1-2. Amu jé a aval avé Yéhôva a nga volô bia na bi bo bibu’a ya nda bôte jé?

YÉHÔVA a nga bo na bi bo bibu’a ya nda bôte jé. Ngo’o abime ma’a ete! Bibu’a ya nda bôte jangan bi nga ve bibiene ngumba be Yéhôva, a bia futi ndi nleme jab ntañe Yésus a nga ya’an. Nda bôte jangan ja nyiñe meva’ été. Bia bu’ubane mbamba ényiñe den, bi bili fe ndi nleme ya nyiñe nnôm éto Paradis si va nge ke yôp melu ma zu.

² Nye’an ñwô ô nga tindi Yéhôva na a nyoñe bia nda bôte jé, jam ete ki é nji be mone jam. (Jean 3:16) Bible a jô na bi nga “kuseban a tañ.” (1 Bec. 6:20) A zene ya ntañ, Yéhôva a nga volô bia na bi bi mbamba élat a nye. Bi bili beta mvome ya bi Ésaa a dañe bôte bese ya si a yôp. Bi nga yene sondô ya mvuse na teke ésaa mfe a ne ane Yéhôva.

3. Nsili ôvé bi ne ntindane ya sili biabebien éyoñ bia yene mvaé ése Yéhôva a bo bia? (Fombô’ô nka’ale ô ne nlô ajô na “ Ye Yéhôva a yene fo’o ma?”)

³ Ane ntili besam éziñe melu mvus, bia fe bi ne sili biabebiene na: “Jé ma ye ve Yéhôva amu mbamba be mam . . .  mese a nga bo ma?” (Bs. 116:12) Éyalan é ne na bi vo’o bulane Yéhôva mvaé ése a bo bia môs éziñ. Ve nye’ane wé wo tindi bia na bia fe bi nye’e nye. Nlômane Jean ô nga jô na: “Bia nye’e amu a nga taté nye’e bia.” (1 Jean 4:19) Aval avé bi ne liti Ésaa wongane na bia nye’e nye?

4. Amu jé bia yiane jeñe na bi subu Yéhôva bebé avale kalate Jacques 4:8 a jô?

⁴ Yéhôva a yi na bi bo bemvôé bé a na bi bo bi laan a nye. (Lañe’e Jacques 4:8.) A jô bia na bi ‘bo mbane ya ye’elan,’ a émien a ne fe nkômesane ya vô’ôlô bia éyoñ ése. (Bero. 12:12) A vo’o bo na bi kômbô laan a nye, éyoñ éte nje a jô bia na a yeme, nge ke na a ne nte’an. Bia fe bia vô’ôlô nye éyoñ bia lañe Mejô mé me ne Bible, a éyoñ bia lañe bekalate ba volô na bi kôme wô’ô mejô mete. Bia vô’ôlô fe nye éyoñ bia kôme baa alo bisulan. Fo’o ve ane mbamba minlañ mia yemete élat é ne zañ ésaa ba mon, élate bia be Yéhôva fe ja bo ngul éyoñ bi ne mbane ya laan a nye.

5. Jé bi ne bo asu na meye’elane mangan me bo édok?

⁵ Tame tebe mone jôm a fas aval ô wô’ô bo ô laan a Zambe. Yéhôva a yi na bi kôme yooé nye minlem miangan éyoñ bia ye’elane nye. (Bs. 62:8) Bia yiane sili biabebiene minsili mi: ‘Nge meye’elane me ne ane kalate môt a tili, ye Yéhôva a ne fo’o kôme yene na émam me ne édok, a na mam ma jô ma so ma nlem? Nge ke na, ye da yené ve ane ma ba’alane bifia môte mfe a nga tili?’ Bia yeme na wo nye’e Yéhôva nya abuii, a na wo kômbô ba’ale mbamba élat a nye. Ve asu na ô tôé nsôñan ôte, wo yiane bo ô laan a nye éyoñ ése. Kate’e nye mam môé. Kate’e fe nye meva’a wo bi ényiñ a minju’u wo tôbane mie. Te ko woñe ya sili nye mvolan.

