1. Kasi munthu wakeneranga kuchita wuli pambere wandakumane na themba la Peresiya?

TIYELEZGERE kuti mukaŵako ku Peresiya vyaka 2,500 ivyo vyajumpha. Mukukhumba kuyowoyeskana na themba la charu ichi nkhani yinyake, ntheura mukuluta ku msumba wa Shushani uko themba likukhala. Kweni pambere mundakumane nalo themba mukwenera kuzomerezgeka dankha. Chifukwa para mulutenge waka kwambura kuzomerezgeka, mungakakomeka.—Est. 4:11.

2. Kasi Yehova wakukhumba kuti tijipulikenge wuli para tikuyowoyeskana nayo?

² Tikuwonga chomene chifukwa Yehova wali nga ni themba la Peresiya yayi. Yehova ngwankhongono chomene kweniso ngwakuzirwa kujumpha ŵawusi wose ŵa ŵanthu, kweni tingayowoyeskana nayo nyengo yiliyose. Iyo wakukhumba kuti tiŵenge ŵakufwatuka kuyowoyeskana nayo. Mwachiyelezgero, nangauli Yehova wali na mazina gha vithokozo, nga Mlengi Mukuru, Wankhongonozose, na Fumu Yikuru, kweni iyo wakukhumbaso kuti timuchemenge waka na zina lipusu lakuti “Dada.” (Mat. 6:9) Ntchakukondweska chomene kuti Yehova wakukhumba kuti tijipulikenge kuti tili paubwezi na iyo.

3. Chifukwa wuli ntchakwenelera kuchema Yehova kuti “Dada,” ndipo tiwonenge vichi mu nkhani iyi?

³ Ntchakwenelera kuchema Yehova kuti “Dada” chifukwa ndiyo Chisimi cha umoyo withu. (Sal. 36:9) Pakuŵa Dada withu tikwenera kumupulikira. Para tikuchita ivyo iyo wakukhumba tizamusanga vitumbiko vinandi. (Heb. 12:9) Vinyake mwa vitumbiko ivi, mbumoyo wamuyirayira, kwali nkhuchanya panji pa charu chapasi. Kweniso pasono tikusanga vyandulo. Mu nkhani iyi, tiwonenge umo Yehova wakulongolera kuti ni Dada wachitemwa pasono.  Kweniso tiwonenge chifukwa icho tikwenera tikugomezgera kuti wazamutilekapo yayi. Kweni chakwamba, tiyeni tiwone dankha chifukwa icho tikugomezgera kuti Adada ŵithu ŵakuchanya ŵakutitemwa chomene ndipo ŵakukhumba kutovwira.

4. Chifukwa wuli ŵanyake vikuŵasuzga kuwona Yehova kuti ni Dada wawo?

⁴ Kasi imwe vikumusuzgani kuwona Chiuta kuti ni Dada winu? Ŵanyake ŵakuwona kuti Yehova ni Mukuru chomene ndipo ise tili ŵambura kuzirwa kwa iyo. Ŵakukayika kuti Chiuta Wankhongonozose wakughanaghanira waliyose payekha. Kweni Dada withu wachitemwa wakukhumba yayi kuti tijipulikenge nthena. Iyo wali kutipa umoyo ndipo wakukhumba kuti tiŵe nayo paubwezi. Mpositole Paulosi wakalongosolera awo ŵakamutegherezganga ku Ateni kuti Yehova “wali kutali yayi na waliyose wa ise.” (Mil. 17:24-29) Chiuta wakukhumba kuti waliyose wa ise wayowoyeskanenge nayo nga umo mwana wakuchitira kwa mupapi wake wachitemwa.

5. Kasi tikusambirako vichi kwa mudumbu munyake?

⁵ Ŵanyake vingaŵasuzga kuwona Yehova kuti ni Dada wawo chifukwa chakuti ŵadada ŵawo ŵakuthupi ŵakachitanga nawo vinthu mwalusungu yayi. Wonani ivyo wakayowoya mudumbu munyake. Iyo wakati: “Adada ŵane ŵakaŵa ŵankhaza chomene. Nkhati namba kusambira Baibolo, chikaniŵira chakusuzga kujipulika kuti nili pafupi na Adada ŵakuchanya. Kweni nati namumanya makora Yehova, vyose vikasintha.” Kasi namwe muli kujipulikapo nthena? Usange ni nthena, kugongowa yayi. Para nyengo yajumphapo, namwe mwambenge kuwona kuti Yehova ni Dada muwemi chomene.

