1. ¿Xi caquiiñeʼ guni ti binni dxiqué pa racalaʼdxiʼ guiniʼné rey de Persia?

GUXUÍʼLUNU nabézanu ndaaniʼ guidxi Persia. Racaláʼdxinu guinínenu rey ni runi mandar raqué, nga runi riuunu guidxi Susa, ra nuu palaciu stibe. Peru qué lica zaníʼ íquenu chisuhuaanu nezalú rey que purtiʼ pa gúninu ni sin permisu stibe zándaca guuticabe laanu (Est. 4:11).

2. ¿Ximodo racalaʼdxiʼ Jehová guni sentirnu ora guinínenu laa?

² Rudiʼnu xquixe peʼ cadi naca Jehová casi ca rey ni guyuu ndaaniʼ guidxi Persia dxiqué. Neca jma nápabe poder que ca gobernante ni nuu lu Guidxilayú riʼ, zanda guinínenu laabe ora tiica si. Racaláʼdxibe guinínenu laabe. Neca nápabe título casi ni jma napa poder, Señor Soberano ne ni bizáʼ guiráʼ ni nuu la? racaláʼdxibe gábinu laabe Bixhózenu ora guinínenu laabe, cásica ora riniʼné ti binni bixhoze (Mat 6:9). Riéchenu purtiʼ racalaʼdxiʼ Jehová chuʼnu jma gaxha de laa.

3. ¿Xiñee zanda guidúʼyanu Jehová casi ti Padre ne xi zadúʼyanu lu artículo riʼ?

³ Nápanu stale razón para gábinu Jehová Bixhózenu purtiʼ laabe nga bidiibe laanu guendanabani (Sal. 36:9). Naquiiñeʼ guzúʼbanu stiidxabe purtiʼ laabe nga Bixhózenu. Pa gúninu ni gábibe laanu la? zacaanu stale ndaayaʼ (Heb. 12:9). Tobi de laani nga zanda guibáninu guibáʼ o lu Guidxilayú riʼ sin gátinu. Peru zanda cueendunu ni galán dede ca yanna. Lu artículo riʼ zadúʼyanu ximodo rusihuinni Jehová naca ti Padre ni nadxii laanu ne xiñee caquiiñeʼ chuʼnu seguru  qué zusaanabe laanu lu ca dxi ni zeeda ca. Peru guidúʼyanu primé xiñee caquiiñeʼ chuʼnu seguru nadxii ne rapa Bixhózenu ni nuu guibáʼ laanu.

4. ¿Xiñee raca nagana para caadxi binni gúʼyacaʼ Jehová casi Bixhózecaʼ?

⁴ ¿Ñee raca nagana para laanu guidúʼyanu Jehová casi Bixhózenu la? Zándaca nuu binni riníʼ ique gastiʼ nga laa nezalú Dios. Qué runi crecaʼ pa rizaalaʼdxiʼ Dios ni jma napa poder cada tobi de laanu. Peru qué racalaʼdxiʼ Jehová guiníʼ íquenu zacá. Cumu laabe bidiibe guendanabani laanu, racaláʼdxibe guyúbinu ne guidxélanu laabe. Ora bisiene apóstol Pablo ca binni de Atenas ca diidxaʼ riʼ, guniʼbe «cadi zitu diʼ» nuu Jehová «de cada tobi de laanu» (Hech. 17:24-29). Racalaʼdxiʼ Dios guidxíñanu laa, cásica ridxiña ti baʼduhuiiniʼ bixhoze ni nadxii laa.

5. ¿Xi rusiidiʼ ejemplu stiʼ ti hermana laanu?

⁵ Nuu sti razón xi pur raca nagana para caadxi binni gúʼyacaʼ Jehová casi Bixhózecaʼ. ¿Gunáʼ nga razón ca yaʼ? Purtiʼ qué nizaalaʼdxiʼ o qué ñannaxhii bixhózecaʼ laacaʼ. Sicaríʼ guníʼ ti hermana: «Guizáʼ malu guca bixhozeʼ né naa. Ngue runi, ora bizuluáʼ bineʼ estudiar Biblia la? guca nagana para naa chuaaʼ gaxha de Jehová, Bixhózenu ni nuu guibáʼ. Peru ora binebiaʼyaʼ chaahueʼ laabe la? bichaa modo ruuyaʼ laabe». Pa zacá cazaacanu, cadi guireʼnu gana, ra tidiʼ tiempu zudiʼnu cuenta Jehová nga Bixhózenu ne gástiruʼ stobi casi laabe.

