1-2. Engkai maka ibere Jahwe kita kesempaten gelah banci jadi bagin keluargaNa? Janah uga carana?

IUNDANG Jahwe kita gelah jadi bagin arah keluarga si ersada ngelayani Ia. Luar biasa kel undangen e! Si jadi bagin bas keluarga enda eme kalak si nggo mbaktiken diri man Dibata janah erkiniteken man korban tebusen AnakNa. Seh kel riahna jadi bagin keluarga Jahwe. Lit tujun geluhta janah meriah kel ukurta perban lit arapen kegeluhen si rasa lalap, i surga ntah pe bas pardis i doni.

² Perban keleng kel ate Jahwe kita, iberekenNa kesempaten gelah banci kita jadi bagin keluargaNa. Tapi gelah e banci terjadi, arus iban Jahwe pengorbanen si mbelin. (Joh. 3:16) Kita “nggo itukur alu meherga.” (1 Kor. 6:20) Perban nggo ibereken Jahwe tebusen, banci kita rembak ras Ia. Banci silebuh Ia Bapak aminna pe Ia Si Hebatna bas alam semesta enda. Sada kehamaten kel e banta. Janah, bagi si nggo sibahas bas artikel sebelumna, Jahwe e Bapak si mehulina.

3. Sanga siukuri kerina kiniulin Jahwe man banta, penungkunen kai nge si lit bas ukurta? (Nen ka kotak “Perdiateken Jahwe nge Aku?”)

³ Banci saja tersungkun-sungkun kita bagi sekalak penulis Pustaka si ngataken, “Kai banci kuulihken man [Jahwe], kerna kerina kiniulinNa man bangku?” (Msm. 116:12) Situhuna, labo pernah kita ngasup ngulihken kai si nggo ibere Jahwe man banta. Tapi, perban keleng ate Jahwe kita, kita pe reh kelengna ateta Ia. Nina Rasul Johanes, “Kita ngkelengi, sebap leben kap Dibata si ngkelengi  kita.” (1 Joh. 4:19) Uga carata mbuktiken maka keleng ateta Bapakta si i surga?

4. Menurut Jakup 4:8, ngkai maka arus siusahaken rembak ras Jahwe?

⁴ Ate Jahwe rembak kita ras Ia janah rusur ngerana man baNa. (Baca Jakup 4:8.) IsuruhNa kita gelah ‘ertoto la erngadi-ngadi,’ janah lalap kita ibegikenNa. (Rom. 12:12) La pernah Ia sibuksa ntah pe latih iakapNa megiken kita. Perlu ka sibegiken Jahwe adi sibaca Pustaka bage pe kerina publikasinta si nampati kita ngangkai Pustaka. Selain si e, sibegiken ka Jahwe sanga reh kita ku perpulungen janah tutus ateta mperdiatekenca. Bali bagi anak ras orang tuana, kita pe banci tetap rembak ras Jahwe adi rusur kita ngerana ras Ia janah sibegiken Ia.

5. Uga carana gelah isi totonta banci erban meriah ukur Jahwe?

⁵ Cuba ukuri uga nge totondu man Jahwe. Sanga kita ertoto, ateNa situriken min isi pusuhta man baNa. (Msm. 62:9) Emaka, sisungkunilah banta: ‘Bage-bage saja nge lalap totoku, bali bagi pesan si mulih-ulih icetak? Ntah bali bagi surat si itulis bas pusuh nari?’ Pasti keleng kel atendu Jahwe, janah terus atendu rembak ras Ia. Adi bage, raturlah kam ngerana ras Ia. Turikenlah isi pusuhndu man baNa. Ceritaken kai si erban meriah ukurndu bage pe si erban kitik ukurndu. Teklah kam maka banci lalap ipindondu penampatNa.