6. Kuyana na Mateyu 11:27, kasi ni nthowa wuli yimoza iyo Yehova watovwilira kuti timuwonenge kuŵa Dada withu wachitemwa?

⁶ Nthowa yimoza iyo Yehova watovwilira kuti timuwonenge kuŵa Dada withu wachitemwa njakuti wali kuzomerezga kuti ivyo Yesu wakayowoya na kuchita vilembeke mu Baibolo. (Ŵazgani Mateyu 11:27.) Yesu wakayezganga Adada ŵake mwakuti wakayowoya kuti: “Waliyose uyo wawona ine wawona na Adada wuwo.” (Yoh. 14:9) Kanandi Yesu wakayowoyanga kuti Yehova ni Dada. Mu mabuku ghanayi pera gha Makani Ghawemi, Yesu wakazunura mazgu ghakuti “Dada,” kung’anamura Yehova, mu malo 165. Chifukwa wuli kanandi Yesu wakayowoyanga vya Yehova? Chifukwa chimoza ntchakuti wakakhumbanga kuti ŵanthu ŵamanye kuti Yehova ni Dada wachitemwa.—Yoh. 17:25, 26.

7. Kasi tikusambirako vichi kwa Yehova pa umo wakachitiranga vinthu na Mwana wake?

⁷ Wonani ivyo tikusambirako kwa Yehova pa umo wakachitiranga vinthu na Mwana wake, Yesu. Nyengo zose Yehova wakapulikanga na kuzgora malurombo gha Yesu. (Yoh. 11:41, 42) Nangauli Yesu wakasangananga na masuzgo ghanandi kweni nyengo zose wakawonanga kuti Adada ŵake ŵakumutemwa na kumovwira.—Luka 22:42, 43.

8. Kasi Yehova wakamovwiranga wuli Yesu?

⁸ Yesu wakazomerezga kuti Adada ŵake ndiwo ŵakamovwiranga kuti walutilire kuŵa na umoyo. Iyo wakati: “Nili wamoyo chifukwa cha Adada.” (Yoh. 6:57) Yesu wakagomezganga chomene Adada ŵake, ndipo Yehova wakamupa vyose vyakukhumbikwira kuti walutilire kuŵa wamoyo. Kweni chakuzirwa chomene ntchakuti Yehova wakamovwiranga Yesu kuti walutilire kuŵa wakugomezgeka kwa iyo.—Mat. 4:4.

9. Kasi Yehova wakalongora wuli kuti wakamutemwanga chomene Yesu?

⁹ Chifukwa chakuti Yehova ni Dada wachitemwa, wakakhumbanga kuti Yesu wamanyenge kuti wamovwirenge. (Mat. 26:53; Yoh. 8:16) Nangauli ni nyengo zose yayi apo Yehova wakavikiliranga Yesu ku vinthu ivyo vingamupweteka, kweni wakamovwiranga kuzizipizga viyezgo.  Yesu wakamanyanga kuti masuzgo ghose agho wakasangananga nagho ngakanyengo waka. (Heb. 12:2) Yehova wakalongora kuti wakamutemwanga Yesu, mwakumutegherezga para wakulomba, kumupa vyakukhumbikwa, kumusambizga na kumovwira. (Yoh. 5:20; 8:28) Sono tiyeni tiwone umo Adada ŵithu ŵakuchanya ŵakutovwilira nga umo ŵakachitiranga na Yesu.

10. Kuyana na Salimo 66:19, 20, kasi Yehova wakulongora wuli kuti wakutitemwa?

¹⁰ Yehova wakutegherezga para tikulomba. (Ŵazgani Salimo 66:19, 20.) Iyo wali kutiŵikira mphaka yayi pa nkhani ya kulomba kweni wakutichiska kuti nyengo zose tilombenge. (1 Tes. 5:17) Ntheura tingalomba kwa Chiuta withu nyengo yiliyose, kweniso kulikose uko tingaŵa. Iyo nyengo zose ngwakunozgeka kutegherezga malurombo ghithu. Para tamanya kuti Yehova wakutegherezga malurombo ghithu tikwamba kumutemwa chomene. Wamasalimo wakayowoya kuti: “Nkhutemwa Yehova Chifukwa wakupulika lizgu lane.”—Sal. 116:1.

