1. Ana mundu jwasosekwaga kutenda chichi mkanawonegane ni mwenye jwa ku Pelisiya?

AGAMBE ganichisya kuti ndaŵi jine ŵatemi ku Pelisiya yaka 2,500 yipiteyo. Ni akusaka kuti akaŵechetane ni mwenye jwa m’chilambochi. Kuti aŵechetane najo ŵasosekwaga kwawula ku msinda wa Susani kuŵatamaga mwenyejo. Nambo yaliji yangakomboleka kuti aŵechetane ni mwenyejo mkanaŵe kwakunda. Yikaŵe kuti wawojo ŵapite kuwonegana ni mwenye mkaniŵaŵilanje nikuti akawulajidwe.​—Est. 4:11.

2. Ana Yehofa akusasaka kuti tulipikaneje wuli patukusaka kuŵechetana ni jwalakwe?

² Kusala yisyene yili yakusangalasya mnope kuti Yehofa nganaŵa mpela mwenye jwa ku Pelesiya. Yehofa ali jwamachili mnope soni jwapenani kupunda jwakulamulila jwalijose. Nambope, mpaka tuŵechetane najo ndaŵi jilijose. Jwalakwe akusasaka kuti tuŵeje ŵagopoka kuŵechetana najo. Mwachisyasyo, atamose kuti Yehofa akwete mena ga udindo mpela Mkupanganya Jwamkulungwa, Jwamachiligose, soni Ambuje Ŵamachiligose, jwalakwe akusasaka kuti tuŵechetaneje najo pakukamulichisya masengo lina lyakumanyika lyakuti “Atati.” (Mat. 6:9) Kusala yisyene, yili yakusangalasya kuti Yehofa akusasaka kuti tumŵandichileje.

3. Ligongo chichi mpaka tumkolanje Yehofa kuti “Atati,” soni ana chitukambilane chichi munganiji?

³ Yili yakupikanika kumkolanga Yehofa kuti “Atati” ligongo ni jwaŵatupele umi. (Sal. 36:9) Ligongo lyakuti ali Atati ŵetu, tukusasosekwa kumpikanila. Naga tukutenda yakusatusalila, tuchisangalala ni yindu yambone yejinji. (Aheb. 12:9) Yinduyi yikupwatikapo umi wangamala, chinga kwinani kapena pachilambo chapasichi. Yine mwa yindu yamboneyi tukusangalala nayo apanopano. Nganiji chijisale mwakusatendela Yehofa apano mpela Mtati jwachinonyelo. Chijisalesoni ligongo lyakwe tukusosekwa kusimichisya kuti kusogoloku jwalakwe ngasatuleka. Nambo  chandanda, kwende tulole ligongo lyakwe tukusosekwa kulupilila kuti Atati ŵetu ŵakwinani akusatunonyela mnope soni akusatusamalila.

4. Ligongo chichi ŵandu ŵane akusayiwona kuŵa yakusawusya kumwona Yehofa mpela Mtati jwawo?

⁴ Ana yikusiyasawusyaga kumwona Yehofa mpela Mtati jwawo? Ŵane akusalipikana kuti ŵangali mate pakulandanya ni mwaŵelele Yehofa. Jemanjaji akusakayichila naga Mlungu Jwamachiligose akusasamala ya mundu jwalijose pajika. Nambo Yehofa jwali Atati ŵetu ŵachinonyelo jwangasaka kuti tulipikaneje myoyo. Jwalakwe jwatupele umi soni akusasaka kuti tuŵe paunasi wambone ni jwalakwe. Ndumetume Paulo paŵalalichilaga ŵandu ku Atene, jwasasile kuti Yehofa “nganaŵa kose kwakutalika ni jwalijose mwa jwetuwe.” (Mase. 17:24-29) Mlungu akusasaka kuti jwalijose aŵechetaneje najo mpela mwakusatendela mwanache ni nangolo jwakwe jwachinonyelo.

5. Ana tukulijiganya chichi kutyochela pa yaŵasimene nayo mlongo jwine?

⁵ Ŵane akusayiwona kuŵa yakusawusya kumwona Yehofa mpela Mtati jwachinonyelo. Akusatenda yeleyi ligongo lyakuti ŵakulile m’liŵasa lyele Atati ŵawo nganiŵalosyaga chinonyelo. Aganichisye yaŵaŵechete mlongo jwine. Jwalakwe jwatite, “Atati ŵangu ŵaliji ŵangasa mnope. Panatandite kulijiganya Baibulo, yaliji yakusawusya kwa une kulipikana kuti mpaka naŵandichile Atati ŵakwinani. Nambo yosopeyi yachenjile panammanyilile chenene Yehofa.” Ana wawojo akusalipikana mpela mlongoju? Naga yili myoyo, amanyilile kuti yili yakomboleka kumwona Yehofa mpela Mtati jwawo jwambone.

