1. Mang e ba t’uf ni nge rin’ be’ ni faanra baadag ni nge yan i non ko pilung nu Persia?

MU SUSUNNAG ni sogonap’an 2,500 e duw ni ke yan mu um par u Persia. Ga baadag ni ngam weliyew e pilung ko re nam nem murung’agen ban’en. Ere kam milekag ko fare mach nu Shushan ko gin ma par e en pilung riy. Machane u m’on ni ngam man mu guy e en pilung, ma thingari pi’ mat’awum. Ya ra danga’, ma rayog ni ngan liem nga mum’!​—Esther 4:11.

2. Susun nge uw rogon u wan’dad ni ngaud nonad ngak Jehovah?

² Gad be pining e magar ni Jehovah e de bod e re pilung nu Persia nem! Dariy reb e girdi’ nib pilung ni taareb gelngirow nge tolngirow Jehovah. Yugu aram rogon ma Jehovah e yugu demtrug e ngiyal’ nrayog ni ngad nonad ngak. Baadag ni nge dab ud magagawongad ni ngad nonad ngak. Bod ni, yugu aram rogon ni boor e liw rok Jehovah nib tolang ni bod rogon e En Tasunmiy, Gubin Ma Rayog Rok, nge Somol Nth’abi Tolang, machane baadag ni ngad nonad ngak ni gad be fanay fare bugithin ni “Chitamangimad.” (Matt. 6:9) Gad ba felfelan’ ngay ni baadag Jehovah ni ngad chuchugurgad ngak!

3. Mang fan nrayog ni ngad pininged Jehovah ni “Chitamangimad,” ma mang e gad ra weliy ko re article ney?

³ Ba puluw ni ngaud pininged Jehovah ni “Chitamangimad,” ya ir Tabolngin e yafos rodad. (Ps. 36:9) Bochan ni ir e Chitamangidad, mab milfan ngodad ni ngad folgad rok. Faan gad ra rin’ e tin ke yog, ma boor e tow’ath nib manigil nra yag ngodad. (Heb. 12:9) Pi tow’ath nem e ba muun ngay e yafos ni manemus u tharmiy ara fayleng. Ku rayog ni nge yag boch e tow’ath ngodad e chiney. Re article ney e be weliy rogon ni ma dag Jehovah e ngiyal’ ney ni ir e Chitamangidad ni gad ba t’uf rok, nge fan nrayog ni nge pagan’dad nra boch nga m’on ma dabi pagdad. Machane, som’on e ngad weliyed  fan nrayog ni nge pagan’dad nri gad ba t’uf rok e Chitamangidad ni bay u tharmiy ma baadag ni nge ayuwegdad.

4. Mang fan nib mo’maw’ ngak boch e girdi’ ni ngar ted Jehovah ni bod e Chitamangirad?

⁴ Ba mo’maw’ ngom ni ngam tay Got ni bod e Chitamam, fa? Bay boch e girdi’ ni yad ma lemnag ni kaygi pag feni tolang Jehovah ma dariy fadad u wan’. Yad ma lemnag ni Got ni Gubin Ma Rayog Rok e der ma lemnagrad ni be’ nge be’. Machane, Chitamangidad ni gad ba t’uf rok e dabun ni ngaud lemgad ni aram rogon. Ir e ke pi’ e yafos ngodad ma baadag ni nge fel’ e tha’ u thildad. Tomuren ni yog apostal Paul e pi thin ney, me weliy ngak e piin ur motoyilgad ngak u Athens ni “dariy bagadad nib mal’af Got rok nga orel.” (Acts 17:24-29) Baadag Got ni ngaud nonad ngak ni gad gubin ni bod rogon e bitir ni yugu rayog ni nge yan i non ko chitamangin ara chitiningin ni bochan e manang ni yima t’ufeg ma yima ayuweg.

