1. Nye omunu umue a sukilile oku linga oco a vangule la Soma yo ko Persia?

SOKOLOLA okuti o kasi kuviali wo ko Persia kosimbu okuti tunde kotembo yaco, pa pita ale 2.500 kanyamo. Ove o kuete ondaka yimue yoku sapela la soma. Kuenje o linga ungende toke ko Siusana kolupale ku sangiwa elombe lia soma. Pole oco o sapele la soma, ove o sukila oku talamẽla evilikiyo liaye. Nda wa iñila ño okuti kua kovongiwile, o pondiwa!—Est. 4:11.

2. Tu sukila oku liyeva ndati poku sapela la Yehova?

² Yehova ka kasi nda soma yina yo ko Persia! Yehova wa velapo calua okuti uviali womunu u sule; ndaño ndoco, tu pondola oku sapela laye vapuluvi osi. Eye o yongola okuti tu lianja poku ci linga. Ndaño okuti o kuete olonduko vimue viesumbilo ndeci, Ululiki wetu wa Velapo, Tõlo kuenda Ñala Ukuonene Wosi, Yehova o tu vetiya oku u tukula hati, ‘Isia,’ okuti ondaka yimue yesumbilo. (Mat. 6:9) Yehova ka yongola oku tendiwa ndomunu umue o kasi ocipãla ale ka kapeleko omanu, pole, o yongola okuti tu u tenda nda Isia umue ukuacisola. Ocili okuti oku kũlĩha ovina evi, ci sanjuisa!

3. Momo lie tu tukuila Yehova okuti “Isietu” kuenda nye tu lilongisa vocipama cilo?

³ Etu tu pondola oku tukula Yehova okuti “Isietu,” momo eye ono yomuenyo wetu. (Osa. 36:9) Omo okuti Yehova eye Isietu, eye lika tu sukila oku pokola. Nda tua linga ovina Yehova a tu tuma, tu tambula asumũlũho alua. (Va Hev. 12:9) Amue pokati kasumũlũho aco, omuenyo ko pui kilu, ale palo  posi. Ndaño muẽle cilo, oku pokola ku Yehova ci nena asumũlũho. Vocipama cilo, tu konomuisa ndomo Yehova a sokisiwa nda Isia umue ukuacisola cilo kuenda esunga lieci tu kolelela okuti ndaño kovaso yoloneke ka ka tu yanduluka. Pole tete, tu konomuisa ovovangi a lekisa okuti Isietu wo kilu o tu sole calua kuenda o yongola oku tu kuatisa.

4. Momo lie vamue ca va tĩlila oku tenda Yehova nda Isiavo?

⁴ Anga hẽ kokuove ca ku tĩlila oku tenda Yehova nda Isiove? Omanu vamue va litenda okuti ka va kuete esilivilo kuenda va sule calua oku li sokisa la Yehova. Omo liaco, ci va tĩlila oku tava okuti Suku Ukuonene Wosi, wa va kapako omunu lomunu. Pole, Isietu ukuacisola hacoko a sima. Eye wa tu ĩha omuenyo kuenda o yongola okuti tu kala akamba vaye. Upostolo Paulu wa lombolola ciwa olondaka evi kolonjeveleli viaye ko Atenai eci a popia hati, Yehova “ka kasi ocipãla letu.” (Ovil. 17:24-29) Hanga hẽ wa limbuka ale okuti, isia umue nda o kuete ocisola calua, omõla o lianja poku sapela laye? Yehova o yongola okuti ove o liyevavo ndoco.

5. Nye tu lilongisa kulandu wa manji umue ukãi?

⁵ Omanu vakuavo ca va tĩlila oku tenda Yehova nda Isia, omo okuti va isiavo ka va va tatele locisola kuenda ohenda. Sokolola eci manji umue ukãi a lombolola. Eye hati: “Isiange wa enda oku ndi tata calua lãvi. Eci nda fetika oku lilongisa Embimbiliya, ca tĩlile oku amẽla ku Isia wo kilu. Pole noke yoku kũlĩha ciwa Yehova, nda pongolola ovisimĩlo viange.” Hanga hẽ o kuetevo ocitangi caco? Nda o kuete ocitangi caco, kolela okuti o pondolavo oku tenda Yehova nda Isia wa velapo vosi.

