1, 2. Ka uagu líchiga Heowá chansi woun lun hádangiñe wamá liduheñu, ani ida liña ladügüni?

ADÜGAALI Heowá aban lubuidun agunbirahani woun: busenti lun hádangiñe wamá liduheñu. Hadan liduheñu añahein gürigia ha derege hamaali habagari lun ani afiñetiña luagu lani Liráü sákürifisiu. Ítara waña kei aban iduheñu ha gúndaatiña. Guentó, gasuunihali wabagari ani gúndaatiwa lau hemenigi wamá lun wawinwandun lun sun dan, sielu lan yebe o ya ubouagu lidan Paraísu.

² Ladüga línsiñehabu, adügaali Heowá aban óunwenbu sákürifisiu lun líchugun chansi woun lun hádangiñe wamá liduheñu (Huan 3:16). Ariñagatu Bíbülia “seru” lan webegi lun Bungiu (1 Ko. 6:20). Seremei lebegi esefuruni, adügati Bungiu lun gayara lan gamadagua wamá luma. Ibihatiwa aban lubuidun chansi lun wagúarun lun Gürigia le súdinitimabei lidan sun ubóu, Wáguchi. Ani kei warihini lidan arütíkulu le lubaabei le, ligía Úguchili le buídutimabei le gayaraabei Gáguchi wamani.

3. Ka álügüdahani gayaraabei wadügüni wóuniwagua? (Ariha huméi rekuáduru “ Téniti san Heowá nun?”).

³ Háfuga wadügüni ligiaméme álügüdahani le ladügübei aban abürühati Sálumu, le ariñagubei: “Ida lubá san nafayeiruni Nabureme luagu sun buiti le adüga láalibei nun?” (Sal. 116:12). Le linarün katei, úati ni kata gayaraati wadügüni lun wafayeiruni Wáguchi le siélubei. Íbini ítara, ínchaha lumutiwa línsiñehabu lun giñe hínsiñebei lan woun. Abürühati apostolu Huan: “Hínsiñeti Bungiu woun ladüga wínsiñedun lun furumiñe” (1 Huan 4:19). Ligíati, ida liña warufuduni hínsiñe lan Wáguchi Bungiu woun?

4. Según Santiagu 4:8, Ka uagu mosu lubéi wáfaagun lun wayarafadun lun Heowá?

⁴ Busenti Heowá lun wayarafadun lun luma lun gayanuhadi wamá luma (aliiha huméi Santiagu 4:8). Amuriahati wama lun  wafurieidun lun súnwandan, ani aranseñu liña lun laganbuniwa súnwandan (Rom. 12:12). Úati beresegu lan, mabuchadun ligía luagu lun laganbuniwa. Ida líñati waganbuni Heowá? Aban lídangiñe, lau waliihanu Bíbülia, to Lererun, tuma burí agumeiraguagüdüni to íderagubadiwa lun gunfuranda wamanu Bíbülia. Aganba wamuti giñe lau wíchugun arigei lun le ariñawagúbei lidan adamuridaguni. Ítara kei adüga lan gayanuhadi lan irahü luma lúguchi lun buidu lan hamadagua, adügati giñe gayanuhadi wamá luma Heowá súnwandan lun yarafañu wamá lun.

5. Ida luba wabuiduragüdüni ligaburi wafurieidun?

⁵ Ida liña san ligaburi wayanuhan luma Bungiu? Busenti lun wadaarunu wanigi dan le wafurieidun lun (Sal. 62:8). Ligía buidu lubéi lun wálügüdagun woungua: “Ítara liña san nafurieidun kei aban uganu le naganbubei ani ábaya nariñaguni? O ítara liña kei burí gárada to nabürühaboun lau núhabu guánarügü?”. Chóuruti hínsiñe lan Heowá woun sunsuinagubei ani busentiwa lun yarafañu wamá lun. Lun lira, mosu gabügürügua lan wayanuhan luma. Dará wamóun wanigi lun, ayanuha wamá luma luagu ugundani le wasandirubei luma luagu wadiheri. Chouru waméi gayara lan wáluahani lídehan.