6. Casi ná Mateo 11:27, ¿xi huayuni Jehová para guidúʼyanu laa casi Bixhózenu ni nadxii laanu?

⁶ ¿Ximodo huayacané Jehová laanu guidúʼyanu laa casi Bixhózenu ni nadxii laanu? Ti modo nga gunábabe guicá lu Biblia guiráʼ ni guníʼ ne ni biʼniʼ Jesús (biindaʼ Mateo 11:27). Bisihuinni Jesús ximodo peʼ nga Bixhoze, nga runi guniʼbe: «Ni maʼ biiyaʼ naa la? laaca maʼ biiyaʼ Bixhozeʼ» (Juan 14:9). Stale biaje guníʼ Jesús Jehová nga Bixhózenu. Ne lu guidapaʼ Evangeliu biaʼ 165 biaje riete gudxi Jesús Jehová: «Bixhozeʼ». ¿Xiñee yaʼ? Tobi de ca razón nga purtiʼ racaláʼdxibe ganna binni Jehová nga Bixhózenu ni nadxii laanu (Juan 17:25, 26).

7. ¿Xi rizíʼdinu de Jehová ora ridúʼyanu ximodo biʼniʼ tratarbe Jesús?

⁷ Guidúʼyanu ximodo biʼniʼ tratar Jehová Jesús, ne xi rizíʼdinu de ejemplu stibe. Bicaadiaga Dios guiráʼ ca oración stiʼ Xiiñiʼ, ne bicabi laabe (Juan 11:41, 42). Biiyaʼ Jesús modo gucané ne gunnaxhii Jehová laabe neca bidxaagalube stale guendanagana (Luc. 22:42, 43).

8. ¿Ximodo gupa Jehová Jesús?

⁸ Guníʼ Jesús Bixhoze nga bidii guendanabani laa ne guiráʼ ni caquiiñeʼ. Sicaríʼ guniʼbe: «Nabaneʼ pur Dios» (Juan 6:57). Gupa Jesús confianza laabe, ne bidii Jehová laabe guiráʼ ni caquiiñebe. Peru ni jma risaca nga gucané Jehová Jesús para gaca fiel (Mat. 4:4).

9. ¿Ximodo bisihuinni Jehová nadxii Jesús?

⁹ Bisihuinni Jehová naca ti Padre ni nadxii Xiiñiʼ purtiʼ biyúbibe modo ganna Jesús nuube para gacanebe laa (Mat. 26:53; Juan 8:16). Neca qué ñápabe laa de guiráʼ ca peligru ni gudiʼdiʼ, peru gucanebe laa guni huantar ca guendanagana stiʼ. Gunna dxichi Jesús ti tiempu si zandaa ca guendanagana stiʼ (Heb. 12:2). Bisihuinni Jehová rapa Xiiñiʼ purtiʼ bicaadiaga ca oración stibe, bidii laabe guiráʼ ni caquiiñebe, bisiidiʼ ne gucané laabe (Juan 5:20;  8:28). Guidúʼyanu ximodo rapa Jehová, Bixhózenu ni nuu guibáʼ laanu.

10. Pur ni ná Salmo 66:19, 20, ¿ximodo rusihuinni Jehová nadxii laanu?

¹⁰ Rucaadiaga Jehová ca oración stinu (biindaʼ Salmo 66:19, 20). Racaláʼdxibe guni orarnu laabe, ne rábibe laanu cadi gusaana de gúninu ni (1 Tes. 5:17). Laaca zanda guinínenu laabe né respetu ora tiisi ne ra tiica si nuunu. Cadi guiníʼ íquenu guizáʼ nuu xhiiñabe ne qué zanda gucaadiágabe laanu; siempre rucaadiaga Jehová laanu. Ora rudiʼnu cuenta rucaadiaga Jehová ca oración stinu jmaruʼ si rudii gana laanu chuʼnu gaxha de laabe. Tobi de ca hombre ni bicaa Salmo guníʼ: «Nadxieeʼ Jehová purtiʼ rucaadiágabe naa» (Sal. 116:1).

11. ¿Ximodo ricabi Jehová ca oración stinu?