11. Kasi Yehova wakuzgora wuli malurombo ghithu?

¹¹ Adada ŵithu ŵakupulika malurombo ghithu kweniso ŵakutizgora. Mpositole Yohane wakutisimikizgira kuti: “Kanthu kalikose ako tingalomba mwakuyana na khumbo [la Chiuta], wakutipulika.” (1 Yoh. 5:14, 15) Ndipouli, nyengo zinyake Yehova wangazgora malurombo ghithu munthowa iyo takhazganga yayi. Iyo wakumanya icho ntchakukhumbikwa nadi kwa ise, ntheura nyengo zinyake wangatizgora yayi panji wangakhumba kuti tilindilirepo.—2 Kor. 12:7-9.

12-13. Kasi Yehova wakutipa ivyo tikukhumbikwira munthowa wuli?

¹² Yehova wakutipa ivyo tikukhumbikwira. Wakuchita ivyo dada waliyose wakwenera kuchita. (1 Tim. 5:8) Wakuŵapa ŵana ŵake vyakukhumbikwa pa umoyo. Wakukhumba yayi kuti tenjerwenge pa nkhani ya chakurya, vyakuvwara, na pakukhala. (Mat. 6:32, 33; 7:11) Pakuti Yehova ni Dada wachitemwa, wakuwoneseska kuti tizakasange ivyo tizamukhumbikwira munthazi.

¹³ Chakuzirwa chomene ntchakuti Yehova wakutovwira mwauzimu. Kwizira mu Baibolo, wali kutivumbulira unenesko wakukhwaskana na iyo, khumbo lake, chifukwa icho wakatilengera, kweniso ivyo wachitenge munthazi. Kweniso wakalongora kuti wakughanaghanira waliyose payekha panyengo iyo tikasambiranga unenesko kuti timumanye makora, kwali nkhwizira mwa ŵapapi ŵithu panji munthu munyake. Ndipo wakulutilira kutisambizga kwizira mu ŵalara ŵa mpingo kweniso ŵabali na ŵadumbu ŵakukhwima mwauzimu. Yehova wakutisambizgaso kwizira ku maungano gha mpingo uko tikusambilira lumoza na ŵabali na ŵadumbu ŵithu. Mu vyose ivi na vinyake, Yehova wakulongora kuti ni Dada withu wachitemwa.—Sal. 32:8.

14. Chifukwa wuli Yehova wakutisambizga, ndipo wakuchita wuli nthena?

¹⁴ Yehova wakutisambizga. Mwakupambanako na Yesu, ise ndise ŵambura kufikapo. Ntheura kuti watisambizge, Yehova wakutilanga usange ntchakukhumbikwa. Mazgu ghake ghakutikumbuska kuti: “Yehova wakulanga awo wakuŵatemwa.” (Heb. 12:6, 7) Yehova wakutilanga munthowa zakupambanapambana. Mwachiyelezgero, tingaŵazga fundo yinyake mu Baibolo panji kupulika fundo yinyake pa maungano ndipo tingawona kuti tikukhumbikwira kusintha kaghanaghaniro kithu panji umo tikuchitira vinthu. Ndipo nyengo zinyake wovwiri uwo tingakhumbikwira ŵangatipa mbalara. Mulimose umo wovwiri ungizira, kweni tikwenera kumanya kuti Yehova wakutilanga chifukwa chakuti wakutitemwa.—Yer. 30:11.

15. Kasi Yehova wakutovwira wuli?

¹⁵ Yehova wakutovwira kuzizipizga viyezgo. Nga umo dada wachitemwa wakovwilira ŵana  ŵake para ŵasangana na masuzgo, Dada withu wakuchanya nayo wakutovwira mu nyengo za masuzgo. Wakutovwira na mzimu utuŵa kuti tilutilire kuŵa nayo paubwezi. (Luka 11:13) Kweniso Yehova wakutovwira para tagongowa. Mwachiyelezgero, wali kutipa chilindizga chiwemi chomene. Chilindizga cha munthazi ichi chikutovwira kuti tizizipizgenge masuzgo. Ghanaghanirani fundo iyi: Nanga tingaŵa kuti tasangana na masuzgo wuli, Adada ŵithu ŵachitemwa ŵazamumazga masuzgo ghose agho tikusangana nagho. Tikwenera kukumbuka kuti masuzgo agho tikusangana nagho sono ngakanyengo kweni ivyo Yehova wakutipa ni vyamuyirayira.—2 Kor. 4:16-18.

