1. Ino aby raha tsy maintsy nataonolo araiky izikoa izy tihikoran̈a tamy panjakany Persy?

MINIMINIA hely baka anao iziô niain̈y ta Persy, tamy taon̈o 2 500 T.K. Misy afera maventy tianao hikoran̈iny amy panjakany tany io, ke tsy maintsy nan̈ano dia lavitry anao firaka anao zeky ta Sosana, tanàna nisy panjaka io. Fa alohany anao hikoran̈a aminany koa, tsy maintsy mahazo lalan̈a baka aminany antsendriky, koa tsy zen̈y anao maty edy!—Est. 4:11.

2. Tiany Jehovah han̈ano karakory atsika koa fa mikoran̈a aminany?

² Nakiry Jehovah tsy ôtry panjakany Persy io! Ten̈a mankasitraka izy atsika. Tsisy pitondra olombelon̈o mahaoesa voninahitriny Jehovah ndreky angovonany. Fa ndray zen̈y, ikeny man̈aton̈o izy fo atsika amy fotoan̈a jiaby. Tiany Babantsika io tsy hihafahafa ndreky tsy havozo foeky atsika koa fa mikoran̈a aminany. Ohatra iziô, maro an̈aran̈a fan̈ajan̈a ikahian̈a Jehovah amy Baiboly ao, karaha ataony: Pamoron̈o Be Voninahitry, Farany Mahery, ndreky Tompo Farany An̈abo. Kanefa tsy zen̈y tiany hikahiantsika izy lera mivavaka, fa “Baba” na “Papa.” (Mat. 6:9) Ten̈a manohin̈y fô mahay fa tiany Jehovah harikitry izy atsika!

3. Nan̈ino tsy diso atsika koa mikaiky Jehovah “Baba” zen̈y? Ino raha hidinihintsika ato?

³ Tsy diso atsika koa mikaiky Jehovah “Baba” zen̈y, fotony baka aminany fahin̈anantsika. (Sal. 36:9) Zen̈y mahavy atsika mila man̈aja izy ndreky man̈araka volan̈anany. Hahazo hatsaran̈a maro atsika izikoa man̈ano zen̈y. (Heb. 12:9) Tafiditry amy zen̈y, fiain̈ana tsisy farany andan̈itry an̈y na ambony tany eto. Hankafỳ hatsaran̈a maro koa atsika rango izioty. Hidinihintsika ato porofo mankamarin̈y fa Jehovah Babantsika io  tia atsika ndreky tsy hiala atsika foeky, rango zioty firaka aminy amaray an̈y. Fa alô antsendriky zahavantsika nan̈ino atsika mety matoky fa ten̈a tia ndreky mikarakara atsika ankitin̈y Babantsika andan̈itry an̈y io.

4. Nan̈ino ma sarotro aminolo sasany mieritreritry Jehovah mira Baba zen̈y?

⁴ Sarotro aminao ma mieritreritry Jehovah mira Baba zen̈y? Olo sasany koa fa mandiniky habezan̈any Jehovah Zan̈ahary, iro mahatsiaro ten̈a hely ndreky tsisy fotiny foeky. Zan̈ahary Farany Mahery zen̈y ho iro tsy hiasaloha amintsika. Ny marin̈y aminany, atsika tsy tiany Babantsika be fitiavan̈a io hieritreritry karaha zen̈y. Izy nan̈amia atsika fahin̈ana, ke tiany han̈aton̈o izy atsika. Tsisy ny hafa amy zen̈y raha nikoran̈iny apostoly Paoly taminolo nitandren̈y izy ta Atena tan̈y. Karaha ty ho izy: ‘Jehovah tsy lavitry atsika tsiaraikiaraiky.’ (Asa. 17:24-29) Atsika tsiaraikiaraiky koa tiany Jehovah han̈aton̈o izy, karaha ataony tsaiky tsy misalasala man̈aton̈o babany ten̈a tia izy in̈y.

5. Ino raha ianarantsika baka tamy raha niain̈any ranabavy araiky?

⁵ Mety tsy mora aminolo sasany hahita Jehovah mira Baba zen̈y, fotony babandro niteraka iro mety tsy nijery iro foeky na tsy ten̈a nan̈aboaka fitiavan̈a tamindro. Misy ranabavy araiky nivolan̈a: “Papako farandraha masiaka eky sady mamopoko koa. Tamy zaho vo komansy nianatra Baiboly, ten̈a tsy nora taminaka nifandray tamy Jehovah, Baba andan̈itry an̈y io. Fa niova raha zen̈y, zaho koa fa nahay izy tsarabe.” Asa anao mba karaha zen̈y? Anao aza rivan̈a. Arakaraka handihanany fotoan̈a, ho hitanao fa Jehovah io Baba farany tsara.