5. Mang e rayog ni ngad filed ko n’en ni buch rok reb e walag nib pin?

⁵ Ku bay boch e girdi’ nib mo’maw’ ni ngar ted Jehovah ni ir e Chitamangirad ni bochan e chitamangirad e gathi ri ma t’ufegrad fa reb e ri der ma t’ufegrad. Am lemnag e n’en ni yog reb e walag nib pin. I gaar: “Chitamag e ma gafgownageg. Ere nap’an nug tabab ko fol Bible mab mo’maw’ ni nggu chugur ngak reb e Matam ni bay u tharmiy. Machane nap’an nug nang Jehovah nib fel’ rogon, ma aram me thil e lem rog.” Ga ma lem ni aray rogon, fa? Faanra aray rogon e lem rom, ma dabi mulan’um, ya ra munmun ma ga ra guy ni Jehovah e ir e bin th’abi fel’ e Matam nra yag ngom.

6. Mang reb e kanawo’ ni ke ayuwegdad Jehovah riy ya nge yag nda ted ni ir e Chitamangidad ni gad ba t’uf rok nrogon ni bay ko Matthew 11:27?

⁶ Reb e kanawo’ ni ke ayuwegdad Jehovah riy ya nge yag nda ted ni ir e Chitamangidad ni gad ba t’uf rok e aram e ke n’igin ni ngan yoloy e thin rok Jesus nge pi n’en i rin’ nga lan e Bible. (Mu beeg e Matthew 11:27.) Bochan nrib fel’ rogon ni i m’ug rarogon e Chitamangin Jesus rok, ma aram fan nrayog ni nge gaar: “Cha’ ni ke guyeg e ke guy e en ni Chitamangiy.” (John 14:9) Ba ga’ ni ma weliy Jesus murung’agen Jehovah ni ir e Chitamangidad. U lan fa aningeg i Gospel e fanay Jesus fare bugithin riy ni “Chitamag” ni sogonap’an 165 yay u nap’an ni be non ngak Jehovah ara be weliy murung’agen. Mang fan ni boor yay ni i weliy Jesus murung’agen Jehovah? Reb i fan e bochan e nge mich u wan’ e girdi’ ni Jehovah e ir reb e Matam ni ma t’ufegey.​—John 17:25, 26.

7. Mang e gad ra fil u murung’agen Jehovah u rogon e ngongol rok ngak Fak?

⁷ Am lemnag e n’en rayog ni ngad filed u murung’agen Jehovah u rogon e ngongol rok ngak Jesus ni Fak. Gubin ngiyal’ ni ma rung’ag Jehovah e meybil rok Jesus. Machane gathi kemus aram, ya ku ma fulweg taban e meybil rok. (John 11:41, 42) Demtrug rogon e re miti skeng ni i mada’nag Jesus, ma gubin ngiyal’ ni manang nib t’uf rok e Chitamangin ma bay ni be ayuweg.​—Luke 22:42, 43.

8. Mang boch e kanawo’ ni i pi’ Jehovah e tin nib t’uf rok Jesus riy?

⁸ I tamilangnag Jesus ni Chitamangin e Ir Tabolngin e yafos rok maku ir e En Be Ayuweg e yafos rok u nap’an ni gaar: “En ni Chitamangiy . . . e be tiyeg ni gub fos.” (John 6:57) Rib pagan’ Jesus ko Chitamangin, ma i pi’ Jehovah e tin nib t’uf rok ya nge yag ni par nib fos. Bin th’abi ga’ fan riy e, i ayuweg Jehovah Jesus ni nge par nib yul’yul’ ngak.​—Matt. 4:4.

