1. Мар кароно вал, Персиысь эксэен вераськон понна?

 ПУКТЭ син азяды: тӥ улӥськоды асьме вакытлэсь азьло V даурын вашкала Персиын. Тӥледлы одӥг уж сярысь эксэен вераськыны кулэ, но тӥ мынӥськоды Сузы каре, кытын эксэй улэ. Но соин вераськон понна, нырысь юано, яра-а со доры пырыны. Озьы ӧд лэсьтэ ке, тӥледыз виыны но быгатозы! (Есф. 4:11).

2. Потэ-а Иеговалэн, милям соин матысь кусыпъёсмы мед луозы шуыса?

² Ми туж шумпотӥськомы, Иегова Персиысь эксэйлы уг кельшы шуыса! Адямиослэн кивалтӥсьёсынызы ӵошатыса, Инмармы трослы кужмогес но даногес луэ, но со дыре ик ми быгатӥськомы соин котькыӵе дыре вераськыны. Солэн потэ, ми соин кышкатэк мед вераськомы шуыса. Кылсярысь, Иеговаез данъяса, ми быгатӥськомы солы вазиськыны Быдӟым Кылдытӥсь, Ваньзэ быгатӥсь Инмар но Кузё-Инмар шуыса. Нош со куре милемыз солы Атай шуыса вазиськыны (Матф. 6:9). Ми туж шумпотӥськомы: Иеговалэн потэ, милям соин шуныт но матысь кусыпъёсмы мед луозы шуыса!

3. Малы ми Иеговалы Атай шуыса вазиськыны быгатӥськомы но мае ми эскеромы та статьяын?

³ Ми быгатӥськомы Иеговалы Атай шуыса вазиськыны, малы ке шуоно со милемлы улон сётӥз (Пс. 35:10). Со милям Атаймы луэ бере, ми солэсь кылзӥськыны кулэ. Куке ми лэсьтӥськомы сое, мар сярысь со милемыз куре, соку ми паймымон бакель каронъёслы шумпотыны быгатомы (Евр. 12:9). Одӥгез соос пӧлысь — со пырак улон, инмын яке музъем вылын. Нош куд-ог бакель каронъёсты ми али ик ини басьтӥськомы.  Та статьяын ми эскеромы, кызьы Иегова ми сярысь атай кадь сюлмаське но малы ми оскыны быгатӥськомы, со милемыз ноку уз кельты шуыса. Нош нырысь эскеромы, малы оскыны луэ, инмысь Атаймы милемыз туж яратэ но ми сярысь сюлмаське шуыса.

4. Малы куд-огъёсызлы Иегова шоры секыт учкыны Атайзы шоры кадь?

⁴ Секыт-а тӥледлы Инмар шоры учкыны Атай шоры кадь? Куд-огъёсыз малпало, Инмар туж быдӟым но ми солы кулэ ум луиське шуыса. Соос уг оско, Ваньзэ быгатӥсь Инмар ми пӧлысь котькудӥз сярысь сюлмаське шуыса. Но яратӥсь Атаймылэн уг поты, ми озьы мед малпаломы шуыса. Со милемлы улон сётӥз, но солэн потэ, милям соин матысь кусыпъёсмы мед луозы шуыса. Та сярысь верамез бере, апостол Павел Афины карын улӥсьёслы валэктӥз, Иегова «ваньмылы асьмелы матын улэ» шуыса (Ап. уж. 17:24—29). Инмарлэн потэ, ми пӧлысь котькудӥз со шоры мед учкоз шуыса озьы ик, кызьы нылпи яратӥсь но сюлмаськись атаез шоры учке.

5. Малы дышетэ милемыз одӥг сузэрмылэн учырез?

⁵ Нош мукетъёсызлы Инмар шоры секыт учкыны Атай шоры кадь, малы ке шуоно асьсэлэн атайзы соослы яратэмзэ но сюлмаськемзэ ӧз возьматъя, шуыны луоз. Тани одӥг сузэрмылэн учырез. «Мынам атае монэн ассэ туж чурыт возиз,— вера со.— Куке мон Библиез дышетыны кутски, мыным секыт вал малпаны, Иегова инмысь Атай луэ шуыса. Ваньмыз воштӥськиз соку гинэ, куке мон соин умойгес тодматски». Секыт-а тӥледлы Иегова шоры учкыны Атайды шоры кадь? Секыт ке, киостэс эн лэзе! Дыр ортчыса, тӥ но шӧдыны быгатоды, Иегова ваньмызлэсь умой Атай луэ шуыса.