6. Mwakamulana ni Mateyu 11:27, ana Yehofa atukamuchisye chamtuli kuti tumwoneje kuŵa Atati ŵetu ŵachinonyelo?

⁶ Pakusaka kutukamuchisya kuti tumwoneje Yehofa mpela Mtati jwachinonyelo, jwalakwe jwakundile kuti yaŵawechete soni yaŵatesile Yesu yilembedwe m’Baibulo. (Aŵalanje Mateyu 11:27.) Yesu jwatendaga yindu mpela Atati ŵakwe, mwamti jwayikene pakuŵecheta kuti, “Mundu jwambweni une ŵawenisoni Atati.” (Yoh. 14:9) Yesu jwaŵechete mnope yakwamba udindo wakwete Yehofa mpela Mtati. Mu Ngani Syambone mchechepe, Yesu jwakamulichisye masengo maloŵe gakuti “Atati” maulendo chiŵandika 200 pakwamba ya Yehofa. Ligongo chichi Yesu jwaŵechete mnope yakwamba Yehofa? Ligongo limo lili lyakuti jwalakwe jwasakaga kwakamuchisya ŵandu kumanyilila kuti Yehofa ali Mtati jwachinonyelo.​—Yoh. 17:25, 26.

7. Ana tukulijiganya chichi kwa Yehofa kutyochela pa yindu yaŵamtendele Mwanache jwakwe?

⁷ Kwende tulole yatukulijiganya kwa Yehofa kutyochela payindu yaŵamtendele Mwanache jwakwe. Ndaŵi syosope Yehofa jwapikanilaga mapopelo ga Yesu. Ngaŵa kuti jwalakwe jwagambaga kupikanila mapopelo ga Yesu, nambo ŵagajangagasoni. (Yoh. 11:41, 42) Mwangasamala kandu ya yakusawusya yaŵasimanaga nayo Yesu, jwalakwe jwalipikanaga kuti Atati ŵakwe ŵamnonyelaga soni kumkamuchisya.​—Luk. 22:42, 43.

8. Ana Yehofa ŵamsamalilaga Yesu mmatala gapi?

⁸ Yesu jwamanyililaga kuti Atati ŵakwe ni ŵaŵampele umi soni ŵampaga yakusosechela paumi wakwe. Jwalakwe jwatite, “Ngwete umi ligongo lya Atati.” (Yoh. 6:57) Yesu jwadalilaga mnope Atati ŵakwe. Soni Yehofa ŵampaga yakusosechela ya paumi wakwe. Nambo chakusosekwa mnope chaliji chakuti Yehofa ŵamsamalilaga Yesu mwausimu.​—Mat. 4:4.

9. Ana Yehofa jwalosisye chamtuli kuti jwaliji Mtati jwachinonyelo kwa Yesu?

⁹ Mpela Mtati jwachinonyelo, Yehofa jwalolechesyaga kuti Yesu akupochela chikamuchisyo kutyochela kwa jwalakwe. (Mat. 26:53; Yoh. 8:16) Atamose kuti Yehofa nganamchenjelaga  Yesu ku yakusawusya yakwe yosope, jwalakwe jwamkamuchisyaga kuti akombole kuyipilila. Yesu jwamanyililaga kuti yakusawusya yiliyose yachasimane nayo chiŵe yakandaŵi kamnono. (Aheb. 12:2) Yehofa jwalosisye kuti akusamnonyela Yesu mwakumpikanila, mwakumpa yakusosechela ya paumi, mwakumjiganya, soni mwa kumkamuchisya. (Yoh. 5: 20; 8:28) Sambano kwende tulole yakusatenda Yehofa pakutusamalila m’weji mpela muŵatendele ni Yesu.

10. Mwakamulana ni Salimo 66:19, 20, ana Yehofa akusalosya chamtuli kuti akusatunonyelaga?

¹⁰ Yehofa akusapikana mapopelo getu. (Aŵalanje Salimo 66:19, 20.) Jwalakwe akusasakaga kuti tupopeleje mwampaka tukombolele. (1 Ates. 5: 17) Mpaka tupopele kwa Mlungu ndaŵi jilijose soni pamalo galigose. Jwalakwe akusaŵa jwakoseka kutupikanila ndaŵi syosope. Patumanyilile kuti Yehofa akusajanga mapopelo getu, yikusatutendekasya kuti tumnonyeleje mnope. Jwamasalimo jwatite, “Ngwanonyela Ambuje ligongo agapikene maloŵe gangu.”​—Sal. 116:1.

