1. I tahito, eaha te titauhia ia rave no te farerei i te arii no Peresia?

 A FERURI na te ora ra outou i Peresia a 2 500 matahiti i teie nei. Te hinaaro ra outou e paraparau i te arii, tere atura outou i te oire Susana. E titauhia râ ia farii te arii i te farerei ia outou. Ia ore, e nehenehe outou e haapohehia!—Ese. 4:11.

2. Eaha to tatou huru a ite ai te hinaaro ra Iehova ia faafatata tatou ia ˈna?

² Auaa e ere Iehova mai te mau arii no Peresia! Mea teitei aˈe o ˈna i te mau faatere taata, ua ineine noa râ o ˈna i te farii maitai mai ia tatou! Te hinaaro ra Iehova ia faafatata tatou ia ˈna. Noa ˈtu o Iehova te Atua poiete, Manahope e te Arii hau ê, te titau manihini mai ra o ˈna ia pii ia ˈna ei “Metua.” (Mat. 6:9) Auê te mahanahana te titau mai ra Iehova ia faafatata ia ˈna e ia faariro ia ˈna ei Metua no tatou!

3. No te aha mea tano ia parau e “Metua” Iehova no tatou e eaha ta tatou e hiˈopoa i roto i teie haapiiraa?

³ E “Metua” iho â Iehova no tatou, o ˈna hoi te tumu o to tatou ora. (Sal. 36:9) Na nia i to ˈna tiaraa Metua, e titauhia ia tatou ia faaroo ia ˈna. Ia rave tatou i ta ˈna e ani mai ra, e haamaitairaa faahiahia mau ta tatou e fanaˈo. (Heb. 12:9) E nehenehe atoa e noaa ia tatou te ora mure ore i te raˈi aore ra i nia i te fenua. I roto i teie haapiiraa, e hiˈopoa tatou i ta Iehova e rave ra i teie nei â no te haapapu e Metua î i te here o ˈna o te ore roa e faarue ia tatou.  Na mua râ, e hiˈo anaˈe eaha te haapapu ra te here e te aupuru maite ra to tatou Metua i te raˈi ia tatou.

4. No te aha mea fifi no vetahi ia farii e Metua Iehova no ratou?

⁴ Mea fifi anei no outou ia farii e Metua Iehova no outou? Te manaˈo nei vetahi mea haihai e mea faufaa ore ratou i te aro o te Atua teitei. No ratou, mea fifi ia farii te tâuˈa ra te Atua Manahope i te taata tataitahi. Auê to tatou Metua î i te here i te peapea ia manaˈo te taata mai tera! Na ˈna hoi i ho mai i te ora e te titau mai ra oia ia faafatata ia ˈna! Ua faataa te aposetolo Paulo i tera manaˈo faufaa i te feia no Ateno. No reira oia i parau ai ia ratou i muri iho, “aita hoi [Iehova] i atea ia tatou tataitahi.” (Ohi. 17:24-29) Te hinaaro ra te Atua ia faafatata tatou ia ˈna mai te hoê tamarii o te imi i te rima aupuru o to ˈna metua î i te here.

5. Eaha te haapiiraa e huti mai i te hiˈoraa o te tahi tuahine?

⁵ Mea fifi atoa no vetahi ia farii e Metua Iehova no ratou no te mea aita to ratou iho metua tane i faaite atu i te here. Te faataa ra te tahi tuahine: “E taata ino roa to ˈu metua tane. I to ˈu haamataraa i te haapii i te Bibilia, mea fifi roa no ˈu ia farii e Metua to tatou i te raˈi. Tera râ, i to ˈu taa-maitai-raa i te huru o Iehova, ua taui roa to ˈu manaˈo.” Tera atoa anei to outou huru? Mai te peu e e, e nehenehe outou e taui a farii atu ai o Iehova te Metua maitai roa ˈˈe!

