1. Omuntu akaba asemeriire kukora ki kusobora kubaza n’omukama wa Buperesi?

TERAMU akasisani n’oikara omu bukama bwa Buperesi nk’emyaka 2,500 enyuma. Oine ensonga ey’orukugonza kubaliza Omukama, nahabweki ogenda omu rubuga rwa Susani nambere omukama aikara. Baitu otakabalize n’omukama osemeriire kubanza kwikirizibwa, kandi kakuba olengaho kubaza nauwe otaikiriziibwe nosobora kwitwa!​—Es. 4:11.

2. Yahwe nagonza tumanye ki obukirukuhika ha kubaza nauwe?

² Mali kirungi muno ngu Yahwe tali nk’omukama wa Buperesi! Yahwe aine obusobozi bwingi n’amaani kukira abalemi b’abantu boona, baitu nitusobora kubaza nauwe obwire bwona. Tarukugonza tutiine kubaza nauwe. Ekyokurorraho, n’obukiraaba ngu Yahwe aine ebitiinisa bingi nk’Omuhangi wa Byona, Ow’obusobozi bwona, kandi Omulemi wa byona, nagonza obuturaaba nitubaza nauwe tumwete “Isitwe.” (Mat. 6:9) Mananu kwo nikitusemeza kukimanya ngu Yahwe nagonza tumwirre haihi!

3. Habwaki kihikire kweta Yahwe “Isitwe,” kandi nitwija kubazaaho ki omu kicweka kinu?

³ Kihikire kweta Yahwe Isiitwe, habwokuba nuwe ndugirro ey’obwomeezi. (Zab. 36:9) Kandi habwokuba nuwe Isiitwe, tusemeriire kumworobera. Kakuba tukora eby’aturagira, nitwija kutunga emigisa nyingi. (Baheb. 12:9) Emigisa egi n’etwarramu obwomeezi obutahwaho, omu iguru rundi omu nsi. Kandi tugasirwa muno n’omu kasumi kanu. Omu kicweka kinu nitwija kubazaaho ensonga ezirukugumya ngu Yahwe ali Isiitwe  ow’okugonza kandi n’ensonga habwaki nitukigumya ngu talituhemukira omu busumi obw’omu maiso. Baitu katubanze tubazeeho ensonga habwaki nitukigumya ngu Isiitwe ow’omu iguru n’atugonza muno kandi n’atufaaho.

4. Habwaki abantu abamu kibagumira kurora Yahwe nka Isebo?

⁴ Kikugumira kurora Ruhanga nka Isiitwe? Abantu abamu batekereza ngu tituli b’omugaso hali Yahwe habwokuba aine ekitiinisa kingi. Kandi bagurukyagurukya Ruhanga Ow’obusobozi bwona obwaraaba n’abafaaho. Baitu, Isiitwe ow’okugonza tarukugonza twehurre tuti. Akatuha obwomeezi kandi n’agonza tutunge enkoragana enungi nauwe. Hanyuma y’okubazaaho ensonga enu, omukwenda Paulo akasoborra abarukumuhuliriza omu Asene nagamba ati: ‘Tali hara n’omu wena haliitwe.’ (Eng. 17:24-29) Yahwe nagonza tubaze nauwe nk’oku omwana agonza kubaza n’omuzaire we arukumugonza kandi arukumufaaho.

5. Ekyokurorraho kya munyaanya itwe nikitwegesa ki?

⁵ Abantu abamu kibagumira kurora Yahwe nka Isebo habwokuba baise bo ab’omubiri bataboleke okugonza hamu n’embabazi. Tekerezaaho ebigambo bya munyaanya itwe omu. Nagamba ati: “Ise nyowe akambonabonesa muno, nahabweki obunatandikire kwega Baibuli, kikangumira muno kwirra haihi na Isenyowe ow’omu iguru. Baitu buli kimu kikahinduka obunatandikire kumanya kurungi Yahwe.” Naiwe nukwo orukwehurra oti? Obworaaba nukwo orukwehurra, kigumye ngu akasumi nikaija kuhika okyetegereze ngu Yahwe ali Isiitwe arukukirrayo kimu oburungi.