11. Ana Yehofa akusajangaga chamtuli mapopelo getu?

¹¹ Ngaŵa kuti Atati ŵetu akusagamba kupikanilape mapopelo getu, nambo akusajangagasoni. Ndumetume Yohane jwasasile kuti, “Jwalakwe akusatupikana pa ndaŵi jitukuŵenda kandu kalikose mwakulingana ni lisosa lya [Mlungu].” (1 Yoh. 5:14, 15) Nambope, ndaŵi sine Yehofa nganaŵa ajanjile mapopelo getu mwatukusachila. Jwalakwe akusamanyilila yampaka yitukamuchisye. Myoyo ndaŵi sine patukuŵenda mpaka atujanje kuti iyayi, kapena mpaka asache kuti tujembecheye kaje.​—2 Akoli. 12:7-9.

12-13. Ana Atati ŵetu ŵakwinani akusatupa yakusosechela mmatala gapi?

¹² Yehofa akusatupa yatukusosechela. Jwalakwe akusatendega yindu yosope yakusasosekwa kutenda mtati. (1 Tim. 5:8) Akusapeleka kwa ŵanache ŵakwe yindu yakusosechela kuti akole umi. Jwalakwe jwangasakaga kuti tudandawuleje pakwamba yindu yachitulyeje, yakuwala, soni pagona. (Mat. 6:32, 33; 7:11) Mpela nangolo jwachinonyelo, Yehofa alinganyisye chile yindu yatuchisangalala nayo msogolo.

¹³ Chakusosekwa mnope, Yehofa akusatupa yakusosechela yetu yausimu. Kupitila m’Maloŵe gakwe, Yehofa atusalile yakuwona yakwamba jwalakwejo, chakulinga chakwe, chakulinga cha umi, soni yayichitendekwa msogolo. Jwatukamuchisye kupitila kwa achinangolo ŵetu kapena ŵandu ŵane kuti atujiganye yakwamba jwalakwejo. Soni akupitilisya kutukamuchisya kupitila mwa achakulungwa ŵamumpingo, soni abale ni alongo ŵakomangale mwausimu. Konjechesya pelepa, Yehofa akusatujiganya kupitila m’misongano ja mpingo, kwatukusalijiganya yimpepe ni liŵasa lyetu lya usimu. Kupitila m’matala gelega soni gane, Yehofa alosisye kuti ali mtati jwachinonyelo kwa wosopewe.​—Sal. 32:8.

14. Ana Yehofa akusatujiganya ligongo chichi, soni akusatenda yeleyi chamtuli?

¹⁴ Yehofa akusatujiganya. Mwakulekangana ni Yesu, m’weji tuli ŵangali umlama. Myoyo pakusaka kutujiganya, Atati ŵetu ŵachinonyelo akusatujamukaga naga pakusosechela. Maloŵe gakwe gakusatukumbusya kuti, “Ambuje akusamjamuka jwalijose jwakusamnonyela.” (Aheb. 12:6, 7) Yehofa akusatujamukaga m’matala gejinji. Mwachisyasyo, patukuŵalanga Baibulo, kapena kupikana yine yakwe pamisongano yikusatukamuchisya kuchenga ndamo syetu. Ndaŵi sine tukusapochela chikamuchisyo kutyochela kwa achakulungwa ŵamumpingo. Chinga akutukamuchisya m’litala lyapi, Yehofa akusatenda yeleyo ligongo lyakutunonyela.​—Yel. 30:11.

15. Ana Yehofa akusatuchenjela m’matala gapi?

¹⁵ Yehofa akusatukamuchisya patusimene ni yakusawusya. Mpela mwakusatendela mtati jwachinonyelo pakwakamuchisya ŵanache ŵakwe  pasimene ni yakusawusya, nombe Atati ŵetu ŵakwinani akusatusamalilaga patusimene ni yakusawusya. Yehofa akusakamulichisya masengo msimu weswela kuti utuchenjeleje mwausimu. (Luk. 11:13) Yehofa akusatukamuchisyasoni patukulagasika nganisyo. Mwachisyasyo, jwalakwe atupele chembecheyo chakudalilichika cha msogolo. Chembecheyochi chikusatukamuchisya kuti tukombole kupilila yakusawusya. Aganichisye ayi, Chinga tukusimana ni yakusawusya yamtuli, Atati ŵetu ŵachinonyelo chachimasya yosopeyo. Yakusawusya yiliyose yatukusimana nayo, yili yakandaŵi kamnono. Nambo yindu yambone yakusatupa Yehofa yichiŵapo mpaka kalakala.​—2 Akoli. 4:16-18.