6. Ndomo ca tangiwa ku Mateo 11:27, Yehova o tu kuatisa ndati oku u tenda nda Isia umue ukuacisola?

⁶ Onjila yimue Yehova a kuama yoku tu kuatisa oku u tenda nda Isia umue ukuacisola, poku tu sapuila Vembimbiliya ovina Yesu a popia levi a linga. (Tanga Mateo 11:27.) Omo okuti Yesu wa setukula ciwa ovituwa via Isiaye, wa popia hati: “Wosi o mola ame, o molavo Isia.” (Yoa. 14:9) Yesu wa lombolola olonjanja vialua ndomo Yehova a sokisiwa nda Isia. Vavanjeliu akuãla, Yesu wa tukula Yehova nda “Isia” ci soka 165 kolonjanja. Momo lie Yesu a tukuila olonjanja vialua catiamẽla ku Yehova? Esunga limue, oco omanu va limbuke okuti Yehova Isia umue ukuacisola.—Yoa. 17:25, 26.

7. Nye tu lilongisa catiamẽla ku Yehova poku konomuisa ndomo eye a kapeleko Omõlaye?

⁷ Tu pondola oku lilongisa calua catiamẽla ku Yehova poku konomuisa ndomo eye a kapeleko Omõlaye, Yesu. Yehova olonjanja viosi wa enda oku yeva olohutililo via Yesu, pole, ka endaile lika oku vi yevelela, wa endavo oku vi tambulula. (Yoa. 11:41, 42) Kovitangi viosi Yesu a pita lavio, wa enda oku limbuka ocisola kuenda ekuatiso lia Isiaye.—Luka 22:42, 43.

8. Kolonepa vipi Yehova a kuatisa Yesu?

⁸ Yesu wa kũlĩhile okuti Yehova eye ono yomuenyo waye kuenda wa kũlĩhilevo okuti, oco amameko lomuenyo wa sukilile ekuatiso lia Isiaye. Yesu wa popia hati: “Ndi muila omuenyo ku Isia.” (Yoa. 6:57) Yesu wa kolelele Isiaye lutima wosi kuenda Yehova wa enda oku kuatisa Yesu kovina viosi a sukilile ketimba. Handi vali, ca velapo ceci okuti, Yehova wa endavo oku kuatisa Yesu kovina a sukilile konepa yespiritu.—Mat. 4:4.

9. Yehova wa lekisa ndati okuti wa kala Isia ukuacisola ku Yesu?

⁹ Omo okuti Yehova Isia umue ukuacisola,  wa ecelela okuti Omõlaye o limbuka okuti o kuete ekuatiso lia Isiaye. (Mat. 26:53; Yoa. 8:16) Ndaño okuti Yehova ka teyuile Yesu kovitangi viosi, pole, wo kuatisa oku vi yula. Yesu wa kolelele okuti ohali yosi a laikele oku tala, yo katembo katito. (Va Hev. 12:2) Yehova wa lekisa okuti o sole Yesu poku u yevelela, poku eca kokuaye ovina a sukilile, oku u pindisa kuenda oku u kuatisa. (Yoa. 5:20; 8:28) Isietu wo kilu, o lingavo cimuamue letu. Tu kũlĩhĩsa ndomo a pondola oku ci linga.

10. Ndomo ca lekiswa Kosamo 66:19, 20, Yehova o lekisa ndati okuti o tu sole?

¹⁰ Yehova o yevelela olohutililo vietu. (Tanga Osamo 66:19, 20.) Yehova ka kapi olongave violonjanja tu sukila oku likutilila. Omo liaco, eye o tu vetiya oku likutilila olonjanja viosi. (1 Va Tes. 5:17) Lesumbilo, tu pondola oku amẽla ku Suku vapuluvi osi, apa posi tu sangiwa. Yehova ndaño okuti o kuete ovina vialua vioku linga, otembo yosi wa likapelako oku tu yevelela. Eci tu limbuka okuti Yehova o yeva olohutililo vietu, ukamba tu kuete laye u livokiya. Ukualosamo wa popia hati: “Ndi sole Yehova, momo eye o yeva ondaka yange.”—Osa. 116:1.

