1. Wira mutthu olavule ni mwene a oPersia, aahaana opaka exeeni?

NKAHAYA muupuwele vaakhanle wira mwaakhala elapo ya oPersia iyaakha 2.500 sivinre. Vano mookhalana mwaha muniphavela anyu omuleela mwene. Nto munneetta mukwaha murowaka oSusa, epooma yaakhala aya empa ya mwene. Masi muhinatthi olavula ni mwene, mwaahaana ovekela wira mweemereriwe. Akhala wira khimwaarowa opaka eyo, nyuwo mwaamwiiviwa!—Esth. 4:11.

2. Yehova oniphavela wira nooneleke sai ovaanela ni yena?

² Ti voohakalaliha vanceene osuwela wira Yehova khonlikana ni mwene ole a oPersia! Yehova ti muulupalexa waavikana mamwene a apinaatamu, hata vari siiso, owo oniphavela wira nivaaneleke ni yena khula okathi nimphavela ahu. Oniphavela wira nipakeke eyo nihoovaka etthu. Mwa ntakiheryo, nnaamwi orina ene maihaneliwo a nttittimiho ntoko, Mpattuxa Muulupalexa, Oowerya Sotheene ni Pwiya Muulupalexa; Yehova onnintumererya omwiitthana okhala “Tith’ihu”, nuulumo nenno nnooniherya waataana ni ophentana. (Math. 6:9) Yehova khoniphavela wira nimooneke ntoko Tiithi ootakhala, masi oniphavela wira nimwaattameleke. Moohaanyiherya ninnihakalala osuwela wira Yehova oniphavela wira nimwaattameleke!

3. Xeeni vari aya vooloka omuhimya Yehova okhala “Tith’ihu”? Mwaha ola, ninrowa othokorerya exeeni?

³ Ninnimuhimya Yehova okhala “Tith’ihu”, mwaha woowi owo tonivanhe ekumi. (Esal. 36:10) Nto okhala wira Yehova, Tiithi ahu, nihaana omwiiwelela ni murima wotheene. Akhala wira nnoopaka ele Yehova onnivekela awe, nnoophwanya mareeliho manceene. (aHéb. 12:9) Mareeliho awo anihela muhina, ophwanya okumi woohimala muhoolo, akina anrowa okhalaka wiirimu akina valaponi. Nave, hata okathi ene yoola, omwiiwelela Yehova onniniphwanyiha mareeliho. Mwaha ola, ninrowa woona moota Yehova onooniherya awe okhala Tiithi ihu olelo-va, ni etthu ennikupaliha wira Yehova  khonikhala-khala oninyanyalaka muhoolo. Masi wanipacerya, ninrowa woona itthu sinooniherya wira Tiithi ihu a wiirimu onniniphenta vanceene ni oniphavela onikhaliherya.

4. Xeeni atthu akina vanaavila aya omuthokorerya Yehova ntoko Tiithi?

⁴ Niireke vannoovilani omuthokorerya Muluku ntoko Tiithi anyu? Atthu akina annimoona Yehova okhala muulupalexa, nto eyo enniwiiriha wuupuwelaka wira kharina efaita. Nave onnaavila okupali wira Muluku Oowerya Sotheene onnaathokorerya. Masi, Tiithi ihu oophenta Yehova, khonuupuwela siiso. Owo oonivaha okumi ni oniphavela wira nikhale apatthani awe. Murummwa Paulo aahittittimiherya ekeekhai eyo, okathi aalavula awe ni atthu wAthena wira Yehova “khankhala ottaiwene ni hiyo”. (Mit. 17:24-29) Muluku oniphavela wira nimwaattameleke. Nave nihaana okhala ootaphuwa naavaanelaka ni yena ntoko mwaana onitaphuwa awe aavaanelaka ni paapa awe oophenta.

5. Yowiiraneya ya murokora mmosa, enniixuttiha exeeni?

⁵ Atthu akina vannaavila omuthokorerya Yehova ntoko Tiithi, mwaha woowi awo khatonko ophentiwa ni apapaya. Nwehe ele murokora mmosa ohimmye awe: “Paapa aka aanikihasula vanceene. Nto okathi kaapacenrye aka omusoma Biibiliya, vaanikivila woona wira kookhalana waataana wooloka ni Tiithi, aka a wiirimu. Masi nuumala omusuwela oratteene Yehova, moonelo aka waahiturukeya”. Niireke nyuwo murina muxankiho mmosaru aarina awe murokora ola? Akhala wira ti siiso, mukupaliki wira munoowerya omuthokorerya Yehova okhala Tiithi ootepexa oloka waavikana axitiithi akina.