9. Uw rogon ni dag Jehovah ni ir reb e Matam nrib t’uf Jesus rok?

⁹ Bochan ni Jehovah e ir reb e Matam ni ma t’ufegey, ma aram fan ni i guy rogon ni nga i par Jesus ma manang ni bay e Chitamangin nra ayuweg. (Matt. 26:53; John 8:16) Yugu aram rogon nde yororiy Jehovah Jesus ndabi maad’ad, machane i ayuweg ni nge athamgil u fithik’ e gafgow ni i yib ngak. Manang Jesus ndemtrug e re miti n’en nra gafgow riy ma bay n’umngin nap’an me chuw. (Heb. 12:2) I micheg Jehovah nib t’uf Jesus rok  ya ma motoyil ngak, ma ma pi’ e tin nib t’uf rok, ma ma skulnag, maku ma ayuweg. (John 5:20; 8:28) Chiney e ngad weliyed rogon ni ma ayuwegdad e Chitamangidad ni bay u tharmiy ni bod rogon ni i ayuweg Jesus.

10. Uw rogon ni ma dag Jehovah ni gad ba t’uf rok nrogon ni bay ko Psalm 66:19, 20?

¹⁰ Ma motoyil Jehovah ko meybil rodad. (Mu beeg e Psalm 66:19, 20.) Dabun ni ngad lichnaged urngin yay ni gad ma meybil ngak, nge n’en gad ma yibilay murung’agen, nge n’umngin nap’an ni gad ma meybil; ya baadag ni ngaud meybilgad ngak ni gubin ngiyal’. (1 Thess. 5:17) Demtrug e ngiyal’ nge gin’en ni gad bay riy ma rayog ni ngad meybilgad ko Got rodad. Gathi kaygi yoor pa’ nga puluwon ndabiyog ni nge motoyil ngodad; ya gubin ngiyal’ ni bay ni nge motoyil ko meybil rodad. Faanra tamilang u wan’dad ni ma motoyil Jehovah ko meybil rodad, ma ra gel feni t’uf rodad. I gaar e en ni yoloy e Psalm: “Ba t’uf Somol rog ya ma rung’ag lungug.”​—Ps. 116:1.

11. Uw rogon ni ma fulweg Jehovah taban e meybil rodad?

¹¹ Chitamangidad e gathi kemus ni ma motoyil ko meybil rodad, ya ku ma fulweg taban. Ke micheg apostal John ngodad ni ke gaar: “[Got e ra] rung’ag e tin ni gadad be yog ni faan gadad ra ning ban’en ngak ni ban’en nib m’agan’ ngay.” (1 John 5:14, 15) Riyul’ nsana dabi fulweg Jehovah taban e meybil rodad u rogon kanawoen ni gad be lemnag. Machane, manang e n’en nib fel’ ngodad. Ere aram fan ni bay yu ngiyal’ ni fulweg rok ko meybil rodad e danga’ ara baadag ni ngad songad.​—2 Kor. 12:7-9.

12-13. Mang boch e kanawo’ ni ma pi’ e Chitamangidad ni bay u tharmiy e tin nib t’uf rodad riy?

¹² Ma pi’ Jehovah e tin nib t’uf rodad. Ma rin’ e n’en nib m’agan’ ngay ni nge rin’ urngin e matam. (1 Tim. 5:8) Ma pi’ e tin nib t’uf rok pi fak ya nge yag nra pared ni yad ba fos. Dabun ni nge magafan’dad ko ggan ni ngad ked, ara mad ni ngad chuwgad ngay, ara gin ngad pared riy. (Matt. 6:32, 33; 7:11) Bochan ni ir e Chitamangidad ni gad ba t’uf rok, ma aram fan ni ke yarmiy ni nge yag ngodad urngin e tin nib t’uf rodad boch nga m’on.

