ALATIKE AKO 6
Ko Sehova, Tatatou Tamai, ʼe ʼOfa Mamahi Kia Tatou
“Koia, ʼe tonu ke kotou faikole fenei: ‘Ko tamatou Tamai.’ ” —MAT. 6:9.
KATIKO 135 Ke Ke Fakapotopoto, Siʼoku Foha
TE ʼU MANATU FAKANOUNOU *
1. Kotea ʼae neʼe tonu ke fai e he tahi moka neʼe fia palalau ki te hau ʼo Pelesia?
FAKAKAUKAUʼI age muʼa, ʼe ke maʼuli ʼi Pelesi, kua hili ki ai taʼu ʼe 2 500. ʼE ke fia palalau ki te hau ʼo te fenua ʼaia ʼo ʼuhiga mo he aluʼaga. ʼE ke faifolau anai ki te fenua ko Susani, ʼae ʼe nofo ai te hau. Kae ʼe hoki feala pe ke ke palalau ki ai, mo kapau kua fakagafua atu. Kapau ʼe ke alu ki te hau kae neʼe mole fakagafua atu, ʼe feala pe ke matehi koe.—Esite. 4:11
2. ʼE loto e Sehova ke tou palalau feafeaʼi kia te ia?
2 Meʼa fakafiafia, koteʼuhi ko Sehova ʼe mole hage ko te hau ʼo Pelesi! ʼE maʼoluga age ia Sehova ʼi te ʼu hau fakakelekele. Logo la te faʼahi ʼaia, kae ʼe feala ke tou fakaovi kia te ia ʼi he temi pe. ʼE ina loto ke tou palalau faʼifaʼitaliha kia te ia. Ohage la, logo la ʼe maʼu e Sehova te ʼu higoa fakatuʼulaga, ohage ko te Tupuʼaga Lahi, mo Mafimafi pea mo Tuʼi ʼAliki, kae ʼe ina fakaafe tatou ke tou ui “Tamai” moka tou faikole kia te ia. (Mat. 6:9) ʼE fakatupu fiafia te loto ʼae ʼo Sehova ke tou felogoi lelei mo ia.
3. He koʼe ʼe feala ke tou pauʼi kia Sehova ʼo ui “Tamai”? Kotea ʼae ka tou vakaʼi ʼi te alatike ʼaeni?
3 ʼE tuha ke tou pauʼi kia Sehova ʼo ui “Tamai,” koteʼuhi ko ia te Matapuna ʼo totatou maʼuli. (Pes. 36:10) Pea ʼe maʼua ke tou fakalogo kia te ia he ʼe ko ia ko tatatou Tamai. Kapau ʼe tou fai te meʼa ʼae ʼe ina kole mai, ʼe ina tapuakina lahi anai tatou. (Hep. 12:9) ʼE tou maʼu anai te maʼuli heʼe gata, tatau aipe ʼi te lagi peʼe ko te kele. Pea ʼi te temi nei, kua lahi te ʼu lelei taulekaleka ʼe tou maʼu. ʼE fakamahino ʼi te alatike ʼaeni pe ʼe fakaha feafeaʼi e Sehova kia tatou ko ia ko he Tamai ʼofa. ʼE toe fakamahino mai pe koʼe ʼe feala ke tou tui papau ʼe mole ina liʼakina anai tatou. Kae tou vakaʼi muʼa pe koʼe ʼe feala ke tou tui papau ʼe ʼofa mamahi tatatou Tamai ʼae ʼe ʼi selo kia tatou pea ʼe fia tokoni mai.