6. Ia au i te Mataio 11:27, mea nafea Iehova i te haapapuraa mai e Metua î i te here o ˈna?

⁶ Ua haapapai Iehova i te mau parau e ohipa a Iesu i roto i te Bibilia ia papu ia tatou e Metua î i te here o ˈNa. (A taio i te Mataio 11:27.) Ua faaite Iesu ma te tia roa i te huru o to ˈna Metua, ua tae roa oia i te parau: “O tei ite mai ia ˈu, ua ite atoa ïa i te Metua.” (Ioa. 14:9) Pinepine Iesu i te faahiti e Metua o Iehova. I roto noa i na evanelia e maha, hau atu i te 165 taime to Iesu faahitiraa i te parau “Metua” no Iehova. No te aha? Te tahi tumu, ia papu i te taata e Metua î i te here o Iehova.—Ioa. 17:25, 26.

7. Eaha ta tatou e haapii mai na roto i to Iehova huru i nia i ta ˈna Tamaiti?

⁷ A feruri na i to Iehova huru i nia i ta ˈna Tamaiti. Ua faaroo e ua pahono noa Iehova i te mau pure a Iesu. (Ioa. 11:41, 42) Noa ˈtu eaha te ati ta ˈna i faaruru, ua papu maitai ia Iesu eita to ˈna Metua î i te here e faarue ia ˈna.—Luka 22:42, 43.

8. Mea nafea Iehova i te aupururaa ia Iesu?

⁸ Ua ite Iesu o to ˈna Metua te Tumu o to ˈna ora e na ˈna atoa e aupuru ra ia ˈna. No reira Iesu i na ô ai: “Te ora ra vau maoti te Metua.” (Ioa. 6:57) Ua tiaturi papu Iesu i to ˈna Metua e ua aupuru iho â Iehova i ta ˈna Tamaiti i te pae tino e hau roa ˈtu â i te pae varua.—Mat. 4:4.

9. Mea nafea Iehova i te haapapuraa e Metua î i te here o ˈna no Iesu?

⁹ Ua hinaaro Iehova ia papu ia Iesu eita roa to ˈna Metua î i te here e faarue ia ˈna. (Mat. 26:53; Ioa. 8:16) Aita Iehova i paruru ia Iesu i te mau fifi atoa, ua tauturu noa râ oia ia ˈna ia faaoromai tamau. Ua ite Iesu no te hoê taime poto noa te ati. (Heb. 12:2) Ua haapapu râ Iehova e here noa oia ia Iesu ma te faaroo, ma te aupuru, ma te haapii e ma te turu ia ˈna. (Ioa. 5:20; 8:28) I teie nei, e hiˈopoa anaˈe e nafea to tatou Metua i te raˈi e na reira atoa ˈi no tatou.

10. Ia au i te Salamo 66:19, 20, eaha te tahi haapapuraa mea here na Iehova ia tatou?

¹⁰ E faaroo Iehova i ta tatou mau pure. (A taio i te Salamo 66:19, 20.) Aita Iehova i horoa i te tahi mau taotiaraa no te pure ia ˈna! (Tes. 1, 5:17) E nehenehe tatou e faafatata ia ˈna i te mau taime e vahi atoa. Ua ineine noa o ˈna i te faaroo maite ia tatou. E rahi noa ˈtu â to tatou here ia ˈna ia mauruuru tatou i te faanahoraa faahiahia mau o te pure! Ua parau roa te tahi papai salamo: “E hinaaro rahi to ˈu ia Iehova, o tei faaroo mai i tau reo.”—Sal. 116:1.

11. E nafea Iehova ia pahono i ta tatou mau pure?

¹¹ Eita noa to tatou Metua e faaroo i ta tatou mau pure, e pahono atoa râ oia i te reira. Ua haapapu te aposetolo Ioane: “Noa ˈtu eaha ta tatou e ani ia au i to [te Atua] hinaaro, e faaroo mai o ˈna.” (Ioa. 1, 5:14, 15) Eita paha Iehova e pahono i ta tatou pure mai ta tatou i manaˈo. O ˈna tei ite eaha te mea maitai roa ˈˈe no tatou. Ia ani tatou i te hoê mea, e pahono mai paha Iehova aita. Area i te tahi atu taime, e hinaaro o ˈna ia tiai rii tatou.—Kor. 2, 12:7-9.