¹³ Bin th’abi ga’ fan e ma pi’ Jehovah e tin nib t’uf rodad ya nge yag ni par e tha’ u thildad nib fel’. Ke fanay e Thin rok ni nge weliy ngodad e tin riyul’ u murung’agen, nge n’en nib m’agan’ ngay, nge fan ke sunmiydad, nge n’en nra buch boch nga m’on. Ke ayuwegdad ni aram e ke fanay e gallabthir rodad ara yugu boch e girdi’ ni ngar filed murung’agen ngodad. Maku be ulul ni nge ayuwegdad ni ngad manged fager rok u daken e piin piilal u lan e ulung ni yad ma t’ufegdad nge yugu boch e walag ni pumoon nge ppin ni kar ilalgad ko tirok Got ban’en. Maku reb e, ku ma skulnagdad u daken e pi muulung ni gad ma un ngay, ya aram e gin gad ma fil pi walagdad boch ban’en riy u taabang. Ma fanay Jehovah e pi kanawo’ ney nge yugu boch e kanawo’ ni nge dag ngodad ni ir e chitamangidad ni ma lemnagdad.​—Ps. 32:8.

14. Mang fan ni ma skulnagdad Jehovah, ma uw rogon ni ma rin’ e re n’ey?

¹⁴ Ma skulnagdad Jehovah. Gad ba thil Jesus, ya gadad e dawor da flontgad. Ere, aram fan ni bay yu ngiyal’ ni ma yal’uwegdad e Chitamangidad ni gad ba t’uf rok ni bochan e ku aram rogon ni be skulnagdad. Be puguran e Thin rok ngodad ni be gaar: “Somol e ma gechignag [ara ma yal’uweg] e en nib t’uf rok.” (Heb. 12:6, 7) Boor e kanawo’ ni ma yal’uwegdad Jehovah riy. Bod nrayog ni ngad beeged ban’en u lan e Thin rok ara da rung’aged ban’en u nap’an e muulung ma gad nang nib t’uf ni ngad thilyeged ban’en u rogon e lem ara ngongol rodad. Fa reb e rayog ni nge ayuwegdad u daken e piin piilal. Demtrug rogon ni ke yal’uwegdad Jehovah, ma gubin ngiyal’ ni ma rin’ ni bochan e gad ba t’uf rok.​—Jer. 30:11.

15. Mang boch e kanawo’ ni ma ayuwegdad Jehovah riy?

¹⁵ Ma ayuwegdad Jehovah ni ngad athamgilyed e pi skeng ni ke yib ngodad. Chitamangidad ni bay u tharmiy e ma ayuwegdad u fithik’ e pi skeng ni ma yib ngodad, ni bod rogon reb e matam ni ma  t’ufeg pi fak ni ma ayuwegrad u nap’an ni ke yib e magawon ngorad. Ma fanay gelngin nib thothup ni nge ayuwegdad u boch ban’en nrayog ni nge kirebnag e tha’ u thildad. (Luke 11:13) Ku ma ayuwegdad Jehovah u nap’an ni ke meewar lanin’dad ara be magafan’dad. Bod ni, bay e athap rodad ni ke pi’ nrib manigil. Re athap nem e aram e n’en ma ayuwegdad ni ngad athamgilgad u fithik’ e pi magawon ni ma yib ngodad. Am lemnag e re n’ey: Demtrug ban’en nib kireb nra buch rodad, ma Chitamangidad ni gad ba t’uf rok e ra chuweg wenegan urngin ban’en ni kad gafgowgad riy. Demtrug e re miti skeng ni be yib ngodad ma gad manang ni bay n’umngin nap’an me chuw, machane pi tow’ath nra pi’ Jehovah ngodad e ra par ni manemus.​—2 Kor. 4:16-18.

16. Mang e buch u nap’an ndaki fol Adam ko Chitamangin?

¹⁶ Rayog ni ngad guyed e mich riy ni gad ba t’uf rok Jehovah u nap’an ni gad ra lemnag e n’en ni rin’ u nap’an ndaki fol Adam rok. Nap’an ndaki fol Adam ko Chitamangin ni bay u tharmiy, ma aram e daki par ni ir bang ko tabinaw rok Jehovah ni kub muun pi fak ngay. (Rom. 5:12; 7:14) Machane, bay ban’en ni rin’ Jehovah ni nge ayuweg pi fak Adam.