6. Матфейлэсь 11:27 лыдэ басьтыса, кызьы Иегова милемлы валаны юрттӥз, со милям яратӥсь Атаймы луэ шуыса?

⁶ Иеговалэн потэ вал, милемлы сое яратӥсь Атаен лыдъяны капчигес мед луоз шуыса. Соин ик со сюлмаськиз, Библиын Иисуслэн кылъёсыз но ужъёсыз сярысь гожтэмын мед луоз шуыса. (Лыдӟе Матфейлэсь 11:27.) Иисус сокем умой адӟем кариз Атаезлэсь сямъёссэ, со вераны но быгатӥз: «Монэ адӟись мурт Атаез адӟиз» (Иоанн 14:9). Иисус ӵем вералляз Иегова сярысь Атаез сярысь кадь. Кылсярысь, Евангелиосын гинэ но ӵем вераське Иисуслэн Иеговалы Атай шуыса вазиськемез сярысь. Малы ӵем дыръя Иисус озьы вазиськылӥз? Одӥгез муг — адямиосты оскытыны, Иегова яратӥсь Атай луэ шуыса (Иоанн 17:25, 26).

7. Мае ми тодыны быгатӥськомы Иегова сярысь, эскерыса сое, кызьы со ассэ возиз аслаз Пиеныз, Иисусэн?

⁷ Мае ми тодыны быгатӥськомы Иегова сярысь, эскерыса сое, кызьы со ассэ возиз аслаз Пиеныз, Иисусэн? Иегова котьку кылзӥз Иисуслэсь вӧсяськонъёссэ. Кылзэм сяна, озьы ик Инмар соослы ответ но сётылӥз (Иоанн 11:41, 42). Кыӵе гинэ шуг-секытъёсын Иисус медаз пумиськылы, со котьку но шӧдӥз, Атаез сое яратэ но со сярысь сюлмаське шуыса (Лука 22:42, 43).

8. Кызьы Иегова сюлмаськиз Иисус сярысь?

⁸ Иисус тодӥз: Атаез солы улон сётӥз, озьы ик улон понна со солы ваньзэ кулэзэ но сётэ. Иисус вераз, со Атаезлы луыса улэ шуыса (Иоанн 6:57). Иисус быдэсак оскиз Атаезлы, но Иегова солы улон понна ваньзэ кулэзэ сётылӥз. Нош валтӥсез, Иегова Иисуслы юрттӥз оскымон кыльыны (Матф. 4:4).

9. Кызьы Иегова Иисуслы возьматӥз, со яратӥсь но сюлмаськись Атай луэ шуыса?

⁹ Яратӥсь Атай кадь, Иегова Иисусэз оскытӥз, со котьку но солы юрттыны дась шуыса (Матф. 26:53; Иоанн 8:16). Иегова Иисусэз ӧз утьы ке но ваньмызлэсь, мар солы  вӧсь карыны быгатысал, со юрттӥз солы вань шуг-секытъёс пыр потыны. Иисус тодӥз, вань курадӟонъёсыз огдырлы гинэ шуыса (Евр. 12:2). Иегова возьматӥз, Иисусэз яратэ шуыса: со сое кылзӥз, солы ваньзэ кулэзэ сётылӥз, сое дышетӥз но солы юрттӥз (Иоанн 5:20; 8:28). Эскеромы, кызьы инмысь Атаймы милемлы но Иисуслы сямен ик юрттэ.

10. Псалтирез 65:19, 20 лыдэ басьтоно ке, кызьы Иегова милемлы яратонзэ возьматэ?

¹⁰ Иегова вӧсяськонъёсмес кылзэ. (Лыдӟе Псалтирез 65:19, 20.) Со уг вера, макем ӵем, мар сярысь но кӧня дыр ӵоже ми вӧсяськыны быгатӥськомы. Со интые, Инмар мылкыдмес ӝутэ ялан вӧсяськыны (1 Фес. 5:17). Мы быгатӥськомы Инмарлы вазиськыны котькыӵе дыре но котькыӵе интыын. Со котьку дыр шедьтэ, милемыз сак кылзон понна. Тае валаса, ми эшшо но золгес сое яратыны кутскиськомы. «Шумпотӥсько,— шуиз псаломъёсты гожъясь,— Кузё-Инмар куараме кылӥз» (Пс. 114:1).