6. Jé bia yiane bo asu na bi ba’ale élate jangan a Ésaa wongan a ne yôp?

⁶ Asu na bi ba’ale élate jangan a Yéhôva, bia yiane yeme mvaé a bo bia. Bi ne tyiñ a ntili besam a nga jô na: ‘A Yéhôva Zambe wom, bitua bi mam ô boya bi ne abui, a asimesane dôé e ne mfa’a wongan . . .  nge me nga ye kañete a kobô de, da dañ abim e ne ngule ya lañeban.’ (Bs. 40:5) Ve bi nji yiane yeme mvaé Yéhôva a bo bia ve nlem été, da yiane fe yené na bia ve nye akiba a zene ya minkobô miangan a mimboane miangan. A zen éte, bia ye liti na bia selan a bôte ya melu ma. Bôte ya mbia émo nyi ba ve’ele ki bisi mam mese Zambe a bo asu dap. Bible émien a bo’olô na bôte ya “melu ma su’ulan” ba ye bo bikalak. (2 Tim. 3:1, 2) Te bia ve’ele vu be môs éziñ!

7. Jé Yéhôva a yi na bi bo, a amu jé?

⁷ Bebiaé be nji yi na bone bab be siñan, ve na be nye’esan ane bone ya abume da. Aval ete fe, Yéhôva a yi na bebo bisaé bé bese be bo bemvôé. Nye’an ô ne zañe jangan ñwô ô ne ne ndeme ya na bi ne benya Bekristen. (Jean 13:35) Bia kañese mejô me ntili besam ma: “Tameka yenan, aka’a mvo’é a mvaé e né ane bobenyañe be too vôme wua a nleme wua!” (Bs. 133:1) Bia liti Yéhôva na bia nye’e nye éyoñ bia nye’e fe bobejañ a besita. (1 Jean 4:20) A ne nya édima jame na bi bo bibu’a ya nda bôte bobejañe be ne mbamba nlem a mvam!​—Beép. 4:32.

8. Kalate 1 Jean 5:3 a liti na jé ja yiane dañe tindi bia na bi bo Yéhôva mewôk?

⁸ Yéhôva a jô bongô na be bo bebiaé bab mewôk, ajô te a yi fe na bi bo nye mewôk. (Beép. 6:1) Da yiane na bi  bo Zambe mewôk amu nnye a ne Nté wongan, nnye fe a ve bia mam mese, a ne fe fek a dañe beésaa bese ya si nyô. Ve nge bia bo Yéhôva mewôk, a dañe dañ amu bia nye’e nye. (Lañe’e 1 Jean 5:3.) Akusa bo Yéhôva a yiane na bi bo nye mewôk, a ne étyi te yemete môte na a bo de. A nga ve môt ase ya be bia ngule ya nyoñe mintyi’ane mié, ajô te a ne mevak éyoñe nye’ane ñwô wo tindi bia na bi bo nye mewôk.

9-10. Amu jé é ne mfi na bi yem memvinda me Yéhôva a bo nye mewôk?

⁹ Mbiaé éziñ a nji yi na mbia jam a kui mone wé. Ajô te bebiaé be wô’ô telé ngume nkobe metiñe na be ba’ale bone bap. Éyoñ bongô ba tôñe metiñe mete, ba liti na be too bebiaé bab ndi, a na ba semé be. Jôm ete nje é ne mfi na bia fe bi kôme yeme memvinda me Yéhôva a tôñe me. Éyoñe bia bo de, bia liti Yéhôva na bia nye’e nye a na bia semé nye, a biabebiene fe bia bi abui bibotan. (És. 48:17, 18) Ve bôte ba biasé metiñe me Yéhôva be wô’ô su’ulane tôbane “Nge me nga yem.”​—Beg. 6:7, 8.

¹⁰ Éyoñe bia tôñe zene Yéhôva a liti bia, bia ba’ale nyule jangan, nleme wongan, a mbamba élate bia be nye bi bili. Yéhôva nnye a yem mam me ne soo bia benya mevak. Aurore a nyiñ États-Unis, a jô na: “Ma kôme yeme na, éyoñ bia bo Yéhôva mewôk, mam ma wulu bia nya mvo’é ényiñ.” A bele. Womiene  tame ve’ele simesane bibotane wo bu’ubane bie amu wo semé memvinda me Yéhôva.

