1. Wetin person go need to do if e want talk to the king of Persia?

THINK-AM say you dey alive about 2,500 years ago for the land of Persia. You want talk to the king about one matter. So you travel go the city wey the king de live wey them de call Shushan. But you no go fit talk to the king unless e allow you. If you try to talk with the king when e no allow you, they fit kill you!—Esther 4:11.

2. How Jehovah want make we de feel about our prayer to him?

² We dey happy say Jehovah no be like that king for Persia! Jehovah dey important and get power pass any ruler for this earth. Even with that one, we fit talk to Jehovah anytime. Make we de feel free to talk to God because e like-am. For example, na true say Jehovah get wonderful titles like the Person wey make everything, the Person wey get power pass, and the Lord wey high pass. But when we de pray, e want make we still use the word “Father” or “Papa.” (Matt. 6:9) We really dey happy say Jehovah want make we be e tight friend!

3. Why we fit call Jehovah “Papa,” and wetin this topic go talk about?

³ E dey correct to call Jehovah “Papa” because na Jehovah give life to everything. (Ps. 36:9) We suppose to obey God because e be our Papa. When we do the things wey God want make we do, e go bless us with plenty fine things. (Heb. 12:9) One of the blessings na everlasting life, whether for heaven or earth. We still de enjoy some other fine things today. This topic go talk about wetin show say Jehovah na our Papa today and why we fit dey sure say e no go ever leave us for future. But first, make we talk about why we fit believe say our Papa Jehovah really love us and de care for us.

4. Why e de hard some people to see Jehovah as their Papa?

⁴ E de hard you to believe say God fit be your Papa? Some people fit feel say we no dey important to God because God really dey wonderful. They no dey sure say Almighty God care about each of them. But even with that one, our Papa love us and e no want make we feel like that. Na God give us life and e want make we be e friend. Apostle Paul tell some people for Athens say that one na true, and e still explain to them say Jehovah “no dey far from any of us.” (Acts 17:24-29) Just as pikin de feel free to go talk to e papa when the papa love the pikin, na so God want make we do because e love us.

5. Wetin we learn from the thing wey one sister face?

⁵ E fit hard other people to see Jehovah as their Papa because their own papa no show them love and care or e show them just small love and care. Think about this thing wey one sister talk, e say: “My papa de curse me, no be small. When I first start to study Bible, e no easy for me to near our Papa Jehovah. But after I don know Jehovah, everything change.” You de feel like that sister? If na so, make you know say you fit begin see Jehovah as the best Papa wey you fit ever get.

6. According to Matthew 11:27, wetin be one way wey Jehovah don help us see say e be our Papa and e love us?

⁶ Jehovah make sure say they write the things wey Jesus talk and do for Bible. This one na one way wey Jehovah help us see say e be our Papa and e love us. (Read Matthew 11:27.) Jesus really do things like e Father, no wonder e fit talk say: “If any person don see me, e don see the Father too.” (John 14:9) Jesus de always talk about Jehovah as Father. For only the Bible book of Matthew, Mark, Luke, and John, Jesus use the word “Father” about 165 times when e de talk about Jehovah. Why Jesus talk about Jehovah as Father plenty times? One reason be say, e want make people see Jehovah as their Papa and say Jehovah love them.—John 17:25, 26.

7. Wetin we learn about Jehovah from the way e treat e Son?

⁷ Make we discuss the thing wey we fit learn about Jehovah from the way e treat Jesus, e Son. Jehovah de always hear Jesus when e de pray. But God no only hear the prayer, e still answer-am. (John 11:41, 42) No matter the problem wey Jesus face, e still de feel the love and support from e Father.—Luke 22:42, 43.

8. Which ways Jehovah give Jesus the things wey e need?

⁸ Jesus understand say e life come from e Father and e dey alive because of e Father. So Jesus talk say: “I de live because of my Father.” (John 6:57) Jesus trust e Father for everything, and Jehovah give Jesus the things wey e need to dey alive. And the number one important thing be say, Jehovah help Jesus make e fit serve him well.—Matt. 4:4.

9. As Father, how Jehovah show say e really love Jesus?

⁹ Because Jehovah love Jesus and na e Father, Jehovah make Jesus really know say the Father dey e back. (Matt. 26:53; John 8:16) Na true say Jehovah no protect Jesus from every bad thing, but e help Jesus to endure problems. Jesus know say any bad thing wey e suffer, na only for some time. (Heb. 12:2)  Jehovah show say e love Jesus because e listen, teach, support, and give Jesus the things wey e need. (John 5:20; 8:28) Now, make we talk about how our Papa for heaven de care for us like the way e care for Jesus.

10. According to Psalm 66:19, 20, how Jehovah de show say e love us?

¹⁰ Jehovah de listen to our prayer. (Read Psalm 66:19, 20.) E no de look how many times we de pray, wetin we de pray about, or how long our prayer be, instead e want make we de pray everytime. (1 Thess. 5:17) We fit pray to our God anytime, no matter the place wey we dey. God no dey busy sotey e no fit listen to our prayer, instead e de always want hear us when we pray. When we know say Jehovah de listen to our prayer, this one de make us love Jehovah more. One writer for book of Psalm talk say: “I love Jehovah because e de hear me.”—Ps. 116:1.