11. Кызьы Иегова вӧсяськонъёсмылы ответ сётэ?

¹¹ Инмысь Атаймы вӧсяськонъёсмес кылзэм сяна, озьы ик соослы ответ но сётэ. Апостол Иоанн милемыз оскытӥз: «Солэн [Инмарлэн] эрикезлы тэрытскыса, мае гинэ ум куриське, Со асьмеды кылзэ» (1 Иоанн 5:14, 15). Зэм но, со уг возьматы, Иегова ответ сётоз шуыса озьы, кызьы ми малпаськомы. Инмар тодэ, мар милемлы зэмзэ но пайда ваёз, соин ик куддыръя со куронъёсмес уг быдэсты, нош куддыръя солэн потэ, ми мед возьмаломы шуыса (2 Кор. 12:7—9).

12, 13. Кызьы инмысь Атаймы милемлы ваньзэ кулэзэ сётэ?

¹² Иегова милемлы ваньзэ кулэзэ сётэ. Со лэсьтэ сое, мае ачиз вань атайёсты лэсьтыны косэ (1 Тим. 5:8). Инмар нылпиосызлы улон понна ваньзэ кулэзэ сётэ. Солэн уг поты, ми сиён-юон, дӥськут но улон инты понна мед сюлмаськомы шуыса (Матф. 6:32, 33; 7:11). Яратӥсь Атай кадь, Иегова сюлмаськиз, вуонояз но милям ваньмыз кулэез мед луоз шуыса.

¹³ Нош тужгес но кулэез, Иегова сётэ милемлы ваньзэ, соин умой кусыпъёс возён понна. Аслаз Кылаз со ачиз сярысь но эрикез сярысь зэмлыкез милемлы усьтӥз, валэктӥз, малы ми улӥськомы но мар возьма милемыз азьланяз. Инмар юрттӥз милемлы соин тодматскыны анай-атайёсмы пыр яке мукет адямиос пыр. Но со азьланьтэ ми сярысь сюлмаськыны кенешысь яратӥсь тӧроос пыр, озьы ик юн осконэн мукет вын-агайёс но сузэр-апайёс пыр. Со сяна, Иегова дышетэ милемыз христиан пумиськонъёсын, кытын ми духовной семьяенымы ӵош дышетскиськомы. Та куд-ог амалъёс гинэ, кызьы Иегова ми сярысь сюлмаськемзэ возьматэ (Пс. 31:8).

14. Малы Иегова милемыз дышетэ но кыӵе амалъёсты Инмар со понна кутэ?

¹⁴ Иегова милемыз дышетэ. Иисусэн ӵошатоно ке, ми тырбыдэстэмесь. Библиын гожтэмын: «Кузё-Инмар кинэ яратэ, сое ик вӧсь но каре уго» (Евр. 12:6, 7). Соин ик, яратӥсь Атаймы, милемыз дышетыкуз, кулэ дыръяз милемыз тупатъя, яке вӧсь каре. Иегова пӧртэм сямен тупатъяны быгатэ. Кылсярысь, Библиез лыдӟыкумы яке кенешлэн пумиськонъёсаз дышетскыкумы, ми валаны быгатӥськомы, милемлы малпаськон амалмес тупатоно яке асьмеды мукет сямен возёно шуыса. Оло нош кулэ луись юрттэт ми тӧроослэсь басьтыны быгатомы. Милемыз тупатон понна, Иегова кыӵе гинэ амал медаз куты, со котьку но сое яратыса лэсьтэ (Иер. 30:11).

15. Кызьы Иегова юрттэ милемлы?

¹⁵ Иегова юрттэ милемлы шуг-секытъёс дыръя. Нылпиосызлэн секыт вакытъёсаз атай ӵем дыръя соослы юрттыны дась.  Озьы ик инмысь Атаймы но юрттэ милемлы шуг-секытъёс пыр потыны. Святой духсэ уже кутыса, со уте милемыз ваньмызлэсь, мар быгатэ соин кусыпъёсмес сӧрыны (Лука 11:13). Озьы ик Иегова юрттэ милемлы, куке ми куректыса улӥськомы. Кылсярысь, со милемлы вуоноезлы паймымон оскон сётэ. Та оскон юрттэ милемлы шуг-секытъёсты чиданы. Малпаське: кыӵе гинэ шуг-секытъёсын ми медам пумиське, яратӥсь Атаймы тупатоз вань уродзэ, кудӥз милемлы пумит лэсьтэмын вал. Вань шуг-секытъёсмы огдырлы гинэ, нош Иеговалэн бакель каронъёсыз пыраклы! (2 Кор. 4:16—18).

