1-2. Ang’o m’ucwalu Yehova niyabu iwa yo kara wamond i kind juruot pare, man eyabu yone nenedi?

YEHOVA ulwong’owa kara wamond i kind juruot pare m’ubetimo ire. Eno tie lwong’o ma ber m’usagu zoo! Dhanu ceke ma gibetimo ni Yehova githiero kwo migi ire man gitie ku yioyic i lam mi jamgony ma Wode uthiero. Watie ku mutoro nibedo i kind juruot maeno. Pilembe tin eni wabekwo ma ber man watie ku genogen mi kwo rondo ku rondo i nindo m’ubino, jumoko i polo, jumange ke i Paradiso iwi ng’om.

² Mer ma Yehova umaru kowa ucwale niyabu iwa yo kara wamond i kind juruot pare. Re kara lembuno ucopere, Yehova utimo lembe moko ma yawe mbe. (Yoh. 3:16) ‘Eng’iewowa ku wel piny.’ (1 Kor. 6:20) Nikadhu kud i jamgony, Yehova umio iwa kaka ma wacopo bedo ko ku mer ma ceng’ini kude. Etie iwa rwom ma lee dit nilwong’o Yehova nia Wegwa, en m’etie Ng’atu ma dit m’usagu zoo. Bende, calu ma waneno i thiwiwec m’ukadhu, Yehova tie Wego ma ber ma yawe mbe.

3. Waromo penjara ku penji ma kani? (Nen bende sanduku ma thiwie tie “ Nyo andha Yehova ung’eya?”)

³ Calu jagor buku moko mi Biblia, wan de waromo penjara kumae: “Abiculo ang’o ni Yehova kum kony pare ceke ma yor i bang’a?” (Zab. 116:12) Dwokowang’ penji maeno utie nia gin moko mbe ma waromo culo ni Wegwa mi polo. Re mer m’emaru kowa cwaluwa nimare bende. Jakwenda Yohana ugoro kumae: “Wamaru, kum elar emaruwa.” (1 Yoh. 4:19) Dong’ wacopo nyutho nenedi ni Wegwa mi polo nia wamare?

4. Nimakere ku Yakobo 4:8, pirang’o ukwayu waii nicoro ceng’ini i vut Yehova?

⁴ Yehova ubemito wacor ceng’ini i vute man wabed wawec i bang’e. (Som Yakobo 4:8.) Ebekwayuwa nia ‘wabed asu i rwo,’ pilembe ithe tie acika yor i bang’wa. (Rum. 12:12) Kadok lembe tie dupa i wang’e de, re etie ayika saa ceke niwinjo rwo mwa. Wan lundo wawinje nwang’u wabesomo Lembe pare Biblia, man girasoma mwa ma konyowa ninyang’ i Biblia. Wawinje bende nwang’u wabelubo coko mwa mi Jukristu kilili. Tap calu ma kind awiya bedo ceng’ini ku junyodo migi ka gibeweco kugi wang’ ma pol, kumeno bende kindwa bedo ceng’ini ku Yehova ka waweco kude wang’ ma pol.

5. Wacopo timo ang’o kara waketh rwo mwa udok miero?

⁵ Kepar nyanok pi kit rwo peri. Yehova ubemito nia saa ma waberwo i bang’e, wakor ire paru mwa man kite ma wabewinjara ko. (Zab. 62:8) Pieno ukwayu wakepenjara kumae: ‘Nyo rwo para bebedo nyamalu malu ve aberangu wec ma ng’atu mange ubeyero, kunoke nyo abed arwo niai kud i adundena ve abekiewo paru para gira?’ M’umbe jiji, imaru Yehova lee, man ibemito nia saa ceke mer m’i kindwu kude ubed ku tego i ie. Kara merne ubed kumeno, ukwayu iwec i bang’e wang’ ma pol. Bed ikor ire paru m’upondo i adundeni. Kor ire bende lembe m’unyayu anyong’a i ii man m’uberoyo adieng’a i ii. Ng’ei ma jiji mbe nia icopo kwayu Mungu ukonyi.