6. Ka lunbei wadügüni lun yarafañu wamá lun Heowá?

⁶ Lun wayarafadun lun Heowá, mosu giñe geteingiradi wamá. Úaratiwa luma dimurei le lariñagubei abürühati sálumu, le ariñagubei: “Nabureme, Nubungiute, gíbeti burí katei buíduburiti le adüga báalibei luma lubuidun aritaguni le burí bídanbei woun. Úati ni kata bibe! Busentina hamuga nadimurehan luagu burí katei ligía, gama lumoun gíbeyati lun niyaraabei lan abahüdagua” (Sal. 40:5). Íbini ítara, úati buídurügü lan wasandirun eteingiruni, mosu giñe warufuduni weteingiradi lun Heowá lau le wariñagubei luma lau le wadügübei. Anihán katei le adügübei lun mítaran wamá kei gürigia ha uguñebaña weyu. Wawinwanduña lidan aban ubóu le ñein lubéi marufudun hamá gürigia eteingiruni luagu sun le adüga láalibei Bungiu hawagu. Le linarün aban katei, ligía aban lídangiñe seini le arufudubalin wawinwanduña lan lidan “lagumuhóun dan” le ñein lubéi metengiradihaña lan gürigia (2 Tim. 3:1, 2). Maweiyasun wamá ígira lun láfadarun igaburi le wawagu!

7. Ka labusenrunbei Heowá lun wadügüni, ani ka uagu?

⁷ Mabuseruntiña agübürigu lun herederun hasaanigu ageindagua, lubaragiñe lira, busentiña lun buidu lan hanaagun houngua. Ligiaméme labusenrunbei Heowá hámagiñe lisaanigu. Le linarün katei, adügati ínsiñeni le wádanbei lun wasubudirúniwa kei kristiánugu inarünitiña (Huan 13:35). Abürühati aban lubúein Bungiu: “Ariha humá ida liña lan lubuidun lun haganóun íbirigu lidan aban hámagua!” (Sal. 133:1). Ma inarüni úaraguatiwa lan luma le lariñagubei abürühati sálumu le? Dan le hínsiñe hamá wábirigu woun, warufuduñein giñe lun Heowá hínsiñe lan woun (1 Huan 4:20). Wéiriti lubuidun lau hádangiñe wamá íbirigu ha ítarabaña woun kei iduheñu ha ‘buídubei hanaagun hámagua’ ani ‘gudemehabu hagía hámagua’ (Efe. 4:32).

8. Kei lariñaguni 1 Huan 5:3, kátima adügübei lun gaganbadi wamá lun Heowá?

⁸ Agurabati Heowá lun gaganbadibaña lan isaanigu houn hagübürigu, agurabati giñe lun gaganbadi wamá lun (Efe. 6:1). Gadünati lun gaganbadi wamá lun ladüga ligía Adügübaliwa, ruti ibagari woun ani ligía Úguchili le chútimabei aau. Lau sun lira, létima adügübei lun gaganbadi wamá lun, ladüga línsiñe woun (aliiha huméi 1 Huan 5:3). Inarüni anihein lan saragu resun lun gaganbadi wamá lun, íbini ítara, mafosurun lumutiwa. Ruti chansi woun lun wanúadirun, ani gúndaati dan le wanúadirun gaganbadibadiwa lan lun ladüga línsiñe woun.

9, 10. Ka uagu súdini lubéi lun wasubudiruni lilurudun Bungiu ani winwan wameime?

 ⁹ Busentiña agübürigu lun buidu lan lidin houn hasaanigu. Ligía híchugubei lúrudu houn luáguti laruman ibagari. Isaanigu ha gaganbadibaña lun burí lúrudu ligía, arufudatiña afiñe hamá hawagu hagübürigu ani inebetiña giñe houn. Ítarameme, súdinitimati lun wasubudiruni lilurudun Wáguchi le siélubei luáguti laruman ibagari luma lun wawinwanduni. Ítara liña warufuduni lun Heowá hínsiñe lan ani inebe ligía woun. Dan le wadügüni lira, buiti lidin woun lidan wabagari (Isa. 48:17, 18). Luéigiñe le aban oubaü, gürigia ha maganbadibaña lun Bungiu luma lun lilurudun adügatiña dañu hóuniwagua (Gal. 6:7, 8).

¹⁰ Dan le wawinwandun kei le aubei lagundaara Heowá adügati lun wóunigiruni dandu wátuadi, ligaburi wasandiragun woungua luma wamadagua luma. Subudi lumuti kátima lan buídutimabei woun. Ariñagatu aban íbiri to awinwanduboun Meriga, gíritu Aurora: “Subudi numuti buídutima lan wabagari dan le gaganbadi wamá lun Heowá”. Inarüni katei le. Álügüdagua wamá woungua: “Ka buiti ibiha náalibei lau nafalaruni lubuidun ladundehan Heowá?”.