11. How Jehovah fit answer our prayer?

¹¹ Our Papa Jehovah no de only listen to our prayer but e still de answer-am. Apostle John talk wetin make us dey sure, e say: “Anything wey we beg God, and the thing na wetin e want, e go answer.” (1 John 5:14, 15) Na true say Jehovah no go always answer our prayer as we expect. But e know wetin good for us. And so sometimes the answer fit be no or God fit want make we wait.—2 Cor. 12:7-9.

12-13. Which different-different way our Papa for heaven de use give us the things wey we need?

¹² Jehovah de give us things wey we need. E de do wetin e want make every papa do. (1 Tim. 5:8) God de give e children the things wey they need to dey alive. E no want make we over worry about wetin we go chop, cloth wey we go wear, or place wey we go stay. (Matt. 6:32, 33; 7:11) Because Jehovah love us as our Papa, e don even arrange things wey we go need for future.

¹³ The number one important thing na say, Jehovah de give us wetin we need make we fit be e tight friend. For inside Bible, Jehovah don tell us the truth about the kind person wey e be, wetin e get for mind about the things wey e make, why e make us, and wetin go happen for future. When we first learn the truth, God show say e care about us as e use our papa or mama or another person to teach us about the kind person wey e be. And God still continue to help us be e friend. E de use elders for congregation and other brothers and sisters with strong faith. Apart from that one, Jehovah de use congregation meeting to teach us. For our meeting, we de learn about God with other brothers and sisters. For this ways and other ways, Jehovah de show say e really love us as our Papa.—Ps. 32:8.

14. Why Jehovah de teach us, and how e de do-am?

¹⁴ Jehovah de teach us. We no be like Jesus, we de sin. So part of the way wey Jehovah de use teach us na to correct us when we need correction. Bible tell us say: “Na the people wey Jehovah love e de correct.” (Heb. 12:6, 7) Jehovah de correct us for different-different way. For example, Jehovah fit use something wey we read for Bible or wey we hear for our meeting to correct us. Or sometimes, the elders fit give us the help wey we need. No  matter how Jehovah correct us, Jehovah de always correct us because e love us.—Jer. 30:11.

15. Which ways Jehovah de use protect us?

¹⁵ Jehovah de help us endure problems. When papa love e pikin, e de help the pikin when e get problem. For the same way, our Papa for heaven de help us when we get problem. If something go spoil the friendship wey we get with God, God go use e holy spirit protect us from that thing. (Luke 11:13) Jehovah still de help us when we really dey sad. For example, Jehovah give us better hope. This hope fit help us endure hard time. Think about this one: No matter the bad things wey we de suffer, our Papa Jehovah go remove any problem wey this things don cause for us. Our problems na only for some time, but the blessings from Jehovah go last forever.—2 Cor. 4:16-18.

16. Wetin happen as Adam no obey e Papa Jehovah?

¹⁶ We fit see the love wey Jehovah get for us from wetin e do when Adam sin. As Adam no obey Jehovah, e stop to dey among the family of Jehovah, and even e children. (Rom. 5:12; 7:14) But Jehovah do something to help the children of Adam.

17. When Adam no obey Jehovah, wetin Jehovah no waste time to do?

¹⁷ Jehovah punish Adam, but e promise to help the children of Adam. God no waste time to promise say people go be part of e family again if they obey the things wey e talk. (Gen. 3:15; Rom. 8:20, 21) For that one to happen, Jehovah send e dear Son make e come die for us. This thing wey Jehovah do show say e really love us no be small!—John 3:16.

18. Even if we don stop to serve Jehovah well, why we dey sure say e want us as e children?

 ¹⁸ Even though say we de sin, Jehovah want make we dey part of e family, and e no de see-am as load to help us. Even if we stop to serve Jehovah well or we stop to do wetin e want, e no de troway us. Jesus use the story about one young man to show say the love wey Jehovah get for e children really strong. The young man for the story comot leave e family go use e life anyhow. (Luke 15:11-32) The papa for the story no stop to get hope say e pikin go come back. The papa use all e heart welcome the pikin when e come back to the family. If e be say we don stop to serve Jehovah well but we come repent, make we know say our Papa for heaven still love us and e dey ready to welcome us back.

19. Wetin Jehovah go do to fix the things wey Adam don spoil?

¹⁹ Our Papa Jehovah go fix all the things wey Adam don spoil. After Adam sin, Jehovah decide say e go take 144,000 people from the earth to be part of e family. This people go be kings and priests for heaven with Jesus. For the new world, Jesus and the 144,000 people go help other faithful people for this earth to remove sin from their body. After this other people pass the final test, God go give them everlasting life. That time, our Papa Jehovah go dey happy to see say the only people for earth na people wey sin don comot for their body, and they don be e children. Things go really fine that time!

20. Which ways Jehovah don use show us say e really love us, and wetin we go talk about for the next topic?

²⁰ Jehovah don show say e really love us. Jehovah na the best Papa. E de hear our prayer and e de give us the things wey we need to live and to be e friend. God de teach us and de support us. E don keep plenty fine-fine things for us for future. We dey happy say our Papa Jehovah love us and de care for us! For the next topic, we go talk about different ways wey we fit show say as children of God, we like the way God de show us love.