KO SEHOVA ʼE KO HE TAMAI ʼOFA PEA MO FIA TOKONI MAI
ʼE loto e Sehova ke tou fakaovi age kia te ia ohage ko he tamai ʼofa ʼe fia fakaovi ki ʼana fanau (Vakaʼi te palakalafe 4)
4. He koʼe ʼe faigataʼa ki ʼihi tanatou manatu ko Sehova ʼe hage ko hanatou Tamai?
4 ʼE faigataʼa koa kia koe hau manatu ko te ʼAtua ʼe hage ko hau Tamai? Ko ʼihi ʼe natou manatu ʼe mole natou maʼuhiga moka fakatatau natou kia Sehova. ʼE faigataʼa hanatou tui ko te ʼAtua Mafimafi ʼe fia tokoni kia natou takitokotahi. ʼE mole loto e tatatou Tamai ʼofa ke tou manatu feia. Neʼe ina foaki mai te maʼuli pea ʼe ina loto ke tou fakaovi age kia te ia. ʼI tana ʼosi fakaha te moʼoni ʼaia, neʼe fakamahino e te apositolo ko Paulo ki te hahaʼi ʼo Ateni ʼae neʼe fagono ki ai, “ ʼe mole mamaʼo ia tatou takitokotahi.” (Gaue 17:24-29) ʼE loto e te ʼAtua ke tou faikole age kia te ia ohage pe ko he kiʼi fanau ’e faipalalau ki ʼana matuʼā ʼae ʼe ʼoʼofa mo tokoni ki ai.
5. Kotea ʼae ʼe tou ako mai te aluʼaga ʼae neʼe hoko ki he tuagaʼane?
5 Pea ʼe faigataʼa ki ʼihi hanatou manatu ko Sehova ʼe hage ko hanatou Tamai, koteʼuhi neʼe mole ʼofa pea mo agalelei tanatou tamai kia natou. ʼE fakamatala fenei e he tuagaʼane: “Neʼe agamalohi ʼaupito taku tamai. ʼI taku kamata ako, neʼe faigataʼa kia au haku fakaovi ki te Tamai ʼae ʼi selo. Kae ʼi taku iloʼi lelei leva ia ia, neʼe fetogi ai taku manatu.” ʼE ke manatu feia koa mo koe? Kapau koia, ʼaua naʼa ke lotovaivai. ʼAki te temi, ʼe feala anai ke ke manatu ko Sehova ʼe ko tau Tamai ʼae ʼe agalelei ʼaupito.
6. Ka tou lau ia Mateo 11:27, kotea ʼae neʼe fai e Sehova ke liliu ai kia tatou ko hatatou Tamai ʼofa?
6 Neʼe fakatuʼu e Sehova ʼi te Tohi-Tapu te ʼu meʼa ʼae neʼe ui pea mo fai e Sesu, ke liliu ai kia tatou ia te ʼAtua ko hatatou Tamai ʼofa. (Lau ia Mateo 11:27.) Neʼe faʼifaʼitakiʼi lelei e Sesu ia tana Tamai. Koia, neʼe ina ui fenei ai: “Ko ʼae kua sio kia te au, kua toe sio ia ki te Tamai.” (Soa. 14:9) Neʼe ina tau ui “Tamai” moka neʼe palalau ʼo ʼuhiga mo Sehova. Pea ʼi te ʼu Evaselio ʼe fa, neʼe teitei tuʼa 165 tana fakaʼaogaʼi te kupu “Tamai.” Kotea tona tupuʼaga? Neʼe ina fai te faʼahi ʼaia tafito ke iloʼi papau ai e te hahaʼi ko Sehova ʼe ko he Tamai ʼofa.—Soa. 17:25, 26.
7. Kotea te ako ʼe tou taʼofi mai te faʼahiga aga ʼa Sehova ki tona ʼAlo?
7 Tou vakaʼi te ako ʼae ʼe tou maʼu mai te faʼahiga aga ʼa Sehova ki tona ʼAlo ko Sesu. Neʼe fagono tuʼumaʼu pe ki ʼana faikole. Pea neʼe mole gata pe ki tana fagono ki ai, kae neʼe ina toe tali ʼana faikole. (Soa. 11:41, 42) Logo la te ʼu ʼahiʼahi ʼae neʼe tau mo Sesu, kae neʼe ina logoʼi tuʼumaʼu pe te ʼofa ʼo tana Tamai mo tana tokoni age ki ai.—Luka 22:42, 43.