11. Yehova o tambulula ndati olohutililo vietu?

¹¹ Isietu ka yevelela lika olohutililo vietu, pole, o vi tambululavo. Upostolo Yoano o tu sapuila hati: “Nda tu pinga ovina viosi vi likuata locipango caye, eye o tu yeva.” (1 Yoa. 5:14, 15) Pole, halonjanja viosiko Yehova a ka tambulula olohutililo vietu ndomo tu yongola. Eye wa kũlĩha ciwa ovina tu sukila. Omo liaco, citava okuti etambululo liaye li kala okuti “sio,” ale eye amisapo kamue oku eca etambululo liaco.—2 Va Kor. 12:7-9.

12-13. Volonjila vipi Isietu wo kilu a siata oku tu tata?

¹² Yehova o tu ĩha ovina tu sukila. Eye eca ongangu koku linga ovina a kisika ku vaisia vosi. (1 Tim. 5:8) Yehova eca komãla vaye ovina viosi va sukila ketimba. Eye ka yongola okuti tu sakalala enene leci tu lia, leci tu wala kuenda onjo yoku kala. (Mat. 6:32, 33; 7:11) Omo okuti Yehova, Isia ukuacisola, eye wa likuminya okuti kovaso yoloneke o ka tu ĩhavo ovina viosi tu sukila.

¹³ Ca velapo vali ceci okuti, Yehova o tu ĩha cosi tu sukila konepa yespiritu. Pocakati Condaka yaye, eye o tu sapuila ovituwa viaye, ovina a yongola oku linga, ocimãho comuenyo kuenda ovina vi ka pita kovaso yoloneke. Poku lekisa ndomo a tu kapako, Yehova pocakati colonjali vietu kuenda Akristão vakuavo, o tu kuatisa oku u kũlĩha. Kuenje tu amamako oku tambula ekuatiso liocisola cakulu vekongelo kuenda vamanji vakuavo va loñoloha kespiritu. Handi vali, Yehova o tu ĩha olonumbi pocakati colohongele, vina vi tu kuatisa oku lilongisa ovina vialua kumue la vamanji. Evi vimue olonjila Yehova a lekisa okuti o tu sole, ndeci Isia umue a linga.—Osa. 32:8.

14. Momo lie Yehova a tu pindisila kuenda o ci linga ndati?

¹⁴ Yehova o tu pindisa. Yesu wa lipuile, pole, etu sio. Omo liaco, nda ci sukiliwa, Isietu ukuacisola o tu pindisa. Embimbiliya li tu sapuila hati: “Yehova o pindisa una a sole.” (Va Hev. 12:6, 7) Yehova o pondola oku tu pindisa volonjila vialua. Ndeci, eye o pondola oku tu pengulula pocakati covina vimue tu tanga Vembimbiliya, ale kueci tu yeva kolohongele. Pamue citava okuti ekuatiso tu sukila li tunda kakulu vekongelo. Olonjila viosi Yehova a kuama poku tu pindisa, eye o ci linga locisola.—Yer. 30:11.

15. Ndamupi Yehova a tu teyuila?

¹⁵ Yehova o tu kuatisa eci tu lipita lovitangi.  Ndeci isia umue ukuacisola a kuatisa omõlaye kovitangi, Isietu wo kilu o tu ĩha ongusu oco tu pandikise kovitangi. Pocakati cespiritu sandu, eye o tu teyuila kovina vi kapa kohele ekolelo lietu. (Luka 11:13) Yehova o tu kuatisavo eci tu sumua. Ndeci, eye o tu ĩha elavoko limue li komõhisa. Elavoko liaco, li tu kuatisa oku pandikisa kovitangi. Sokolola ndoco: Ndaño tu liyaka lovitangi vialua, Yehova o ka vi malako viosi. Ovitangi viosi tu lipita lavio viokatembo katito, pole, asumũlũho a Yehova a ka kala otembo ka yi pui.—2 Va Kor. 4:16-18.