¹¹ Cadi rucaadiaga si Bixhózenu ca oración stinu, sínuque laaca ricábibe laanu. Sicaríʼ guníʼ apóstol Juan: «Zanda guinábanu laa intiica cosa, peru gaca ni ni racalaʼdxiʼ, ne zucaadiaga laanu» (1 Juan 5:14, 15). Peru zándaca cadi modo peʼ cabézanu nga guicabi Jehová ca oración stinu. Cumu nánnabe xii nga ni jma jneza para laanu la? nuu biaje qué zudiibe laanu ni gunábanu laabe o racaláʼdxibe cuézanu ti tiempu (2 Cor. 12:7-9).

12, 13. ¿Xi runi Jehová para gudii laanu ni caquiiñenu?

¹² Rudii Jehová ni caquiiñenu. Rinábabe ca ni naca xaíque ndaaniʼ familia gúnicaʼ casi rúnibe (1 Tim. 5:8). Rudiibe ca xiiñibe guiráʼ ni caquiiñecaʼ. Qué racaláʼdxibe chuʼnu xizaa de ni guidoʼno, xi gácunu o paraa cuézanu (Mat. 6:32, 33; 7:11). Cumu nadxiibe laanu la? ruuyabe cadi guiaadxaʼ laanu gastiʼ lu ca dxi ni zeeda ca.

¹³ Peru ni jma risaca nga rudii Jehová laanu guiráʼ ni caquiiñenu para chuʼnu jma gaxha de laa. Biquiiñebe Biblia para gábibe laanu modo laabe, ni naguixhe íquebe gúnibe, xiñee bizaʼbe laanu ne xi zazaaca ca dxi ni zeeda ca. Bizaaláʼdxibe cada tobi de laanu ora bizulú bizíʼdinu ca ni dxandíʼ rusiidiʼ Biblia ne biquiiñebe bixhózenu, jñaanu o xcaadxi binni para gacanecaʼ laanu gunibiáʼ chaahuinu laabe. Ne cayacanérube laanu, riquiiñebe ca ancianu ne ca hermanu ni maʼ ziné stale iza ndaaniʼ xquidxi Dios para gacanecaʼ laanu. Ne laaca rusiidibe laanu ora riuunu reunión, ra rizíʼdinu jma de laabe né ca hermanu stinu. Sicaríʼ ne xcaadxi modo rusihuinni Jehová, Bixhózenu ni nuu guibáʼ rizaalaʼdxiʼ cada tobi de laanu (Sal. 32:8).

14. ¿Xiñee rusiidiʼ Jehová laanu, ne ximodo rúnibe ni?

¹⁴ Rusiidiʼ Jehová laanu. Maʼ gadxé laanu de Jesús, purtiʼ perfectu laa ne laanu coʼ. Nga runi, para gusiidiʼ Jehová laanu, nuu biaje riguu jnézabe laanu ora caquiiñenu ni. Lu Stiidxabe ná: «Runi disciplinar Jehová ca binni ni nadxii» (Heb. 12:6, 7). Ne rúnibe ni de gadxé gadxé modo. Guzéʼtenu ti ejemplu, zándaca ora guidúʼndanu xiixa lu Biblia o gunadiáganu xiixa ra reunión gucaa laanu guchaʼnu modo laanu. Ne zándaca gacané ca ancianu laanu ora caquiiñenu ni. Modo tiica si uguu jneza Jehová laanu, rúnibe ni purtiʼ nadxiibe laanu (Jer. 30:11).

15. ¿Ximodo rapa Jehová laanu?

¹⁵ Racané Jehová laanu guni huantarnu ca guendanagana rápanu. Rapa Jehová, Bixhózenu ni nuu guibáʼ laanu ora nápanu guendanagana, cásica runi ti binni  ni nadxii xiiñiʼ. Riquiiñebe espíritu santu stibe para cadi chuʼ xiixa ni guxheleʼ laanu de laabe (Luc. 11:13). Laaca racanebe laanu ora nuunu triste. Guzéʼtenu ti ejemplu, nápabe ti esperanza galán para laanu lu ca dxi ni zeeda ca, ne racané esperanza riʼ laanu guni huantarnu ca guendanagana cadxaagalunu. Guiníʼ íquenu ndiʼ: zabee Jehová intiica guendanagana ni cadxaagalunu. Zidiʼdiʼ si guiráʼ ca guendanagana stinu, peru qué ziuu dxi guirá ca ndaayaʼ ni chigudii Jehová laanu (2 Cor. 4:16-18).