17. Nap’an ni togopuluw Adam, ma mang e rin’ Jehovah ni ka chingiyal’ nem?

¹⁷ I gechignag Jehovah Adam, machane i micheg nra ayuweg e piin owchen. Ka chingiyal’ nem me micheg nra fek bayay e girdi’ ni yad ba yul’yul’ ni ngar manged bang ko tabinaw rok. (Gen. 3:15; Rom. 8:20, 21) I rin’ Jehovah e re n’ey u daken fare biyul ni maligach ni pi’ Jesus ni Fak nib t’uf rok. I micheg Jehovah gelngin nri gad ba t’uf rok u daken Fak ni pi’ ni nge yim’ ni fan ngodad.​—John 3:16.

18. Mang fan nrayog ni nge pagan’dad ni baadag Jehovah ni ngad pared ni ka gadad pi fak ni yugu aram rogon ni kad maloggad rok?

¹⁸ Yugu aram rogon ndawor da flontgad, ma baadag Jehovah ni ngad manged bang ko tabinaw rok, ma dariy ba ngiyal’ ni ma lemnag ni gad  be magawonnag. Sana rayog ni ngad rin’ed ban’en nra kireban’ ngay ara da maloggad rok, machane dariy ba ngiyal’ nra mulan’ u puluwdad. I tamilangnag Jesus gelngin nri ma t’ufeg Jehovah pi fak u daken fare fanathin ni murung’agen fare pagel ni malog. (Luke 15:11-32) Fare matam u lan e re fanathin nem e dariy ba ngiyal’ ni tal ndaki athapeg ni nge sul fak nga tabinaw. Nap’an ni guy fare matam fare pagel ni ke sul i yib nga tabinaw, me mil nge yan i m’ag e gumuchmuch ngak ni ke felfelan’. Faanra bay ba ngiyal’ ni kad maloggad rok Jehovah machane kad kalgadngan’dad, ma rayog ni nge pagan’dad ni Chitamangidad ni gad ba t’uf rok e ba m’agan’ ngay ni ngad sulod ngak.

19. Uw rogon nra chuweg Jehovah gubin wenegan e kireb ni ke k’aring Adam?

¹⁹ Ra chuweg e Chitamangidad gubin wenegan e kireb ni ke k’aring Adam. Tomuren ni togopuluw Adam, me dugliy Jehovah ni nge pof 144,000 e girdi’ u fayleng ni ngar uned ngak Fak ko gagiyeg u tharmiy ni yad boch e pilung nge prist. Nap’an ni gad ra yan nga lan e bin nib beech e fayleng, ma Jesus nge pi cha’nem ni yad ra un ngak ko gagiyeg e yad ra ayuweg e piin yad be fol ni ngkur flontgad bayay. Tomuren ni kar pared ni yad ba yul’yul’ u nap’an e bin tomur e skeng, ma aram e ra pi’ Got e yafos ndariy n’umngin nap’an ngorad. Ra felfelan’ e Chitamangidad u nap’an nra guy e re fayleng ney ni ke sugnag pi fak ni yad ba flont. Rib gel e felfelan’ ni yira tay e ngiyal’ nem!

20. Mang boch e kanawo’ ni ke dag Jehovah riy ni gad ba t’uf rok, ma mang e gad ra weliy ko bin migid e article?

²⁰ Ke dag Jehovah nri gad ba t’uf rok. Ir e bin th’abi fel’ e Matam nra yag ngodad. Ma rung’ag e meybil rodad, ma ma pi’ e tin nib t’uf rodad nib muun ngay e tin nib t’uf ko par rodad nge tha’ u thildad ngak. Ma skulnagdad maku ma ayuwegdad. Ku bay boch e tow’ath ni ke tay ni fan ngodad boch nga m’on. Ri gad be felfelan’ ni kad nanged ni gad ba t’uf rok e Chitamangidad ma baadag ni nge ayuwegdad! Bin migid e article e gad ra weliy riy boch e kanawo’ nrayog ni ngad daged riy ni gad be pining e magar ngak ko t’ufeg ni ma dag ngodad.