16. Мар луиз, куке Адам яратӥсь Атаезлы пумит мынӥз?

¹⁶ Иеговалэсь яратэмзэ ми адӟиськомы соку но, куке малпаськомы со сярысь, мар лэсьтӥз Иегова, Адамлэн кылзӥськымтэез бере. Инмысь Атаезлы пумит мыныса, Адам ачиз но, солэн нылпиосыз но Иеговалэн семьяез пӧлы ӧз пыре ини (Рим. 5:12; 7:14). Нош, Адамлэн нылпиосызлы юрттон понна, Иегова мар ке но лэсьтӥз.

17. Мар лэсьтӥз Иегова, Адамлэн сьӧлыкамез бере ик?

¹⁷ Иегова Адамез кылкутытӥз, нош Адамлэн вордӥськоно нылпиосызлы солэн юрттэмез потӥз. Инмар соку ик кылзэ сётӥз, кылзӥськись адямиослы семьяяз пырыны одно ик лэзёз шуыса (Ул.-выл. 3:15; Рим. 8:20, 21). Иегова сое лэсьтыны быгатэ мозмытӥсь курбонлы луыса, кудзэ вайыны кулэ вал яратоно Пиез, Иисус. Ми понна Пизэ сётыса, Иегова возьматӥз, милемыз туж яратэ шуыса (Иоанн 3:16).

18. Кытысь ми тодӥськомы, Иеговалэн потэ, ми солэн нылпиосыз мед луомы шуыса, куддыръя ми солэсь палэнскиськомы ке но?

¹⁸ Ми тырбыдэстэмесь ке но, Иеговалэн потэ, ми солэн семьяез пӧлын мед луомы шуыса, но милемлы юрттыны солы секыт ӧвӧл. Куддыръя ми Инмарез ӝоже уськытӥськомы  яке солэсь палэнскиськомы, но со котьку оске, ми со доры берытскомы шуыса. Иисус возьматӥз, макем зол Иегова нылпиоссэ яратэ, йыромем пи сярысь мадёнэз вераса (Лука 15:11—32). Та пилэн атаез оскемысь ӧз дугды, со куке но бертоз шуыса. Нош куке пиез бертӥз, атаез солэн пумитаз бызьыса потӥз но сое юн ӟыгыртӥз. Ми Иеговалэсь палэнскимы ке, нош собере ӧпкелимы ке, ми быдэсак оскыны быгатӥськомы: яратӥсь Атаймылэн туж потэ, ми со доры мед берытскомы шуыса.

19. Кызьы Иегова быдтоз вань уродзэ, кудзэ лэсьтӥз Адам?

¹⁹ Милям Атаймы быдтоз вань уродзэ, кудзэ лэсьтӥз Адам. Солэн пумит султэмез бере, Иегова ужпум кутӥз аслаз семьяяз пыртыны 144 000 адямиосты, кудъёсыз инмын солэн Пиеныз, Иисусэн, ӵош эксэйёс но священникъёс луыса ужалозы-тыршозы. Выль дуннеын Иисус но соин ӵош кивалтӥсьёс юрттозы кылзӥськись адямиослы тырбыдэс луыны. Кылзӥськись луонэз берпуметӥзэ эскерем бере, Инмар соослы пырак улон кузьмалоз. Макем шумпотоз Атаймы, куке адӟоз, музъем тырбыдэс пиосыныз но нылъёсыныз тырмемын шуыса! Со луоз паймымон дыр.

20. Кызьы Иегова милемлы яратонзэ возьматэ? Мае ми эскеромы вуоно статьяын?

²⁰ Иегова милемыз туж яратэ. Со ваньмызлэсь умой Атай луэ. Со вӧсяськонъёсмес кылзэ но сётэ милемлы ваньзэ кулэзэ улон понна, озьы ик соин умой кусыпъёс возён понна. Со дышетэ милемыз но юрттэ милемлы. Озьы ик со милемлы паймымон кузьымъёс дасяз. Ми туж шумпотӥськомы, Иегова милемыз яратэ но ми сярысь сюлмаське шуыса! Вуоно статьяын эскериськоз, кызьы ми возьматыны быгатӥськомы, солэн яратэмез понна тау кариськомы шуыса.