12-13. E nafea to tatou Metua i te raˈi e aupuru ai ia tatou?

¹² E aupuru Iehova ia tatou. Te amo maite ra Iehova i te mau hopoia atoa a te hoê metua tane. (Tim. 1, 5:8) Te horoa ra o ˈna i te mau mea atoa e hinaarohia e ta ˈna mau tamarii. Aita o ˈna e hinaaro ra ia haapeapea tatou no te maa, te ahu e te nohoraa. (Mat. 6:32, 33; 7:11) Ei Metua î i te here, ua faaineine atoa Iehova i te mau mea atoa no te haamâha i to tatou mau hinaaro a muri aˈe.

¹³ Te mea faufaa roa ˈtu â, te aupuru ra Iehova ia tatou i te pae varua. Na roto i ta ˈna Parau, ua faaite mai Iehova i te parau mau no nia ia ˈna, ta ˈna opuaraa, te tumu e ora ˈi tatou i nia i te fenua e eaha te tiai mai ra a muri aˈe. Ua faaite mai Iehova i to ˈna here ia tatou tataitahi i te haamataraa tatou i te haapii i te parau mau. Ua faaohipa oia i to tatou mau metua aore ra i te tahi taata poro no te tauturu ia tatou ia ite o vai o ˈna. Mai reira mai, ua tauturu-noa-hia tatou e te mau matahiapo î i te here o te amuiraa, oia atoa e te tahi atu mau taeae e tuahine feruriraa paari. Na roto i te mau putuputuraa, te tamau atoa nei Iehova i te haapii ia tatou e te tahi atu mau mero o to ˈna utuafare fetii. E ere anei Iehova i te Metua o te aupuru maite ra i to ˈna utuafare?—Sal. 32:8.

14. No te aha e e nafea Iehova e aˈo ai ia tatou?

¹⁴ E haapii Iehova ia tatou. No to tatou huru tia ore, e titauhia i to tatou Metua î i te here ia aˈo, aore ra ia haapii, ia tatou. Te haamanaˈo mai ra ta ˈna Parau: “E aˈo hoi Iehova i te feia mea here na ˈna.” (Heb. 12:6, 7) Ua rau te raveraa a Iehova no te aˈo ia tatou. E na reira paha o ˈna na roto i te hoê irava Bibilia, te hoê putuputuraa aore ra te mau matahiapo. Noa ˈtu eaha te raveraa ta Iehova e faaohipa, e tamau o ˈna i te aˈo ia tatou na roto i te here.—Ier. 30:11.

15. E nafea Iehova e tauturu ai ia tatou i roto i te ati?

¹⁵ E tauturu Iehova ia tatou i roto i te ati. Mai te hoê metua e aupuru i ta ˈna tamarii e fifi ra, eita to tatou Metua i te raˈi e faarue ia tatou i roto i te ati. E horoa mai oia i to ˈna varua moˈa ia ore tatou ia  atea ê ia ˈna. (Luka 11:13) Eita Iehova e faarue ia tatou ia hepohepo tatou. E horoa mai râ oia i te hoê tiaturiraa faahiahia o te tauturu mai ia faaoromai tamau. Noa ˈtu eaha te fifi aore ra ati ta tatou e faaruru, e faaore roa to tatou Metua î i te here i te mau mea atoa o te haamauiui ia tatou. E haamanaˈo anaˈe, no te hoê taime poto noa te ati, area te mau haamaitairaa a Iehova, mea mure ore ïa!—Kor. 2, 4:16-18.