6. Kusigikirra ha Matayo 11:27, mulingo ki ogumu Yahwe ogw’atukonyire kumurora nka Isiitwe ow’okugonza?

⁶ Ebintu Yesu y’abalize n’ebiyakozere nugwo gumu ha miringo Yahwe akozeseze kutukonyera kumanya nk’oku ali Isiitwe ow’okugonza. (Soma Matayo 11:27.) Yesu akahondera ekyokurorraho kya Ise kikumi ha kikumi kandi enu niyo ensonga habwaki yagambire ati: “Anyakundozire nyowe, buli arozire Isenyowe.” (Yoh. 14:9) Yesu yaikaraga n’abazaaho obujunanizibwa Yahwe ahikiriza nka Isiitwe. Omu bitabu bbina eby’enjiri, Yesu akeeta Yahwe “Isiitwe” emirundi nka 165. Habwaki Yesu yabalizeeho muno Yahwe nka Isiitwe? Ensonga emu eri ngu, akaba nagonza kukonyera abantu kukigumya ngu Yahwe ali Isiitwe ow’okugonza.​—Yoh. 17:25, 26.

7. Omulingo Yahwe yatwaizeemu Omwana we nigutwegesa ki?

⁷ Tekerezaaho ebiturukwegera ha mulingo Yahwe yatwaizeemu Omwana we Yesu. Yahwe yahurraga esaara ze. Kandi tiyagarukiraga ha kuzihurra kwonka baitu yazigarukamuga. (Yoh. 11:41, 42) Omu kulengesebwa kwona Yesu okuyarabiremu akaba nakigumya ngu Ise n’amugonza kandi n’amusagika.​—Luk. 22:42, 43.

8. Yahwe akarolerra Yesu omu miringo ki?

⁸ Yesu akakyetegereza ngu Ise nuwe akaba ali ndugirrao y’obwomeezi bwe kandi nuwe y’amurolerraga, enu niyo nsonga habwaki y’agambire ati: “[Ninyomeera] habwa Isenyowe.” (Yoh. 6:57) Yesu akesigira kimu Ise Yahwe kandi Yahwe akamuha ebyetaago bye byona. Kukira muno Yahwe akafaaho ebyetaago bya Yesu eby’omwoyo.​—Mat. 4:4.

9. Yahwe akooleka ata ngu akaba ali Taata ow’okugonza kandi n’afaaho Yesu?

⁹ Yahwe nk’oku ali Ruhanga ow’okugonza akakonyera Yesu kukigumya ngu n’amusagika. (Mat. 26:53; Yoh. 8:16) N’obukiraaba ngu Yahwe akaikiriza Yesu kuhikwaho ebizibu ebimu, akamukonyera kubigumiisiriza. Yesu akaba akimanyire ngu akabi koona akakumuhikireho kaali katarukwija kuba ak’ebiro n’ebiro.  (Baheb. 12:2) Yahwe akooleka ngu nagonza Yesu kuraba omu kuhurra esaara ze, kumuha ebyetaago bye, kumutendeka, kandi n’okumusagika. (Yoh. 5:20; 8:28) Hati leka tubazeeho omulingo Isiitwe ow’omu iguru atwolekamu okugonza nk’okuyakwolekere Yesu.

10. Kusigikirra ha Zabuli 66:19, 20, Yahwe akyoleka ata ngu n’atugonza?

¹⁰ Yahwe ahurra esaara zaitu. (Soma Zabuli 66:19, 20.) Nagonza tumusabe emirundi nyingi, tutarukutiina kandi kumara obwire bwingi. (1 Bas. 5:17) Nitusobora kusaba Ruhanga omu mulingo ogw’ekitiinisa obwire bwona obuturukugonza, kandi hoona nambere tuli. Taburwa obwire obw’okuhurra esaara zaitu; baitu aikara ayetekaniize kuzihuliriza. Obutukyetegereza ngu Yahwe nahurra esaara zaitu, tweyongera kumwirra haihi. Omuhandiiki wa Zabuli akagamba ati: “Ningonza Mukama baitu, [ahurra] iraka lyange.”​—Zab. 116:1.