8. Neʼe foaki feafeaʼi e Sehova te ʼu meʼa ʼae neʼe ʼaoga kia Sesu?
8 Neʼe iloʼi lelei e Sesu neʼe ko tana Tamai te Matapuna ʼo tona maʼuli, pea neʼe tokaga tuʼumaʼu pe kia ia. Koia, neʼe ina ui fenei: “ ʼE au maʼuli ʼuhi ko te Tamai.” (Soa. 6:57) Neʼe falala katoa ia Sesu ki tana Tamai, pea neʼe foaki age e Sehova kia ia te ʼu meʼa fuli ʼae neʼe ʼaoga ki tona maʼuli. Ko te meʼa ʼae neʼe maʼuhiga age, neʼe tokoni tuʼumaʼu pe ia Sehova kia ia ʼi te faʼahi fakalaumalie, ke nofo agatonu ʼo kaku ki tona mate.—Mat. 4:4.
9. Neʼe fakaha feafeaʼi e Sehova neʼe ko he Tamai neʼe ʼofa lahi kia Sesu?
9 Neʼe loto e Sehova, ʼae ko he Tamai ʼofa, ke iloʼi e tona ʼAlo neʼe tokoni ki ai. (Mat. 26:53; Soa. 8:16) Logo pe la neʼe mole ina puipui ia ia ʼi ʼona mamahi fuli, kae neʼe tokoni ki ai ke ina ʼutakiʼi te ʼu mamahi. Pea neʼe iloʼi e Sesu neʼe fakatemi pe tona ʼahiʼahiʼi. (Hep. 12:2) Neʼe fakaha e Sehova neʼe tokaga ki tona ʼAlo, he neʼe fagono ki ai, mo foaki age te ʼu meʼa ʼae neʼe ʼaoga ki ai, mo ina akoʼi ia ia pea mo lagolago ki ai. (Soa. 5:20; 8:28) Tou vakaʼi ʼi te lakaga nei pe ʼe toe tokoni feafeaʼi mai tatatou Tamai ʼae ʼe ʼi selo kia tatou.
ʼE TOKAGA LELEI TATATOU TAMAI ʼAE ʼI SELO KIA TATOU
Ko he tamai ʼofa ’e (1) fakalogo, (2) mo tokaga ki te maʼuli fakasino, (3) mo ina akoʼi, pea mo (4) puipui ʼana fanau. ʼE toe tokaga kia tatou tatatou Tamai ʼae ʼi selo ʼi te ʼu aluʼaga tatau ʼaia (Vakaʼi te palakalafe 10-15) *
10. Ka tou lau ia Pesalemo 66:19, 20, ʼe fakaha feafeaʼi e Sehova ʼe ʼofa ia tatou?
10 ʼE fagono Sehova ki ʼatatou faikole. (Lau ia Pesalemo 66:19, 20.) ʼE loto e te ʼAtua ke tou fakaha fuli age te ʼu meʼa ʼae ʼi totatou loto. Pea ʼe ina loto ke tou “faikole tuʼumaʼu,” pe ʼe nounou peʼe loaloaga. (1 Tes. 5:17) ʼE feala ke tou palalau ki ai ʼi he temi pe, pea ʼi he koga meʼa pe ʼe tou nonofo ai. ʼE mole maʼumaʼua fau ke mole feala ai hana fakalogo ki ʼatatou faikole. ʼE fagono tuʼumaʼu mai pe ia kia tatou. Pea ka tou mahino lelei ʼe fagono ki ʼatatou faikole, ʼe tou ʼoʼofa lahi ai kia te ia. Neʼe ui fenei e te tagata faipesalemo: “E au ofa [kia Sehova], koteuhi e logo ia ia, ki toku leo.”—Pes. 116:1.
11. ʼE tali feafeaʼi e Sehova ki ʼatatou faikole?
11 ʼE mole fakalogo pe tatatou Tamai ki ʼatatou faikole, kae ʼe ina toe tali ki ai. ʼE fakamoʼoni fenei e te apositolo ko Soane: “Ko he meʼa pe ʼe tou kole ki te ʼAtua ʼo mulimuli ki tona finegalo, ʼe fagono mai kia tatou.” (1 Soa. 5:14, 15) ʼE moʼoni, ʼi ʼihi temi ʼe mole tali mai e Sehova ʼo mulimuli ki te meʼa ʼae ʼe tou loto ki ai. ʼE ina iloʼi te meʼa ʼae ʼe lelei kia tatou. Koia, ʼe feala ke fakafisi ki te meʼa ʼae ʼe tou kole age kia te ia, peʼe ina loto anai ke tou faʼa kataki ʼo talitali.—2 Ko. 12:7-9.