6. Kai si arus silakoken gelah banci tetap rembak ras Bapakta si i surga?

⁶ Gelah banci tetap rembak ras Bapakta si i surga, ula kita lupa ngata bujur man baNa. Pasti setuju kita ras kai si ikataken penulis masmur, nina, “Enggo melala kal perbahanenNdu si mehuli man kami o [Jahwe] Dibata kami, la lit si seri ras Kam! Andiko lalana rencana si mehuli si enggo ibahanNdu guna kami, la terturiken aku kerina perban lalana.” (Msm. 40:6) Labo kita ngata bujur bas pusuhta saja, tapi sibuktiken ka man Jahwe arah ranan bage pe perbahanenta. Enda me si erbanca kita la seri ras kalak si deban. Enterem kalak si gundari la iergaina kai si nggo ilakoken Dibata man bana. Janah la ateta mamang kerna si e perban salah sada tanda maka kita nggeluh bas “wari-wari pendungi” eme nterem kalak si la meteh ngata bujur. (2 Tim. 3:1, 2) Pasti la ateta seri ras kalak e!

7. Kai ate Jahwe silakoken? Janah ngkai?

⁷ La ate orang tua anakna rubat, tapi kompak min atena. Jahwe pe kompak ka min ateNa kerina anakNa. Janah adi kita sikeleng-kelengen, e me buktina kita tuhu-tuhu kalak Kristen. (Joh. 13:35) Seri perasanta ras kai si ikataken penulis masmur, nina, “Andiko ulina ras senangna, adi kalak si ersenina ersada perarih!” (Msm. 133:1) Adi keleng ateta turang seninanta, sibuktiken man Jahwe maka keleng ateta Ia. (1 Joh. 4:20) Meriah kel ukurta perban banci kita jadi sada keluarga ras turang seninanta si ‘melias janah mesayang.’​—Ep. 4:32.

8. Menurut 1 Johanes 5:3, kai nge alasen si pentingna maka sipatuhi Jahwe?

⁸ Ate Jahwe patuh min anak-anak man orang tuana, janah ateNa ka gelah patuh kita man baNa. (Ep. 6:1) Patuh kita man  Jahwe perban Ia si nciptaken kita, Ia si mereken keperlunta, janah Ia me Bapak si pentarna. Tapi, alasen si pentingna maka sipatuhi Jahwe eme perban keleng ateta Ia. (Baca 1 Johanes 5:3.) Situhuna melala alasen ngkai kita patuh man Jahwe. Tapi labo pernah ipaksaNa kita patuh man baNa. Enggo ibereken Jahwe banta kebebasen erban pilihen, emaka meriah kel ukurNa adi sipilih patuh man baNa perban keleng ateta Ia.

9-10. Engkai maka penting sipatuhi perentah Jahwe?

⁹ Ate orang tua aman min iakap anak-anakna. E me sebapna iban orang tua peraturen guna ngelindungi anak-anakna. Adi patuh kalak e, e buktina tek ia man orang tuana janah iergaina orang tuana. Tapi, lit peraturen si ndauh pentingen si arus sipatuhi, si rehna arah Bapakta si i surga. Adi patuh kita, sibuktiken maka keleng ateta Jahwe, siergai Ia, janah mbelin ka gunana man banta. (Jes. 48:17, 18) Tapi, adi la sipatuhi Jahwe, kita nge si rugi.​—Gal. 6:7, 8.

¹⁰ Adi tiap wari silakoken kai si ngena ate Jahwe, banci sijaga dirita arah kai si mbahayaken kesehatenta, si erban kita sedih, bage pe si erban lanai kita rembak ras Jahwe. Iteh Jahwe kai si mehulina banta. Nina Aurora si tading i Amerika Serikat, “Tek aku adi sipatuhi Jahwe, pasti meriah kel ukurta.” Payo si ikatakenna e. Uga menurutndu? Lit nge gunana  bandu sanga idalankenndu perentah Jahwe?