16. Eaha te faahopearaa a faaroo ore ai Adamu i to ˈna Metua î i te here?

¹⁶ Ua haapapu atoa Iehova i to ˈna here ia tatou na roto i te ohipa ta ˈna i rave i te taime matamua a fifi ai to ˈna utuafare fetii i nia i te fenua. I to ˈna faaroo-ore-raa i to ˈna Metua i te raˈi, ua ere Adamu i to ˈna parahiraa i roto i te utuafare oaoa o Iehova. Ua ere atoa râ to ˈna huaai! (Roma 5:12; 7:14) Eaha ïa ta Iehova i rave?

17. I muri aˈe i to Adamu faaroo-ore-raa, eaha ta Iehova i fafau oioi?

¹⁷ Ua faautua Iehova ia Adamu e ua horoa atoa i ta ˈna huaai tamarii i te hoê tiaturiraa. Ua fafau oioi Iehova e riro faahou mai te feia o te faaroo i te Atua ei mero o to ˈna utuafare. (Gen. 3:15; Roma 8:20, 21) Ia tupu te reira, ua horoa oia i ta ˈna Tamaiti ei tusia taraehara no te huitaata. Aita te Atua i faaherehere i ta ˈna Tamaiti no tatou, e ere anei te reira i te haapapuraa o to ˈna here rahi ia tatou?—Ioa. 3:16.

18. Noa ˈtu ua atea ê tatou, eaha te haapapu ra te hinaaro ra Iehova ia riro tatou ei tamarii na ˈna?

¹⁸ Noa ˈtu to tatou huru tia ore, te hinaaro ra Iehova ia riro tatou ei tamarii  na ˈna. E ere roa ˈtu i te mea teimaha no ˈna ia aupuru ia tatou! I te tahi taime, e atea ê aore ra e faaoto paha tatou i to ˈna aau, eita râ Iehova e faaea i te tiaturi ia tatou! Ua faatia Iesu i te aamu o te tamaiti i moˈe no te faaite e Metua î i te here o Iehova. (Luka 15:11-32) I roto i tera aamu, aita te metua tane i faaea i te tiaturi e hoˈi mai ta ˈna tamaiti. I te na reiraraa te tamaiti, oioi roa te metua tane i te farii popou ia ˈna. No reira, ia atea ê tatou ia Iehova, e hoˈi anaˈe ia ˈna ma te aau tatarahapa mau. Ua ineine noa hoi to tatou Metua î i te here i te farii popou ia tatou!

19. E nafea Iehova e faaore roa ˈi i te mauiui ta Adamu i faatupu?

¹⁹ E faaore roa to tatou Metua i te mauiui ta Adamu i faatupu. I muri aˈe i to Adamu faaroo-ore-raa, ua opua te Atua e maiti 144 000 taata no te tavini ei arii e ei tahuˈa i te raˈi i pihai iho i ta ˈna Tamaiti ra o Iesu. I roto i te ao apî, na Iesu e teie mau tia o te Faatereraa arii e tauturu i te feia auraro ia riro ei taata tia roa. Ia oti te tamataraa hopea, e horoa te Atua ia ratou te ora mure ore. I tera taime to tatou Metua e mauruuru roa ˈi i te ite i ta ˈna mau tamaiti e tamahine tia roa ia parahi i te fenua! Te tiai ru mau nei tatou i te reira!

20. Mea nafea Iehova i te haapapuraa mai i to ˈna here rahi ia tatou? Eaha ta tatou e hiˈopoa i roto i to mua ˈtu haapiiraa?

²⁰ Ua haapapu mai Iehova mea here roa na ˈna ia tatou! O ˈna te Metua maitai roa ˈˈe! E faaroo oia i ta tatou mau pure a aupuru atoa ˈi ia tatou i te pae tino e te pae varua. E haapii e e tauturu noa mai o ˈna. E haamaitairaa faahiahia atoa ta ˈna e horoa mai a muri aˈe! E ere anei i te mea mahanahana ia ite e Metua î i te here to tatou? I roto i to mua ˈtu haapiiraa, e hiˈopoa tatou e nafea ia faaite i te mauruuru i to tatou Metua i te raˈi!