16. Nye ceya oku pita eci Adama a sinĩla Isiaye ukuacisola?

¹⁶ Ocina cimue ci lekisa esunga liocisola Yehova a lekisa kokuetu, onjila ndomo eye a tetulula ovitangi viatete via kokiwa lepata liaye palo posi. Adama wa sinĩla Yehova, omo liaco cikale eye kuenda ocitumbulukila caye va siapo oku panga onepa kepata liasanjuka lia Yehova. (Va Rom. 5:12; 7:14) Pole, Yehova wa tetulula lonjanga ocitangi caco.

17. Nye Yehova a linga noke lia Adama oku lueya?

¹⁷ Yehova wa yambula Adama, pole, ka ecelele okuti ocitumbulukila caye ka ci kuata elavoko. Vepuluvi liaco, Yehova wa likuminya okuti omanu vakuepokolo va laikele oku panga vali onepa kepata liaye. (Efet. 3:15; Va Rom. 8:20, 21) Oco ci tẽlisiwe, Yehova wa tuma omõlaye o soliwe, Yesu, oco a tu file. Ocisembi uvangi wocisola calua Yehova a kuetele omanu.—Yoa. 3:16.

18. Nda pamue tua yanduluka Yehova, momo lie tu kolelela okuti Yehova o yongola okuti handi o kala Isietu?

¹⁸ Ndaño ka tua lipuile, Yehova o yongola okuti tu panga onepa kepata liaye kuenda ekuatiso a eca kokuetu lalimue eteke a li tenda ndocilemo. Ocili okuti pamue tu sumuisa  Yehova, ale oku u yanduluka, pole, eye lalimue eteke a ka tu yanduluka. Yesu poku lekisa ocisola ca piãla ca Yehova, eye wa tukula olusapo luomõla ocisandui. (Luka 15:11-32) Isia volusapo, ka puile elavoko okuti omõlaye eteke limue o tuika. Omõla eci a tuika konjo, isia wo tambula lesanju lialua. Nda pamue tua yanduluka Yehova, pole, noke tu likekembela, tu kolela okuti Isietu ukuacisola o pondola oku tu tambula vali.

19. Yehova o ka tumbulula ndati ovina Adama a nyõla?

¹⁹ Isietu o ka tumbulula ovina viosi Adama a nyõla. Noke liesino lia Adama, Yehova wa nõla eci ci soka 144.000 pokati komanu, oco va kale olosoma kuenda ovitunda kilu kumue Lomõlaye. Yesu kumue 144.000 komanu, va ka kuatisa vana va lekisa epokolo oco va ka lipue voluali luokaliye. Noke lioku pita voseteko ya sulako yepokolo, Yehova o ka va ĩha omuenyo ka u pui. Kuenje Isietu o ka yeva esanju lialua lioku mola ongongo oku yuka omãla va li pua. Ocili okuti, eli li ka kala epuluvi limue liesanju lialua!

20. Yehova o lekisa ndati okuti o tu sole kuenda nye tu ka lilongisa vocipama cikuãimo?

²⁰ Yehova wa siata oku eca ovovangi alua a lekisa okuti o tu sole calua. Yehova, Isia umue wa koleliwa. Eye o yeva olohutililo vietu kuenda o tu kuatisa, cikale ketimba, ale konepa yespiritu. Yehova o tu pindisa kuenda o tu teyuila. Eye wa tu pongiyila ovina vialua viwa. Ci sanjuisa calua oku kũlĩha okuti Isietu, Yehova, o tu sole kuenda o tu kuatisa! Omo okuti tumãla vaye, tu yongolavo oku lekisa ocisola kokuaye. Tu pondola oku ci linga ndati? Ocipama cikuãimo ci ka konomuisa epulilo eli.