11. Yahwe agarukamu ata esaara zaitu?

¹¹ Isiitwe Yahwe tagarukira ha kuhurra esaara zaitu kwonka baitu azigarukamu. Omukwenda Yohana atugumya nagamba ati: “Obutusaba ekintu kyona nkokwagonza atuhurra.” (1 Yoh. 5:14, 15) Amananu gali ngu Yahwe asobora kugarukamu esaara zaitu omulingo tubaire tutarukunihira. Amanyire ebintu byonyini ebiturukwetaaga, baitu tukimanye ngu obwire obumu n’asobora kwanga kuhikiriza ekitumusabire rundi akagonza tubanze tulindeho.​—2 Kol. 12:7-9.

12-13. Yahwe akozesa miringo ki kutuha ebyetaago byaitu?

¹² Yahwe atuha ebyetaago byaitu. Akora eki kyonyini eky’arukunihirramu banyineka boona kukora. (1 Tim. 5:8) Afaaho ebyetaago by’omubiri eby’abaana be kandi tarukugonza tweralikirre habw’ebituraalya, eby’okujwara, rundi h’okwikara. (Mat. 6:32, 33; 7:11) Yahwe nk’oku ali muzaire ow’okugonza, akozere entekaniza ey’okutuha ebyetaago byaitu byona omu kasumi ak’omu maiso.

¹³ Kandi kukira muno, Yahwe atuha ebyetaago byaitu eby’omwoyo. Akozeseze Ekigambo kye, kutwoleka amananu agarukumukwataho, ekigendererwa kye, habwaki yatuhangire, kandi n’ebirabaho omu kasumi ak’omu maiso. Akooleka ngu natufaaho obuyatukonyire kwega amananu, nasobora kuba y’akozeseze omuzaire waitu rundi omwegesa ondi kutukonyera kumumanya. Kandi agumizaamu n’akozesa abagurusi, ab’oruganda n’abanyaanya itwe abakuzire omu by’omwoyo kutukonyera. Ekintu ekindi, Yahwe atwegeseza hamu n’aboruganda n’abyaanya itwe kuraba omu nsorrokano ez’ekitebe. Omu miringo enu hamu n’endi, Yahwe ayolekere ngu n’atugonza muno nk’oku taata agonza abaana be.​—Zab. 32:8.

14. Habwaki Yahwe atutendeka, kandi akikora omu mulingo ki?

¹⁴ Yahwe atutendeka. Titurukusisana na Yesu habwokuba tuli bantu abatahikiriire. Nahabweki, omulingo gumu Isiitwe Yahwe atutendekamu, nugwo ogw’okutuhana obukirukuba kisemeriire. Ekigambo kye nikitwijukya kiti: “Abo Yahwe ab’agonza nubo ahana.” (Baheb. 12:6, 7, NW) Yahwe atuhana omu miringo nyingi. Nk’ekyokurorraho, n’asobora kukozesa ekintu ekitusomere omu Kigambo kye rundi ekituhuliire omu nsorrokano kutuhabura. Obwire obumu, n’asobora kukozesa abagurusi b’ekitebe kutukonyera. Buli mulingo gwona Yahwe ogw’akozesa kutuhabura gusigikirra ha kugonza kwe.​—Yer. 30:11.

15. Yahwe atukonyera omu miringo ki?

¹⁵ Yahwe atukonyera kuraba omu bizibu. Nk’oku taata ow’okugonza akonyera abaana be kuraba omu bizibu, Isiitwe ow’omu iguru nauwe atukonyera obutuba nituraba  omu kulengesebwa. Akozesa omwoyo gwe ogurukwera kutulinda nukwo enkoragana yaitu nauwe etasisikara. (Luk. 11:13) Yahwe atukonyera obutuba tuhoirwemu amaani. Ekyokurorraho, atuhaire okunihira okurungi muno. Okunihira kunu okurukukwata ha busumi obw’omu maiso kutukonyera kugumira ebizibu. Tekerezaaho kinu: Isiitwe ow’okugonza naija kutuhuumuza kandi tweberwe kimu obusaasi bwona obutwatungire. Ebizibu byona ebiturukutunga omu kasumi kanu tibirukwija kwikaraho, baitu emigisa Yahwe ey’alituha niija kuba y’ebiro n’ebiro.​—2 Kol. 4:16-18.