16. Kasi chikachitika ntchivichi Adamu wati wagalukira Yehova?

¹⁶ Tikumanya kuti Yehova wakutitemwa para taghanaghanira ivyo wakachita Adamu wati wananga. Adamu wati wagaluka wakaŵaso mu mbumba ya Yehova yayi kusazgapo na ŵana ŵake wuwo. (Rom. 5:12; 7:14) Nangauli vikaŵa nthena, kweni Yehova wakachita chinthu chinyake kuti wawovwire ŵana ŵa Adamu.

17. Kasi Yehova wakachita wuli Adamu wati wagaluka waka?

¹⁷ Yehova wakamulanga Adamu, kweni wakalayizga kuti wawovwirenge ŵana ŵa Adamu. Nyengo yeneyiyo wakalayizga kuti ŵanthu ŵakupulikira wazamuŵawezgera mu mbumba yake. (Gen. 3:15; Rom. 8:20, 21) Kuti wachite nthena, Yehova wakanozga kupeleka umoyo wa Mwana wake wakutemweka Yesu, kuŵa sembe. Yehova wakalongora kuti wakutitemwa chomene pakupeleka mwana wake kuti watiwombore.—Yoh. 3:16.

18. Chifukwa wuli tingaŵa na chigomezgo chose kuti Yehova wangatipokelera kuŵaso ŵana ŵake nanga tingapuluka?

¹⁸ Nangauli ndise ŵambura kufikapo, kweni Yehova wakukhumba kuti tiŵe mu mbumba yake ndipo wakughanaghanako yayi kuti wakutaya  waka nyengo kutovwira. Nyengo zinyake tingamukhuŵazga Yehova panji tingapuluka, kweni nyengo zose wakukhazga kuti tiwelerengeso kwa iyo. Yesu wakayowoya ntharika ya mwana wakuzgeŵa kuti walongore umo Yehova wakutemwera ŵana ŵake. (Luka 15:11-32) Mu ntharika iyi dada wakalekapo yayi kugomezga kuti mwana wake wazamuwelera. Mwana wake wakati wawelera kunyumba, dada wakakondwa chomene ndipo wakamupokelera. Usange nase tapuluka kweni tasintha, tingaŵa na chigomezgo chose kuti Dada withu wachitemwa ngwakunozgeka kutipokelera.

19. Kasi Yehova wazamumazga wuli masuzgo agho ghali kwamba chifukwa cha Adamu?

¹⁹ Yehova wazamumazga masuzgo ghose agho ghali kwamba chifukwa cha Adamu. Adamu wati wagaluka, Yehova wakanozga kuti wasore ŵanthu 144,000 kufuma pa charu chapasi kuti ŵakaŵe mafumu na ŵasembe kuchanya pamoza na Mwana wake. Yesu pamoza na awo wazamuwusa nawo ŵazamovwira ŵanthu ŵakupulikira kuti ŵaŵe ŵakufikapo. Para ŵazakajumpha pa chiyezgo chaumaliro, Chiuta wazamuŵapa umoyo wamuyirayira. Ndipo Adada ŵithu ŵakuchanya ŵazamukondwa chomene kuwona kuti charu chapasi chazura na ŵanthu ŵakufikapo. Iyi yizamuŵa nyengo yakukondweska chomene.

20. Kasi Yehova walongora wuli kuti wakutitemwa chomene, ndipo tizamudumbiskana vichi mu nkhani yakulondezgapo?

²⁰ Yehova walongora kuti wakutitemwa chomene. Nakuti ni Dada muwemi chomene. Wakupulika malurombo ghithu ndipo wakutovwira mwauzimu na mwakuthupi wuwo. Wakutisambizga na kutovwira. Kweniso wazamutichitira vinthu viwemi chomene munthazi. Tikukondwa chomene kumanya kuti Adada ŵithu ŵakutitemwa chomene ndipo ŵakutipwelelera. Mu nkhani yakulondezgapo, tizamudumbiskana nthowa izo ise pakuŵa ŵana ŵawo tingalongolera kuti tikuwonga chitemwa chawo.