtsïni jarhuatasïni Jeoba?

¹⁵ Jeobajtsïni jarhuatasïndi tekaantani engachi tsʼéjkukuechani jatsiajka. Juchari Táti  auandarhu anapu pendienti jarhasïndi jiáni engachi no sési nitamakuarhini jarhajka ísï eska na újka táti ma enga xénchaajka imeri uájpechani. Imeri espiritu santu jingontsïni jarhuatasïndi parachi no méni jurajkuni imani (Luk. 11:13). Ístu, Jeobajtsïni jarhuatasïndi engachi no sési pʼikuarherani jarhajka. Por ejemplu, ambakiti erokuarhikuajtsïni ma íntskusïndi para sánderu orhepani ka i ambejtsïni jarhuatasïndi tekaantani uandanhiata ambe jimbo. Ju je eratseni ini ambe: ambe uéjkichi no sési nitamakuarhini, juchari Táti uékpiti sési péntaati iámindu ambe. Tsʼéjkukuechaksï niáraati kʼamakurhini, peru kóntperatecha engajtsïni Jeoba íntsauaka jindeuatiksï para méntkisï (2 Kor. 4:16-18).

16. ¿Ambe úkuarhispi enga Adani nóteru kurhajchapkia imeri Tátini?

¹⁶ Ma ambe enga xarhatajka na engajtsïni xáni xénchajka Jeoba jindesti ambe enga úpka jiáni enga Adani nóteru kurhajchapkia. Imani ambe jimbo enga Adani úpka, ima ka imeri uájpechaksï nóteru úsptia Jeobaeri familia jingoni kuenta úkuarhini (Rom. 5:12; 7:14). Peru Jeoba úspti ambe ma para Adaniri uájpechani jarhuataani.

17. ¿Ambe úspi Jeoba enga Adani nóteru kurhajchapkia?

¹⁷ Nájkiruka Jeoba kastigaripka Adanini, erokuarhikua ma íntsaaspti imeri uájpechani. Jirejiresï aiatspespti eskaksï imecha engaksï kurhajchapiringa, úpiringaksï ménderu Jeobaeri familia jingoni kuenta úkuarhini (Gén. 3:15; Rom. 8:20, 21). Ka úspti ísï úni Jesusiri uarhikua jimbo, imeri uájpa enga xáni xénchajka. Enga ísï íntspipka Jesusini, xarhataspti na engajtsïni xáni xénchajka (Juanu 3:16).

18. Nájkirukachi ma tiempu jurajkupka Jeobani, ¿andichisï uá seguru jarhani eskajtsïni ima ísï uékasïni komu imeri uájpecha?

¹⁸ Nájkirukachi no perfektueka, Jeoba uékasïndi eskachi imeri familia jingoni kuenta úkuarhiaka. Jamberichi úpiringa no sési pʼikuastani o jurajkuni ma tiempu, peru Jeoba méntkisï erokuarhisïndi eskachi k’uanhatsintaaka imani jingoni.  Jesusi uandantaspti uájperi ma enga ísku ambenharhijka tumina para xarhatani na engajtsïni xáni xénchajka Jeoba (Luk. 15:11-32). Táti jemba enga Jesusi úrapka uandantskuarhu, méntkisï eratsespti eska imeri uájpa kʼuanhatsentapiringa. Ka enga ísï úkuarhipka, ima kánikua tsípikua jingoni jióntaspti. Engachi ma tiempu jurajkupka Jeobani peruchi iásï moántania, uákachi seguru jarhani eskajtsïni juchari Táti tsípikua jingoni jióntaaka.

19. ¿Ambe uá Jeoba para sési péntani iámu ambe enga Adaniri kulpa jimbo úkuarhika?

¹⁹ Juchari Táti sési péntaati iámu ambe enga xáni no sési úkuarhika Adaniri kulpa jimbo. Enga ísï no kurhandipka, Jeoba erakuaspti 144,000 kʼuiripuechani parakaksï jindepiringa reicha ka saserdoticha auandarhu imeri Uájpa jingoni. Jimbanhi parhakpinirhu, Jesusi ka imecha engaksï imani jingoni juramuaka jarhuatauatiksï imechani engaksï kurhajchajka Jeobani paraksï perfektueni. Engaksï na xarhataakia eskaksï kurhajchasïnga Tata Diosïni jiáni engaksï últimu tsʼéjkunhaaka, Tata Diosï íntsauati tsípikua para méntkisï. Juchari Táti kánikua sési pʼikuarheraati enga exeaka eska iámu echerirhu, solu imeri uájpecha jauaka engaksï perfektueuaka. ¿A no eska kánikua ambakiti ambeuaka?

20. ¿Nénajtsïni xarhatacheskia Jeoba eskajtsïni kánikua xénchasïnga ka ambechi exea máteru jorhenguarhikua jimbo?

²⁰ Jeoba xarhatastia eskajtsïni kánikua xénchasïnga. Ima jindesti sánderu ambakiti Táti engachi uáka jatsini. Kurhauasïndi juchari kómarhikuechani ka íntskusïndijtsïni ambe engachi uétarhinchajka parachi úni irekani ka parachi no méni jurajkuni imani. Jarhuatasïndijtsïni ka arhistacheni. Ka ístu, ambakiti kóntperatechantsïni íntsauati sánderu orhepani. ¿A no eskajtsïni kánikua sési pʼikuastasïnga míteni eskajtsïni juchari Táti xénchasïnga ka pendienti jarhani juchantsïni jimbo? Máteru jorhenguarhikua jimbochi exeaka nénachi uá xarhatakuni Jeobani, komu imeri uájpecha, eskachi jukaparharasïnga na engajtsïni xáni xénchajka.