11. Kai si arus silakoken sanga mesera siakap patuh? Jelasken.

¹¹ Sanga mesera siakap patuh, ertotolah kita. Perban kita la sempurna, mon-mon mesera siakap patuh man Jahwe. Tapi arus terus kita erjuang gelah banci patuh man baNa. Nina penulis masmur man Dibata, “Bahanlah maka meriah ukurku [patuh] man baNdu.” (Msm. 51:14) Nina sekalak perintis biasa si gelarna Denise, “Sanga mesera kuakap matuhi salah sada perentah Jahwe, ertoto aku gelah ibereken Jahwe man bangku gegeh ngelakoken kai si benar.” Tek kita pasti ijawap Jahwe pertoton si bage.​—Luk. 11:9-13.

12. Menurut Epesus 5:1, kai si arus silakoken?

¹² Baca Epesus 5:1. Perban kita “anak-anak si ikelengi” Jahwe, siusahaken kel ngusih Ia. Siusih sifat-sifatNa bagi perkeleng, melias, janah nggit ngampuni. Sanga kalak si la nandai Dibata ngidah perbahanenta si mehuli, banci saja nggit dungna kalak e erlajar kerna Jahwe. (1 Pet. 2:12) Orang tua Kristen arus mehuli perbahanenna man anak-anakna bali bagi Jahwe. Adi orang tua ngusih Jahwe, banci saja anak-anakna pe nggit jadi teman Jahwe.

13. Kai si arus silakoken gelah banci pang?

¹³ Biasana, bangga kel anak-anak  man bapakna janah meriah ukurna nceritaken kerna bapakna man kalak si deban. Kita pe bangga kel man Bapakta si i surga eme Jahwe, janah itandai kalak si deban ka min ateta Ia. Seri perasanta ras Raja Daud, si ngataken, “Kupuji [Jahwe] sabap perbahanenNa.” (Msm. 34:3) Tapi, uga adi kita permela? Uga carana gelah kita pang? Banci kita pang adi siukuri uga riahna akap Jahwe sanga siceritaken kerna Ia janah adi siukuri ka kai saja gunana man kalak si deban perban erlajar kerna Jahwe. Banci iban Jahwe kita pang. Enggo isampatiNa kalak Kristen bas abad si pertama gelah pang, kita pe pasti ka isampatiNa.​—1 Tes. 2:2.

14. Engkai maka penting erberita si meriah?

¹⁴ Jahwe la mbeda-bedaken kalak, emaka meriah ukurNa adi keleng ateta kalak si deban, la soal uga latar belakangna. (Perb. 10:34, 35) Salah sada cara si mehulina ngkelengi kalak si deban eme alu mberitaken berita si meriah. (Mat. 28:19, 20) Hasilna, kalak si megiken kita banci reh ulina kegeluhenna gundari janah banci datna kegeluhen si rasa lalap.​—1 Tim. 4:16.

15-16. Kai saja si erbanca meriah ukurta?

¹⁵ Jahwe e Bapak si perkeleng, emaka ermeriah ukur min ateNa keluargaNa. (Jes. 65:14) Gundari, melala si banci erban kita ermeriah ukur, aminna pe lit masalahta. Misalna, tek kita keleng kel ate Bapakta si i surga nandangi kita. Lit ka pemetehta si benar kerna Kata Dibata. (Jer. 15:16) Janah kita jadi bagin arah keluarga si istimewa. Kerina si lit bas keluarga e ngkelengi Jahwe, nggit ndalanken perentahNa, janah sikeleng-kelengen.​—Msm. 106:4, 5.

¹⁶ Banci kita tetap ermeriah ukur perban tek kita maka reh ulina nge pagi geluhta. Siteh maka kentisik nari imasapken Jahwe me kerina kejahaten janah iban KerajanNa pagi doni enda jadi pardis. Kalak si mate pe ipekeke janah banci ia jumpa mulihi ras kalak si ikelengina. Enda arapen si luar biasa! (Joh. 5:28, 29) Seh kel riahna pagi ukurta! Janah si pentingna, tek kita maka kentisik nari, kerina si lit i surga ras i doni mereken kehamaten ras pujin man Bapakta si perkeleng janah nembah Ia saja.