6. Izikoa Matio 11:27 zahan̈a, ino fomba araiky han̈ampiany Jehovah atsika hihevitry izy mira Baba be fitiavan̈a zen̈y?

⁶ An̈isany fomba han̈ampiany Jehovah atsika hihevitry izy mira Baba be fitiavan̈a, raha nivolan̈iny Jesosy ndreky raha nataony. (Vakia Matio 11:27.) Jesosy ten̈a nahavita nangala tahaka toetriny Babany. Zen̈y nahavy izy nasaky nivolan̈a: “Lan̈iany olo nahita zaho nahita Baba koa.” (Jaona 14:9) Na ôtry ataony amy bokiny Filazantsara ao fo, efa kadiriny in-100 aby Jesosy nampiasa volan̈a “Baba” zen̈y, ivolan̈ana Jehovah. Nan̈ino izy nikoran̈a momba Jehovah matetiky be karaha zen̈y? Baka olo ho resy lahatra fa Jehovah io Baba be fitiavan̈a ankitin̈y.—Jaona 17:25, 26.

7. Ino raha ianarantsika momba Jehovah baka tamy fomba nitondrasany Zanany io?

⁷ Ino raha ianarantsika baka amy fomba nitondrasany Jehovah i Jesosy? Ten̈a tiany mare zanany io, ke nampiany fo. Isaka Jesosy nivavaka, Jehovah tsy basiny nitandren̈y izy fo fa, nivaliany koa vavakanany. (Jaona 11:41, 42) Ndray ino ndray ino raha sarotro nandalovany Jesosy, tsapany fo fa Babany io ten̈a tia izy ndreky mikarakara izy.—Lioka 22:42, 43.

8. Karakory nataony Jehovah nikarakara Jesosy?

⁸ Hainy Jesosy fa Jehovah Loharanony Fahin̈ana, an̈isanizen̈y fahin̈ananany. Zen̈y nahavy Jesosy nivolan̈a: “Baka aminany mahavy zaho velon̈o.” (Jaona 6:57) Hainy fa matoa izy misy, baka amy Jehovah, ary baka amy Jehovah koa mahavy izy mbala velon̈o fo. Karakory nataony Jehovah nikarakara Jesosy? Namezany izy zay raha nilainy. Fa ny raha ten̈a maventy, Jehovah nan̈ampy izy tsy hivadiky.—Mat. 4:4.

9. Karakory nan̈aboahany Jehovah fa izy ten̈a tia sady nikarakara Jesosy?

⁹ Baba be fitiavan̈a ankitin̈y Jehovah! Von̈ono fo izy nan̈ampy Jesosy. Nataony  tsapany Jesosy raha zen̈y. (Mat. 26:53; Jaona 8:16) Marin̈y fa Jehovah tsy niaro izy tamy zay raha sarotro nidiaviny, fa izy fo tsy voly nan̈ampy zanany io. Hainy Jesosy koa fa raha niaretany aby zen̈y mielan̈a fo. (Heb. 12:2) Karakory nan̈aboahany Jehovah fa izy ten̈a tia ndreky nikarakara Jesosy? Izy nitandren̈y vavakanany, nan̈amia raha nilainy, nampiofan̈a izy, sady nan̈ampy izy. (Jaona 5:20; 8:28) Tsisy ny hafa amy zen̈y koa raha ataony Jehovah amintsika. Alô hizahavantsika karakory an̈anovany zen̈y.

10. Karakory an̈aboahany Jehovah fitiavany atsika, izikoa Salamo 66:19, 20 zahan̈a?

¹⁰ Tandrin̈esany Jehovah vavakantsika. (Vakia Salamo 66:19, 20.) Tsy nasiany Jehovah erany halavasany vavaka ataontsika. Ndray izy aby mandrisiky atsika hivavaka matetiky ke! (1 Tes. 5:17) Mety mivavaka aminany fo atsika amy fotoan̈a jiaby, ndray aia ndray aia tany misy atsika. Tsy empaka foeky Jehovah mitandren̈y atsika sady tandrin̈esany tsarabe atsika koa fa mivavaka. Fahaizantsika zen̈y mahavy atsika mahaitia izy fo. Zen̈y nahavy panoratra salamo araiky ty nivolan̈a: “Tiako Jehovah, fotony izy mitandren̈y feonaka ndreky vavakanaka.”—Sal. 116:1.