6. Ukwayu watim ang’o kara kindwa umedere nibedo ceng’ini ku Wegwa mi polo?

⁶ Kara kindwa umedere nibedo ceng’ini ku Wegwa mi polo, ukwayu wabed wadwok ire foyofoc. Jagor Zaburi uyero lemandha kinde m’egoro kumae: “Tic ma wang’u ijo m’itimo gi dupa, e Yehova Mungu para, man pidoic peri ma ni yor i bang’wa: gicopo kwandri ngo kud i beng’i; tek ayenyo ayer awec pigi, gisagu ma jucopo kwanu.” (Zab. 40:5) Pieno, kakare nifoyo Yehova yor i iwa kende, ukwayu wanyuth foyofocne nikadhu kud i wec man timo mwa. Ka wabetimo kumeno, wabikoc ku dhanu dupa ma wakwo kugi. I ng’om ma wabekwo i ie tin, dhanu dupa ginyutho ngo foyofoc pi lembe ceke ma Mungu ubetimo igi. Timo maeno ubenyutho nia andha wabekwo i ‘kajik ceng’.’ (2 Tim. 3:1, 2) Ento wan, wacikara ngo nibedo ve dhanu maeno nyanok de!

7. Yehova ubemito watim ang’o, man pirang’o?

⁷ Junyodo gimito ngo awiya migi gidagiri i kindgi, ento gimito nia awiya gimariri i kindgi. Kumeno bende, Yehova ubemito awiya pare ceke gibed ku winjiri ma ber i kindgi. Mer ma wamarara ko nyutho nia watie Jukristu mandha. (Yoh. 13:35) Wayio nia jagor Zaburi uyero lemandha kinde m’egoro kumae: “Nen ma ram eber, emit de ni umego ya gibed karacelo i [acel]!” (Zab. 133:1) Ka wamaru umego ku nyimego mwa, nwang’u wabenyutho ni Yehova nia wamare. (1 Yoh. 4:20) Etie lembe mi mutoro nibedo i kind umego ku nyimego ma gibekwo ma ber “ng’atuman ku wadi man ku wadi” man ma gitie “kud adunde mi ngisi!”​—Ef. 4:32.

8. Nimakare ku 1 Yohana 5:3, waworo Yehova pi thelembe ma kani ma pire tek?

⁸ Yehova ubemito awiya giwor junyodo migi, man ebemito wan de wawore. (Ef. 6:1) Eromo nia wawore pilembe etie Jacwic mwa, en re m’egwokowa man eriek nikadhu janyodo moko ci. Ento thelembe ma dit m’uketho wawore utie mer ma wamare ko. (Som 1 Yohana 5:3.) Kadok nwang’u thelembe tie dupa m’ucikere nicwaluwa niworo Yehova de, re ediyowa ngo adiya kara wawore. Emio  iwa bedagonya, man anyong’a nege kinde m’eneno nia mer ma wamare ko re m’ubecwaluwa niwore.

9-10. Pirang’o pire tie tek nia wang’ei cik pa Mungu man waworgi?

⁹ Junyodo gimito ngo lembe ma rac unwang’ awiya migi. Pi thelembe maeno re ma giketho cik ni awiyane kara ugwokgi. Kan awiya gibeworo cik maeno ma junyodo migi uketho igi, eno nyutho kamaleng’ nia gigeno junyodo migi man gibeworogi. Pire tie tek nisagu nia wang’ei cik pa Yehova Wegwa mi polo man wawor cikne i kwo mwa. Pilembe ka watimo kumeno, nwang’u wabenyutho nia wamare man wabewore; bende niworo cik pa Yehova mio iwa bero ma yawe mbe. (Isa. 48:17, 18) Tung’ ku maeno, ju ma giworo ngo Yehova man cik pare giroyiri gigi i peko dupa.​—Gal. 6:7, 8.

¹⁰ Ka wabekwo kit kwo ma nyayu mutoro i Yehova, nwang’u wabegwokara giwa i kum lembe ma copo nyayu peko i kumwa, ma romo nyayu koo koo i iwa, man ma copo nyotho winjiri mwa ku Yehova. Yehova ung’eyo gin ma romo mio iwa anyong’a i kwo. Nyamego Aurora ma kwo i États-Unis ukoro kumae: “Ang’eyo nia ka wabeworo Yehova, kwo mwa bedo ber m’usagu zoo.” Wec maeno tie lemandha. Nyo in de idaru nwang’u bero mi woro cik pa Yehova i kwo peri?