16. Ana chatendekwe chichi Adamu ali alepele kwapikanila Atati ŵakwe ŵachinonyelo?

¹⁶ Tukusachiwona chinonyelo cha Yehofa kwa m’weji patukuganichisya mwaŵatendele yindu kwa Adamu ni Hawa ali alemwisye. Adamu paŵalepe kwapikanila Atati ŵakwe ŵakwinani, jwalakwe pampepe ni ŵanache ŵakwe nganaŵasoni mbali ja liŵasa lya Yehofa. (Alo. 5:12; 7:14) Nambo Yehofa ŵatesile chindu chine chakwe pakusaka kwakamuchisya ŵanache ŵa Adamu.

17. Panyuma pakuti Adamu alemwisye, ana Yehofa ŵatesile chichi ndaŵi jijojo?

¹⁷ Yehofa ŵampele chilango Adamu, nambo jwalinganyisye yakwakamuchisya ŵanache ŵa Adamu. Ndaŵi jijojo Yehofa jwasasile kuti ŵandu ŵakupikanila chachiwujilasoni mliŵasa lyakwe. (Gen. 3:15; Alo. 8: 20, 21) Yehofa ŵalinganyisye yeleyi kupitila mwa Yesu jwaŵapeleche mbopesi jakutuwombola. Yehofa jwalosisye kuti akusatunonyela mnope mwakutupa Mwanache jwakwe.​—Yoh. 3:16.

18. Ligongo chichi mpaka tuŵe ŵakusimichisya kuti Yehofa ali jwakusachilila kuti tuŵepe ŵanache ŵakwe atamose patumlemwechesye?

¹⁸ Atamose kuti tuli ŵangali umlama, Yehofa akusasaka kuti tuŵe m’liŵasa lyakwe. Kupwatika pelepa jwangayiwona kuŵa yakusawusya kutukamuchisya.  Mpaka tutende yindu yampaka yimsakalisye jwalakwe, nambo Yehofa jwangatulekaga. Yesu jwasasile chiwanichisyo cha mwanache jwamsokonechele pakusaka kulosya yakusati Yehofa pakwanonyela ŵanache ŵakwe. (Luk. 15:11-32) Mtati jwa m’chiwanichisyochi, nganaleka kulupilila kuti mwanache jwakwe chachiwujila. Mwanachejo pajwawujile kumangwakwe, mtatijo ŵampochele ni makono gaŵili. Naga tuli tumlemwechesye Yehofa ni kulosya mtima wakupitikuka, jwalakwe akusaŵa jwakoseka kutupochelasoni.

19. Ana Yehofa chachilinganya chamtuli yindu yayajonasiche ligongo lya Adamu?

¹⁹ Atati ŵetu chachilinganya yindu yosope yayajonasiche ligongo lya Adamu. Jwalakwe ali ajimuchile, Yehofa jwalinganyisye yakujigala ŵandu 144,000 kuti akalamulile yimpepe ni Yesu kwinani mpela mayimwene soni ŵambopesi. M’chilambo chasambano, Yesu pampepe ni achimjakweŵa chachakamuchisya ŵandu ŵakulupichika kuŵa ŵamlama. Panyuma pakulinjidwa kakumalisya, Mlungu chachapa umi wangamala. Pelepo Atati ŵetu chachiŵa ŵakusangalala pakulola kuti chilambo chapasi chigumbele ni ŵanache ŵakwe ŵamlama. Kusala yisyene jeleji jichiŵa ndaŵi jakusangalasya.

20. Ana Yehofa alosisye mmatala gapi kuti akusatunonyela mnope, soni ana mungani jakuyichisya tuchikambilana chichi?

²⁰ Yehofa alosisye kuti akusatunonyela mnope. Jwalakwe ali Mtati jwambone mnope. Akusapikanila mapopelo getu, soni kutupa yakusosechela yetu, chinga yakuchilu kapena yausimu. Akusatujiganya soni kutukamuchisya. Kupwatika pelepa, atusunjilesoni yindu yambone kusogoloku. Kusala yisyene tukusaŵa ŵakusangalala kumanyilila kuti Atati ŵetu akusatunonyela mnope. Mungani jakuyichisya, tuchikambilana yampaka tutende pakulosya kuyamichila chinonyelo chakwe.