12-13. ʼE fakakatoa feafeaʼi e tatatou Tamai ʼae ʼi selo te ʼu meʼa ʼae ʼe ʼaoga kia tatou?
12 ʼE fakakatoa e Sehova te ʼu meʼa ʼae ʼe ʼaoga kia tatou. ʼE fai e Sehova te ʼu meʼa ʼae ʼe ina kole age ke fai e te ʼu tamai fuli. (1 Tim. 5:8) Ohage la, ʼe ina fakakatoa te ʼu meʼa ʼae ʼe ʼaoga ki ʼana fanau ʼi te faʼahi fakasino. ʼE mole ina loto ke tou hoha ʼo ʼuhiga mo te meʼa kai, mo te meʼa laofi, pea mo te nofoʼaga. (Mat. 6:32, 33; 7:11) Pea ko Sehova, ʼae ko he Tamai ʼofa, kua ina fai he ʼu fakatuʼutuʼu ʼo ʼuhiga mo te ʼu meʼa ʼae ka ʼaoga kia tatou ʼi te ka haʼu.
13 Kae ʼe maʼuhiga age kia Sehova ke ina foaki mai te ʼu meʼa ʼae ʼe ʼaoga kia tatou ʼi te faʼahi fakalaumalie, ke tou fakaovi ai kia te ia. ʼE ina fakaha mai ʼi te Tohi-Tapu pe ko ai ia ia, kotea tana fakatuʼutuʼu, kotea te ʼuhiga ʼo te maʼuli pea mo te ka haʼu. Neʼe tokoni mai ʼaki tana fakaʼaogaʼi ʼatatou matuʼā, peʼe ko he tahi age ke tokoni mai ke tou iloʼi ia ia. Pea ʼe toe hoko atu pe tana tokoni ʼofa mai kia tatou ʼaki te ʼu tagata ʼafeā ʼo te kokelekasio pea mo te ʼu tehina mo tuagaʼane ʼae kua fotufotuʼa. Tahi ʼae, ʼe akoʼi tatou e Sehova ʼi ʼatatou fono. ʼE akoʼi fakatahi ai tatou mo totatou famili fakalaumalie. ʼE fakaha mai ai e Sehova tona ʼofa kia tatou fuli ohage pe ko he tamai ʼe ʼofa ki ʼana fanau.—Pes. 32:8.
14. He koʼe ʼe akoʼi tatou e Sehova? Pea ʼe feafeaʼi tana fai te faʼahi ʼaia?
14 ʼE akoʼi tatou e Sehova. ʼE tou heʼe haohaoa, ʼo mole tou hage ko Sesu. Koia, ʼe akoʼi tatou e tatatou Tamai ʼofa ʼo ina fakatonutonuʼi tatou moka ʼe ʼaoga. ʼE fakamanatuʼi fenei mai e te Tohi-Tapu: “ ʼE akonakiʼi e Sehova ia natou ʼae ʼe ʼofa ai.” (Hep. 12:6, 7) ʼE akonakiʼi tatou e Sehova ʼi he ʼu aluʼaga kehekehe. Ohage la, ʼe tou mahino anai ʼe tonu ke tou fetogi tatatou faʼahiga manatu peʼe ko tatatou aga, moka tou lau he vaega Tohi-Tapu peʼe moka tou logo ki he manatu ʼi te ʼu fono. Peʼe lagi ko te kau tagata ʼafeā ʼae ka natou tokoni mai anai. Tatau aipe pe ʼe feafeaʼi te fakatonutonuʼi ʼo tatou e Sehova, kae ʼe ina fai tuʼumaʼu pe koteʼuhi ʼe ʼofa ia tatou.—Sel. 30:11.
15. ʼE puipui feafeaʼi tatou e Sehova?