11. Meye’elane ma volô bia na bi bo jé?

¹¹ Meye’elane ma volô bia na bi bo Yéhôva mewôk to’o éyoñ nalé a ne ayaé. Da ye ke bo tyi’ibi na bi bo Yéhôva mewô’ éyoñ ése, ve bia yiane bo mbane ya wosan abé é ne bia menyul été. Ntili besam a nga ye’elane Yéhôva na: “Futi’i nkômbane ya bo wo mewô’ô nleme wom été.” (Bs. 51:12, nwt-F) Dénise a ne nkpwa’a mefan, a jô na: “Ma ye’elane Yéhôva na a volô ma éyoñ ése ma yene na ma kate tôñ atiñe dé éziñ.” Bi ne tabe ndi na Yéhôva a vo’o bo te yalan avale meye’elan ete.​—Luc 11:9-13.

12. Kalate Beéphésien 5:1 a liti na bia yiane bo jé?

¹² Lañe’e Beéphésien 5:1. Aval ane ‘bone ya nye’an,’ bia jeñ a ngul ése na bi vu Ésaa wongane Yéhôva. Bia jeñe na bi bi fulu nye’an, na bi bo mbamba nlem ane nye, a na bi yeme jamé bôte bevok. Éyoñe bôte be nji yeme Yéhôva ba yene mbamba ntabane wongan, be ne bo ntindane ya tu’a kômbô yeme nye. (1 P. 2:12) Bebiaé ba yiane vu Yéhôva nté ba yale bone bap. Éyoñ ba bo de, nalé a ne tindi bone bab na be kômbô bo bemvôé be Yéhôva.

13. Jé é ne volô bia na bi bo ayo’o nlem?

¹³ Bi wô’ô yene bobe bongô be too beésaa  bap mebun, be nye’e fe be wumulu be. Aval ete fe, bi too Ésaa wongan a ne yôp benya mebunu, a bia yi na bôte bese be yeme nye. Bia wô’ôtan ane Njôô bôte David, nnye a nga tili na: “Nleme wom w’aye bo mebun be Yéhôva.” (Bs. 34:2) Nge bi ne ki awusonô? Jé é ne ve bia ayo’o nlem? Nge bi ve’ele simesan abime mvaé Yéhôva a ne wôk éyoñ bia kobô ajô dé, a abim avé nkañete ô ne volô bôte bevok, nalé a ye volô bia na bi bo ayo’o nlem. Yéhôva a ye ve bia abim ayo’o nlem da sili bia. A nga bo de ntete mimbu ôsu, a ye fe volô bia den.​—1 Bet. 2:2.

14. Amu jé é ne mfi na bi kañete bôte Mejô me Zambe?

¹⁴ Yéhôva a fombô ki bôte mesu, nne fe a yi na bi nye’e bôte bese nalé, teke bo ôbangam. (Mam. 10:34, 35) Mbamba zene ya liti bôte nye’an a ne na bi kañete be Mejô me Zambe. (Mt. 28:19, 20) Mfi ôvé ésaé nkañete é ne bo asu bôte ba vô’ôlô bia? Abui mam e ne tyendé binyiñe biap, Mejô me Zambe me ne fe ve be ndi nleme ya nyiñe nnôm éto melu ma zu.​—1 Tim. 4:16.

15-16. Mam mevé ma bo na bi vak?

¹⁵ Yéhôva a ne mbamba Ésaa, jôm ete nje a yi na nda bôte jé é nyiñe meva’ été. (És. 65:14) To’o bia tôbane minjuk, bi bili abui beamu ya vak. Jam ôsu, bia yeme na Ésaa wongan a nye’e bia abui. Bia yeme fe benya mejôô be ne Bible nya ñyemane. (Jr. 15:16) Bi bili fe ngum avale nda bôt, bibu’a ya été bia nye’esan, bia nye’e fe Yéhôva a mevinda mé.​—Bs. 106:4, 5.

¹⁶ Bi ne ba’ale ava’a dangan amu bia yeme na ényiñe ja ye tu’a bo mvaé melu ma zu. Bia yeme na Yéhôva a mbeme mane zu vaa mbia be bôte bese si, a telé Éjôé jé, nje éte ja ye bo na si é beta bo Paradis. Bia yeme fe na bôte bangan be nga mane wu ba ye beta wômô. (Jean 5:28, 29) Môs ôte ô tame ke kui! Ve jam bia dañe yange é ne éyoñe bone be Zambe bese, ba be ne yôp a ba be ne si, ba ye lu’u Yéhôva tyiñe jia, a ve nye ékaña’a ja yiane nye.