11. Karakory ataony Jehovah koa fa mamaly vavakantsika?

¹¹ Babantsika io tsy vitany mitandren̈y vavakantsika fo fa mamaly vavakantsika koa. Man̈amia toky atsika karaha ty apostoly Jaona: “Zay raha angatahintsika aminany [Zan̈ahary], izikoa mifan̈araka amy sitraponany, izy mitandren̈y atsika.” (1 Jaona 5:14, 15) Fa ndray zen̈y, Jehovah tsy voatery hamaly vavakantsika erakany fomba itiavantsika izy. Hainy raha ten̈a mahatsara atsika, ke ndraikindraiky mety tsy direkty valiany vavakantsika, fa tiany atsika hiambin̈y.—2 Kor. 12:7-9.

12-13. Karakory ataony Jehovah mikarakara atsika?

¹² Amezany Jehovah atsika raha ilaintsika. Zen̈y lastio raha irahiny ataony baba jiaby. (1 Tim. 5:8) Amiany atsika raha ilaintsika isanandra. Tsy tiany atsika hiasaloha momba hanin̈y hoanin̈y, lamba sikinin̈y, ndreky tran̈o ipitrahan̈a. (Mat. 6:32, 33; 7:11) Hataony Jehovah koa fomba hazahoantsika zay raha ilaintsika, aminy amaray an̈y. Ten̈a Baba be fitiavan̈a ankitin̈y izy!

¹³ An̈abony raha jiaby zen̈y, ataony koa raha hahavy atsika ho tsara fihavanan̈a aminany. Baka amy Volan̈anany ao nan̈ambarany tamintsika ny marin̈y momba izy, fikasan̈anany, antony nan̈amboarany atsika, ndreky raha handalo aminy hoavy. Maro fomba han̈ampiany atsika hahay raha momba izy ndreky hifandray aminany. Iô iro olobentsika aby io ndreky olo hafa nampianatra atsika. Iô koa iro antipan̈ahy be fitiavan̈a, avio rahalahy ndreky ranabavy matotro, fivorian̈any fiangonan̈a. Misy fomba maro hafa koa han̈aboahany Jehovah fa izy Baba be fitiavan̈a ankitin̈y.—Sal. 32:8.

14. Nan̈ino Jehovah man̈anatra atsika, baka io karakory han̈anovany zen̈y?

¹⁴ Ampiofan̈iny Jehovah atsika. An̈isany fomba ampiofan̈any atsika fan̈anaran̈a. Jesosy baka lavorary, fa atsika ndraiky tsy karaha zen̈y. Ke atsika koa fa man̈ano diso, mety han̈ano fomba Babantsika be fitiavan̈a io han̈itsian̈a atsika. Mampatsiaro raha koran̈iny Baiboly ty raha zen̈y: ‘Lan̈iany olo tiany Jehovah fo anariny.’ (Ohab. 3:12) Maro fomba an̈itsiany Jehovah atsika. Mety baka amy raha nivakintsika tamy Baiboly, na raha ren̈intsika lera fivorian̈a han̈aboahany amintsika toetsain̈y na raha fatao mila ialantsika.  Mety hampiasa iro antipan̈ahy aby io koa izy. Fa ndray karakory ndray karakory ataony Jehovah man̈itsy atsika, fitiavan̈a fo mahavy izy man̈ano zen̈y.—Jer. 30:11.

15. Karakory ataony Jehovah man̈ampy atsika?

¹⁵ Jehovah man̈ampy atsika hiatriky raha sarotro. Karaha zen̈y baka ataony baba be fitiavan̈a zen̈y! Amezany Jehovah fan̈ahy masin̈y atsika hiarovan̈a atsika amy raha jiaby mety handrobaka fihavanan̈antsika aminany. (Lioka 11:13) Ampiany Jehovah koa atsika izikoa fa miasaloha. Ataony raha hahavy atsika han̈anten̈a raha tsara aminy hoavy, ke raha zen̈y han̈ampy atsika hiatriky raha sarotro mandalo. Aleva onon̈o, ndray ino ndray ino raha ratsy mety havoa atsika, io tsy maintsy hadosony Jehovah fo, tsy niany tsy amaray. Raha sarotro handalovantsika aby io mielan̈a fo, fa hatsaran̈a hamezany Jehovah atsika io ndraiky maharitry mandrakizay.—2 Kor. 4:16-18.