15 ʼE lagolago mai ia Sehova moka ʼahiʼahiʼi tatou. ʼE lagolago he tamai ʼofa ki ʼana fanau moka natou tau mo he ʼu fihifihia. ʼO toe feia pe, ʼe tokoni mai tatatou Tamai ʼae ʼi selo ke tou Luka 11:13). ʼE ina toe puipui tatou mai te lotovaivai mo te lototuʼania. Ohage la ʼe ina foaki mai he ʼamanaki taulekaleka, he ʼamanaki ʼe tokoni mai ke tou lava ʼutakiʼi te ʼu mamahi. Fakakaukauʼi age muʼa te faʼahi ʼaeni: Tatau aipe pe kotea te ʼu malaʼia ʼae ʼe hoko kia tatou, kae ʼe pulihi anai e tatatou Tamai ʼofa te ʼu mamahi fuli ʼae neʼe tou tau mo ia.ʼE fakatemi pe ʼotatou ʼahiʼahi kae ko te ʼu tapuakina ʼa Sehova ʼe heʼe gata ia.—2 Ko. 4:16-18.
katakiʼi ʼotatou ʼahiʼahi. ʼE ina fakaʼaogaʼi tona laumalie maʼoniʼoni moʼo puipui ʼo tatou, ke mole tou tuʼutamakiʼia ʼi te faʼahi fakalaumalie. (ʼE MOLE LIʼAKINA ANAI TATOU ʼI HE ʼAHO E TATATOU TAMAI
16. Kotea ʼae neʼe hoko ʼi te talagataʼa ʼa Atama ki tana Tamai ʼae ʼi selo?
16 Ko te fakatuʼutuʼu ʼae neʼe fai e Sehova ʼi te temi ʼae neʼe talagataʼa ai ia Atama, neʼe ina fakaha ai tona ʼofa kia tatou. Neʼe mole kei kau ia Atama, ʼo feia ki tona hologa, ki te famili ʼo tana Tamai ʼae ʼi selo ʼi te temi ʼae neʼe talagataʼa ai kia te ia. (Loma 5:12; 7:14) Meʼa fakafiafia koteʼuhi neʼe tokoni mai Sehova kia tatou.
17. Kotea ʼae neʼe fai atu aipe e Sehova ʼi te ʼosi talagataʼa ʼa Atama?
17 Neʼe fakatuʼā e Sehova ia Atama, kae neʼe ina faigaʼi pe ke maʼu e tona hologa he ʼamanaki. Neʼe ina fakapapauʼi atu aipe ʼe feala anai ki te hahaʼi ʼae ʼe fia fakalogo age kia te ia ke natou toe kau ki tona famili. (Sen. 3:15; Loma 8:20, 21) Neʼe ina fakahoko te faʼahi ʼaia ʼaki te sakilifisio faitotogi ʼo tona ʼAlo ʼofaina, ia Sesu. Neʼe fakaha e Sehova tona ʼofa mamahi kia tatou ʼi tana foaki mai tona ʼAlo.—Soa. 3:16.
Kapau neʼe tou mavae mai te ʼAtua kae ʼe tou fakahemala, ʼe fakatalitali anai tatou e Sehova, tatatou Tamai fonu ʼi te ʼofa (Vakaʼi te palakalafe 18)
18. He koe ʼe tou tui papau ʼe loto e Sehova ke tou kau ki tona famili logo la neʼe tou mavae mai ia te ia?
18 Logo la totatou ʼuhiga agahala kae ʼe loto e Sehova ke tou kau ki tona famili, pea ʼe mole fiu ia ʼi te tokoni mai. ʼE feala pe ʼi ʼihi temi ke tou fakamamahiʼi peʼe ke tou mavae mai ia te ia lolotoga he temi. Kae ʼe ʼamanaki tuʼumaʼu pe ia Sehova ʼe tou toe liliu mai anai kia te ia. Neʼe fakaha Luka 15:11-32) ʼI te hisitolia ʼaia neʼe ʼamanaki tuʼumaʼu pe e te tamai ʼe toe liliu mai anai tona foha. Pea ʼi tana toe liliu mai ki fale neʼe tali fakafiafia e tana tamai. Kapau neʼe tou mavae mai ia Sehova kae kua tou fakahemala ʼe feala pe ke tou tui papau ʼe fakatalitali anai tatou e tatatou Tamai fonu ʼi te ʼofa.
e Sesu te ʼofa lahi ʼo Sehova ki ʼana fanau ʼaki tana fakamatala ʼae te hisitolia ʼo te foha ʼae neʼe puli. (19. ʼE pulihi feafeaʼi anai e Sehova te ʼu mamahi ʼae neʼe tupu mai ia Atama?