6. Moovarihana ni Matheyo 11:27, Yehova onnikhaliherya sai omoona ntoko Tiithi oophenta?

⁶ Enamuna emosa Yehova onnikhaliherya awe omoona ntoko Tiithi oophenta, mwaha woowi oheemererya olempwa mBiibiliyani itthu Yesu aapanke awe ni aahimmye awe. (Mmusome Matheyo 11:27.) Yesu aahitakiha moomalela mikhalelo ni omutthu wa Tiithi awe, tivonto aahimmye awe so: “Ole okònne miyo, owònne Atithi”. (Yoh. 14:9) Yesu aahilavula ikwaha sinceene itthu Yehova onipaka awe ntoko Tiithi. Ivangelyo xexe paahi, Yesu aahimuhimya Yehova okhala “Tiithi” ikwaha sinaattamela 200. Xeeni Yesu ohalaka olavula vanceene voohimya sa Yehova? Nthowa nimosa, mwaha woowi aaphavela owiiriha atthu okupali wira Yehova, Tiithi oophenta.—Yoh. 17:25, 26.

7. Nniixutta exeeni voohimya sa Yehova vaavo ninvarerya ahu moota aamuthokorerya awe Mwanawe?

⁷ Nnoowerya wiixutta itthu sinceene voohimya sa Yehova, nivareryaka moota aamuthokorerya awe Mwanawe, Yesu Kristu. Okathi wotheene Yehova aaniwiriyana mavekelo a Yesu. Nave ohiya paahi owiriyana, Yehova aanaakhula mavekelo a Yesu. (Yoh. 11:41, 42) Okathi aakumana awe mixankiho, Yesu aanoona wira aaniphentiwa ni okhaliheriwa ni Tiithi awe.—Luka 22:42, 43.

8. Mwa enamuna xeeni Yehova aamukhapelela awe Yesu?

⁸ Yesu aanisuwela wira Yehova tanvaha okumi, ni aamuroromela Tiithi awe wira ovikaniheke okhala mukumi. Yesu aahimmye so: “Vano miyo kokhalana ekumi mw’Atithi”. (Yoh. 6:57) Yesu aanimuroromela ni murima wotheene Tiithi awe, nave Yehova aaninvaha itthu sa werutthuni. Etthu yootepexa otthuneya, okhala wira Yehova aanimukhaliherya Yesu wira ovikanihe okhala oororomeleya.—Math. 4:4.

9. Yehova oonihenrye sai okhala Tiithi amphenta vanceene Yesu?

⁹ Okhala wira Tiithi oophenta, Yehova aahimooniherya Yesu wira aanimukhaliherya vanceene. (Math. 26:53; Yoh. 8:16) Nnaamwi Yehova aahaamwaakihenrye Yesu mixankiho sotheene saamukhumelenle, owo aahimukhaliherya Yesu ovilela mixankiho iyo. Nave Yesu aanisuwela wira khula muxankiho waarowa omukhumelela,  waarowa okhala wa okathi vakhaani paahi. (aHéb. 12:2) Yehova aahooniherya wira aanimphenta Yesu, onwiriyanaka, onvahaka itthu saamuthowa, omwiixuttihaka ni omukhaliheryaka. (Yoh. 5:20; 8:28) Vano, nrowe niwehe moota Tiithi ahu a wiirimu onirumeela awe inamuna iyo wira onikhaliherye.

10. Moovarihana ni Esalimo 66:19, 20, Yehova onooniherya sai wira onniniphenta?

¹⁰ Yehova onniwiriyana mavekelo ahu. (Musome Esalimo 66:19, 20.) Yehova khovanhe mukano mavekelo ahu. Masi owo onnintumererya onvekela ikwaha sinceene. (1 aTes. 5:17) Mwa nttittimiho, hiyo pooti onvekela Muluku okathi wotheene, moohicikha opuro nri ahu. Owo khontepa waatteliwa miteko vahinweryaneya aya oniwiriyana, maana okathi wotheene onnivaha ephoole mavekelo ahu. Vaavo nnoona ahu wira Yehova onniwiriyana mavekelo ahu, ninnitepa omphenta. Nasaalimo mmosa aahimmye so: “Miyo kinnaphenta Apwiya, mana ahìwelela nsu naka”.—Esal. 116:1.