16. Adama koa fa tsy nan̈araka volan̈any Jehovah Babany be fitiavan̈a io, ino vokany?

¹⁶ Adama koa fa tsy nan̈araka volan̈any Jehovah, nanjary tsy an̈isany lafamìny Jehovah eky izy ndreky taranakanany jiaby. (Rom. 5:12; 7:14) Fa ndray tio raha zen̈y, mbala nitady fomba fo Jehovah han̈ampian̈a taranakany Adama. Hita baka amy zen̈y fa izy ten̈a tia atsika.

17. Adama koa fa nanota nisazìny Jehovah. Fa ino raha direkty nataony Jehovah?

¹⁷ Marin̈y fa Adama nisazìny Jehovah, fa Jehovah mbala nan̈ano raha fo han̈ampian̈a taranakany Adama. Niaraka tamy zen̈y izy nampan̈anten̈a fa lan̈iany olo tsy mivadiky, mbala hanjary an̈isany lafamìnany ndraiky. (Gen. 3:15; Rom. 8:20, 21) Baka raha zen̈y ho tanteraka, nambelany Jehovah natao soron̈o Zanany ten̈a tiany, han̈avotan̈a atsika. Ten̈a tiany Jehovah marin̈y atsika!—Jaona 3:16.

18. Izikoa atsika nanota kanefa nibebaka, nan̈ino atsika mety matoky fa Jehovah von̈ono fo handray atsika?

 ¹⁸ Tiany Jehovah ho an̈isany lafamìnany fo atsika. Problemo hely fo, atsika tsy lavorary. Ndraikindraiky atsika mety tafan̈ano raha mampalahelo izy na tafiala izy foeky. Fa Jehovah tsy empaka na mahinihiny amintsika. Mbala von̈ono han̈ampy atsika fo izy. Ino ma toky anan̈antsika fa izy von̈ono handray atsika? Fan̈oharan̈a nataony Jesosy momba zanaka adala in̈y. (Lioka 15:11-32) Zanaka adala io koa fa nimpody, ravoravo mare babany nandray izy. Karaha zen̈y koa, Jehovah mbala man̈anten̈a atsika himpody aminany fo. Jehovah ten̈a tia atsika.

19. Karakory han̈adosoany Jehovah raha ratsy jiaby vokatrany fahotan̈any Adama?

¹⁹ Hadosony Jehovah raha ratsy jiaby vokatrany fahotan̈any Adama. Tafarany Adama nanota, nanapakevitry Jehovah fa hanangana olombelon̈o misy 144 000. Iro io hanjary panjaka ndreky pisoron̈o andan̈itry an̈y hiaraka amy Zanany. Jesosy ndreky iro hiaraka hanjaka aminany aby io, amy donia vaovao, han̈ampy lan̈iany olo man̈araka volan̈any Jehovah hanjary lavorary. Afarany fitsapan̈a farany, Zan̈ahary han̈amia iro fiain̈ana tsisy farany. Ho ravoravo mare Babantsika io amy zen̈y hahita tany jiaby ho feno olo lavorary. Ho tsara mare kony fiain̈ana amy zen̈y!

20. Karakory aby nan̈aboahany Jehovah fa ten̈a tiany ankitin̈y atsika? Ino raha hidinihin̈y amy lahatsoratra man̈araka?

²⁰ Naboakany Jehovah fa izy ten̈a tia atsika ankitin̈y. Tsisy Baba tsara mandilatra izy. Jehovah mitandren̈y vavakantsika, avio mbala amezany atsika koa raha ilaintsika andavanandra ndreky raha ilaintsika baka atsika hahavita hihavan̈a aminany. Izy mampiofan̈a ndreky man̈ampy atsika. Tsy zen̈y fo fa, mbala maro koa hatsaran̈a hamezany atsika aminy amaray an̈y. Ravoravo mare fontsika mahay fa Jehovah ten̈a tia atsika sady mikarakara atsika! Ke amy maha zanany atsika, akory han̈aboahantsika fa ten̈a tia izy atsika? Zen̈y raha hidinihintsika amy lahatsoratra man̈araka.