19 ʼE pulihi anai e tatatou Tamai te ʼu mamahi fuli ʼae neʼe tupu mai ia Atama. Hili te talagataʼa ʼae ʼi Eteni, neʼe fai leva e Sehova te tonu ʼae ke ina vaheʼi he toko 144 000 hahaʼi mai te kele ke kaugā hau pea mo pelepitelo ʼi selo mo tona ʼAlo. ʼE tokoni anai ia Sesu pea mo ʼona kaugā hau ki te hahaʼi fakalogo ke natou liliu ʼo haohaoa ʼi te malama foʼou. Hili te ʼahiʼahi fakaʼosi ʼo tanatou fakalogo, ʼe foaki anai e Sehova kia natou te maʼuli heʼe gata. Pea ʼe fiafia anai tatatou Tamai ʼi te kua nofoʼi ʼo te kele e ʼona foha mo ʼona ʼofafine kua haohaoa. ʼE ko he temi taulekaleka anai ʼaia!
20. ʼE fakaha feafeaʼi mai e Sehova ʼe ʼofa mamahi ia tatou? Pea kotea ka tou vakaʼi anai ʼi te alatike ka hoa mai?
20 ʼE fakaha mai e Sehova ʼi he ʼu aluʼaga kehekehe ʼe ʼofa mamahi ia tatou. Ko he Tamai lelei ia. ʼE fakalogo mai ki ʼatatou faikole pea ina foaki mai te ʼu meʼa ʼae ʼe ʼaoga kia tatou pe ʼi te faʼahi fakasino peʼe fakalaumalie. ʼE ina akoʼi tatou pea mo lagolago mai kia tatou. Pea ʼe ina toe fai anai he ʼu meʼa ʼe lelei age maʼa tatou ʼi te ka haʼu. ʼE tou lotofakafetaʼi lahi ʼi tatatou iloʼi ʼae ʼe ʼofa pea mo lototokaga tatatou Tamai kia tatou. ʼI te alatike ka hoa mai, ʼe tou vakaʼi anai pe ʼe feafeaʼi hatatou fakaha tatatou lotofakafetaʼi ki te ʼofa ʼae ʼe ina fakaha mai kia tatou ʼaeni, ko ʼana fanau.
KATIKO 108 Te ʼOfa Agatonu ʼo Te ʼAtua
^ pal. 5 ʼE tou manatuʼi tuʼumaʼu ia Sehova ʼi tona ʼuhiga ʼae ko ia ko totatou Tupuʼaga pea mo Tui ʼo te ʼAtulaulau. Kae ʼe lahi te ʼu tupuʼaga ke tou manatu ai ʼe ko he Tamai ʼe ʼofa lahi kia tatou. ʼE tou vakaʼi anai ʼi te alatike ʼaeni te ʼu tupuʼaga ʼaia. ʼE tou toe vakaʼi anai pe ʼe koʼe ʼe feala ke tou tui papau ʼe mole liʼakina anai tatou e Sehova.
^ pal. 59 FAKAMATALA ʼO TE ʼU PĀKI: ʼE fakaha ʼi te ʼu pāki takitahi ʼaeni ʼe fa he tamai mo tana kiʼi fanau: ko he tamai ʼe fakalogo lelei ki tona kiʼi foha, ko he tamai ʼe tokaga ki te maʼuli fakasino ʼo tona kiʼi ʼofafine, ko he tamai ʼe ina akoʼi tona foha, pea ko he tamai ʼe ina fakalotofimalieʼi tona foha. Pea ko te nima ʼae ʼi te ʼu tuʼa pāki ʼe ina fakatata te nima ʼo Sehova. ʼE toe tokaga kia tatou ʼi te ʼu aluʼaga tatau ʼaia.