11. Rwo konyowa nenedi?

¹¹ Rwo konyowa nibedo wor, kadok kinde ma nyutho woro tie yot ungo. Saa moko ecopo bedo iwa tek niworo cik pa Yehova pilembe  waleng’ ungo, ento wacikara nitimo kero kara kud wapodh i dubo. Jagor Zaburi ukwayu Mungu kumae: “Jenga ku cwiny ma wor.” (Zab. 51:12) Nyamego moko ma nyinge Denise ma tie jayab yo uyero kumae: “Kan anwang’u nia niworo cik moko ma Yehova umio ubevoya, arwo i bang’e kara emii ira kero m’atim ko lembe m’atira.” Ka waberwo kit rwo ma kumeno, wang’ei m’umbe jiji nia Yehova bidwoko wang’e.​—Lk. 11:9-13.

12. Nimakere ku Juefeso 5:1, wacikara nitimo ang’o?

¹² Som Juefeso 5:1. Calu ma watie “nyithindho ma jumer” pa Yehova, ukwayu watim kero nilubo lapor pare. Pieno wacikara ninyutho mer ni jumange, nibedo ber kugi man niweko igi ka gitimowa rac. Ka dhanu m’ung’eyo Yehova ngo gineno nia watie ku kura ma ber, eno copo cwalugi niponjo lembe dupa i wie. (1 Pet. 2:12) Junyodo ma Jukristu gicikiri nikwo kud awiya migi i ayi ma nyutho nia gibelubo lapor pa Yehova. Tek gitimo kumeno, awiya migi bende copo mito gibed jurimb Yehova.

13. Wacikara nitimo ang’o kara wanwang’ tegocwiny?

¹³ Nyathin bedo kud anyong’a i kum won man eweco pire ku mutoro ni jumange. Rom rom kumeno, watie kud anyong’a i kum Yehova Wegwa mi polo, man wamito jumange bende ging’eye. Wawinjara i adundewa calu Ubimo Daudi m’ukiewo kumae: “Ng’eyong’ec para bilule ni kum Yehova.” (Zab. 34:2) Re saa moko lworo weco pi Yehova ni jumange romo  negowa. Dong’ wacikara nitimo ang’o kara wanwang’ tegocwiny? Ukwayu wapar pi bero ma jumange gicopo nwang’u ka ging’eyo Yehova, man anyong’a ma Yehova romo bedo ko tek wabeweco pire ni dhanu mange. Yehova bimio iwa tegocwiny ma watie ku yenyne. Calu m’ekonyo umego mwa mi rundi ma kwong’a, ebikonyo wan bende.​—1 Tes. 2:2.

14. Pirang’o pire tie tek nitimo tic mi rweyo lembanyong’a?

¹⁴ Yehova umbe kud akoyakoya, man anyong’a nege kan eneno wabenyutho mer ni dhanu mi thek moko ci. (Tic. 10:34, 35) Yo acel ma ber ma wanyutho ko nia wamaru dhanu mange utie nirweyo igi lembanyong’a. (Mat. 28:19, 20) Tic mi rweyo lembanyong’a romo bedo kud adwogi ma kani? Ju ma giwinjowa giromo kwo ku mutoro tin eni, man giromo bedo ku genogen mi kwo rondo ku rondo i nindo m’ubino.​—1 Tim. 4:16.

15-16. Wacopo bedo ku mutoro pi thelembe ma kani?

¹⁵ Yehova utie Wego ma jamer, pieno ebemito juruot pare ma gibetimo ire gibed ku mutoro. (Isa. 65:14) Lembe tie dupa dit ma romo ketho wabed ku mutoro tin eni, kadok wabekadhu kud i peko ma tung’ tung’. Ku lapor, wang’eyo nia Wegwa mi polo umaruwa lee akeca. Watie ku ng’eyong’ec ma tap mi Lembe pa Mungu ma tie Biblia. (Yer. 15:16) M’umedo maeno, watie i kind jutic pa Yehova ma gimare, ma gimaru cik pare, man ma gitie ku mer i kindgi.​—Zab. 106:4, 5.

¹⁶ Wacopo bedo ku mutoro saa ceke pilembe wang’eyo m’umbe jiji nia i nindo m’ubino, kwo bidoko ber magwei. Wang’eyo nia ceng’ini eni Yehova binyotho jutimrac ceke, man i the Ker pare ebidwoko ng’om ni Paradiso. Watie bende ku genogen ma ber dit ma nia dhanu ma githo gibicer man gibikwo kendo ku wedi migi. (Yoh. 5:28, 29) Eno bibedo lembe mi mutoro ma yawe mbe! M’usagu zoo, wang’eyo nia ceng’ini eni, ng’atu moko ci, i polo kunoke iwi ng’om bitimo thier ni Wegwa ma jamer, biyunge man bimio ire pak m’eromo ko.