11. Yehova onaakhula sai mavekelo ahu?

¹¹ Tiithi ahu a wiirimu khahiyo paahi oniwiriyana mavekelo ahu, masi onnaakhula. Murummwa Yohani onnilipiherya so: “Muluku onninìwa nanvekelaka etthu, nanvekelakaru sintthara otthuna wawe”. (1 Yoh. 5:14, 15) Ekeekhai wira, khahiyo wira okathi wotheene Yehova onrowa waakhulaka mavekelo ahu ntoko naaphavela ahu. Owo onnisuwela etthu yootepa otthuneya mookumini mwahu. Tivonto, okathi mukina waakhula wawe pooti okhala “nnaari” aahiiso pooti woona wira vannireerela waakhula okathi mukina.—2 aKor. 12:7-9.

12-13. Mwa inamuna xeeni Tiithi ihu a wiirimu onnikhapelela awe?

¹² Yehova onninivaha itthu sinnithowa. Yehova onnipaka ele onaavekela awe axipaapa otheene wira apakeke. (1 Tim. 5:8) Owo onnaavaha anaawe itthu sinaathowa wira avikaniheke okhala akumi. Yehova khoniphavela wira nixankeke ni etthu yoolya, soowara ni opuro wookhala. (Math. 6:32, 33; 7:11) Okhala wira Tiithi oophenta, Yehova ooleiherya wira onoonivaha itthu sinnithowa muhoolo.

¹³ Etthu yootepa otthuneya okhala wira Yehova onninivaha khula etthu wira nlipihe waataana wooloka nrina ahu ni yena. Orumeelaka Nuulumo nawe Biibiliya, owo onninleela omutthu awe, soolakela sawe, yoolakela ya okumi ahu ni ele enrowa wiiraneya muhoolo. Nave ooniheryaka moota onimukhapelela awe khula mmosa a hiyo, owo ohaaruma anamuyari ahu wala Namoona mukina wira onikhaliherye wiixutta ekeekhai ni omusuwela Yehova. Owo onnivikaniha onikhaliherya okhala apatthani awe, aarumeelaka axitokweene oophenta, anna ni arokora oolipa momunepani. Nave Yehova onniniixuttiha orumeelaka mithukumano sa mmulokoni, weiwo nniixutta ahu vamosa ni anna ni arokora. Iyo inamuna vakhaani paahi Yehova onooniherya awe wira onniniphenta ntoko Tiithi ihu.—Esal. 32:8.

14. Xeeni Yehova onniixuttiha awe ni onipaka sai eyo?

¹⁴ Yehova onniniixuttiha. Hiyo khanihiyo oomalela ntoko Yesu ori awe oomalela. Tivonto vaareerelaka, okathi mukina Tiithi ihu oophenta Yehova, onninipwapwela wira oniixuttihe. Biibiliya onninuupuxerya wira: “Tthiri Apwiya annapwapwela yale anaphentaya”. (aHéb. 12:6, 7) Yehova onninipwapwela mwa inamuna soovirikana. Mwa ntakiheryo, Yehova pooti onipwapwela orumeelaka ele ninsoma ahu mBiibiliyani wala ele ninwiriyana ahu mmithukumanoni. Nave pooti wira nikhaliheryo nimphavela ahu ninrowa ovahiwa ni axitokweene. Moohicikha enamuna Yehova onnipwapwela awe, owo onnipaka eyo mwa enamuna yoophenta.—Yer. 30:11.

15. Mwa inamuna xeeni Yehova onnikhapelela awe?

¹⁵ Yehova onninikhaliherya okathi wa mixankiho. Ntoko siisaale tiithi onimukhaliherya awe  mwanawe okathi wooxankiha, Tiithi ihu a wiirimu onninikhaliherya okathi ninkumana ahu mixankiho. Owo onnirumeela munepa awe wootteela wira onikhapelele wa khula etthu yaarowa ohonona mukhalelo ahu womunepani. (Luka 11:13) Nave Yehova onninikhaliherya okathi ninkhulumuwa ahu aahiiso ninxanka ahu. Mwa ntakiheryo, Yehova oonivaha nlipelelo nookuxa murima. Nlipelelo nlo na muhoolo ninninikhaliherya ovilela mixankiho. Nkahaya muupuwele ela: Moohicikha etthu yootakhala ekhanle ooniiraneela, Yehova onoomaliha mixankiho sahu. Musuweleke wira khula muxankiho ninwanana ahu ti wa okathi vakhaani paahi, masi mareeliho a Yehova anikhala mahiku otheene.—2 aKor. 4:16-18.