11. Ida liña líderaguniwa furíei?

¹¹ Íderagua lumutiwa furíei lun gaganbadi wamá íbini anhein hénrengu lubéi woun. Kei gafigoun wabéi sun wagía, anihein dan mosu lan wáfaagun lun gaganbadi wamá lun Heowá. Gama lumoun mosu wasigirun áfaagua lun méiguadun wamá lidoun figóu. Ayumuraguati aban ábürühati sálumu lun Bungiu: “Ruba gunfurandaü nun lun nadügüni le barufudahabei; busentina nafalaruni tau sun nanigi!” (Sal. 119:34). Ariñagatu  aba prekursora to apurichihaboun 70 oura luagu hati, gíritu Denise: “Dan le gürewei lan nun lun gaganbadi nan lun somu lugumadin Heowá, aban namuriahan erei luma lun líderagunina adügei le buídubei”. Chouru waméi, lóunabubei lan Heowá libe burí furíei le (Luk. 11:9-13).

12. Ka lariñagubei Éfesuna 5:1 woun lun wadügüni?

¹² (Aliiha huméi Éfesuna 5:1). Kei “lirahüñü [wa]béi Bungiu ha hínsiñetiña lun”, lunti wadügüni sun wayaraati lun wáyeihani. Áyeiha wamuti ligaburi lau hínsiñehabu wamá, gamadoun wamá luma lau feruduna wamaniña amu. Dan le harihini gürigia ha ibidiñeti Bungiu houn lubuidun ligaburi wóuserun, gayaraabei línchahaniña katei le lun busén hamá hasubudirun luagu (1 Fe. 2:12). Garichatiña agübürigu kristiánugu lun hóuseruniña hasaanigu ítara kei lóuseruniwa Heowá. Anhein hadüga ítara, másiñati busenbaña lan hasaanigu lun gamadagua hamá luma Wáguchi le hínsiñehabubei.

13. Kaba íderaguawa lun mígiraguagüdün wamá woungua lun haburi luma lun wayanuhan luagu Heowá houn amu?

¹³ Liibe-agei dan, apantahatiña irahüñü lau háguchi ani gúndaatiña lau hayanuhan luagu. Ítarameme, apantahatiwa lau Wáguchi le siélubei ani busentiwa lun hasubudiruni amu. Sandiguatiwa woungua kei urúei Dawidi, le abürühabei: “Pántatina lau Aburemei; aganba huméi” (Sal. 34:2). Ánheinti haburi wabéi? Ka gayaraabei líderaguniwa lun ganigi wamá? Líderagubadiwa wasaminarun luagu ugundani le lasandirubei Heowá luma luagu  saragu buiti le habihibei amu lau hasubudiruni. Líchugubei Heowá ganigi le wemegeirubei woun. Ítara kei líderaguniña wíbirigu ha lánina furumiñeti sígulu, ítara luba giñe líderaguniwa (1 Tesa. 2:2).

14. Ka uagu súdini lubéi lun wídehan lidan dasi lánina hadügǘn disipulugu?

¹⁴ Úati himei lan Heowá aban gürigia luéi le aban, ani wéiriti giñe lugundan dan le larihiniwa arufuda ínsiñeni houn amu, meberesenga halíana hamá (Adü. 10:34, 35). Aban igaburi buídutimati le ídanbei warufudei hínsiñe hamá gürigia woun, lau wapurichihani uganu buiti (Mat. 28:19, 20). Ka gayaraabei libihíniwa lau dasi le? Gayaraabei gunda lan habagari ha aganbubaliwa guentó ani hemenigi hagíame hawinwandun lun súnwandan ámuñegü (1 Tim. 4:16).

15, 16. Ka resun wámabei lun gunda wamá?

¹⁵ Aban Úguchili hínsiñehabuti Heowá ani busenti lun gúndaañu hamá liduheñu (Isa. 65:14). Íbini wásügürün lídangiñe lénrengunga, anihein saragu resun wama lun gúndaañu wamá guentó. Kei hénpulu, chouru wamuti hínsiñe wamá sunsuinagubei lun Wáguchi le siélubei. Subudi wamuti inarüni le tídanbei Bíbülia, to Lererun (Her. 15:16). Ani hádangiñetiwa iduheñu ha úatiña kei hagía ubouagu, le ñein habéi gürigia ha hínsiñeti Heowá luma lilurudun houn ani hínsiñegua hagía hámagua (Sal. 106:4, 5).

¹⁶ Gayaraati giñe gunda wamá ladüga chouru wamani buídutimabei lan ibagari ámuñegü. Subudi wamuti málühali lan Heowá agumucha hau gürigia wuribatiña ani seremei lun Larúeiha ladügüba lun ábanbei lan Paraísu Ubóu. Lanwoun lira, anihein aban lubuidun emenigini wama luagu hásaaruba lan ha hilaañabaña lídangiñe óunweni lunya hóundaragun hama haduheñu (Huan 5:28, 29). Mame lubuidun katei le! Ani létima súdinitimabei chouru wamani málühali lan dan, dandu sielu kei ubouagu, lun lichugúniwa uéiriguni, alawahóuni luma áhuduraguni le yuubei lun Wáguchi le hínsiñehabubei.