16. ¿Xi bizaaca dxi maʼ qué nuzuubaʼ Adán stiidxaʼ Jehová?

¹⁶ Ridúʼyanu pabiáʼ nadxii Jehová laanu ora riníʼ íquenu ni bíʼnibe dxi maʼ qué nuzuubaʼ Adán stiidxabe. Cumu qué nuzuubaʼ Adán stiidxaʼ Dios la? laabe ne ca ni zá de laabe maʼ qué ñácacabe parte de familia stiʼ Dios (Rom. 5:12; 7:14). Peru biʼniʼ Jehová xiixa para gacané ca xiiñiʼ Adán.

17. ¿Xi biʼniʼ Jehová nagueendaca despué de bidxiideche Adán laa?

¹⁷ Neca bisabanáʼ Jehová Adán, qué nusaanabe ca binni ni zá de laa sin ti esperanza. Nagueendaca biʼniʼ prometerbe zabiguetaʼ zaca ca binni ni guzuubaʼ diidxaʼ parte de familia stibe (Gén. 3:15; Rom. 8:20, 21). Ne bíʼnibe ni ra bidiibe lugar gati Jesús pur laanu. Ne zacá bisihuínnibe guizáʼ nadxiibe laanu (Juan 3:16).

18. Neca maʼ bixélenu de Jehová, ¿xiñee zanda chuʼnu seguru nadxiibe laanu casi xiiñibe?

¹⁸ Neca imperfectu laanu la? racalaʼdxiʼ Jehová gácanu parte de familia stiʼ ne qué ruuyabe laanu casi ti carga. Zándaca gúninu xiixa ni guniná ladxidoʼbe o guixélenu de laabe ti tiempu, peru ribézabe guibiguétanu ra nuube. Ora bizeeteʼ Jesús parábola stiʼ hijo pródigo, bisihuínnibe nabé  nadxii Jehová laanu (Luc. 15:11-32). Padre ni riete lu parábola riʼ qué nuniti esperanza zabiguetaʼ xiiñiʼ. Ne dxi bibiguetaʼ xiiñibe la? guizáʼ biéchebe ora bíʼyabe laa sti biaje. Pa maʼ bixélenu de Jehová ne maʼ guca arrepentirnu, zanda chuʼnu seguru racalaʼdxiʼ Jehová, Bixhózenu, guibiguétanu ra nuu.

19. ¿Xi zuni Jehová para guni chaahuiʼ guiráʼ ca guendanagana napa binni pur bichee Adán?

¹⁹ Zuni chaahuiʼ Jehová guiráʼ ca guendanagana napa binni pur bichee Adán. Dxi bichee Adán, gudixhe ique Jehová guni adoptar 144,000 binni ni gaca rey ne sacerdote guibáʼ né Jesús, Xiiñibe. Jesús ne ca ni chiguni mandarné laa guibáʼ zacanecaʼ ca binni ni ruzuubaʼ diidxaʼ gácacaʼ perfectu lu guidxilayú cubi. Despué de prueba final, guiráʼ ca ni guzuubaʼ diidxaʼ zacaacaʼ guendanabani ni qué zaluxe. Dxi ca, guizáʼ ziecheʼ Jehová ora guʼyaʼ puru binni perfectu nabani lu Guidxilayú. ¿Cadi dxandíʼ guizáʼ sicarú zaca ca dxi ca la?

20. ¿Ximodo maʼ bisihuinni Jehová nadxii laanu de guidubi ladxidóʼ, ne xi zadúʼyanu lu sti artículo ca?

²⁰ Maʼ bisihuinni Jehová nadxii laanu de guidubi ladxidóʼ. Jehová nga Bixhózenu ne gástiruʼ stobi casi laabe. Rucaadiágabe ca oración stinu, rudiibe laanu guiráʼ ni caquiiñenu ne racanebe laanu chuʼnu jma gaxha de laabe. Rusiidibe ne racanebe laanu. Ne laaca náparube stale ndaayaʼ galán para laanu. ¿Cadi dxandíʼ riéchenu gánnanu nadxii ne rapa Bixhózenu Jehová laanu la? Lu sti artículo ca zadúʼyanu ximodo zanda gudiʼnu xquixe peʼ laabe purtiʼ nadxiibe laanu.