16. Exeeni yiiraneyale nuumala Adamu ohimwiiwelela Tiithi aya oophenta?

¹⁶ Enamuna emosa enooniherya wira Yehova onniniphenta, ti ele aapanke awe nuumala okhumelela mixankiho emusi awe ya valaponi. Okathi Adamu yahaamwiiwelenle aya Yehova, awo ni osuulu aya yaahihiya wiirela mpantta emusi yoohakalala ya Yehova. (aRom. 5:12; 7:14) Yehova aahipaka etthu wira aakhaliherye Adamu ni osulu aya.

17. Moohipisa nuumala Adamu ottheka, Yehova aapanke exeeni?

¹⁷ Yehova aahimuhukhumu Adamu, masi aahivaha nlipelelo osuulu wotheene wa Adamu. Moohipisa, Yehova aahileiherya wira apinaatamu oowiiwelela yaamutthikela wiirela mpantta emusi ya Muluku. (Maph. 3:15; aRom. 8:20, 21) Wira yiiraneye eyo, Yehova aahimuruma Mwanawe amphentexa awe wira ovahe okumi awe ntoko mukuttho wowoopola. Tthiri eyo enooniherya ophenta wuulupale wa Yehova.—Yoh. 3:16.

18. Hata nihiyale ene omurumeela Yehova, exeeni ennikupaliha wira oniphavela wira nimooneke okhala Tiithi ihu?

¹⁸ Nnaamwi nri ene anatampi, Yehova oniphavela wira niireleke mpantta emusi awe, nto  khivanimuxankiha onikhaliherya. Ekeekhai wira hiyo pooti omunyoonyiha wala ohiya omurumeela, masi Yehova khonninyanyala. Ophavelaka wooniherya wira Yehova onnaaphenta anaawe, Yesu aahilavula nlikanyiho na mwaana aakhumme etthoko ya paapa awe. (Luka 15:11-32) Tiithi a nlikanyiho nne, aanilipelela wira mwanawe aamuhokolowa. Nto okathi mwaana ole aatthikenle awe owaani, paapa awe aahimwaakhela voohakalala vanceene. Akhala wira noohiya omurumeela Yehova, nnattharuwa ni murima wotheene, nikupaliki wira Tiithi ihu oophenta onoonaakhela ni matata manli.

19. Yehova onrowa olokiherya sai itthu Adamu ahononne aya?

¹⁹ Tiithi ihu onoolokiherya itthu sotheene Adamu ahononne aya. Nuumala Adamu ohimwiiwelela, Yehova ohaathanla apinaatamu 144.000 wira akhale mamwene ni anamukuttho wiirimu vamosa ni Mwanawe. Elapo esya, Yesu ni a 144.000 anrowa waakhaliherya apinaatamu okhala oomalela. Nuumala apinaatamu awo oowiiwelela weehereriwa okathi wookiserya, Yehova onimwaatthuvela aavahaka ekumi yoohimala. Nto Tiithi ahu onoohakalala vanceene woona elapo yotheene asareyale ene anaawe oomalela. Tthiri owo onrowa okhala okathi woohakalaliha vanceene!

20. Mwa inamuna xeeni Yehova onooniherya awe wira onniniphenta? Mwaha onittharelana ninrowa othokorerya exeeni?

²⁰ Tthiri, Yehova oonivaha mathowa manceene anooniherya wira onniniphenta vanceene. Moohaanyiherya, owo Tiithi oolokexa. Owo onniwiriyana mavekelo ahu, onninikhapelela mmukhalelo wa werutthuni ni womunepani. Yehova onniniixuttiha ni onikhaliherya. Nave onoonivaha itthu sinceene soohakalaliha muhoolo. Tthiri ti vookuxa murima, osuwela wira Tiithi ihu, Yehova onniniphenta ni onikhapelela! Nto okhala wira na anaawe, nimphavela wooniherya wira ninnixukhurela eparakha ela onivanhe awe. Ninrowa wooniherya sai eyo? Ninrowa othokorerya mwaha onittharelana.