16. Kiki ekyabaireho Adamu obuyajemiire Ise ow’okugonza?

¹⁶ Yahwe ekiyakozere hanyuma ya Adamu kusiisa, bwakaiso oburukugumya ngu Yahwe n’atugonza muno. Adamu obuyajemiire Ise ow’omu iguru, akafeerwa omugisa ogw’okuba omu h’abaana ba Yahwe kandi yafereeza n’abaijukuru be omugisa gunu. (Bar. 5:12; 7:14) Baitu Yahwe akacwamu kukonyera abaijukuru ba Adamu.

17. Kiki Yahwe ekiyakozere aho naaho hanyuma ya Adamu kumujeemera?

¹⁷ Yahwe akafubira Adamu, baitu akaraganiza kukonyera abaijukuru be. Aho naaho akaraganiza ngu abantu abarukumworobera nibaija kwikirizibwa kugaruka omu ka ye. (Kub. 3:15; Bar. 8:20, 21) Yahwe akahikiriza omurago gunu nasigikirra ha kicunguro ky’Omwana we Yesu ow’agonza muno. Obuyahaireyo Omwana we kutucungura, kikoolekera kimu ngu n’atugonza muno.​—Yoh. 3:16.

18. Habwaki nitukigumya ngu Yahwe n’atugonza nk’abaana be, n’obukiraaba ngu tuhabire kuruga haliwe?

¹⁸ N’obuturaaba tutahikiriire, Yahwe nagonza tube kicweka ky’eka ye, kandi taturora nk’omugugu. Nitusobora kumusaaliza rundi kuhaba habw’akasumi kake, baitu Yahwe aikara  nanihira ngu nitwija kugaruka haliwe. Yesu akoleka okugonza okwa Yahwe ainiire abaana be omu kyokurorraho eky’omwana ay’azahire. (Luk. 15:11-32) Ise omwana onu akaikara nanihira ngu omwana we alihika agaruke. Mutabani we onu obuyagarukire omu ka, Ise akamutangirra. Kakuba tuhaba tukaruga hali Yahwe baitu tukegarukamu, tukimanye ngu Isiitwe ow’okugonza ayetekaniize kututangirra.

19. Yahwe naija kusemeza ata buli kimu kyona ekyaleserwe okusiisa kwa Adamu?

¹⁹ Isiitwe Yahwe naija kusemeza buli kimu kyona eky’aleserwe okusiisa kwa Adamu. Hanyuma ya Adamu kujeema, Yahwe akacwamu kukoma abantu 144,000 kuruga omu nsi kuheereza nk’abakama kandi nk’abanyakatagara omu iguru hamu n’Omwana we. Yesu hamu naabarukulema nabo nibaija kukonyera abantu abahulizi kufooka abahikiriire omu ensi empyaka. Hanyuma y’okuraba ha kulengesebwa okw’okumalirra okuragumya ngu nibamworobera, Ruhanga naija kubaha obwomeezi obutahwaho. Isiitwe naija kusemererwa muno kurora ensi ijwire batabani be n’abahara be abahikiriire. Ako kaliba kasumi akarungi muno!

20. Miringo ki Yahwe ayolekeremu ngu n’atugonza muno, kandi ekicweka ekirukwongeraho nikiija kubazaaho ki?

²⁰ Yahwe atwolekere ngu natugonza muno. Kandi nuwe Isiitwe arukukirayo kimu oburungi. Ahurra okusaba kwaitu kandi atuha ebyetaago byaitu eby’omubiri hamu n’eby’omwoyo. Atutendeka kandi atukonyera kuraba omu bizibu. Kandi atutekaniriize ebirungi bingi omu kasumi ak’omu maiso. Mali nikitusemeza muno kukimanya ngu Isiitwe n’atugonza muno kandi n’atufaaho! Ekicweka ekirukwongeraho nikiija kubazaaho omulingo itwe nk’abaana be tusobora kwoleka ngu nitumusiima habw’okugonza okw’atwoleka.